Deuteronomy 6

Malagasy MRV 2011 (La Bible en Malgache)

← Chapter 5 Jump to: Chapter 7 →

1Ary izao ny lalàna, dia ny didy sy ny fitsipika, izay nandidian’NY TOMPO Andriamanitrareo hampianarina anareo mba harahinareo any amin’ny tany izay alehanareo holovana,

2mba hatahoranao NY TOMPO Andriamanitrao, hitandremanao ny lalànany rehetra sy ny didiny izay omeko anao, dia ianao sy ny zanakao ary ny zafinao, amin’ny andro rehetra hiainanao, mba ho maro andro ianao.

3Koa mihainoa, ry Israely, ary mitandrema amin’ny fanarahana izany, mba hahita soa ianao ka hitombo indrindra, araka izay nolazain’NY TOMPO, Andriamanitry ny razanao taminao, rahatrizay any amin’ny tany tondra-dronono sy tantely.

4Mihainoa ry Israely: NY TOMPO Andriamanitsika dia TOMPO iray ihany.

5Koa tiava NY TOMPO Andriamanitrao amin’ny fonao manontolo sy ny fanahinao manontolo ary ny herinao manontolo.

6Aoka ho ao am-ponao izao didy omeko anao anio izao,

7ary ampianaro tsara ny zanakao izany ka resaho aminy mandrakariva na mipetraka ao an-tranonao ianao, na mandeha eny an-dalana, na mandry, na mifoha;

8ary fehezo ho famantarana eo amin’ny tananao ireny, ary aoka ho fehy fampahatsiarovana eo ambonin’ny handrinao,

9ary soraty eo amin’ny tolam-baravaran’ny tranonao sy eo amin’ny vavahadinao.

10Rehefa entin’NY TOMPO Andriamanitrao ho any amin’ny tany izay nianianany tamin’i Abrahama sy Isaka ary i Jakoba razanao homena anao ianao, dia tany misy tanàna lehibe sady tsara izay tsy nataonao,

11trano feno zava-tsoa rehetra izay tsy ianao no nahafeno azy; lavaka famorian-drano nohadiana eo amin’ny vato izay tsy nolavahanao; tany voavoly voaloboka sy hazo oliva izay tsy nambolenao; ary rehefa mihinana ianao ka voky

12dia mitandrema fandrao hadinonao NY TOMPO izay nitondra anao nivoaka avy tany amin’ny tany Ejipta, tany amin’ny trano nanandevozana.

13Matahora NY TOMPO Andriamanitrao ianao ka manompoa Azy ary aoka ny anarany no hianiananao.

14Aza manaraka izay andriamanitra hafa amin’ireny andriamanitry ny firenena manodidina anareo ireny

15fa Andriamanitra saro-piaro aminao NY TOMPO Andriamanitrao, fandrao hirehitra aminao ny fahatezeran’NY TOMPO Andriamanitrao ka hofongorany tsy ho eo ambonin’ny tany ianao.

16Aza maka fanahy NY TOMPO Andriamanitrareo ianareo, tahaka ilay nakanareo fanahy Azy tao Masa.

17Tandremo tsara ny didin’NY TOMPO Andriamanitrareo sy ny teny vavolombelony ary ny lalànany, izay efa nomeny anao.

18Ataovy izay mahitsy sady tsara eo imason’NY TOMPO mba hahita soa ianao ka hiditra handova ny tany soa izay nianianan’NY TOMPO tamin’ny razanao homena azy,

19sady mba horoahiny tsy ho eo anoloanao ny fahavalonao rehetra, araka izay nolazain’NY TOMPO.

20Raha manontany anao ny zanakao amin’ny andro ho avy hoe: Manao ahoana moa ny teny vavolombelona sy ny didy ary ny fitsipika, izay nandidian’NY TOMPO Andriamanitsika hotandremanareo?

21Dia holazainao aminy hoe: Andevon’i Farao tany Ejipta isika ary tanana mahery no nitondran’NY TOMPO antsika niala avy tany Ejipta.

22Ary NY TOMPO nanao famantarana sy fahagagana lehibe sady mandoza tamin’ny Ejiptiana sy i Farao ary ny ankohonany rehetra teo imasontsika.

23Dia nitondra antsika niala avy tany Izy mba hahafahany mampiditra antsika sy manome antsika ny tany izay nianianany tamin’ny razantsika homena azy.

24Ary NY TOMPO nandidy antsika mba hanaraka ireo didy rehetra ireo sy hatahotra NY TOMPO Andriamanitsika mba hahita soa mandrakariva isika ary ho velona tahaka ny amin’izao anio izao.

25Ho fahamarinantsika ny mitandrina hanaraka izany didy rehetra izany eo anatrehan’NY TOMPO Andriamanitsika, araka izay nandidiany antsika.

← Chapter 5 Jump to: Chapter 7 →