Judges 1

Shan

Jump to: Chapter 2 →

1လိုၼ်းဢၼ် ယေႃးသူႉ ႁွတ်ႈဢၼိၵ်ႈၸႃႉယဝ်ႉၼၼ်ႉ၊ ၵူၼ်းမဵဝ်း ဢီႉသရေႇလႃႉ တင်းလၢႆလဝ်ႊထၢမ်တီႈထႃႇဝရႃႉၽြႃးလႄႈဝႃႈ၊ ၵႃႈၼႂ်းၶႃႈၸဝ်ႈႁဝ်းၸိူဝ်းၼႆႉၽူႈလႂ်တၵ်းလႆႈၶီႇၶိုၼ်ႈဢွၼ်တၢင်းပိူၼ်ႈၸူးၵႃႈတီႈၵူၼ်း ၶႃႇၼၼီႉ တင်းလၢႆ ႁႂ်ႈလႆႈတိုၵ်းတေႃးၶဝ်တီႈၶႃႈ၊ ဝႃႈၼင်ႇၼႆသေယဝ်ႉ၊-

2ထႃႇဝရႃႉၽြႃး မီးဢမိင်ႉလႄႈဝႃႈ၊ ယူႉတႃႉ တၵ်းလႆႈၶီႇၶိုၼ်ႈဢေႃႈ။ ၵဝ်ဢဝ်မိူင်းၼၼ်ႉဢၢပ်ႈပၼ်ၵႃႈၼႂ်းမိုဝ်းမၼ်းယဝ်ႉ၊ ဝႃႈၼင်ႇၼႆဢေႃႈ။-

3ယူႉတႃႉ ၼၼ်ႉလၢတ်ႈတီႈပီႈၸၢႆးမၼ်း သီႉမုၼ်ႇ လႄႈဝႃႈ၊ ၸွမ်းလူၺ်ႈၵၼ်တင်းၵဝ်ၶိုၼ်ႈၵႂႃႇၵႃႈတီႈလိၼ်ဢမူၺ်ႇၵဝ်ၼၼ်ႉ ႁႂ်ႈလႆႈတိုၵ်းတေႃးၵူၼ်း ၶႃႇၼၼီႉ ၸိူဝ်းၼၼ်ႉသေၵမ်း။ ၵႃႈတီႈလိၼ်ဢမူၺ်ႇမႂ်းၵေႃႈ ၵဝ်တၵ်းၸွမ်းၵႂႃႇလူၺ်ႈၵၼ်တင်းမႂ်းဢေႃႈ၊ ဝႃႈၼင်ႇၼႆလႄႈ၊ သီႉမုၼ်ႇ ၸွမ်းၶိုၼ်ႈၵႂႃႇဢေႃႈ။-

4ယူႉတႃႉ ၼၼ်ႉၶီႇၶိုၼ်ႈၵႂႃႇလႄႈထႃႇဝရႃႉၽြႃးဢဝ်ၵူၼ်း ၶႃႇၼၼီႉ ဢိၵ်ႇတင်းၵူၼ်း ၽေႇရၸီႉ တင်းလၢႆ ဢၢပ်ႈပၼ်ၵႃႈၼႂ်းမိုဝ်းၶဝ်သေယဝ်ႉ ၶဝ်တိုၵ်းတေႃးယႃႉပႅတ်ႈၶဝ်ၼၼ်ႉ ၵႃႈတီႈဝဵင်း ပေးၸႅၵ်ႉ ၼၼ်ႉၵူၼ်းမိုၼ်ႇၼိုင်ႈဢေႃႈ။-

5ၶဝ်ထူပ်းႁၼ်ၶုၼ် ဢတေႃးၼီႉပေးၸႅၵ်ႉ ၵႃႈၼႂ်းဝဵင်း ပေးၸႅၵ်ႉ ၼၼ်ႉလႄႈ တိုၵ်းတေႃးမၼ်းသေလႄႈ ယႃႉပႅတ်ႈၵူၼ်း ၶႃႇၼၼီႉ ဢိၵ်ႇတင်းၵူၼ်း ၽေႇရၸီႉ ၸိူဝ်းၼၼ်ႉသေယဝ်ႉ၊-

6ဢတေႃးၼီႉပေးၸႅၵ်ႉ ၼၼ်ႉဢွၵ်ႇပၢႆႈဢေႃႈ။ ၶဝ်လိုပ်ႈၸွမ်းလမ်းၸွမ်းမၼ်းလႄႈတီႉလႆႈသေယဝ်ႉ တႅပ်းမႄႈမိုဝ်းမၼ်းမႄႈတိၼ်မၼ်းပႅတ်ႈဢေႃႈ။-

7ဢတေႃးၼီႉပေးၸႅၵ်ႉ လၢတ်ႈလႄႈဝႃႈ၊ ၶုၼ်လူင်ၸဵတ်းသိပ်းဢၼ်လႆႈၶၢမ်ႇတၢင်းဢၼ်တႅပ်းမႄႈမိုဝ်းမႄႈတိၼ်ၸိူဝ်းၼၼ်ႉ လႆႈၵဵပ်းၵိၼ်ဢၼ်ယွႆႈဢၼ်ယႅမ်း ၵႃႈတႂ်ႈၶူင်ႇတီႈၵိၼ်ၵဝ်ဢေႃႈ။ ၸွမ်းၵႃႈၼင်ႇဢၼ်ၵဝ်ယၢမ်ႈႁဵတ်းမႃးၼၼ်ႉသေလႄႈ ၽြႃးပဵၼ်ၸဝ်ႈပၼ်ဢပႅတ်ႈတီႈၵဝ်ယဝ်ႉ၊ ဝႃႈၼင်ႇၼႆဢေႃႈ။ ၶဝ်ဢဝ်မၼ်းၼၼ်ႉသူင်ႇၵႃႈတီႈဝဵင်း ယေႇရူႉသလႅမ်ႇ လႄႈ မၼ်းၼၼ်ႉတၢႆၵႃႈတီႈၼၼ်ႈဢေႃႈ။

8ၵူၼ်းမဵဝ်း ယူႉတႃႉ ၸိူဝ်းၼၼ်ႉ တိုၵ်းတေႃးဝဵင်း ယေႇရူႉသလႅမ်ႇ လႄႈ သိမ်းဢဝ်သေယဝ်ႉ ယႃႉပႅတ်ႈလူၺ်ႈၶူမ်းလၢပ်ႇၶူမ်းလႅဝ်းလႄႈ ဢဝ်ၽႆးတုတ်ႇဝဵင်းၼၼ်ႉဢေႃႈ။-

9လိုၼ်းၼၼ်ႉ ၵူၼ်းမဵဝ်း ယူႉတႃႉ ၸိူဝ်းၼၼ်ႉလူင်းၵႂႃႇႁႂ်ႈလႆႈတိုၵ်းတေႃးၵူၼ်း ၶႃႇၼၼီႉ ဢၼ်ယူႇၵႃႈတီႈၼိူဝ်ႁၢၼ်ႉလွႆ ၵႃႈတီႈပွတ်းတၢင်းၸၢၼ်း ဢိၵ်ႇတင်းၵႃႈတႂ်ႈတီႈဢၼ်ပၢင်ႇဢၼ်ပဵင်းၼၼ်ႉဢေႃႈ။-

10ၵူၼ်းမဵဝ်း ယူႉတႃႉ ၸိူဝ်းၼၼ်ႉ သမ်ႉၶီႇသိုၵ်းၵႂႃႇၸူးၵႃႈတီႈၵူၼ်း ၶႃႇၼၼီႉ ဢၼ်ယူႇၵႃႈၼႂ်းဝဵင်း ႁေႇပြုၼ်ႇ ဢၼ်မီးၸိုဝ်ႈသဵင်ၵဝ်ႇ ၵီႉရယႃႉသႃႇၽႃႇ ၼၼ်ႉလႄႈတိုၵ်းတေႃးယႃႉပႅတ်ႈ ဢႁီႉမၼ်ႇ၊ သေးသေး တင်း တႃႇလမေး ၸိူဝ်းၼၼ်ႉဢေႃႈ။

11ၶဝ်သမ်ႉလုၵ်ႉသေၵႃႈတီႈၼၼ်ႈ ၶီႇသိုၵ်းၵႂႃႇၸူးၵႃႈတီႈၶဝ်ၸိူဝ်းဢၼ်ပဵၼ် ၵူၼ်းဝဵင်း တေႇပီႉရႃႉ ၼၼ်ႉဢေႃႈ။ ၸိုဝ်ႈၵဝ်ႇသဵင်ၵဝ်ႇဝဵင်း တေႇပီႉရႃႉ ၼၼ်ႉၸမ်ႉ၊ ပဵၼ် ၵီႉရယႃႉသေႃႇၽႃႉ ဢေႃႈ။-

12မိူဝ်ႈၼၼ်ႉ ၵႃႇလႅပ်ႉ လၢတ်ႈလႄႈဝႃႈ၊ ၵဝ်တၵ်းဢဝ်လုၵ်ႈယိင်းၵဝ် ဢႃႇၶသႃႉ ပၼ်ၵၼ်တင်းၵေႃႉဢၼ်တိုၵ်းဢဝ် ဝဵင်း ၵီႉရယႃႉသေႃႇၽႃႉ ၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

13ဢေႃးထၼ်ႇယေႇလႃႉ လုၵ်ႈၸၢႆး ၵေးၼတ်ႉ ဢၼ်ပဵၼ်ၼွင်ႉၸၢႆး ၵႃႇလႅပ်ႉ ၼၼ်ႉ တိုၵ်းဢဝ်ဝဵင်းၼၼ်ႉလႄႈ၊ မၼ်းဢဝ်လုၵ်ႈယိင်းမၼ်း ဢႃႇၶသႃႉ ပၼ်ၵၼ်တင်းမၼ်းၼၼ်ႉဢေႃႈ။-

14မိူဝ်ႈဢၼ်မႄႈယိင်းၼၼ်ႉမႃးၸူးတီႈၽူဝ်မၼ်းၼၼ်ႉၸိုင်၊ မၼ်းတိုၵ်းယူင်းၸူဝ်းဢဝ်ၽူဝ်မၼ်း ႁႂ်ႈလႆႈယွၼ်းဢဝ်ၵႂၢၵ်ႈလိၼ်သေၵႂၢၵ်ႈၼိုင်ႈတီႈပေႃႈမၼ်းသေယဝ်ႉ လူင်းသေၵႃႈၼိူဝ်လီႈမၼ်းသေလႄႈ ၵႃႇလႅပ်ႉ ထၢမ်တီႈမၼ်းလႄႈဝႃႈ၊ မႂ်းၶႂ်ႈလႆႈၵႃႈသင်၊ ဝႃႈၼင်ႇၼႆလႄႈ၊-

15မၼ်းၶိုၼ်းလၢတ်ႈလႄႈဝႃႈ၊ ပၼ်တၢင်းလီတီႈၵဝ်ၶႃႈသေၵမ်းၶႃႈ။ လွင်ႈမၼ်းၸမ်ႉ ၸဝ်ႈႁဝ်းပၼ်လိၼ်ၼႃႈတၢင်းၸၢၼ်းၼၼ်ႉ တီႈၵဝ်ၶႃႈယဝ်ႉလႄႈ ၼမ်ႉဢွၵ်ႇႁူးၵေႃႈပၼ်လူးၵွၼ်ႇသေၵမ်းၶႃႈ၊ ဝႃႈၼင်ႇၼႆသေယဝ်ႉ၊ ၵႃႇလႅပ်ႉ ပၼ်ၼမ်ႉဢွၵ်ႇႁူးဢၼ်ၵႃႈၼိူဝ်ဢိၵ်ႇတင်း ၼမ်ႉဢွၵ်ႇႁူးဢၼ်ၵႃႈတႂ်ႈၸိူဝ်းၼၼ်ႉတီႈမၼ်းဢေႃႈ။

16ၵူၼ်းမဵဝ်းၸိူဝ်ႉၶိူဝ်း ၵေႇၼီႉ ၵေႃႉဢၼ်ပဵၼ်ပူႇၼၢႆး မူဝ်းသေႇ ၼၼ်ႉၸိူဝ်းၼၼ်ႉ ဢွၼ်ၵၼ်လုၵ်ႉသေၵႃႈတီႈဝဵင်းတူၼ်ႈထၢၼ် ၸွမ်းလူၺ်ႈၵၼ်တင်းၵူၼ်းမဵဝ်း ယူႉတႃႉ တင်းလၢႆ ၶိုၼ်ႈၵႂႃႇၸူးၵႃႈတီႈထိူၼ်ႇ ယူႉတႃႉ ၵႃႈတီႈၽၢႆႇတၢင်းၸၢၼ်းဝဵင်း ဢႃႇရတ်ႉ လႄႈ ၵႂႃႇတူၵ်းတီႈယူႇတီႈသဝ်းလူၺ်ႈၵၼ်တင်းၶဝ်ၼၼ်ႉဢေႃႈ။-

17ယူႉတႃႉ သမ်ႉၸွမ်းလူၺ်ႈၵၼ်တင်းပီႈၸၢႆးမၼ်း သီႉမုၼ်ႇ ၵႂႃႇလႄႈ တိုၵ်းတေႃးယႃႉပႅတ်ႈၵူၼ်း ၶႃႇၼၼီႉ ဢၼ်ယူႇၵႃႈတီႈဝဵင်း ၸေးၽတ်ႉ ၼၼ်ႉသေလႄႈ ယႃႉၽဵဝ်ႈဝဵင်းၼၼ်ႉပႅတ်ႈမူတ်းမူတ်းသေယဝ်ႉ ဝဵင်းၼၼ်ႉလႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ ႁေႃႇမႃႇ ဢေႃႈ။-

18ယူႉတႃႉ သမ်ႉတိုၵ်းဢဝ်ဝဵင်း ၵႃႇၸႃႉ ဢိၵ်ႇတင်းဢိူင်ႇဝဵင်းမၼ်း၊ ဝဵင်း ဢႃႇသၵေႇလုၼ်ႇ ဢိၵ်ႇတင်းဢိူင်ႇဝဵင်းမၼ်း၊ တင်းဝဵင်း ဢေႇၵြုၼ်ႇ ဢိၵ်ႇတင်းဢိူင်ႇဝဵင်းမၼ်းၸိူဝ်းၼၼ်ႉဢေႃႈ။-

19ထႃႇဝရႃႉၽြႃးမီးယူႇလူၺ်ႈၵၼ်တင်း ယူႉတႃႉ လႄႈ မၼ်းၼၼ်ႉႁေႃႈၶဝ်ၸိူဝ်းဢၼ်ယူႇၵႃႈၼိူဝ်ႁၢၼ်ႉလွႆတင်းလၢႆဢွၵ်ႇပႅတ်ႈဢေႃႈ။ ၵူၼ်းဢၼ်ယူႇၵႃႈၼႂ်းပၢင်ႇၼႂ်းပဵင်းတင်းလၢႆၸိုင် မၼ်းဢမ်ႇႁေႃႈဢွၵ်ႇပႅတ်ႈလႆႈ။ လွင်ႈမၼ်းၸမ်ႉ ၶဝ်ၼၼ်ႉမီးလေႃႉရထႃးလဵၵ်းဢေႃႈ။-

20ၶဝ်ဢဝ်ဝဵင်း ႁေႇပြုၼ်ႇ ပၼ်တီႈ ၵႃႇလႅပ်ႉ ၸွမ်းၵႃႈၼင်ႇဢၼ် မူဝ်းသေႇ သင်ႇလၢတ်ႈဝႆႉၼၼ်ႉလႄႈ မၼ်းၼၼ်ႉႁေႃႈၵူၼ်း ဢႃႇၼၵႃႉ သၢမ်ၵေႃႉဢွၵ်ႇပႅတ်ႈသေၵႃႈတီႈၼၼ်ႈဢေႃႈ။-

21ၵူၼ်းမဵဝ်း ပိၼ်ႇယႃႇမိၼ်ႇ ယင်းဢမ်ႇႁေႃႈၵူၼ်း ယေႇပူႉသီႉ တင်းလၢႆ ဢၼ်ယူႇၵႃႈတီႈဝဵင်း ယေႇရူႉသလႅမ်ႇ ၼၼ်ႉ ဢွၵ်ႇပႅတ်ႈသေၵႃႈတီႈၼၼ်ႈလႄႈ ၵူၼ်း ယေႇပူႉသီႉ ၸိူဝ်းၼၼ်ႉ ယူႇလူၺ်ႈၵၼ်တင်းၵူၼ်းမဵဝ်း ပိၼ်ႇယႃႇမိၼ်ႇ တင်းလၢႆၵႃႈတီႈဝဵင်း ယေႇရူႉသလႅမ်ႇ ၼၼ်ႉယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

22ၵူၼ်းမဵဝ်း ယူဝ်းသႅပ်ႈ ၵေႃႈ ၶီႇသိုၵ်းၶိုၼ်ႈၸူးၵႃႈတီႈဝဵင်း ပေႇသလႃႉ လႄႈ ထႃႇဝရႃႉၽြႃးမီးယူႇလူၺ်ႈၵၼ်တင်းၶဝ်ဢေႃႈ။-

23ၵူၼ်းမဵဝ်း ယူဝ်းသႅပ်ႈ ၸိူဝ်းၼၼ်ႉ ပွႆႇၸႂ်ႉႁႂ်ႈလႆႈလွမ်တူၺ်းဝဵင်း ပေႇသလႃႉ ဢေႃႈ။ ၸိုဝ်ႈၵဝ်ႇသဵင်ၵဝ်ႇဝဵင်းၼၼ်ႉၸမ်ႉ ပဵၼ်ဝဵင်း လူႉၸႃႉ ဢေႃႈ။-

24ၶဵဝ်လွတ်ႈၽၢႆႇၼႂ်းၸိူဝ်းၼၼ်ႉ ထူပ်းႁၼ်ၵူၼ်းၵေႃႉၼိုင်ႈ ဢွၵ်ႇၵႃႈၼႂ်းဝဵင်းၼၼ်ႉမႃးလႄႈ လၢတ်ႈတီႈမၼ်းလႄႈဝႃႈ၊ ၼႄပၼ်သဵၼ်ႈတၢင်းဢၼ်ၶဝ်ႈၸူးၵႃႈၼႂ်းဝဵင်းတႃႉ။ ပေႃးမႂ်းၼႄပၼ်ၸိူဝ်ႉၼင်ႇၼၼ်ၸိုင် ႁဝ်းတၵ်းပၼ်ၵတ်းယဵၼ်ၶျၢမ်းသႃႇတီႈမႂ်းဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

25ၵေႃႉၼၼ်ႉၼႄပၼ်သဵၼ်ႈတၢင်းဢၼ်ၶဝ်ႈၸူးၵႃႈၼႂ်းဝဵင်းသေယဝ်ႉ ၶဝ်ၼၼ်ႉတိုၵ်းတေႃးယႃႉဝဵင်းၼၼ်ႉပႅတ်ႈ လူၺ်ႈၶူမ်းလၢပ်ႇၶူမ်းလႅဝ်းလႄႈပွႆႇၵေႃႉၼၼ်ႉ ဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းသဵင်ႈတင်းလူင်လွတ်ႈဢေႃႈ။-

26ၵေႃႉၼၼ်ႉၵႂႃႇၵႃႈတီႈ မိူင်း ႁိတ်ႉတီႉ လႄႈ တႄႇႁဵတ်းဝဵင်းသေယဝ်ႉ၊ ႁွင်ႉႁဵၵ်ႈၸိုဝ်ႈဝဵင်းၼၼ်ႉ လူႉၸႃႉ ဢေႃႈ။ ၸိုဝ်ႈသဵင်ၼၼ်ႉ ၸပ်းယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

27မဵဝ်း မၼႃႇသေႇ ၼၼ်ႉ ယင်းဢမ်ႇႁေႃႈၶဝ်ၸိူဝ်းဢၼ်ယူႇၵႃႈတီႈဝဵင်း ပႅတ်ႉသၼ်ႇ ဢိၵ်ႇတင်းဝၢၼ်ႈမၼ်းတင်းလၢႆ၊ ဝဵင်း တႃႇၼၵ်ႉ ဢိၵ်ႇတင်းဝၢၼ်ႈမၼ်းတင်းလၢႆ၊ ၶဝ်ၸိူဝ်းဢၼ်ယူႇၵႃႈတီႈဝဵင်း တေႃႇရႃႉ ဢိၵ်ႇတင်းဝၢၼ်ႈမၼ်းတင်းလၢႆ၊ ၶဝ်ၸိူဝ်းဢၼ်ယူႇၵႃႈတီႈဝဵင်း ဢီႉပလမ်ႇ ဢိၵ်ႇတင်းဝၢၼ်ႈမၼ်းတင်းလၢႆ၊ ၶဝ်ၸိူဝ်းဢၼ်ယူႇၵႃႈတီႈဝဵင်း မေႇၵိတ်ႉတေႃႇ ဢိၵ်ႇတင်းဝၢၼ်ႈမၼ်းတင်းလၢႆၸိူဝ်းၼၼ်ႉဢွၵ်ႇပႅတ်ႈလႄႈ ၵူၼ်း ၶႃႇၼၼီႉ ၸိူဝ်းၼၼ်ႉ ၼိူင်ႇၶႅၼ်သေလႄႈယူႇဢေႃႈ။-

28လိုၼ်းၼၼ်ႉ မိူဝ်ႈဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ ႁႅင်းယႂ်ႇမႃးၼၼ်ႉၸိုင် ပိၵ်ႉသမ်ႉၶဝ်ဢမ်ႇႁေႃႈၵူၼ်း ၶႃႇၼၼီႉ တင်းလၢႆဢွၵ်ႇပႅတ်ႈသေၵေႃႈ ၶဝ်ႁႂ်ႈၶဝ်ၼၼ်ႉလႆႈပဵၼ်ၶႃႈ ၶၢမ်ႇတၢင်းၸႂ်ႉတၢင်းသွႆဢေႃႈ။-

29မိူၼ်ၼင်ႇၼၼ် မဵဝ်း ဢေႇၽရိမ်ႇ ယင်းဢမ်ႇႁေႃႈၵူၼ်း ၶႃႇၼၼီႉ ဢၼ်ယူႇၵႃႈတီႈဝဵင်း ၵေႇၸႃႇ ၼၼ်ႉ ဢွၵ်ႇပႅတ်ႈလႄႈ ၵူၼ်း ၶႃႇၼၼီႉ ၸိူဝ်းၼၼ်ႉ ယူႇလူၺ်ႈၵၼ်တင်းၶဝ်ၵႃႈၼႂ်းဝဵင်း ၵေႇၸႃႇ ၼၼ်ႉယူႇဢေႃႈ။-

30မိူၼ်ၼင်ႇၼၼ် မဵဝ်း ဢႃႇသႃႇ ယင်းဢမ်ႇႁေႃႈၵူၼ်းဝဵင်း ၵီႉတရုၼ်ႇ ဢိၵ်ႇတင်းၵူၼ်းဝဵင်း ၼႁႃႇလေႃးလႃႉ ၸိူဝ်းၼၼ်ႉဢွၵ်ႇပႅတ်ႈလႄႈ ၵူၼ်း ၶႃႇၼၼီႉ ၸိူဝ်းၼၼ်ႉ ယူႇလူၺ်ႈၵၼ်တင်းၶဝ်သေလႄႈ လႆႈပဵၼ်ၶႃႈၶၢမ်ႇတၢင်းၸႂ်ႉတၢင်းသွႆယူႇဢေႃႈ။-

31မိူၼ်ၼင်ႇၼၼ် မဵဝ်း ဢႃႇသႃႇ ယင်းဢမ်ႇႁေႃႈၵူၼ်းဝဵင်း ဢၵ်ႉၶေႃႇ ၊ ၵူၼ်းဝဵင်း ၸီႉတုၼ်ႇ ၊ ၵူၼ်းဝဵင်း ဢႃႇလပ်ႉ ၊ ၵူၼ်းဝဵင်း ဢႃႇၶၸိပ်ႉ ၊ ၵူၼ်းဝဵင်း ႁေႇလပႃႉ ၊ ၵူၼ်းဝဵင်း ဢႃႇၽႅတ်ႉ ၊ ၵူၼ်းဝဵင်း ရႃႇႁေႃႇၽႃႉ ၸိူဝ်းၼၼ်ႉဢွၵ်ႇပႅတ်ႈလႄႈ၊-

32ၵူၼ်းမဵဝ်း ဢႃႇသႃႇ ၸိူဝ်းၼၼ်ႉယူႇလူၺ်ႈၵၼ်တင်းၵူၼ်း ၶႃႇၼၼီႉ ၸိူဝ်းၼၼ်ႉဢေႃႈ။ ၶဝ်ဢမ်ႇႁေႃႈၶဝ်ၼၼ်ႉဢွၵ်ႇပႅတ်ႈ။-

33မိူၼ်ၼင်ႇၼၼ် မဵဝ်း ၼပ်ႉထလီႉ ယင်းဢမ်ႇႁေႃႈၵူၼ်းဝဵင်း ပႅတ်ႉသေးမိတ်ႉ တင်းၵူၼ်းဝဵင်း ပေႉသၼတ်ႉ ၸိူဝ်းၼၼ်ႉဢွၵ်ႇပႅတ်ႈလႄႈ ယူႇလူၺ်ႈၵၼ်တင်းၵူၼ်း ၶႃႇၼၼီႉ ဢၼ်ယူႇၵႃႈတီႈမိူင်းၼၼ်ႉဢေႃႈ။ ၼႂ်းဝႃႈၼၼ်သေၵေႃႈ ၵူၼ်းဝဵင်း ပႅတ်ႉသေးမိတ်ႉ ဢိၵ်ႇတင်းၵူၼ်းဝဵင်း ပေႉသၼတ်ႉ ၸိူဝ်းၼၼ်ႉ လႆႈပဵၼ်ၶႃႈၶၢမ်ႇတၢင်းၸႂ်ႉတၢင်းသွႆယူႇဢေႃႈ။-

34ၵူၼ်း ဢႃႇမေႃးရီႉ တင်းလၢႆ ႁဵတ်းႁႂ်ႈၵူၼ်းမဵဝ်း တၢၼ်ႇ ယူႇၵႃႈၼိူဝ်ႁၢၼ်ႉလွႆတႄးလွႆလႄႈ ဢမ်ႇပၼ်ဢၶႂၢင်ႉဢၼ်လႆႈယူႇၵႃႈတႂ်ႈတီႈပၢင်ႇတီႈပဵင်း။-

35ၵူၼ်း ဢႃႇမေႃးရီႉ ၸိူဝ်းၼၼ်ႉ ၼိူင်ႇၶႅၼ်ယူႇၵႃႈၼိူဝ်လွႆ ႁေးရိတ်ႉ ၵႃႈၼႂ်းဝဵင်း ဢႃႇၸလုၼ်ႇ တင်းဝဵင်း သႃႇလပိမ်ႇ ဢေႃႈ။ ၼႂ်းဝႃႈၼၼ်သေၵေႃႈ ႁႅင်းမိုဝ်းၵူၼ်းမဵဝ်း ယူဝ်းသႅပ်ႈ ၼၼ်ႉ ပႄႉၼႅင်ႇႁႂ်ႈၶဝ်ၼၼ်ႉထၼ်ႈပေႃးလႆႈပဵၼ်ၶႃႈ ၶၢမ်ႇတၢင်းၸႂ်ႉတၢင်းသွႆဢေႃႈ။-

36လိၼ်တီႈဢၼ်ၵူၼ်း ဢႃႇမေႃးရီႉ ၸိူဝ်းၼၼ်ႉလႆႈယူႇၼၼ်ႉ ပဵၼ်တီႈဢၼ်ဢဝ်ၸႃႉၸဵမ်ၵႃႈတီႈၵုင်း ဢႃႇၵႃႇရပ်ႉပိမ်း ဢိၵ်ႇတင်းမၢၵ်ႇႁိၼ်မၢၵ်ႇၽႃၼၼ်ႉလႄႈၶိုၼ်ႈၵႂႃႇဢေႃႈ။

Jump to: Chapter 2 →