Judges 8

Shan

← Chapter 7 Jump to: Chapter 9 →

1ၵူၼ်း ဢေႇၽရိမ်ႇ ၸိူဝ်းၼၼ်ႉ လၢတ်ႈတီႈမၼ်းလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈယင်းဢမ်ႇႁွင်ႉဢဝ်ႁဝ်းၶႃႈမိူဝ်ႈဢၼ်ၸဝ်ႈၵႂႃႇ တိုၵ်းၵူၼ်း မီႉတျၼ်ႇ ၸိူဝ်းၼၼ်ႉလႄႈ ႁဵတ်းတီႈႁဝ်းၶႃႈၸိူဝ်ႉၼင်ႇၼႆၼင်ႇႁိုဝ်ၶႃႈ၊ ဝႃႈၼင်ႇၼႆလႄႈ တၢင်ႇဢပႅတ်ႈတီႈမၼ်းၼႃႇလူင်လၢင်ဢေႃႈ။-

2မၼ်းၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ ၵဝ်ႁဵတ်းယဝ်ႉၸိူဝ်ႉၼင်ႇႁိုဝ်ႁႂ်ႈမိူၼ်ၸိူဝ်ႉၼင်ႇဢၼ်သူႁဵတ်းၼၼ်ႉ။ တၢင်းဢၼ် ဢေႇၽရိမ်ႇ ၸွမ်းၵဵပ်းဢဝ်မၢၵ်ႇၸပိတ်ႈၼၼ်ႉ လီလိူဝ်တွၼ်းၼႃႇသေ တၢင်းဢၼ် ဢပျေႇၸႃႇ သိမ်းဢဝ်မၢၵ်ႇၸပိတ်ႈၼၼ်ႉဢမ်ႇၸႂ်ႈႁိုဝ်။-

3ၽြႃးပဵၼ်ၸဝ်ႈဢဝ်ၶုၼ်ပူဝ်ႇၶျုၵ်ႈ မီႉတျၼ်ႇ ဢၼ်ဝႃႈ ဢေႃးရၽႃႉ တင်း ၸေးၽႃႉ ၼၼ်ႉ ဢၢပ်ႈပၼ်ၵႃႈၼႂ်းမိုဝ်းမႂ်းယဝ်ႉ။ ၵဝ်ႁဵတ်းၸိူဝ်ႉၼင်ႇႁိုဝ် လႆႈႁႂ်ႈမိူၼ်ၸိူဝ်ႉၼင်ႇဢၼ်သူႁဵတ်းယဝ်ႉၼၼ်ႉ၊ ဝႃႈၼင်ႇၼႆသေယဝ်ႉ၊ တၢင်းၸႂ်မႆႈၶႆႈၸႃႉၶဝ်ပေႇၵႂႃႇမိူဝ်ႈဢၼ်ၶဝ်လႆႈငိၼ်းၵႂၢမ်း ဢၼ်မၼ်းၶိုၼ်းလၢတ်ႈၸိူဝ်ႉၼင်ႇၼၼ်ၼၼ်ႉဢေႃႈ။-

4ၵီႉတီႉဢုၼ်ႇ ၼၼ်ႉ ႁွတ်ႈထိုင်ၵႃႈတီႈၼမ်ႉႁွင်ႈ ယေႃးတၢၼ်ႇ သေယဝ်ႉ မၼ်းဢိၵ်ႇတင်းၵူၼ်းသၢမ်ပၢၵ်ႇ ဢၼ်မီးတီႈမၼ်းၸိူဝ်းၼၼ်ႉ ယၢပ်ႇၸႂ်ႁိူဝ်ႉၸႂ်ယူႇသေလႄႈ ဢွၼ်ၵၼ်ၶၢမ်ႈလႄႈလိုပ်ႈလမ်းၸွမ်းၵႂႃႇဢေႃႈ။-

5မၼ်းယွၼ်းတီႈၵူၼ်းဝဵင်း သူႉၵုတ်ႉ တင်းလၢႆလႄႈဝႃႈ၊ ပၼ်ၶဝ်ႈမုၼ်းတီႈၶဝ်ၸိူဝ်းဢၼ် ၸွမ်းလင်ၵဝ်ၸိူဝ်းၼႆႉသေၵမ်း။ ၶဝ်ၼႆႉ ယၢပ်ႇၸႂ်ႁိူဝ်ႉၸႂ်ယဝ်ႉ။ မိူဝ်ႈလဵဝ်ၼႆႉၵဝ်ၸွမ်းႁႃ ၸေးၽႁႃႉ တင်း ၸႃႇလမုၼ်ႇၼႃႉ ဢၼ်ပဵၼ်ၶုၼ်လူင် မီႉတျၼ်ႇ ၸိူဝ်းၼၼ်ႉဢေႃႈ၊ ဝႃႈၼင်ႇၼႆလႄႈ၊-

6ၶုၼ်ဝဵင်း သူႉၵုတ်ႉ ၸိူဝ်းၼၼ်ႉၶိုၼ်းလၢတ်ႈလႄႈဝႃႈ၊ လွင်ႈၼင်ႇႁိုဝ်ႁဝ်းတၵ်းလႆႈပၼ်ၶဝ်ႈမုၼ်းတီႈပူဝ်ႇပႃႇၵူၼ်းသိုၵ်းမႂ်းၸိုင်၊ ၸေးၽႁႃႉ တင်း ၸႃႇလမုၼ်ႇၼႃႉ ၼၼ်ႉမီးၵႃႈၼႂ်းမိုဝ်းမႂ်းယဝ်ႉႁိုဝ်။ ဝႃႈၼင်ႇၼႆသေဢေႃႈ။-

7ၵီႉတီႉဢုၼ်ႇ ၵေႃႈလၢတ်ႈလႄႈဝႃႈ၊ ပေႃးပဵၼ်ၼင်ႇၼၼ်ၸိုင် မိူဝ်ႈဢၼ်ထႃႇဝရႃႉၽြႃးဢဝ် ၸေးၽႁႃႉ တင်း ၸႃႇလမုၼ်ႇၼႃႉ ဢၢပ်ႈပၼ်ၵႃႈၼႂ်းမိုဝ်းၵဝ်ၼၼ်ႉ ၵဝ်တၵ်းဢဝ်တင်းတူၼ်ႈၼၢမ်ထိူၼ်ႇ ဢိၵ်ႇတင်းတူၼ်ႈၼၢမ်လိၼ် ပေႃႉယႅၼ်ႉလင်သူ ႁႂ်ႈပေႃးတႅၵ်ႇပေႃးလႅဝ်ဢေႃႈ၊ ဝႃႈၼင်ႇၼႆသေယဝ်ႉ၊-

8လုၵ်ႉသေၵႃႈတီႈၼၼ်ႈ ၶိုၼ်ႈၸူးၵႃႈတီႈဝဵင်း ပေႇၼူၺ်ႇလႃႉ လႄႈ သမ်ႉယွၼ်းတီႈၶဝ်ၼၼ်ႉၸိူဝ်ႉၼင်ႇၼၼ်သေၵေႃႈ၊ ၵူၼ်းဝဵင်း ပေႇၼူၺ်ႇလႃႉ ၸိူဝ်းၼၼ်ႉၶိုၼ်းလၢတ်ႈမိူၼ်ၸိူဝ်ႉၼင်ႇဢၼ်ၵူၼ်းဝဵင်း သူႉၵုတ်ႉ ၸိူဝ်းၼၼ်ႉၶိုၼ်းလၢတ်ႈၼၼ်ႉဢေႃႈ။-

9မၼ်းၵေႃႈလၢတ်ႈတီႈၵူၼ်းဝဵင်း ပေႇၼူၺ်ႇလႃႉ ၸိူဝ်းၼၼ်ႉလႄႈဝႃႈ၊ မိူဝ်ႈဢၼ်ၵဝ်ၶိုၼ်းမႃးၼိမ်ၼိမ်လီလီၼၼ်ႉၸိုင် ၵဝ်တၵ်းၵိူၼ်ႇယႃႉတိူၵ်ႈတီႈတိုၵ်းသိုၵ်းၼႆႉပႅတ်ႈဢေႃႈ၊ ဝႃႈၼင်ႇၼႆဢေႃႈ။-

10မိူဝ်ႈၼၼ်ႉ ၸေးၽႁႃႉ တင်း ၸႃႇလမုၼ်ႇၼႃႉ ၸိူဝ်းၼၼ်ႉပႃးပူဝ်ႇပႃႇၵူၼ်းသိုၵ်း မိုၼ်ႇၼိုင်ႈပၢႆႁႃႈႁဵင်ၸမ်ၸမ်ၵူၺ်းဢၼ်ပဵၼ်ၵႃႈဢၼ်ၵိုတ်းဢၼ်ၵျၢၼ်ႇ ၵႃႈၼႂ်းၵူၼ်းၼႃႈဝၼ်းဢွၵ်ႇတင်းသဵင်ႈတင်းလူင်ၼၼ်ႉသေလႄႈ မီးယူႇၵႃႈတီႈဝဵင်း ၵႃႇၵေႃႇ ၵွပ်ႈပိူဝ်ႈ ဢၼ်ၶဝ်ၸိူဝ်းဢၼ်ယိပ်းၵမ်လၢပ်ႇလူမ်ႉတၢႆ သႅၼ်ၼိုင်ႈပၢႆသွင်မိုၼ်ႇယဝ်ႉၼၼ်ႉဢေႃႈ။-

11ၵီႉတီႉဢုၼ်ႇ ၶီႇၵႂႃႇသဵၼ်ႈတၢင်းၶဝ်ၸိူဝ်းဢၼ် ယူႇၵႃႈၼႂ်းမူဝ်းၵႃႇၼၼ်ႉၽၢႆႇဝၼ်းဢွၵ်ႇဝဵင်း ၼေႃႇပႃႉ တင်းဝဵင်း ယူပ်ႉပေႇႁႃႉ လႄႈ တိုၵ်းတေႃးယႃႉပႅတ်ႈပူဝ်ႇပႃႇၵူၼ်းသိုၵ်းတင်းလၢႆ ၵွပ်ႈပိူဝ်ႈဢၼ်ပူဝ်ႇပႃႇၵူၼ်းသိုၵ်းၸိူဝ်းၼၼ်ႉ ယင်းဢမ်ႇမႆႈၸႂ်ၶီၸႂ်လႄႈယူႇၼၼ်ႉသေယဝ်ႉ၊-

12ၸေးၽႁႃႉ တင်း ၸႃႇလမုၼ်ႇၼႃႉ ၸိူဝ်းၼၼ်ႉ ဢွၵ်ႇပၢႆႈလႄႈ မၼ်းလိုပ်ႈၸွမ်းလမ်းၸွမ်းသေလႄႈ တီႉလႆႈ ၸေးၽႁႃႉ တင်း ၸႃႇလမုၼ်ႇၼႃႉ ၶုၼ်လူင် မီႉတျၼ်ႇ သွင်ပႃးၼၼ်ႉလႄႈ ယႃႉပူဝ်ႇပႃႇၵူၼ်းသိုၵ်းၶဝ်ၼၼ်ႉပႅတ်ႈဢေႃႈ။

13ၵီႉတီႉဢုၼ်ႇ လုၵ်ႈၸၢႆး ယေႃးသႃႉ ၼၼ်ႉ လုၵ်ႉသေၵႃႈတီႈဢၼ်တိုၵ်းသိုၵ်းၼၼ်ႉၶိုၼ်းမႃးသဵၼ်ႈတၢင်းလွႆ ဢၼ်ၶိုၼ်ႈၵႃႈတီႈ ႁေႇၶႃးရိတ်ႉ လႄႈ၊-

14တီႉလႆႈၵူၼ်းဢွၼ်ႇ ၵူၼ်းဝဵင်း သူႉၵုတ်ႉ ၵေႃႉၼိုင်ႈသေယဝ်ႉ၊ ၸႅတ်ႈထၢမ်လႄႈ ၵေႃႉၼၼ်ႉတႅမ်ႈမၢႆၸိုဝ်ႈသဵင်ၶုၼ် သူႉၵုတ်ႉ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ် ၸဵတ်းသိပ်းပၢႆၸဵတ်းၵေႃႉ ပၼ်တီႈမၼ်းဢေႃႈ။-

15မၼ်းၵေႃႈမႃးၸူးၵႃႈတီႈၵူၼ်းဝဵင်း သူႉၵုတ်ႉ ၸိူဝ်းၼၼ်ႉလႄႈဝႃႈ၊ ဢွၼ်ၵၼ်တူၺ်း ၸေးၽႁႃႉ တင်း ၸႃႇလမုၼ်ႇၼႃႉ ဢၼ်သူ ဢဝ်သႄႉသွမ်းၵဝ်လႄႈဝႃႈ၊ လွင်ႈၼင်ႇႁိုဝ်ႁဝ်းတၵ်းလႆႈပၼ်ၶဝ်ႈမုၼ်းတီႈၵူၼ်းသိုၵ်းမႂ်းဢၼ်ယၢပ်ႇၸႂ်ႁိူဝ်ႉၸႂ် တင်းလၢႆၼၼ်ႉၸိုင် ၸေးၽႁႃႉ တင်း ၸႃႇလမုၼ်ႇၼႃႉ ၸိူဝ်းၼၼ်ႉ မီးၵႃႈၼႂ်းမိုဝ်းမႂ်းယဝ်ႉႁိုဝ်။ ဝႃႈၼင်ႇၼႆၼၼ်ႉတႃႉ၊ ဝႃႈၼင်ႇၼႆသေလႄႈ၊-

16ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းဝဵင်းၼၼ်ႉၸိူဝ်းၼၼ်ႉမႃးလႄႈ ဢဝ်တင်းတူၼ်ႈၼၢမ်ထိူၼ်ႇ ဢိၵ်ႇတင်းတူၼ်ႈၼၢမ်လိၼ် သင်ႇသွၼ်သုင်းမႃႉ ၵူၼ်းဝဵင်း သူႉၵုတ်ႉ ၸိူဝ်းၼၼ်ႉဢေႃႈ။-

17တိူၵ်ႈတီႈတိုၵ်းသိုၵ်းဝဵင်း ပေႇၼူၺ်ႇလႃႉ ၼၼ်ႉၵေႃႈ မၼ်းၵိူၼ်ႇယႃႉပႅတ်ႈလႄႈ ဢဝ်ၵူၼ်းဝဵင်းတင်းလၢႆတၢႆဢေႃႈ။-

18မိူဝ်ႈၼၼ်ႉ မၼ်းတွင်ႈထၢမ်တီႈ ၸေးၽႁႃႉ တင်း ၸႃႇလမုၼ်ႇၼႃႉ ၸိူဝ်းၼၼ်ႉလႄႈဝႃႈ၊ ၶဝ်ၸိူဝ်းဢၼ်သူဢဝ်တၢႆၵႃႈၼႂ်းဝဵင်း တႃႇပေႃႇ ၼၼ်ႉ ပဵၼ်ၵူၼ်းၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉၶိုၼ်းလၢတ်ႈလႄႈဝႃႈ၊ ၶဝ်ၵႃႈမီးၼၼ်ႉ ပဵၼ်မိူၼ်ၸိူဝ်ႉၼင်ႇဢၼ်ၸဝ်ႈႁဝ်းပဵၼ်ၼႆႉလႄႈ ပျေႉၸုမ်ႇဝႆႉတင်းႁၢင်ႈၽၢင်လုၵ်ႈၸၢႆးၶုၼ်ႁေႃၶမ်းၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

19မၼ်းၵေႃႈလၢတ်ႈလႄႈဝႃႈ၊ ၶဝ်ၼၼ်ႉပဵၼ်ၼွင်ႉၸၢႆးၵဝ်၊ လုၵ်ႈၸၢႆးမႄႈၵဝ်လူင်ပႄႇ။ ၵႃႈၼင်ႇဢၼ်ထႃႇဝရႃႉၽြႃး ဢသၢၵ်ႈလိပ်းယူႇၼၼ်ႉ သင်သူပၼ်ဢသၢၵ်ႈၵတ်းယဵၼ်ၶျၢမ်းသႃႇတီႈၶဝ်ၼၼ်ႉမႅၼ်ႈၸိုင် ၵဝ်ယင်းဢမ်ႇဢဝ်သူတၢႆလႄႈ တၵ်းယူႇဢေႃႈ၊ ဝႃႈၼင်ႇၼႆလႄႈ၊-

20သမ်ႉလၢတ်ႈတီႈ ယေႇသႃႇ လုၵ်ႈၸၢႆးတူၼ်ႈမၼ်းလႄႈဝႃႈ၊ လုၵ်ႉလႄႈဢဝ်ၶဝ်ၼႆႉတၢႆတႃႉ၊ ဝႃႈၼင်ႇၼႆသေၵေႃႈ လုၵ်ႈၸၢႆးၼၼ်ႉ ယင်းဢမ်ႇထွတ်ႇဢမ်ႇဢဝ်လၢပ်ႇမၼ်းဢွၵ်ႇလႄႈယူႇ ပိူဝ်ႈဢၼ်မၼ်းၵူဝ်ၵွပ်ႈပိူဝ်ႈဢၼ်ဢသၢၵ်ႈမၼ်းယင်းလဵၵ်ႉယင်းဢွၼ်ႇၼၼ်ႉဢေႃႈ။-

21ၸေးၽႁႃႉ တင်း ၸႃႇလမုၼ်ႇၼႃႉ ၸိူဝ်းၼၼ်ႉၵေႃႈလၢတ်ႈလႄႈဝႃႈ၊ တူဝ်ၸဝ်ႈႁဝ်းလုၵ်ႉလႄႈၶႃႈၽၼ်းႁဝ်းၶႃႈပႅတ်ႈတႃႉ။ ႁႅင်းတၼ်းၶူဝ်းၸၢင်ႈပဵၼ်ၸွမ်းၵႃႈၼင်ႇဢၼ် ၵူၼ်းပဵၼ်ၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊ ၵီႉတီႉဢုၼ်ႇ လုၵ်ႉလႄႈ ဢဝ် ၸေးၽႁႃႉ တင်း ၸႃႇလမုၼ်ႇၼႃႉ တၢႆသေယဝ်ႉ ထွတ်ႇဢဝ်လၢဝ်ၶမ်းဢၼ်ႁၢင်ႈၶိူင်ႈၵႃႈတီႈၶေႃးၵလႃးဢုၵ်ႉၶဝ်ၸိူဝ်းၼၼ်ႉဢေႃႈ။-

22မိူဝ်ႈၼၼ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ လဝ်ႊလၢတ်ႈတီႈ ၵီႉတီႉဢုၼ်ႇ လႄႈဝႃႈ၊ ၵွပ်ႈပိူဝ်ႈဢၼ်ၸဝ်ႈႁဝ်းၵႄႇသႄႇၼုၵ်ႈဢဝ်ႁဝ်းၶႃႈ ဢွၵ်ႇသေၵႃႈၼႂ်းမိုဝ်းၵူၼ်း မီႉတျၼ်ႇ ၸိူဝ်းၼၼ်ႉလႄႈ ၸဝ်ႈႁဝ်းဢိၵ်ႇတင်းၸူဝ်ႈလုၵ်ႈပၢၼ်လၢၼ်ၸဝ်ႈႁဝ်း ဢုပ်ႉပိူင်ႇၵႃႈၼိူဝ်ႁဝ်းၶႃႈသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

23ၵီႉတီႉဢုၼ်ႇ လၢတ်ႈတီႈၶဝ်လႄႈဝႃႈ၊ ၵဝ်ဢမ်ႇလႆႈဢုပ်ႉပိူင်ႇသူ။ လုၵ်ႈၸၢႆးၵဝ်ၵေႃႈဢမ်ႇလႆႈဢုပ်ႉပိူင်ႇသူ။ ထႃႇဝရႃႉၽြႃးတၵ်းလႆႈဢုပ်ႉပိူင်ႇသူဢေႃႈ၊ ဝႃႈၼင်ႇၼႆဢေႃႈ။-

24ၵီႉတီႉဢုၼ်ႇ သမ်ႉလၢတ်ႈတီႈၶဝ်ၼၼ်ႉလႄႈဝႃႈ၊ ၵဝ်မီးဢလူဝ်ႇၶႂ်ႈယွၼ်းဢဝ်တီႈသူ ႁႂ်ႈသူၵႃႈမီးတင်းသဵင်ႈတင်းလူင် လႆႈဢဝ်ပေႇႁူဢၼ်သူႁိမ်ဢဝ်လႄႈလႆႈၸိူဝ်းၼၼ်ႉပၼ်တီႈၵဝ်ဢေႃႈ၊ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ ၶဝ်ၼၼ်ႉပဵၼ်မဵဝ်း ဢီႉသမေႇလႃႉ လႄႈ ၸၢင်ႈတိုဝ်းပေႇႁူၶမ်းဢေႃႈ။-

25ၶဝ်ၵေႃႈဢွၼ်ၵၼ်ၶိုၼ်းလၢတ်ႈလႄႈဝႃႈ၊ ႁဝ်းၶႃႈတၵ်းပႃးၸေႇတၼႃႇသေလႄႈပၼ်ၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ဢဝ်ၽႃႈဝႆသိူဝ်ႇသေလႄႈ ၵူၼ်းတင်းသဵင်ႈတင်းလူင်ၼၼ်ႉ ဢွၼ်ၵၼ်ဢဝ်ပေႇႁူဢၼ်ၶဝ်ႁိမ်ဢဝ်လႄႈလႆႈၸိူဝ်းၼၼ်ႉၶျႃးသႂ်ႇဢေႃႈ။-

26ဢၼ်ၸင်ႈဢၼ်ႁိဝ်ႈပေႇႁူၶမ်း ဢၼ်မၼ်းယွၼ်းဢဝ်ၼၼ်ႉၸမ်ႉ မီးႁဵင်ပၢႆၸဵတ်းပၢၵ်ႇၵျၢပ်ႈ သၶေးလႃႉ ဢေႃႈ။ ၼွၵ်ႈသေၼၼ်ႉ လၢဝ်ၶမ်းလႂ်၊ ၶိူင်ႈႁွႆႈႁူလႂ်၊ ၶူဝ်းဢၼ်လႅင်ၵမ်ႇ ဢၼ်ၶုၼ်လူင် မီႉတျၼ်ႇ ၸိူဝ်းၼၼ်ႉၼုင်ႈ ႁၢင်ႈၶိူင်ႈၼၼ်ႉ ဢိၵ်ႇတင်းၸိူၵ်ႈၶေႃးၵလႃးဢုၵ်ႉ တင်းလၢႆၸိူဝ်းၼၼ်ႉ ယင်းလႆႈလူးၵွၼ်ႇဢေႃႈ။-

27ၵီႉတီႉဢုၼ်ႇ ဢဝ်ၶိူင်ႈၸိူဝ်းၼၼ်ႉ ႁဵတ်းသိူဝ်ႈသုပ်းၸဝ်ႈလႄႈ ဝႆႉၵႃႈတီႈဝဵင်း ဢေႃႇၽရႃႉ တီႈယူႇမၼ်းၼၼ်ႉသေယဝ်ႉ၊ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ၸၢင်ႈၽိတ်းပိူင်ႈလူၺ်ႈသိူဝ်ႈသုပ်းၸဝ်ႈၼၼ်ႉသေလႄႈၵႂႃႇဢေႃႈ။ လွင်ႈတၢင်းၼၼ်ႉ ပဵၼ်တူင်ႇႁႅဝ်ႉတူင်ႇၶိုမ်းတီႈ ၵီႉတီႉဢုၼ်ႇ တင်းပီႈၼွင်ႉၸိူဝ်ႉၶိူဝ်းမၼ်းဢေႃႈ။-

28ၼင်ႇၼၼ်လႄႈ မဵဝ်း မီႉတျၼ်ႇ လႆႈၶၢမ်ႇတၢင်းဢၼ်တူၵ်းသုမ်း ၵႃႈတီႈၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆလႄႈ လိုၼ်းၼၼ်ႉ ၶဝ်ယင်းဢမ်ႇငွၵ်ႈႁူဝ်ၶဝ်လႆႈလႄႈယူႇဢေႃႈ။ ၼႂ်းၸူဝ်ႈပၢၼ် ၵီႉတီႉဢုၼ်ႇ ၼၼ်ႉ မိူင်းတင်းမိူင်းၼိမ်လီယဵၼ်လီ သီႇသိပ်းပီႊတဵမ်တဵမ် ဢေႃႈ။

29ယေႇရုပ်ႉပႃႇလႃႉ လုၵ်ႈၸၢႆး ယေႃးသႃႉ ၼၼ်ႉၵႂႃႇလႄႈယူႇၵႃႈတီႈႁိူၼ်းမၼ်းဢေႃႈ။-

30ၵီႉတီႉဢုၼ်ႇ ၼၼ်ႉ မေးၼမ်လႄႈလုၵ်ႈၸၢႆးဢၼ်လႆႈၵႃႈတီႈတူဝ်မၼ်းမီးၸဵတ်းသိပ်းၵေႃႉဢေႃႈ။-

31မေးၼွႆႉမၼ်းဢၼ်ယူႇၵႃႈတီႈဝဵင်း သေႇၶိမ်ႇ ၼၼ်ႉ ၵိူတ်ႇလဵင်ႉလုၵ်ႈၸၢႆးမႃးလႄႈ မၼ်းႁွင်ႉႁဵၵ်ႈၸိုဝ်ႈ လုၵ်ႈၸၢႆးၼၼ်ႉ ဢၽီႉမလႅၵ်ႉ ဢေႃႈ။-

32ၵီႉတီႉဢုၼ်ႇ လုၵ်ႈၸၢႆး ယေႃးသႃႉ ၼၼ်ႉ ဢသၢၵ်ႈယႂ်ႇလႄႈၵႄႇထူၼ်ႈသေယဝ်ႉ ႁွတ်ႈဢၼိၵ်ႈၸႃႉလႄႈ လႆႈၶၢမ်ႇတၢင်းဢၼ်သၢင်းၵျူဝ်ႇ ၵႃႈၼႂ်းသၢင်းၶႅင်းပေႃႈမၼ်း ယေႃးသႃႉ ၵႃႈတီႈဝဵင်း ဢေႃႇၽရႃႉ တီႈယူႇၵူၼ်း ဢပျေႇၸႃႇ ၸိူဝ်းၼၼ်ႉဢေႃႈ။-

33မိူဝ်ႈဢၼ် ၵီႉတီႉဢုၼ်ႇ ၼၼ်ႉတၢႆယဝ်ႉၼၼ်ႉၸိုင် ၵူၼ်းမဵဝ်း ဢီႉသရေႇလႃႉ တင်းလၢႆ ၽွၵ်ႈပျၢၼ်ႇၶိုၼ်းလႄႈ ၽိတ်းပိူင်ႈလူၺ်ႈၽြႃး ပႃႇလႃႉ တင်းလၢႆသေယဝ်ႉ ဢဝ် ပႃႇလႃႉပေႇရိတ်ႉ ယုၵ်ႉယွင်ႈဝႆႉၼႂ်းဢရႃႇၽြႃးၶဝ်ဢေႃႈ။-

34ၵူၼ်းမဵဝ်း ဢီႉသရေႇလႃႉ တင်းလၢႆ ယင်းဢမ်ႇၶုၵ်းၸႂ်လႆႈၶႆႈၸႂ်ထူပ်း ထႃႇဝရႃႉၽြႃး ၽြႃးပဵၼ်ၸဝ်ႈၶဝ် ဢၼ်ၵႄႇသႄႇၼုၵ်ႈဢဝ်ၶဝ် ဢွၵ်ႇသေၵႃႈၼႂ်းမိုဝ်းရၢၼ်ႇသူႇၶဝ် ဢၼ်မီးလဵပ်ႈႁွပ်ႈၶဝ်ယူႇၼၼ်ႉလႄႈ၊-

35ဢမ်ႇၶိုၼ်းတွပ်ႇၶိုၼ်းႁဵတ်းၵျေးၸူးတီႈမဵဝ်း ယေႇရုပ်ႉပႃႇလႃႉ ဢၼ်ဝႃႈ ၵီႉတီႉဢုၼ်ႇ ၼၼ်ႉ မႅၼ်ႈၼင်ႇၵျေးၸူးၵႃႈဢၼ်မၼ်းလႆႈႁဵတ်းတီႈ မဵဝ်း ဢီႉသရေႇလႃႉ ၼၼ်ႉလႄႈယူႇဢေႃႈ။

← Chapter 7 Jump to: Chapter 9 →