Judges 16

Shan

← Chapter 15 Jump to: Chapter 17 →

1လိုၼ်းၼၼ်ႉ သၢမ်ႇသုၼ်ႇ ၵႂႃႇၵႃႈတီႈဝဵင်း ၵႃႇၸႃႉ လႄႈ ထူပ်းႁၼ်မႄႈမွၵ်ႇယႃႈသေယဝ်ႉ၊ ၶဝ်ႈၸူးၵႃႈတီႈမၼ်းၼၼ်ႉလႄႈယူႇဢေႃႈ။-

2ၵူၼ်းဝဵင်း ၵႃႇၸႃႉ ၸိူဝ်းၼၼ်ႉ ငိၼ်းလွင်ႈဢၼ် သၢမ်ႇသုၼ်ႇ ႁွတ်ႈထိုင်ၵႃႈတီႈၼၼ်ႈၼၼ်ႉသေယဝ်ႉ၊ ဢွၼ်ၵၼ်လွမ်ႉႁွပ်ႈမၼ်းဝႆႉယူႇ၊ လွမ်ၵျၢမ်ႇလွမ်တူၺ်းၵႃႈတီႈႁူးၽၵ်းတူဝဵင်းၼၼ်ႉတင်းၶိုၼ်းယူႇသေလႄႈ ယူႇတဵတ်ႇတဵတ်ႇယဵၼ်ယဵၼ်ယူႇတင်းၶိုၼ်းလႄႈဝႃႈ၊ ၶိင်ႇၵၢင်ၼႂ် မိူဝ်ႈဢၼ်မိူင်းလႅင်းၼၼ်ႉ ႁဝ်းတၵ်းဢဝ်မၼ်းတၢႆဢေႃႈ၊ ဝႃႈၼင်ႇၼႆဢေႃႈ။-

3သၢမ်ႇသုၼ်ႇ ၼၼ်ႉၼွၼ်းတေႃႇထိုင်ႁွတ်ႈၶိင်ႇတဵင်ႈၶိုၼ်းသေယဝ်ႉ၊ လုၵ်ႉၶိင်ႇမိူဝ်ႈဢၼ်တဵင်ႈၶိုၼ်းၼၼ်ႉလႄႈ ဢဝ်မႂ်ၽၵ်းတူဝဵင်း ဢိၵ်ႇတင်းသဝ်ၽၵ်းတူမၼ်းသွင်လႅမ်ႈသေလႄႈ ထူၺ်ႈဢဝ်ပႃးၵိူၼ်ႇၽၵ်းတူ ဢိၵ်ႇတင်းၵႃႈမီးၼၼ်ႉသေယဝ်ႉ တၢင်ႇသႂ်ႇၵႃႈၼိူဝ်ႁူဝ်မႃႇမၼ်းၵႂႃႇလႄႈ ပႅတ်ႈဝႆႉၵႃႈၼိူဝ်ပၢႆလွႆ ၵႃႈတီႈၽၢႆႇၼႃႈဝဵင်း ႁေႇပြုၼ်ႇ ဢေႃႈ။

4လိုၼ်းၼၼ်ႉ ႁိုင်တၢၼ်ႇတၢၼ်ႇသေယဝ်ႉ၊ မၼ်းၼၼ်ႉသမ်ႉ ငိၼ်းႁၵ်ႉငိၼ်းပႅင်းမႄႈယိင်းၵေႃႉၼိုင်ႈ ဢၼ်လႆႈၸိုဝ်ႈလႆႈသဵင် တေႇလီႉလႃႉ ဢၼ်ယူႇၵႃႈတီႈၶူင်ႈႁူၺ်ႈ ၸေႃႇရိၵ်ႉ ၼၼ်ႉဢေႃႈ။-

5ၶုၼ် ၽီႉလိတ်ႉတီႉ တင်းလၢႆ မႃးၸူးၵႃႈတီႈမႄႈယိင်းၼၼ်ႉလႄႈလၢတ်ႈလႄႈဝႃႈ၊ ၶျေႃးဝွၼ်းမၼ်းလႄႈ တွင်ႈထၢမ်ၸၢမ်းတူၺ်း လွင်ႈဢၼ်ႁႅင်းဢၼ်ယႂ်ႇတီႈမၼ်းၼၼ်ႉ တႄႇယူႇၵွပ်ႈပိူဝ်ႈလွင်ႈတၢင်းဢၼ်လႂ်၊ ဢိၵ်ႇတင်းလွင်ႈဢၼ်ႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ်လႄႈ ပႄႉၼႅင်ႇမၼ်းႁႂ်ႈလႆႈမတ်ႉၽုၵ်ႇဢဝ်မၼ်းလႄႈ ၼိၵ်ႈၸၢၵ်ႈငႅၼ်းသႄးမၼ်းလႆႈၼၼ်ႉသေၵမ်း။ ႁဝ်းတၵ်းၽွမ်ႉၵၼ်ပၼ်ငိုၼ်းႁဵင်ပၢႆပၢၵ်ႇၵျၢပ်ႈတီႈမႂ်းဢေႃႈ၊ ဝႃႈၼင်ႇၼႆဢေႃႈ။-

6တေႇလီႉလႃႉ ၵေႃႈ လၢတ်ႈတီႈ သၢမ်ႇသုၼ်ႇ လႄႈဝႃႈ၊ ၶႅၼ်းတေႃႈမွၵ်ႇလၢတ်ႈလွင်ႈဢၼ် ႁႅင်းဢၼ်ယႂ်ႇတီႈၸဝ်ႈၼၼ်ႉ တႄႇယူႇၵွပ်ႈပိူဝ်ႈလွင်ႈတၢင်းဢၼ်လႂ် ဢိၵ်ႇတင်းလွင်ႈဢၼ်တၵ်းလႆႈဢဝ်ၵႃႈသင်မတ်ႉၽုၵ်ႇၸဝ်ႈ ႁႂ်ႈၼိၵ်ႈၸၢၵ်ႈငႅၼ်းသႄးၸဝ်ႈလႆႈၸိူဝ်ႉၼင်ႇႁိုဝ်ၼၼ်ႉ တီႈၵဝ်ၶႃႈသေၵမ်း။ ၵဝ်ၶႃႈတွင်းပၢၼ်ႇဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

7သၢမ်ႇသုၼ်ႇ လၢတ်ႈတီႈမၼ်းလႄႈဝႃႈ၊ ပေႃးဢဝ်ၸိူၵ်ႈၼင်ဢၼ်လိပ်းၸဵတ်းသဵၼ်ႈ ဢၼ်ဢမ်ႇပႆႇႁႅင်ႈႁွင်သေပွၵ်ႈၼၼ်ႉ မတ်ႉၽုၵ်ႇၵဝ်ၸိုင် ႁႅင်းၵဝ်တၵ်းဢူၼ်ႈၵႂႃႇလႄႈ ၵဝ်တၵ်းပဵၼ်မိူၼ်ၸိူဝ်ႉၼင်ႇပိူၼ်ႈတၢင်ႇၵေႃႉၼၼ်ႉဢေႃႈ၊ ဝႃႈၼင်ႇၼႆဢေႃႈ။-

8မိူဝ်ႈၼၼ်ႉ ၶုၼ် ၽီႉလိတ်ႉတီႉ ၸိူဝ်းၼၼ်ႉ ဢဝ်ၸိူၵ်ႈၼင်ဢၼ်လိပ်းၸဵတ်းသဵၼ်ႈ ဢၼ်ဢမ်ႇပႆႇႁႅင်ႈႁွင်သေပွၵ်ႈၼၼ်ႉမႃးလႄႈ မႄႈယိင်းၼၼ်ႉဢဝ်မတ်ႉၽုၵ်ႇ သၢမ်ႇသုၼ်ႇ ဢေႃႈ။-

9မႄႈယိင်းၼၼ်ႉ ႁႂ်ႈၶဝ်ၸိူဝ်းဢၼ်လွမ်ပႂ်ႉလွမ်တူၺ်းမီးဝႆႉယူႇ ၵႃႈၼႂ်းလုၵ်းတၢင်းၼႂ်းၼၼ်ႉလႄႈ မၼ်းလၢတ်ႈလႄႈဝႃႈ၊ သၢမ်ႇသုၼ်ႇ ဢိူၺ်း၊ ၵူၼ်း ၽီႉလိတ်ႉတီႉ တင်းလၢႆမႃးတိုၵ်းၸဝ်ႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းတိုတ်ႉၸိူၵ်ႈၸိူဝ်းၼၼ်ႉၶၢတ်ႇ မိူၼ်ၸိူဝ်ႉၼင်ႇဢၼ်တိုတ်ႉမႆပၢၼ်ႇဢၼ်တိူဝ်ႉၽႆးၼၼ်ႉၶၢတ်ႇၼၼ်ႉဢေႃႈ။ ၼင်ႇၼၼ်လႄႈ ဢမ်ႇလႆႈႁူႉႁႅင်းမၼ်း။-

10တေႇလီႉလႃႉ ၵေႃႈ လၢတ်ႈတီႈ သၢမ်ႇသုၼ်ႇ လႄႈဝႃႈ၊ ၸဝ်ႈယဝ်ႉယွၵ်ႇၵဝ်ၶႃႈလႄႈ လၢတ်ႈၵႂၢမ်းမူႉသႃႇတီႈၵဝ်ၶႃႈယဝ်ႉ။ တေႃႈလဵဝ်ၼႆႉၶႅၼ်းတေႃႈလၢတ်ႈပၼ်လွင်ႈဢၼ် တၵ်းလႆႈဢဝ်ၵႃႈသင်မတ်ႉၽုၵ်ႇၸဝ်ႈၼၼ်ႉသေၵမ်း။ ၵဝ်ၶႃႈတွင်းပၢၼ်ႇဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

11မၼ်းလၢတ်ႈလႄႈဝႃႈ၊ ပေႃးဢဝ်ၸိူၵ်ႈဢၼ်မႂ်ႇဢၼ်ဢမ်ႇပႆႇတွၼ်ႉသုင်းသွင်ႇၼၼ်ႉ မတ်ႉၽုၵ်ႇၵဝ်ၼႃႇၼႃႇၸိုင်၊ ႁႅင်းၵဝ်တၵ်းဢူၼ်ႈၵႂႃႇလႄႈ ၵဝ်တၵ်းပဵၼ်မိူၼ်ၸိူဝ်ႉၼင်ႇပိူၼ်ႈတၢင်ႇၵေႃႉၼၼ်ႉဢေႃႈ၊ ဝႃႈၼင်ႇၼႆလႄႈ၊-

12တေႇလီႉလႃႉ ဢဝ်ၸိူၵ်ႈဢၼ်မႂ်ႇတင်းလၢႆလႄႈ ဢဝ်မတ်ႉၽုၵ်ႇမၼ်းသေယဝ်ႉ၊ လၢတ်ႈတီႈမၼ်းလႄႈဝႃႈ၊ သၢမ်ႇသုၼ်ႇ ဢိူၺ်း၊ ၵူၼ်း ၽီႉလိတ်ႉတီႉ တင်းလၢႆမႃးတိုၵ်းၸဝ်ႈဢေႃႈ၊ ဝႃႈၼင်ႇၼႆဢေႃႈ။ ၶဝ်ၸိူဝ်းဢၼ်လွမ်ပႂ်ႉလွမ်တူၺ်းၼၼ်ႉၵေႃႈ မီးဝႆႉယူႇၵႃႈၼႂ်းလုၵ်းတၢင်းၼႂ်းဢေႃႈ။ မၼ်းတိုတ်ႉၸိူၵ်ႈၼၼ်ႉၶၢတ်ႇသေၵႃႈတီႈၶႅၼ်မၼ်းၼၼ်ႉ မိူၼ်ၸိူဝ်ႉၼင်ႇမႆၶဵမ်ဢေႃႈ။-

13တေႇလီႉလႃႉ ၵေႃႈ လၢတ်ႈတီႈ သၢမ်ႇသုၼ်ႇ လႄႈဝႃႈ၊ တေႃႇထိုင်ႁွတ်ႈမိူဝ်ႈလဵဝ်ၼႆႉလႄႈ ၸဝ်ႈယဝ်ႉယွၵ်ႇၵဝ်ၶႃႈသေလႄႈ လၢတ်ႈမူႉသႃႇတီႈၵဝ်ၶႃႈယဝ်ႉ။ လၢတ်ႈပၼ်လွင်ႈဢၼ်တၵ်းလႆႈဢဝ်ၵႃႈသင်မတ်ႉၽုၵ်ႇၸဝ်ႈၼၼ်ႉတီႈၵဝ်ၶႃႈသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းလၢတ်ႈလႄႈဝႃႈ၊ ပေႃးဢဝ်ၶူၼ်ႁူဝ်ၵဝ်ၸဵတ်းယွမ်ႇၼႆႉတေႃးသႂ်ႇလေႃးၵႃႈၼႂ်းႁုၵ်ႇၸိုင် ႁႅင်းၵဝ်တၵ်းဢူၼ်ႈၵႂႃႇဢေႃႈ၊ ဝႃႈၼင်ႇၼႆဢေႃႈ။-

14မႄႈယိင်းၼၼ်ႉ ႁဵတ်းၸိူဝ်ႉၼင်ႇၼၼ်လႄႈ ဢဝ်တႅမ်တွၵ်ႇၸပ်းဝႆႉၵႃႈတီႈၵီႇသေလႄႈ လၢတ်ႈလႄႈဝႃႈ၊ သၢမ်ႇသုၼ်ႇ ဢိူၺ်း၊ ၵူၼ်း ၽီႉလိတ်ႉတီႉ တင်းလၢႆမႃးတိုၵ်းၸဝ်ႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ သၢမ်ႇသုၼ်ႇ တိုၼ်ႇလႄႈ ပႃးဢဝ်တႅမ်၊ သဝ်လၵ်းၵီႇ ဢိၵ်ႇတင်းၼိူဝ်ႉႁုၵ်ႇၸိူဝ်းၼၼ်ႉသေလႄႈၵႂႃႇဢေႃႈ။-

15မႄႈယိင်းၼၼ်ႉၵေႃႈ လၢတ်ႈလႄႈဝႃႈ၊ ၸဝ်ႈယင်းဢမ်ႇပႃးႁူဝ်ၸႂ်လႄႈ ႁဵတ်းၸိူဝ်ႉၼင်ႇႁိုဝ်လႄႈလၢတ်ႈလႄႈဝႃႈ၊ ၵဝ်ႁၵ်ႉမႂ်းဢေႃႈ၊ ဝႃႈၼင်ႇၼႆလႆႈၼင်ႇႁိုဝ်။ ၸဝ်ႈယဝ်ႉယွၵ်ႇၵဝ်ၶႃႈ တေႃႇထိုင်ႁွတ်သၢမ်ပွၵ်ႈယဝ်ႉ။ ဢမ်ႇပႆႇမွၵ်ႇလၢတ်ႈလွင်ႈဢၼ်ႁႅင်းဢၼ်ယႂ်ႇတီႈၸဝ်ႈၼၼ်ႉ တႄႇယူႇၵွပ်ႈပိူဝ်ႈလွင်ႈတၢင်းဢၼ်လႂ်ၼၼ်ႉ တီႈၵဝ်ၶႃႈလူင်ပႄႇ၊ ဝႃႈၼင်ႇၼႆဢေႃႈ။-

16ၼင်ႇၼၼ်လႄႈ ၵွပ်ႈပိူဝ်ႈဢၼ်မၼ်းၼၼ်ႉတုၵ်းတဝ်ယူႇၵူႈမိုဝ်ႉၵူႈဝၼ်းသေလႄႈ တိုၵ်းယူင်းမၼ်းယူႇၼၼ်ႉလႄႈ ႁူဝ်ၸႂ်မၼ်းပဵၼ်ဢၼ်ယၢပ်ႇဢၼ်ၽိုတ်ႇ တေႃႇထိုင်ႁွတ်ႈထၼ်ႈပေႃးဢသၢၵ်ႈမၼ်းၸမ်တၵ်းတၢႆၼၼ်ႉလႄႈ၊-

17မၼ်းၸင်ႇဢဝ်ၵႃႈဢၼ်မီးၵႃႈၼႂ်းႁူဝ်ၸႂ်မၼ်းၼၼ်ႉ လၢတ်ႈပၼ်လႄႈဝႃႈ၊ ၶူၼ်ႁူဝ်ၵဝ်ၼႆႉ ဢမ်ႇပႆႇတွၼ်ႉထႃသေပွၵ်ႈ။ ၸႃႉၸဵမ်ၵႃႈၼႂ်းတွင်ႉမႄႈၵဝ်လႄႈ ၵဝ်ပဵၼ်ၵူၼ်း ၼႃႇၸရီႉ ၽြႃးပဵၼ်ၸဝ်ႈဢေႃႈ။ ပေႃးထႃၶူၼ်ႁူဝ်ၵဝ်ၸိုင်၊ ႁႅင်းၵဝ်တၵ်းဢူၼ်ႈၵႂႃႇလႄႈ ၵဝ်တၵ်းပဵၼ်မိူၼ်ၸိူဝ်ႉၼင်ႇပိူၼ်ႈတၢင်ႇၵေႃႉၼၼ်ႉဢေႃႈ၊ ဝႃႈၼင်ႇၼႆဢေႃႈ။-

18တေႇလီႉလႃႉ ႁူႉႁၼ်လွင်ႈဢၼ်မၼ်းဢဝ်ၵႃႈဢၼ်မီး ၵႃႈၼႂ်းႁူဝ်ၸႂ်မၼ်းၼၼ်ႉလၢတ်ႈပၼ်ၼၼ်ႉသေယဝ်ႉ၊ သမ်ႉပွႆႇၸႂ်ႉလႄႈ ႁွင်ႉဢဝ်ၶုၼ် ၽီႉလိတ်ႉတီႉ ၸိူဝ်းၼၼ်ႉလႄႈ သင်ႇလၢတ်ႈၵႂႃႇလႄႈဝႃႈ၊ မႃးထႅင်ႈပွၵ်ႈၼိုင်ႈၼႆလူးၵွၼ်ႇသေၵမ်း။ မၼ်းၼၼ်ႉဢဝ်ၵႃႈဢၼ်မီး ၵႃႈၼႂ်းႁူဝ်ၸႂ်မၼ်းၼၼ်ႉလၢတ်ႈပၼ်ယဝ်ႉ၊ ဝႃႈၼင်ႇၼႆသေယဝ်ႉ၊ ၶုၼ် ၽီႉလိတ်ႉတီႉ ၸိူဝ်းၼၼ်ႉ ပႃးဢဝ်တင်းငိုၼ်းၵႃႈၼႂ်းမိုဝ်းၶဝ်သေလႄႈ မႃးတီႈမၼ်းၼၼ်ႉဢေႃႈ။-

19မၼ်းဢဝ်ႁူဝ်ၶဝ်ႇမၼ်းမွၼ်ႁူဝ် သၢမ်ႇသုၼ်ႇ ႁႂ်ႈၼွၼ်းလပ်းသေယဝ်ႉ၊ ႁွင်ႉဢဝ်ၵူၼ်းၵေႃႉၼိုင်ႈ ထႃၶူၼ်ႁူဝ်မၼ်းၸဵတ်းယွမ်ႇၼၼ်ႉပႅတ်ႈသေလႄႈ ၸႃႉႁဵတ်းတၢင်းဢၼ်ယႃႉယူၵ်ႉမၼ်းလႄႈ ႁႅင်းမၼ်းသုတ်ႈယွမ်းႁၢႆၵႂႃႇဢေႃႈ။-

20မၼ်းၼၼ်ႉလၢတ်ႈလႄႈဝႃႈ၊ သၢမ်ႇသုၼ်ႇ ဢိူၺ်း၊ ၵူၼ်း ၽီႉလိတ်ႉတီႉ တင်းလၢႆမႃးတိုၵ်းၸဝ်ႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းတိုၼ်ႇလႄႈဝႃႈ၊ ၵဝ်တၵ်းဢွၵ်ႇၵႂႃႇမိူၼ်ၸိူဝ်ႉၼင်ႇမိူဝ်ႈဢွၼ်တၢင်းၵူႈပွၵ်ႈၼၼ်ႉလႄႈ ၵျူဝ်းၸႃးဢဝ်ႁႅင်းဢွၵ်ႇဢေႃႈ၊ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ မၼ်းဢမ်ႇႁူႉလွင်ႈဢၼ်ထႃႇဝရႃႉၽြႃးၸုၼ်ႉမၼ်းပႅတ်ႈၼၼ်ႉ။-

21ၵူၼ်း ၽီႉလိတ်ႉတီႉ ၸိူဝ်းၼၼ်ႉ တီႉၵမ်ဢဝ်မၼ်းလႄႈ ၶွၵ်းႁူၺ်ႇတႃမၼ်းပႅတ်ႈသေယဝ်ႉ၊ ဢဝ်မၼ်းလူင်းၵႂႃႇၵႃႈတီႈဝဵင်း ၵႃႇၸႃႉ သေလႄႈ ဢဝ်တင်းၸိူၵ်ႈတွင်းလိူင်မတ်ႉၽုၵ်ႇမၼ်းလႄႈ မၼ်းလႆႈဢဝ်တင်းလူၺ်ၶိုတ်ႈယူႇၵႃႈတီႈႁိူၼ်းထွင်ႇဢေႃႈ။-

22ၵူၺ်းၵႃႈ လိုၼ်းသေဢၼ်ထႃၶူၼ်ႁူဝ်မၼ်းယဝ်ႉၼၼ်ႉ၊ ၶူၼ်ႁူဝ်မၼ်းသမ်ႉၶိုၼ်းဢွၵ်ႇမႃးယူႇဢေႃႈ။

23ၶုၼ် ၽီႉလိတ်ႉတီႉ ၸိူဝ်းၼၼ်ႉ ၸူႉၵၼ်တုမ်ၵၼ် ႁႂ်ႈလႆႈပုၵ်ႈၸေႃႇယိတ်ႈလူင်တီႈၽြႃးၶဝ် တႃႇၵုၼ်ႇ ၼၼ်ႉလႄႈ ႁဵတ်းတၢင်းဢၼ်ၸူမ်းသိူဝ်းမူၼ်ႈပျေႃႇဢေႃႈ။ လွင်ႈမၼ်းၸမ်ႉ ၶဝ်ဝႃႈ၊ ၽြႃးႁဝ်းဢဝ် သၢမ်ႇသုၼ်ႇ ဢၼ်ပဵၼ်ရၢၼ်ႇသူႇႁဝ်းၼၼ်ႉ ဢၢပ်ႈပၼ်ၵႃႈၼႂ်းမိုဝ်းႁဝ်းယဝ်ႉ၊ ဝႃႈၼင်ႇၼႆဢေႃႈ။-

24ၵူၼ်းတင်းလၢႆၼၼ်ႉ မိူဝ်ႈဢၼ်ႁၼ်မၼ်းၼၼ်ႉၸိုင်၊ ယွင်ႈယေႃးၽြႃးၶဝ်လႄႈဝႃႈ၊ ၽြႃးႁဝ်းဢဝ်ရၢၼ်ႇသူႇႁဝ်းဢၼ်ယႃႉၽဵဝ်ႈမိူင်းႁဝ်းပႅတ်ႈလႄႈ ဢဝ်ၵူၼ်းႁဝ်းတၢႆၼမ်ၼႃႇၼၼ်ႉ ဢၢပ်ႈပၼ်ၵႃႈၼႂ်းမိုဝ်းႁဝ်းယဝ်ႉ၊ ဝႃႈၼင်ႇၼႆဢေႃႈ။-

25မိူဝ်ႈဢၼ်ႁူဝ်ၸႂ်ၶဝ်သႂၢင်ႇသိူဝ်းၼၼ်ႉၸိုင် ၶဝ်လၢတ်ႈလႄႈဝႃႈ၊ ႁွင်ႉဢဝ် သၢမ်ႇသုၼ်ႇ မႃးတႃႉ။ ႁႂ်ႈမၼ်းလဵၼ်ႈမၼ်းပျႃႉပုၼ်ႈႁဝ်းသေၵမ်း၊ ဝႃႈၼင်ႇၼႆသေယဝ်ႉ၊ ၶဝ်ႁွင်ႉဢဝ် သၢမ်ႇသုၼ်ႇ ဢွၵ်ႇသေၵႃႈၼႂ်းႁိူၼ်းထွင်ႇမႃးလႄႈ မၼ်းလႆႈလဵၼ်ႈလႆႈပျႃႉ ၵႃႈတီႈၽၢႆႇၼႃႈၶဝ်ဢေႃႈ။ ၶဝ်ဢဝ်မၼ်းဝႆႉၵႃႈၼႂ်းၵႄႈဝူင်ႈၵၢင်သဝ်ႁိူၼ်းတိူၵ်ႈဢေႃႈ။-

26သၢမ်ႇသုၼ်ႇ ၵေႃႈလၢတ်ႈတီႈၵူၼ်းဢွၼ်ႇ ဢၼ်ၸုင်မိုဝ်းမၼ်းၼၼ်ႉလႄႈဝႃႈ၊ ပၼ်ဢၶႂၢင်ႉဢၼ်မိုဝ်းၵဝ်လႆႈၵမ်ထုပ်ႉသဝ် ဢၼ်ထွၵ်ႈၵမ်ႉႁိူၼ်းတိူၵ်ႈၼႆႉ ႁႂ်ႈၵဝ်လႆႈဢိင်သဝ်ၸိူဝ်းၼၼ်ႉယူႇသေၵမ်း၊ ဝႃႈၼင်ႇၼႆဢေႃႈ။-

27ၵႃႈတီႈႁိူၼ်းတိူၵ်ႈၼၼ်ႉ မီးတဵမ်ဝႆႉတင်းၵူၼ်းၸၢႆးၵူၼ်းယိင်းဢေႃႈ။ ၶုၼ် ၽီႉလိတ်ႉတီႉ တင်းသဵင်ႈတင်းလူင်ၵေႃႈမီးၵႃႈတီႈၼၼ်ႈဢေႃႈ။ ၵႃႈၼိူဝ်မုင်းႁိူၼ်းတိူၵ်ႈၼၼ်ႉၵေႃႈ ၵူၼ်းၸၢႆးၵူၼ်းယိင်းဢၼ်လူတူၺ်း သၢမ်ႇသုၼ်ႇ လဵၼ်ႈယူႇပျႃႉယူႇၼၼ်ႉ မီးသေသၢမ်ႁဵင်ၼိုင်ႈဢေႃႈ။-

28သၢမ်ႇသုၼ်ႇ ၵေႃႈသူးတွင်းတီႈထႃႇဝရႃႉၽြႃးလႄႈဝႃႈ၊ ၸဝ်ႈထႃႇဝရႃႉၽြႃးတီႈၶႃႈ၊ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈသေၵမ်းတီႈၶႃႈ၊ ၶႅၼ်းတေႃႈၶိုၼ်းပၼ်ႁႅင်းထႅင်ႈပွၵ်ႈလဵဝ်ၼႆႉၵူၺ်း ႁႂ်ႈၶႃႈၸဝ်ႈလႆႈပၼ်တၢမ်ႇဢပႅတ်ႈတီႈၵူၼ်း ၽီႉလိတ်ႉတီႉ တင်းလၢႆ ဢၼ်ၶွၵ်းမၢၵ်ႇတႃၶႃႈၸဝ်ႈသွင်ၽၢႆႇပႅတ်ႈၼၼ်ႉ ၶိင်ႇမိူဝ်ႈလဵဝ်ၼႆႉၵမ်းလဵဝ်သေၵမ်းတီႈၶႃႈၸဝ်ႈၽြႃး၊ ဝႃႈၼင်ႇၼႆသေယဝ်ႉ၊-

29သၢမ်ႇသုၼ်ႇ ယိပ်းၵမ်သဝ်ၵၢင်ဢၼ်ထွၵ်ႈၵမ်ႉႁိူၼ်းတိူၵ်ႈသွင်လႅမ်ႈၼၼ်ႉလႄႈ ဢဝ်မိုဝ်းၶွၼ်ၶႂႃတဝ်ႉလႅမ်ႈၼိုင်ႈ၊ မိုဝ်းၶွၼ်သၢႆႉတဝ်ႉလႅမ်ႈၼိုင်ႈယူႇသေယဝ်ႉ၊-

30သၢမ်ႇသုၼ်ႇ သူးတွင်းလႄႈဝႃႈ၊ ႁႂ်ႈၶႃႈၸဝ်ႈလႆႈတၢႆလူၺ်ႈၵၼ်တင်း ၵူၼ်း ၽီႉလိတ်ႉတီႉ ၸိူဝ်းၼႆႉသေၵမ်းလူၺ်ႈ၊ ဝႃႈၼင်ႇၼႆသေလႄႈ ဢဝ်ႁႅင်းဢွၵ်ႇလႄႈ ၵွင်ႇတူဝ်မၼ်းတူၵ်းသေယဝ်ႉ၊ ႁိူၼ်းတိူၵ်ႈၼၼ်ႉလူမ်ႉတူၵ်းသႂ်ႇၵႃႈၼိူဝ်ၶုၼ်တင်းလၢႆ ဢိၵ်ႇတင်းၵႃႈၼိူဝ်ၵူၼ်းတင်းသဵင်ႈတင်းလူင်ဢၼ်မီးၵႃႈၼႂ်းမၼ်းၼၼ်ႉဢေႃႈ။ ၼင်ႇၼၼ်လႄႈ ၶဝ်ၸိူဝ်းဢၼ်မၼ်းဢဝ်တၢႆ ၼႂ်းမိူဝ်ႈဢၼ်မၼ်းတၢႆၼၼ်ႉ ယဵင်ႈၶႅၼ်းၼမ်ၼႃႇသေ ၶဝ်ၸိူဝ်းဢၼ်မၼ်းဢဝ်တၢႆမႃးၼႂ်းမိူဝ်ႈဢၼ် မၼ်းဢသၢၵ်ႈလိပ်းယူႇၼၼ်ႉဢေႃႈ။-

31မိူဝ်ႈၼၼ်ႉ ၼွင်ႉၸၢႆးမၼ်းတင်းလၢႆ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းတင်းသဵင်ႈတင်းလူင်ၼၼ်ႉဢွၼ်ၵၼ်လူင်းမႃးလႄႈ ႁၢမ်ဢဝ်တူဝ်တၢႆမၼ်းၶိုၼ်ႈၵႂႃႇသေယဝ်ႉ၊ သၢင်းၵျူဝ်ႇၵႃႈတီႈဝူင်ႈၵၢင်ဝဵင်း ၸေႃးရႃႉ တင်းဝဵင်း ဢေးသတေႃးလႃႉ ၵႃႈၼႂ်းသၢင်းၶႅင်းပေႃႈမၼ်း မႃႇၼေႃႇ ၼၼ်ႉဢေႃႈ။ မၼ်းၼၼ်ႉလႆႈၸီႇယၢင်ႇၵႃႈၼိူဝ်မဵဝ်း ဢီႉသရေႇလႃႉ သၢဝ်းပီႊဢေႃႈ။

← Chapter 15 Jump to: Chapter 17 →