Judges 2

Shan

← Chapter 1 Jump to: Chapter 3 →

1တမၢၼ်ႇထႃႇဝရႃႉၽြႃး လုၵ်ႉသေၵႃႈတီႈဝဵင်း ၵီႉလႃႉၵႃႇလႃႉ မႃးၵႃႈတီႈဝဵင်း ပေႃႇၶိမ်း လႄႈ မီးဢမိင်ႉလႄႈဝႃႈ၊ ၵဝ်ဢဝ်သူဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃး ၵႃႈတီႈမိူင်းဢၼ်ၵဝ်တိူင်ႇဝႃႈဝႆႉတီႈပူႇမွၼ်ႇသူၸိူဝ်းၼၼ်ႉၼႆႉယဝ်ႉ။ ၵဝ်လႆႈဝႃႈ၊ ၵဝ်တၵ်းဢမ်ႇယႃႉပတီႉၺိၺ်ႇ ဢၼ်ၵဝ်ႁဵတ်းဝႆႉလူၺ်ႈၵၼ်တင်းသူၼၼ်ႉပႅတ်ႈလႄႈ ယူႇတႃႇသေႇဢမ်ႇထၢတ်ႇဢေႃႈ။-

2သူဢမ်ႇလႆႈႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ် တင်းၵူၼ်းဝၢၼ်ႈၵူၼ်းမိူင်းၼႆႉၸိူဝ်းၼၼ်ႉ။ သူတၵ်းလႆႈၵိူၼ်ႇယႃႉယိတ်ႈပလၢင်ႇၶဝ်ပႅတ်ႈသေဢေႃႈ၊ ဝႃႈၼင်ႇၼႆသေၵေႃႈ၊ သူဢမ်ႇထွမ်ႇဢမ်ႇဢဝ်ၵႂၢမ်းၵဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူႁဵတ်းၸိူဝ်ႉၼင်ႇၼႆၼင်ႇႁိုဝ်။-

3ပိူဝ်ႈၼႆလႄႈ ၵဝ်သမ်ႉလႆႈဝႃႈ၊ ၵဝ်တၵ်းဢမ်ႇႁေႃႈၶဝ်ၼၼ်ႉဢွၵ်ႇပႅတ်ႈသေၵႃႈတီႈၽၢႆႇၼႃႈသူ။ ၶဝ်ၼၼ်ႉတၵ်းပဵၼ်ၼၢမ်လႅမ်ၵႃႈတီႈပဵမ်ႉသူလႄႈ ၽြႃးၶဝ်ၼၼ်ႉၵေႃႈ တၵ်းပဵၼ်တူင်ႇႁႅဝ်ႉတူင်ႇၶိုမ်းၵႃႈတီႈသူဢေႃႈ၊ ဝႃႈၼင်ႇၼႆဢေႃႈ။-

4မိူဝ်ႈဢၼ်တမၢၼ်ႇထႃႇဝရႃႉၽြႃး မီးဢမိင်ႉၸိူဝ်ႉၼင်ႇၼႆတီႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉၸိုင် ၵူၼ်းတင်းလၢႆဢွၼ်ၵၼ်ၵိဝ်သဵင်သေလႄႈႁွင်ႉႁႆႈဢေႃႈ။-

5တီႈၼၼ်ႈၸိုင် ၶဝ်ႁွင်ႉႁဵၵ်ႈၸိုဝ်ႈ ပေႃႇၶိမ်း လႄႈ ဢွၼ်ၵၼ်ပုၵ်ႈၸေႃႇယိတ်ႈတီႈထႃႇဝရႃႉၽြႃး ၵႃႈတီႈၼၼ်ႈဢေႃႈ။

6မိူဝ်ႈၼၼ်ႉ မိူဝ်ႈဢၼ် ယေႃးသူႉ ပွႆႇၵူၼ်းတင်းလၢႆၼၼ်ႉၸိုင် ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉႁင်းၽႂ်ႁင်းမၼ်း ဢွၼ်ၵၼ်ၵႂႃႇၸူးၵႃႈတီႈဢမူၺ်ႇၶဝ် ႁႂ်ႈလႆႈသိမ်းဢဝ်လိၼ်ၶဝ်ဢေႃႈ။-

7ၼႂ်းၸူဝ်ႈပၢၼ် ယေႃးသူႉ ၼၼ်ႉ ဢိၵ်ႇတင်းၼႂ်းၸူဝ်ႈပၢၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ဢၼ်ဢသၢၵ်ႈလိပ်းယူႇ လိုၼ်း ယေႃးသူႉ လႄႈ ႁၼ်လွင်ႈတၢင်းၵႃႈဢၼ် ထႃႇဝရႃႉၽြႃးႁဵတ်းပုၼ်ႈမဵဝ်း ဢီႉသရေႇလႃႉ ၼၼ်ႉၸိူဝ်းၼၼ်ႉ၊ ၵူၼ်းတင်းလၢႆႁဵတ်းဝၢတ်ႈတီႈထႃႇဝရႃႉၽြႃးဢေႃႈ။-

8ယေႃးသူႉ လုၵ်ႈၸၢႆး ၼုၼ်ႇ ၶႃႈထႃႇဝရႃႉၽြႃးၼၼ်ႉ ဢသၢၵ်ႈလႆႈပၢၵ်ႇပၢႆသိပ်းပီႊသေယဝ်ႉ ႁွတ်ႈဢၼိၵ်ႈၸႃႉသေဢေႃႈ။-

9ၶဝ်ဢဝ်မၼ်းသၢင်းၵျူဝ်ႇၵႃႈတီႈလိၼ်တီႈဢၼ်မၼ်းၶၢမ်ႇဢမူၺ်ႇ ၵႃႈၼႂ်းဝဵင်း တီႉမၼႃႇႁေႇရိတ်ႉ ဢၼ်မီးၵႃႈၼိူဝ်ႁၢၼ်ႉလွႆ ဢေႇၽရိမ်ႇ ၽၢႆႇတၢင်းႁွင်ႇၵုင်း ၵႃႇသႃႉ ၼၼ်ႉဢေႃႈ။-

10ၵူၼ်းၵႃႈဢၼ်ပဵၼ်ၼႂ်းၸူဝ်ႈပၢၼ်ၼၼ်ႉၵေႃႈ ႁွတ်ႈထိုင်ၵႃႈတီႈဢၼ်ၵူၼ်းမဵဝ်းၶဝ် ၸူႉတုမ်ၼၼ်ႉသေသဵင်ႈဢေႃႈ။ ၵူၼ်းဢၼ်ပဵၼ်သိုပ်ႇလိုၼ်းၶဝ် ဢၼ်ဢမ်ႇႁူႉထႃႇဝရႃႉၽြႃး ဢိၵ်ႇတင်းလွင်ႈတၢင်းဢၼ်မၼ်းၸဝ်ႈႁဵတ်းပုၼ်ႈမဵဝ်း ဢီႉသရေႇလႃႉ ၸိူဝ်းၼၼ်ႉၼၼ်ႉပေႃႇမႃးဢေႃႈ။

11မိူဝ်ႈၼၼ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ ႁဵတ်းတူႉၸရိူၵ်ႈၵႃႈတီႈၽၢႆႇၼႃႈထႃႇဝရႃႉၽြႃးလႄႈ ဢွၼ်ၵၼ်ႁဵတ်းဝၢတ်ႈတီႈၽြႃး ပႃႇလႃႉ တင်းလၢႆဢေႃႈ။-

12ၶဝ်ၸုၼ်ႉပႅတ်ႈထႃႇဝရႃႉၽြႃး ၽြႃးပဵၼ်ၸဝ်ႈပူႇမွၼ်ႇၶဝ် ဢၼ်ၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉသေလႄႈ ၸွမ်းလင်ၽြႃးတၢင်ႇသူႇတၢင်ႇပႃး ဢၼ်ၶဝ်ႈပႃးၵႃႈၼႂ်းၽြႃးၵူၼ်းမဵဝ်းဢၼ်ယူႇ ၵႃႈတီႈႁိမ်းႁွမ်းလဵပ်ႈႁွပ်ႈၶဝ်ၼၼ်ႉလႄႈ ၵူမ်ႈႁူဝ်ၵွမ်းႁူဝ်သေလႄႈ တိုၵ်းယူင်း တၢင်းၸႂ်မႆႈၶႆႈၸႃႉထႃႇဝရႃႉၽြႃးဢေႃႈ။-

13ၶဝ်ဢွၼ်ၵၼ်ၸုၼ်ႉပႅတ်ႈထႃႇဝရႃႉၽြႃးလႄႈ ႁဵတ်းဝၢတ်ႈတီႈၽြႃး ပႃႇလႃႉ တင်းၽြႃး ဢႃႇသတရိတ်ႉ ၸိူဝ်းၼၼ်ႉဢေႃႈ။-

14ပိူဝ်ႈၼႆလႄႈ တၢင်းၸႂ်မႆႈၶႆႈၸႃႉထႃႇဝရႃႉၽြႃး ဢွၵ်ႇႁႅင်းယႂ်ႇၼႃႇလူင်လၢင် တီႈမဵဝ်း ဢီႉသရေႇလႃႉ လႄႈ မၼ်းၸဝ်ႈဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ႁိမ်ဢဝ်ၶဝ်ၼၼ်ႉလႄႈ ဢဝ်ၶဝ်ၶၢႆပၼ်ၵႃႈၼႂ်းမိုဝ်းရၢၼ်ႇသူႇ ဢၼ်ယူႇလဵပ်ႈႁွပ်ႈၶဝ်ၼၼ်ႉသေလႄႈ လိုၼ်းၼၼ်ႉႁႂ်ႈၶဝ်ထၼ်ႈပေႃးဢမ်ႇၸုၵ်းၶၢမ်ႇယူႇၵႃႈတီႈၽၢႆႇၼႃႈရၢၼ်ႇသူႇၶဝ်လႆႈလႃးလႃး။-

15ၼႂ်းတီႈၵႃႈဢၼ်ၶဝ်ဢွၵ်ႇၵႂႃႇဢွၵ်ႇပႆၵူႈတီႈၵူႈလႅၼ်ၼၼ်ႉ မိုဝ်းထႃႇဝရႃႉၽြႃး ၸွမ်းႁႄႉၸွမ်းၶႅၼ်ၶဝ်ယူႇ ၸွမ်းၵႃႈၼင်ႇဢၼ် ထႃႇဝရႃႉၽြႃး ဢွၵ်ႇသူပ်းဝႃႈ ဢိၵ်ႇတင်းၸွမ်းၵႃႈၼင်ႇဢၼ် ထႃႇဝရႃႉၽြႃးတိူင်ႇဝႃႈဝႆႉတီႈၶဝ်ၼၼ်ႉလႄႈ ၶဝ်လႆႈႁွတ်ႈထိုင်တုၵ်ႉၶႃႉတၢင်းၽၢၼ်ၼႃႇလူင်လၢင်ဢေႃႈ။-

16ၼႂ်းဝႃႈၼၼ်သေၵေႃႈ ထႃႇဝရႃႉၽြႃး ႁႂ်ႈၵူၼ်းလူင်ဢၼ်ၸီႇယၢင်ႇတြႃး ဢၼ်ၵႄႇသႄႇဢဝ်ၶဝ်လွတ်ႈ သေၵႃႈၼႂ်းမိုဝ်းၶဝ်ၸိူဝ်းဢၼ်ႁိမ်ဢဝ်ၶဝ်ၼၼ်ႉၸိူဝ်းၼၼ်ႉ ပေႃႇဢွၵ်ႇပဵၼ်မႃးဢေႃႈ။-

17ၵူၺ်းၵႃႈ ၶဝ်ဢမ်ႇထွမ်ႇဢမ်ႇဢဝ်ၵႂၢမ်းၵူၼ်းလူင်ဢၼ်ၸီႇယၢင်ႇတြႃးၸိူဝ်းၼၼ်ႉ။ ၶဝ်ၽိတ်းပိူင်ႈလူၺ်ႈၵၼ်တင်းၽြႃးတၢင်ႇသူႇတၢင်ႇပႃးလႄႈ ဢွၼ်ၵၼ်ၵူမ်ႈႁူဝ်ၵွမ်းႁူဝ်ၶဝ်ၸူးဢေႃႈ။ ၶဝ်ဝႄႈပိူင်ႈသေၵႃႈတီႈသဵၼ်ႈတၢင်းဢၼ်ပူႇမွၼ်ႇၶဝ်တင်းလၢႆၵမ်ၵျၢင်ႉပိင်းၺၢပ်ႈထႃႇဝရႃႉၽြႃးလႄႈ ၸွမ်းယူႇၼၼ်ႉၵႂႃႇၶၼ်ၶၼ်ၽႂ်းၽႂ်းသေယဝ်ႉ၊ ဢမ်ႇၵမ်ၵျၢင်ႉၸိူဝ်ႉၼင်ႇၼၼ်။-

18မိူဝ်ႈဢၼ်ထႃႇဝရႃႉၽြႃး ႁႂ်ႈၵူၼ်းလူင်ဢၼ်ၸီႇယၢင်ႇတြႃးၸိူဝ်းၼၼ်ႉပေႃႇဢွၵ်ႇပဵၼ်မႃးၼၼ်ႉၸိုင် ထႃႇဝရႃႉၽြႃးမီးယူႇလူၺ်ႈၵၼ်တင်းၵူၼ်းလူင်ဢၼ်ၸီႇယၢင်ႇတြႃးၼၼ်ႉလႄႈ ၵႄႇသႄႇဢဝ်ၶဝ်လွတ်ႈသေၵႃႈၼႂ်းမိုဝ်းရၢၼ်ႇသူႇၶဝ်ၼၼ်ႉ ၼႂ်းၸူဝ်ႈပၢၼ်ၵူၼ်းလူင်ဢၼ်ၸီႇယၢင်ႇတြႃးၼၼ်ႉတဵမ်တဵမ်ဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃးၶုၵ်းၸႂ်လႆႈမႆႈၸႂ်လူၺ်ႈလွင်ႈတၢင်းဢၼ်ၶဝ်ၶၢင်းၶီၶၢင်းၽၢၼ် ၵွပ်ႈပိူဝ်ႈၶဝ်ၸိူဝ်းဢၼ်ယႃႉယူၵ်ႉၼိၵ်ႈၸၢၵ်ႈငႅၼ်းသႄးၶဝ်ၼၼ်ႉဢေႃႈ။-

19လိုၼ်းသေၵူၼ်းလူင်ဢၼ်ၸီႇယၢင်ႇတြႃးၼၼ်ႉတၢႆယဝ်ႉၼၼ်ႉ ၶဝ်ၼၼ်ႉသမ်ႉဝၢႆႇၶိုၼ်းလႄႈ ယဵင်ႈၶႅၼ်းႁၢႆႉမိူၵ်ႈၼႃႇသေပူႇမွၼ်ႇၶဝ်ၼၼ်ႉ ၼႂ်းလွင်ႈတၢင်းဢၼ်ၶဝ်ၸွမ်းလင်ၽြႃးတၢင်ႇသူႇတၢင်ႇပႃးႁႂ်ႈလႆႈႁဵတ်းဝၢတ်ႈတီႈၶဝ်ၼၼ်ႉလႄႈ ဢွၼ်ၵၼ်ၵူမ်ႈႁူဝ်ၵွမ်းႁူဝ်ၶဝ်ၸူးဢေႃႈ။ ၶဝ်ဢမ်ႇပႄႇဢမ်ႇပႅတ်ႈတၢင်းၵမ်တၢင်းၵျၢင်ႉၶဝ် ဢိၵ်ႇတင်းသဵၼ်ႈတၢင်းၶဝ် ဢၼ်ၽၢင်ႈၵႂႃႇတိူဝ်ႉၵႂႃႇၼၼ်ႉ။-

20တၢင်းၸႂ်မႆႈၶႆႈၸႃႉထႃႇဝရႃႉၽြႃး ဢွၵ်ႇႁႅင်းယႂ်ႇၼႃႇလူင်လၢင် တီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈ မၼ်းၸဝ်ႈမီးဢမိင်ႉလႄႈဝႃႈ၊ ၵွပ်ႈပိူဝ်ႈဢၼ်ၵူၼ်းမဵဝ်းၼႆႉဢမ်ႇထွမ်ႇဢမ်ႇဢဝ်ၵႂၢမ်းၵဝ်လႄႈ ပူၼ်ႉလိူဝ်ပတီႉၺိၺ်ႇဢၼ်ၵဝ်ႁဵတ်းလူၺ်ႈၵၼ်တင်းပူႇမွၼ်ႇၶဝ်ၼၼ်ႉယဝ်ႉလႄႈ၊-

21ၵမ်းလိုၼ်းၵဝ်တၵ်းဢမ်ႇႁေႃႈၵူၼ်းမဵဝ်းဢၼ်ၵိုတ်းၵျၢၼ်ႇ ဝၢႆးလိုၼ်းသေ ယေႃးသူႉ တၢႆယဝ်ႉၼၼ်ႉ ဢွၵ်ႇပႅတ်ႈသေၵႃႈတီႈၽၢႆႇၼႃႈၶဝ်သေၸိူဝ်ႉသေမဵဝ်း။-

22ႁႂ်ႈလႆႈဢဝ်ၶဝ်ၼၼ်ႉၸၢမ်းတူၺ်းမဵဝ်း ဢီႉသရေႇလႃႉ လွင်ႈဢၼ်ၶဝ်တၵ်းပႂ်ႉၵမ်ပႂ်ႉၵျၢင်ႉ ႁႂ်ႈလႆႈၸွမ်းသဵၼ်ႈတၢင်းထႃႇဝရႃႉၽြႃး မိူၼ်ၸိူဝ်ႉၼင်ႇဢၼ် ပူႇမွၼ်ႇၶဝ်ပႂ်ႉၵမ်ပႂ်ႉၵျၢင်ႉၼၼ်ႉဢေႃႈ၊ ဝႃႈၼင်ႇၼႆလႄႈ၊-

23ထႃႇဝရႃႉၽြႃးယင်းဢမ်ႇႁေႃႈၵူၼ်းမဵဝ်းၸိူဝ်းၼၼ်ႉဢွၵ်ႇပႅတ်ႈၶၼ်ၶၼ်ၽႂ်းၽႂ်းလႄႈ ႁႂ်ႈၵိုတ်းၵျၢၼ်ႇယူႇဢေႃႈ။ မၼ်းၸဝ်ႈဢမ်ႇဢဝ်ၶဝ်ၼၼ်ႉ ဢၢပ်ႈပၼ်ၵႃႈၼႂ်းမိုဝ်း ယေႃးသူႉ ၼၼ်ႉ။

← Chapter 1 Jump to: Chapter 3 →