Deuteronomy 3

Malagasy MRV 2011 (La Bible en Malgache)

← Chapter 2 Jump to: Chapter 4 →

1Dia niverina isika avy eo ka niakatra tamin’ny lalana mankany Basana; ary tonga hiady amintsika tao Edrehy i Oga, mpanjakan’i Basana, mbamin’ny vahoakany rehetra.

2Ary hoy NY TOMPO tamiko: Aza matahotra azy ianao fa efa natolotro eo an-tananao izy mbamin’ny vahoakany rehetra sy ny taniny, ary araka izay nataonao tamin’i Sihona, mpanjakan’ny Amorita, izay nonina tao Hesbona, no hataonao aminy.

3Natolotry NY TOMPO Andriamanitsika teo an-tanantsika koa i Oga, mpanjakan’i Basana, sy ny vahoakany rehetra; dia nandresy azy isika mandra-paha tsy nisy niangana azy na dia iray akory aza.

4Dia azontsika ny tanànany rehetra tamin’izany andro izany ary tsy nisy tanàna izay tsy nalaintsika taminy, dia tanàna enimpolo, ny tany Argoba rehetra, izay fanjakan’i Oga tany Basana.

5Samy nisy manda avo sy vavahady ary hidiny hahamafy azy avy ireo tanàna rehetra ireo, afa-tsy ny vohitra madinika maromaro.

6Dia nataontsika ho zavatra voaozona ireny, tahaka izay efa nataontsika tamin’i Sihona, mpanjakan’i Hesbona; naringana ny mponina rehetra isan-tanàna mbamin’ny zaza amam-behivavy.

7Ny biby fiompy rehetra sy ny fananana tamin’ireo tanàna ireo dia nataontsika babo ho antsika.

8Tamin’izany andro izany dia nalaintsika tamin’ny mpanjaka roa izay an’ny Amorita ny tany any andafin’i Jordana, hatreo amin’ny lohasahan-driaka Arnona ka hatrany amin’ny tendrombohitra Hermona,

9izay nantsoin’ny Sidoniana hoe Siriona; nefa ny Amorita kosa dia nilaza azy hoe Senira,

10dia ny tanàna rehetra amin’ny tany lemaka sy i Gileada rehetra ary i Basana rehetra hatrany Saleka sy Edrehy, dia ny tanàna amin’ny fanjakan’i Oga tany Basana.

11Fa i Oga, mpanjakan’i Basana, irery no sisa velona tamin’ny Refaìta. Indro, farafara vy ny farafarany; tsy ao Raba an’ny taranak’i Amona va izany? Sivy hakiho* ny halavany ary efatra hakiho ny sakany, refy hakihon’ny lehilahy io noraisina io.

12Io tany io dia azontsika tamin’izany andro izany; hatrany Aroera izay eo amoron’ny lohasahan-driaka Arnona sy ny antsasaky ny tany havoana any Gileada ary ny tanàna eo, dia nomeko ny Robenita sy ny Gadita.

13Ary ny sisa tamin’i Gileada sy ny tanin’i Basana rehetra, izay fanjakan’i Oga, dia nomeko ny antsasaky ny fokon’i Manase, dia ny tany Argoba rehetra, dia i Basana rehetra izay atao hoe Tanin’ny Refaìta.

14I Jaira, zanak’i Manase, no nahazo ny tany Argoba rehetra, hatramin’ny faritanin’ny Gesorita sy ny Makatita; ary ny anaran’izany Basana izany dia nataony hoe Havota-Jaìra, araka ny anarany ihany, mandraka androany.

15Ary nomeko an’i Makira i Gileada.

16Ny Robenita sy ny Gadita dia nomeko ny hatrany Gileada ka hatrany amin’ny lohasahan-driaka Arnona, dia ny antsasaky ny lohasaha sy ny sisintany, hatrany amin’ny moron’ny lohasahan-driaka Jaboka izay sisintanin’ny taranak’i Amona,

17ary ny tany ngazana koa sy i Jordana ary ny faritany hatrany Kinereta ka hatrany amin’ny ranomasin’ny tany ngazana, dia ny Ranomasintsira, eo an-tsisin’i Pisga, ao atsinanany.

18Nandidy anareo aho tamin’izany andro izany hoe: NY TOMPO Andriamanitrareo efa nanome anareo ity tany ity ho lovanareo. Andeha mita eo alohan’ny Zanak’Israely rahalahinareo ianareo lehilahy mahery rehetra izay samy efa voaomana hiady.

19Fa ny vadinareo sy ny zanakareo madinika ary ny ombinareo, izay fantatro fa anananareo betsaka, dia hitoetra ao an-tanànanareo izay nomeko anareo,

20mandra-panomen’NY TOMPO fitsaharana ny rahalahinareo tahaka ny anareo ka holovany koa ny tany izay nomen’NY TOMPO Andriamanitrareo azy any andafin’i Jordana; vita izay vao hiverina ianareo, samy ho any amin’ny taniny avy, izay nomeko anareo.

21Dia nandidy an’i Josoa aho tamin’izany andro izany hoe: Ny masonao dia efa nahita izay rehetra nataon’NY TOMPO Andriamanitrareo tamin’ireo mpanjaka roa lahy ireo; dia toy izany no hataon’NY TOMPO amin’ny fanjakana rehetra izay halehanao.

22Aza matahotra azy ianareo; fa NY TOMPO Andriamanitrareo no hiady ho anareo.

23Dia nitaraina tamin’NY TOMPO aho tamin’izany andro izany hoe:

24Andriamanitra TOMPO ô, Ianao vao naneho tamin’ny mpanomponao ny fahalehibiazanao sy ny tananao mahery; fa aiza no misy andriamanitra, na any an-danitra na atỳ an-tany, izay mahavita tahaka ny asanao sy ny herinao?

25Mba avelao aho hita ka hahita ny tany soa izay any andafin’i Jordana, dia ilay be tendrombohitra tsara sy i Libanona.

26Fa tezitra tamiko noho ny aminareo NY TOMPO ka tsy nihaino ahy. Hoy Izy tamiko: Aoka izay fa aza miteny Amiko intsony ny amin’izany zavatra izany ianao.

27Miakara eo an-tampon’i Pisga ianao, ary atopazy miankandrefana sy mianavaratra ary mianatsimo sy miantsinanana ny masonao, ary aoka hijery ny masonao; fa tsy hita izany Jordana izany ianao;

28fa mandidia an’i Josoa, dia mampahereza sy mampahatanjaha azy; fa izy no handeha hita eo alohan’ity firenena ity, ary izy no hampandova azy ny tany izay ho hitanao.

29Dia nitoetra tany an-dohasaha tandrifin’i Bety-Peora isika.

← Chapter 2 Jump to: Chapter 4 →