Judges 19

Shan

← Chapter 18 Jump to: Chapter 20 →

1မိူဝ်ႈၶိင်ႇၼၼ်ႉ မိူဝ်ႈဢၼ်ၶုၼ်ႁေႃၶမ်း ဢီႉသရေႇလႃႉ ဢမ်ႇမီးၼၼ်ႉၸိုင်၊ မီးၵူၼ်းမဵဝ်း လေႇဝီႉ ဢၼ်သွၼ်ႈပိုင်ႈယူႇၵႃႈတီႈႁိမ်းၸဵင်ႇလႅၼ်သုတ်းႁၢၼ်ႉလွႆ ဢေႇၽရိမ်ႇ လႄႈ သိမ်းဢဝ်မႄႈယိင်းဢၼ်ပဵၼ်ၵူၼ်းဝဵင်း ပႅတ်ႉလႁႅမ်ႇ ၼႂ်းဢိူင်ႇ ယူႉတႃႉ သေလႄႈ ႁဵတ်းမေးၼွႆႉၼၼ်ႉၵေႃႉၼိုင်ႈဢေႃႈ။-

2မေးၼွႆႉမၼ်းၼၼ်ႉၽိတ်းပိူင်ႈမၼ်းလႄႈ ၽၢတ်ႇယၢၼ်ၵၼ်တင်းမၼ်းၵႂႃႇၵႃႈတီႈႁိူၼ်းပေႃႈတူဝ်ၸဝ်ႈၵဝ်ႇ ၵႃႈတီႈဝဵင်း ပႅတ်ႉလႁႅမ်ႇ ၼႂ်းဢိူင်ႇ ယူႉတႃႉ ၼၼ်ႉသေယဝ်ႉ၊ ယူႇၵႃႈတီႈၼၼ်ႈသီႇလိူၼ်ဢေႃႈ။-

3မိူဝ်ႈဢၼ်ၽူဝ်မၼ်းၼၼ်ႉလုၵ်ႉလႄႈ ပႃးဢဝ်တင်းၵူၼ်းဢွၼ်ႇၵေႃႉၼိုင်ႈ ဢိၵ်ႇတင်းလီႈသွင်တူဝ်သေလႄႈ ၸွမ်းၵႂႃႇႁႂ်ႈလႆႈၶျေႃးဝွၼ်းမၼ်းၼၼ်ႉလႄႈ ဢဝ်မၼ်းၼၼ်ႉၶိုၼ်းမႃးၼၼ်ႉၸိုင် မၼ်းၼၼ်ႉဢဝ်မၼ်းသႂၢင်းၶဝ်ႈၵႃႈၼႂ်းႁိူၼ်းပေႃႈတူဝ်ၸဝ်ႈၵဝ်ႇလႄႈ ပေႃႈမၼ်းၼၼ်ႉထူပ်းႁၼ်လုၵ်ႈၶူၺ်သေယဝ်ႉ၊ မီးၸႂ်ဢၼ်ၸူမ်းသိူဝ်း ၼႂ်းတၢင်းဢၼ်ထူပ်းႁၼ်ၼၼ်ႉဢေႃႈ။-

4ပိူဝ်ႈၼႆလႄႈ ပူႇၼၢႆးမၼ်းဢၼ်ဝႃႈ ပေႃႈမႄႈယိင်းၼၼ်ႉႁပ်ႉဢဝ်မၼ်းလႄႈ မၼ်းယူႇၵႃႈတီႈပူႇၼၢႆးမၼ်းၼၼ်ႉ သၢမ်ဝၼ်းတဵမ်တဵမ်ဢေႃႈ။ ၼင်ႇၼၼ်လႄႈ ၶဝ်ၵိၼ်ၶူပ်းယူႇ၊ ၼွၼ်းယူႇၵႃႈတီႈၼၼ်ႈဢေႃႈ။-

5ဝၼ်းၸတုၵ်ႉထႃႉၼၼ်ႉ မိူဝ်ႈဢၼ်ၶဝ် လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ မၼ်းမႄးႁႅၼ်းႁႂ်ႈလႆႈဢွၵ်ႇၵႂႃႇၼၼ်ႉၸိုင်၊ ပေႃႈမႄႈယိင်းၼၼ်ႉ လၢတ်ႈတီႈလုၵ်ႈၶူၺ်လႄႈဝႃႈ၊ ၵိၼ်ၶဝ်ႈမုၼ်းသေဢိတ်းၼိုင်ႈလႄႈ ႁႂ်ႈၸႂ်လီသေယဝ်ႉၸင်ႇၵႂႃႇသေၵမ်း၊ ဝႃႈၼင်ႇၼႆလႄႈ၊-

6သွင်ၶႃၼၼ်ႉၼင်ႈယူႇ၊ ၵိၼ်ၶူပ်းယူႇသေလႄႈ ယူႇတင်းသွင်ၵေႃႉဢေႃႈ။ ပေႃႈမႄႈယိင်းၼၼ်ႉၵေႃႈလၢတ်ႈတီႈလုၵ်ႈၶူၺ်လႄႈဝႃႈ၊ ၶျႃးၸႂ်သေၵမ်း။ ၶိုၼ်းၼႆႉၵေႃႈႁႂ်ႈပူၼ်ႉသေလႄႈ မူၼ်ႈၸႂ်ပျေႃႇၸႂ်လႄႈယူႇသေၵမ်း၊ ဝႃႈၼင်ႇၼႆဢေႃႈ။-

7မိူဝ်ႈဢၼ်မၼ်းသမ်ႉလုၵ်ႉႁႂ်ႈလႆႈၵႂႃႇၼၼ်ႉၸိုင်၊ ပူႇၼၢႆးမၼ်းတိုၵ်းယူင်းၸူဝ်းဢဝ်မၼ်းလႄႈ မၼ်းသမ်ႉၶိုၼ်းၼွၼ်းၵႃႈတီႈၼၼ်ႈဢေႃႈ။-

8ဝၼ်းပိၼ်ႇၸမႃႉၼၼ်ႉ မိူဝ်ႈဢၼ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉ ႁႂ်ႈလႆႈၵႂႃႇၼၼ်ႉၸိုင်၊ ပေႃႈမႄႈယိင်းၼၼ်ႉသမ်ႉလၢတ်ႈထႅင်ႈလႄႈဝႃႈ၊ ႁႂ်ႈၸႂ်လီသေလႄႈယူႇတေႃႇထိုင်ႁွတ်ႈၵၢင်ဝၼ်းၸၢႆႉသေၵမ်း၊ ဝႃႈၼင်ႇၼႆသေယဝ်ႉ၊ သွင်ၶႃၼၼ်ႉသမ်ႉၵိၼ်ၶူပ်းယူႇထႅင်ႈတင်းသွင်ၵေႃႉဢေႃႈ။-

9မိူဝ်ႈဢၼ်ၵေႃႉၼၼ်ႉဢိၵ်ႇတင်းမေးၼွႆႉမၼ်း တင်းၵူၼ်းဢွၼ်ႇမၼ်းသမ်ႉၶိုၼ်းဢွၼ်ၵၼ်လုၵ်ႉႁႂ်ႈလႆႈၵႂႃႇၼၼ်ႉၸိုင်၊ ပေႃႈမႄႈယိင်း ဢၼ်ပဵၼ်ပူႇၼၢႆးမၼ်းၼၼ်ႉလၢတ်ႈလႄႈဝႃႈ၊ တူၺ်းလူး၊ ၵၢင်ဝၼ်းၸမ်တၵ်းၶမ်ႈယဝ်ႉ။ ၶိုၼ်းၼႆႉၵေႃႈယူႇလႄႈႁႂ်ႈပူၼ်ႉသေၵမ်း။ ၶိင်ႇၵၢင်ဝၼ်း ၸမ်တၵ်းသဵင်ႈယဝ်ႉ။ ၼွၼ်းၵႃႈတီႈၼႆႈသေလႄႈမူၼ်ႈၸႂ်ပျေႃႇၸႂ်ယူႇသေၵမ်း။ မိူဝ်ႈၽုၵ်ႈလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ၶိုၼ်းမိူဝ်းၵႂႃႇၵႃႈတီႈ တီႈယူႇတူဝ်ၸဝ်ႈၵဝ်ႇသေၵမ်း၊ ဝႃႈၼင်ႇၼႆသေၵေႃႈ၊-

10မၼ်းယင်းဢမ်ႇႁႂ်ႈပူၼ်ႉၶိုၼ်းၼၼ်ႉသေလႄႈလုၵ်ႉလႄႈဢွၵ်ႇၵႂႃႇသေယဝ်ႉ၊ ႁွတ်ႈထိုင်ၵႃႈတီႈႁိမ်းဝဵင်း ယေႇပုတ်ႉ ဢၼ်ဝႃႈ ဝဵင်း ယေႇရူႉသလႅမ်ႇ ၼၼ်ႉလႄႈ လီႈဢၼ်တၢင်ႇၵွပ်းသွင်တူဝ် ဢိၵ်ႇတင်းမေးၼွႆႉမၼ်းၵေႃႈ ပႃးတီႈမၼ်းယူႇဢေႃႈ။

11မိူဝ်ႈဢၼ်ၶဝ်ႁွတ်ႈထိုင်ၵႃႈတီႈႁိမ်းဝဵင်း ယေႇပုတ်ႉ ၼၼ်ႉၸိုင် ၵွပ်ႈပိူဝ်ႈဢၼ်ၵၢင်ဝၼ်းၶမ်ႈလႄႈ ၵူၼ်းဢွၼ်ႇမၼ်းၼၼ်ႉ လၢတ်ႈတီႈၸဝ်ႈမၼ်းလႄႈဝႃႈ၊ မႃးသေၵမ်း။ ဝႄႉၶဝ်ႈၸူးၵႃႈၼႂ်းဝဵင်းၵူၼ်း ယေႇပူႉသီႉ ၸိူဝ်းၼႆႉသေလႄႈ ၼွၼ်းတႃႉႁဝ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

12ၸဝ်ႈမၼ်းလၢတ်ႈလႄႈဝႃႈ၊ ႁဝ်းတၵ်းဢမ်ႇဝႄႉၶဝ်ႈၸူးၵႃႈတီႈဝဵင်းၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ဢမ်ႇၸႂ်ႈမဵဝ်း ဢီႉသရေႇလႃႉ ယူႇၼၼ်ႉ။ တၵ်းၵႂႃႇၵႃႈတီႈဝဵင်း ၵီႉပႃႉ လူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။-

13မၼ်းၼၼ်ႉသမ်ႉလၢတ်ႈတီႈၵူၼ်းဢွၼ်ႇမၼ်းလႄႈဝႃႈ၊ ဝႄႉၶဝ်ႈၸူးၵႃႈတီႈဝဵင်းၸိူဝ်းၼႆႉသေဝဵင်းဝဵင်းလႄႈ ႁႂ်ႈပူၼ်ႉၶိင်ႇၵၢင်ၶိုၼ်းၼႆႉ ၵႃႈတီႈဝဵင်း ၵီႉပႃႉ ၊ ဢမ်ႇၼၼ် ၵႃႈတီႈဝဵင်း ရႃႇမႃႉ ၼၼ်ႉတႃႉႁဝ်း၊ ဝႃႈၼင်ႇၼႆသေလႄႈ၊-

14သမ်ႉပူၼ်ႉသေၵႃႈတီႈၼၼ်ႈၵႂႃႇလႄႈ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈႁိမ်းဝဵင်း ၵီႉပႃႉ ၼႂ်းဢိူင်ႇ ပိၼ်ႇယႃႇမိၼ်ႇ ၼၼ်ႉၸိုင် ၵၢင်ဝၼ်းတူၵ်းသေဢေႃႈ။-

15ၶဝ်ဝႄႉၸူးၵႃႈတီႈၼၼ်ႈ ႁႂ်ႈလႆႈၶဝ်ႈလႄႈႁႂ်ႈပူၼ်ႉၶိုၼ်းၵႃႈၼႂ်းဝဵင်း ၵီႉပႃႉ ၼၼ်ႉလႄႈ မၼ်းၶဝ်ႈၵႃႈၼႂ်းဝဵင်းၼၼ်ႉသေယဝ်ႉ၊ ၼင်ႈယူႇၵႃႈတီႈၵၢင်တၢင်းဝဵင်း ၵွပ်ႈပိူဝ်ႈဢၼ်ၽူႈလႂ်ဢမ်ႇပႆႇႁပ်ႉဢဝ်ၵႂႃႇသႂၢင်းၶဝ်ႈၵႃႈၼႂ်းႁိူၼ်းမၼ်း ႁႂ်ႈလႆႈသွၼ်ႈပိုင်ႈယူႇၼၼ်ႉဢေႃႈ။-

16မိူဝ်ႈၼၼ်ႉ ၵူၼ်းထဝ်ႈၵေႃႉၼိုင်ႈ လုၵ်ႉသေၵႃႈတီႈဢၼ်ႁဵတ်းႁႆႊႁဵတ်းၼႃးၼၼ်ႉမႃးၶိင်ႇမိူဝ်ႈဢၼ်ၵၢင်ဝၼ်းၶမ်ႈၼၼ်ႉဢေႃႈ။ ၵေႃႉၼၼ်ႉပဵၼ်ၵူၼ်းႁၢၼ်ႉလွႆ ဢေႇၽရိမ်ႇ လႄႈ သွၼ်ႈပိုင်ႈယူႇၵႃႈတီႈဝဵင်း ၵီႉပႃႉ ၼၼ်ႉဢေႃႈ။ ၵူၼ်းဝဵင်းတင်းလၢႆၼၼ်ႉ ပဵၼ်ၵူၼ်းမဵဝ်း ပိၼ်ႇယႃႇမိၼ်ႇ ဢေႃႈ။-

17မၼ်းၼၼ်ႉမုင်ႈတူၺ်းလႄႈႁၼ်ၶႅၵ်ႇၵေႃႉၼိုင်ႈ မီးယူႇၵႃႈတီႈၵၢင်တၢင်းဝဵင်းၼၼ်ႉသေယဝ်ႉ၊ ၵူၼ်းထဝ်ႈၼၼ်ႉတွင်ႈထၢမ်လႄႈဝႃႈ၊ မႂ်းတၵ်းၵႂႃႇၵႃႈတီႈလႂ်။ မႂ်းလုၵ်ႉၵႃႈတီႈလႂ်မႃး၊ မိူဝ်ႈဢၼ်ဝႃႈၼင်ႇၼႆၸိုင်၊-

18မၼ်းၶိုၼ်းလၢတ်ႈလႄႈဝႃႈ၊ ႁဝ်းၶႃႈလုၵ်ႉသေၵႃႈတီႈဝဵင်း ပႅတ်ႉလႁႅမ်ႇ ၼႂ်းဢိူင်ႇ ယူႉတႃႉ ၵႂႃႇၵႃႈတီႈႁိမ်းၸဵင်ႇလႅၼ်သုတ်းႁၢၼ်ႉလွႆ ဢေႇၽရိမ်ႇ ၼၼ်ႉၶႃႈဢေႃႈ။ ၵဝ်ၶႃႈၼႆႉပဵၼ်ၵူၼ်းၵႃႈတီႈၼၼ်ႈၶႃႈဢေႃႈ။ ၵဝ်ၶႃႈၵႂႃႇၵႃႈတီႈဝဵင်း ပႅတ်ႉလႁႅမ်ႇ ၼႂ်းဢိူင်ႇ ယူႉတႃႉ သေယဝ်ႉ၊ တေႃႈလဵဝ်ၼႆႉ ၵဝ်ၶႃႈၵႂႃႇၸူးၵႃႈတီႈႁိူၼ်းထႃႇဝရႃႉၽြႃးၶႃႈဢေႃႈ။ ၽူႈလႂ်ဢမ်ႇပႆႇဢဝ်ၵဝ်ၶႃႈၵႂႃႇသႂၢင်းၶဝ်ႈၵႃႈၼႂ်းႁိူၼ်းမၼ်းၶႃႈ။-

19ယိူဝ်ႈႁႅင်ႈဢိၵ်ႇတင်းတၢင်ႇၸိူဝ်ႉတၢင်ႇပိူင်ပုၼ်ႈဢၼ်တၵ်းလဵင်ႉတၵ်းဢွႆႇလီႈၵေႃႈ မီးယဝ်ႉၶႃႈဢေႃႈ။ ၶဝ်ႈမုၼ်းဢိၵ်ႇတင်းၼမ်ႉၸပိတ်ႈပုၼ်ႈၵဝ်ၶႃႈ၊ ဢိၵ်ႇတင်းမႄႈယိင်းၶႃႈၸဝ်ႈႁဝ်း တင်းၵူၼ်းဢွၼ်ႇဢၼ်ၸွမ်းမႃးလူၺ်ႈၵၼ်တင်းၶႃႈၸဝ်ႈႁဝ်းၸိူဝ်းၼႆႉၵေႃႈ မီးယဝ်ႉၶႃႈဢေႃႈ။ ဢမ်ႇလူဝ်ႇထႅင်ႈသေၸိူဝ်ႉသေပိူင်ၶႃႈ၊ ဝႃႈၼင်ႇၼႆဢေႃႈ။-

20ၵူၼ်းထဝ်ႈၼၼ်ႉၵေႃႈ လၢတ်ႈလႄႈဝႃႈ၊ ႁႂ်ႈၵတ်းယဵၼ်ၶျၢမ်းသႃႇမီးတီႈမႂ်းသေၵမ်းလူၺ်ႈ။ ၵႃႈဢၼ်မႂ်းလူဝ်ႇၼၼ်ႉၸိုင် ႁႂ်ႈမီးပုၼ်ႈတႃႇၵဝ်တႃႉ။ ၵူၺ်းၵွမ်ႉယႃႇပေႁႂ်ႈပူၼ်ႉၶိုၼ်းၵႃႈတီႈၵၢင်တၢင်းၼႆႉသေၵမ်း၊ ဝႃႈၼင်ႇၼႆသေယဝ်ႉ၊-

21ဢဝ်မၼ်းၵႂႃႇသႂၢင်းၶဝ်ႈၵႃႈၼႂ်းႁိူၼ်းတူဝ်ၸဝ်ႈၵဝ်ႇသေလႄႈ လဵင်ႉဢွႆႇပၼ်လီႈမၼ်းၸိူဝ်းၼၼ်ႉဢေႃႈ။ ၶဝ်ၵေႃႈသုၵ်ႈတိၼ်သေလႄႈ ၵိၼ်ၶူပ်းဢေႃႈ။

22ၼႂ်းမိူဝ်ႈဢၼ်ၶဝ်ယင်းတိုၵ်ႉမီးတၢင်းဢၼ်မူၼ်ႈၸႂ်ပျေႃႇၸႂ်ၸိူဝ်ႉၼင်ႇၼၼ်ယူႇၼၼ်ႉၸိုင်၊ ၵူၼ်းဝဵင်းၼၼ်ႉ ဢၼ်ပဵၼ်ၵူၼ်းဢႃႉထမ်ႇမႃႉၼၼ်ႉၵမ်ႈၽွင်ႈ ဢွၼ်ၵၼ်လွမ်ႉႁွပ်ႈႁိူၼ်းသေလႄႈ ပေႃႉထုပ်ႉၽၵ်းတူဢေႃႈ။ တီႈၵူၼ်းထဝ်ႈၸဝ်ႈႁိူၼ်းၼၼ်ႉၵေႃႈ ၶဝ်ႁွင်ႉလႄႈဝႃႈ၊ ဢဝ်ၵူၼ်းၸၢႆးဢၼ်ၶဝ်ႈၵႃႈတီႈႁိူၼ်းမႂ်းၼႆႉၼၼ်ႉဢွၵ်ႇမႃး ႁႂ်ႈႁဝ်းလႆႈႁူႉမၼ်းတႃႉ၊ ဝႃႈၼင်ႇၼႆဢေႃႈ။-

23ၸဝ်ႈႁိူၼ်းၼၼ်ႉၵေႃႈဢွၵ်ႇၸူးတီႈၶဝ်သေလႄႈ တွင်းပၢၼ်ႇလႄႈဝႃႈ၊ ပီႈၼွင်ႉၶဝ်ဢိူၺ်း၊ ယႃႇပေႁဵတ်းဢမူႉဢၼ်ႁုၵ်းဢၼ်ႁၢႆႉၸိူဝ်ႉၼင်ႇၼႆသေၵမ်း၊ ၵွပ်ႈပိူဝ်ႈဢၼ်ၵေႃႉၼႆႉပဵၼ်ၵေႃႉဢၼ်သွၼ်ႈပိုင်ႈၵႃႈတီႈႁိူၼ်းၵဝ်ၶႃႈလႄႈ ယႃႇပေႁဵတ်းတၢင်းဢၼ်ယုတ်ႈဢၼ်မိူၵ်ႈၼႆႉသေၵမ်း။-

24တူၺ်းလူး၊ ၵႃႈတီႈၼႆႈမီးလုၵ်ႈယိင်းသၢဝ်ၵဝ်ၶႃႈ ဢၼ်ပဵၼ်ၵၼ်ႇၺႃႇဢိၵ်ႇတင်းမေးၼွႆႉမၼ်းၼၼ်ႉၶႃႈဢေႃႈ။ ၵဝ်ၶႃႈတၵ်းဢဝ်ၶဝ်ဢွၵ်ႇလႄႈပၼ်ၶႃႈဢေႃႈ။ ယႃႉသရေႇၶဝ်သေၵမ်း။ ႁဵတ်းၸွမ်းၵႃႈၼင်ႇဢၼ်သူမီးဢလူဝ်ႇၼၼ်ႉတီႈၶဝ်သေၵမ်း၊ ၵူၺ်းၵႃႈ ယႃႇပေႁဵတ်းဢမူႉဢၼ်ယုတ်ႈဢၼ်မိူၵ်ႈၸိူဝ်ႉၼင်ႇၼႆတီႈၵေႃႉၼၼ်ႉသေၵမ်း၊ ဝႃႈၼင်ႇၼႆသေၵေႃႈ၊-

25ၶဝ်ဢမ်ႇထွမ်ႇဢမ်ႇဢဝ်ၵႂၢမ်းမၼ်း။ ပိူဝ်ႈၼႆလႄႈ ၵေႃႉၼၼ်ႉ ဢဝ်မေးၼွႆႉမၼ်းဢွၵ်ႇပၼ်တီႈၶဝ်သေလႄႈ၊ ၶဝ်ၼၼ်ႉႁူႉမၼ်းလႄႈ ႁဵတ်းဢႃႉထမ်ႇမႃႉတီႈမၼ်းတင်းၶိုၼ်းတေႃႇထိုင်ႁွတ်ႈၶိင်ႇၵၢင်ၼႂ်သေယဝ်ႉ၊ ႁူဝ်မိူင်းသႂ်ၸင်ႇပွႆႇမၼ်းသေဢေႃႈ။-

26မိူဝ်ႈဢၼ်ႁူဝ်မိူင်းသႂ်ၼၼ်ႉၸိုင်၊ မႄႈယိင်းၼၼ်ႉမႃးလႄႈ လူမ်ႉယူႇၵႃႈတီႈၽၢႆႇၼႃႈၽၵ်းတူႁိူၼ်းတီႈဢၼ်ၸဝ်ႈမၼ်းမီးၼၼ်ႉသေလႄႈ ယူႇတေႃႇထိုင်ႁွတ်ႈမိူင်းလႅင်းယဝ်ႉၼၼ်ႉဢေႃႈ။-

27ၶိင်ႇၵၢင်ၼႂ်ၼၼ်ႉ၊ ၸဝ်ႈမၼ်းၼၼ်ႉလုၵ်ႉလႄႈ ၽုၺ်ႇၽၵ်းတူႁိူၼ်းသေယဝ်ႉ ဢွၵ်ႇႁႂ်ႈလႆႈၵႂႃႇတၢင်းပႆတၢင်းလႄႈ ႁၼ်မေးၼွႆႉမၼ်းၼၼ်ႉ လူမ်ႉဝႆႉယူႇၵႃႈတီႈၽၢႆႇၼႃႈၽၵ်းတူႁိူၼ်းလႄႈ ဢဝ်မိုဝ်းတၢင်ႇၵႃႈၼိူဝ်ၶူင်ႇၽၵ်းတူယူႇၼၼ်ႉသေယဝ်ႉ၊-

28လၢတ်ႈလႄႈဝႃႈ၊ လုၵ်ႉလႄႈၵႂႃႇတႃႉႁဝ်း၊ ဝႃႈၼင်ႇၼႆသေၵေႃႈ၊ မၼ်းၼၼ်ႉယင်းဢမ်ႇၶိုၼ်းလၢတ်ႈလႄႈယူႇဢေႃႈ။ မိူဝ်ႈၼၼ်ႉ ၵူၼ်းၸၢႆးၼၼ်ႉ ဢဝ်မၼ်းၼၼ်ႉတၢင်ႇၵႃႈၼိူဝ်လီႈသေလႄႈ လုၵ်ႉၵႂႃႇၸူးၵႃႈတီႈ တီႈယူႇမၼ်းဢေႃႈ။-

29မိူဝ်ႈဢၼ်မၼ်းႁွတ်ႈထိုင်ၵႃႈၼႂ်းႁိူၼ်းမၼ်းၼၼ်ႉၸိုင်၊ မၼ်းဢဝ်လၢပ်ႇလႄႈယိပ်းၵမ်ဢဝ်မေးၼွႆႉမၼ်းၼၼ်ႉသေယဝ်ႉ တႅပ်းတူဝ်မၼ်းၼၼ်ႉ ၸွမ်းလူၺ်ႈပွင်ႈလုပ်ႇမၼ်းတင်းလၢႆ ႁဵတ်းသိပ်းသွင်ပွတ်းသေလႄႈ ဢဝ်ပၼ်ၵႂႃႇၵႃႈၼႂ်းမိူင်း ဢီႉသရေႇလႃႉ ၵူႈတီႈၵူႈလႅၼ်ဢေႃႈ။-

30ၼင်ႇၼၼ်လႄႈ ၶဝ်ၸိူဝ်းဢၼ်ႁူႉႁၼ်ၵႃႈမီးၼၼ်ႉ ဢွၼ်ၵၼ်လၢတ်ႈလႄႈဝႃႈ၊ ၸႃႉၸဵမ်ဝၼ်းဢၼ် ၵူၼ်းမဵဝ်း ဢီႉသရေႇလႃႉ တင်းလၢႆ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉလႄႈ တေႃႇထိုင်ႁွတ်ႈဝၼ်းမိူဝ်ႈၼႆႉ ၽူႈလႂ်ဢမ်ႇႁဵတ်းဢမူႉၸိူဝ်ႉၼင်ႇၼႆသေၵေႃႉသေၵူၼ်း။ ၽူႈလႂ်ဢမ်ႇပႆႇတွၼ်ႉႁၼ်သေၽဝ်ႇသေပွၵ်ႈ။ ဢွၼ်ၵၼ်ၶႆႈၸႂ်ဝူၼ်ႉၸႂ်လႄႈ တိူင်ႇပၢင်ႇၸီႇယၢင်ႇတႃႉ၊ ဝႃႈၼင်ႇၼႆဢေႃႈ။

← Chapter 18 Jump to: Chapter 20 →