Proverbs 2

Lao Bible 2012 (ພຣະຄຳພີສັກສິ)

← Chapter 1 Jump to: Chapter 3 →

1ລູກເອີຍ ຈົ່ງຮໍ່າຮຽນເອົາສິ່ງທີ່ພໍ່ບອກສອນ ແລະຢ່າລືມສິ່ງທີ່ພໍ່ບອກໃຫ້ປະພຶດ.

2ຈົ່ງໃຊ້ຫູຟັງສິ່ງທີ່ມີປັນຍາ ແລະຈົ່ງໃສ່ໃຈປະຕິບັດຕາມຄວາມເຂົ້າໃຈໃນປັນຍານັ້ນ.

3ໃຫ້ສະແຫວງຫາຄວາມຮູ້ ແລະວິງວອນຂໍຄວາມເຂົ້າໃຈ.

4ຈົ່ງຊອກຫາປັນຍາດັ່ງເຈົ້າຊອກຫາເງິນ ຫລືຂຸມຊັບທີ່ຖືກເຊື່ອງໄວ້.

5ຖ້າເຮັດເຊັ່ນນີ້ ເຈົ້າກໍຈະຮູ້ຈັກຄວາມຢຳເກງພຣະເຈົ້າຢາເວ ແລະເຈົ້າຈະບັນລຸຜົນສຳເລັດໃນການຮຽນຮູ້ເຖິງພຣະເຈົ້າ.

6ແມ່ນພຣະເຈົ້າຢາເວທີ່ເປັນຜູ້ໂຜດໃຫ້ປັນຍາ, ຄວາມຮູ້ ແລະຄວາມເຂົ້າໃຈແມ່ນມາຈາກພຣະອົງ.

7ພຣະອົງຊົງສະສົມສະຕິປັນຍາໄວ້ໃຫ້ຄົນທ່ຽງທຳ ພຣະເຈົ້າຊົງເປັນໂລ້ໃຫ້ແກ່ຜູ້ທີ່ດຳເນີນໃນຄວາມສັດຊື່.

8ພຣະອົງຊົງປົກປ້ອງທາງຂອງຄວາມຍຸດຕິທຳ ແລະເຝົ້າຮັກສາທາງຂອງຄົນທີ່ເຊື່ອໃນພຣະອົງ.

9ຖ້າເຈົ້າເຊື່ອຟັງເຮົາ ເຈົ້າກໍຈະຮູ້ຈັກສິ່ງທີ່ຖືກຕ້ອງ ສິ່ງທີ່ເປັນທຳແລະສິ່ງທີ່ດີງາມ, ເຈົ້າຈະເຂົ້າໃຈແນວທາງອັນດີງາມທຸກຢ່າງ.

10ເຈົ້າຈະກາຍເປັນຄົນມີປັນຍາ ແລະຄວາມຮູ້ຂອງເຈົ້າກໍຈະໃຫ້ເຈົ້າມີຄວາມສຸກສະບາຍໃຈ.

11ຄວາມເຂົ້າໃຈອັນແທ້ຈິງກັບຄວາມສະຫລາດຈະປົກປ້ອງເຈົ້າ

12ແລະຈະກີດກັ້ນເຈົ້າໄວ້ບໍ່ໃຫ້ປະພຶດຜິດ ສິ່ງເຫຼົ່ານີ້ຈະຮັກສາເຈົ້າໄວ້ໃຫ້ພົ້ນຈາກຄົນທີ່ມັກສ້າງຄວາມເດືອດຮ້ອນທາງວາຈາຄື:

13ຄົນທີ່ໄດ້ປະຖິ້ມຊີວິດອັນຊອບທຳ ແລະໄປດຳເນີນຊີວິດໃນຄວາມມືດມົນແຫ່ງບາບ,

14ຄົນທີ່ພົບຄວາມສະໜຸກໃນທາງປະພຶດຊົ່ວ ແລະຄົນທີ່ພໍອົກພໍໃຈໃນການຊົ່ວຮ້າຍນັ້ນ,

15ຄືຄົນທີ່ທັງຊີວິດຂອງເຂົາລ້ວນແຕ່ຄົດໂກງທັງສິ້ນ.

16ເຈົ້າຈະສາມາດປ້ອງກັນຕົວໄດ້ຈາກຍິງຊົ່ວແຜດສະຫຍາ ທີ່ຊອກຫາລໍ້ລວງເຈົ້າໃຫ້ເຮັດຜິດດ້ວຍຄຳເວົ້າຈາອັນຮຽບຮ້ອຍ

17ເປັນຍິງທີ່ບໍ່ສັດຊື່ຕໍ່ຜົວຄົນທຳອິດຂອງຕົນ ແລະລືມໄລຄຳສາບານອັນສັກສິດທີ່ຕົນເຄີຍມີ.

18ຖ້າເຈົ້າໄປບ່ອນນາງຢູ່ອາໄສ ກໍເທົ່າກັບເຈົ້າໄດ້ເດີນໄປສູ່ຄວາມຕາຍເສຍແລ້ວ.

19ບໍ່ມີໃຜທີ່ໄປຫານາງແລ້ວ ເຄີຍກັບຄືນມາ ລາວບໍ່ໄດ້ຄືນມາສູ່ຫົນທາງແຫ່ງຊີວິດອີກຈັກເທື່ອ.

20ສະນັ້ນ ເຈົ້າຈຶ່ງຕ້ອງເອົາແບບຢ່າງຂອງຄົນຜູ້ດີ ແລະດຳເນີນຊີວິດຂອງຕົນຕາມທາງຊອບທຳ.

21ເພາະຄົນຊອບທຳຈະໄດ້ຢູ່ໃນດິນແດນ ແລະຄົນສັດຊື່ຄົງຢູ່ໃນນັ້ນ.

22ແຕ່ພຣະເຈົ້າຈະຕັດຄົນຊົ່ວຮ້າຍອອກໄປຈາກດິນແດນ ແລະຄົນຄົດໂກງຈະຖືກຖອນຮາກອອກຈາກແຜ່ນດິນນັ້ນ.

← Chapter 1 Jump to: Chapter 3 →