Judges 10

Shan

← Chapter 9 Jump to: Chapter 11 →

1လိုၼ်းသေ ဢၽီႉမလႅၵ်ႉ ၼၼ်ႉ၊ တေႃးလႃႉ လုၵ်ႈၸၢႆး ၽူႉဝႃႇ လုၵ်ႈၸၢႆး တေႃးတေႃး ၵူၼ်းမဵဝ်း ဢီႉသၶႃႇ ၼၼ်ႉ ပေႃႇမႃးႁႂ်ႈလႆႈၵႄႇသႄႇၶျွတ်ႈဢဝ်မဵဝ်း ဢီႉသရေႇလႃႉ လႄႈ ယူႇၵႃႈတီႈဝဵင်း သမီႉရႃႉ ၵႃႈၼိူဝ်ႁၢၼ်ႉလွႆ ဢေႇၽရိမ်ႇ ၼၼ်ႉဢေႃႈ။-

2ၵေႃႉၼၼ်ႉၸီႇယၢင်ႇၵႃႈၼိူဝ်မဵဝ်း ဢီႉသရေႇလႃႉ သၢဝ်းပၢႆသၢမ်ပီႊသေယဝ်ႉ တၢႆလႄႈသၢင်းၵျူဝ်ႇၵႃႈတီႈ ဝဵင်း သမီႉရႃႉ ဢေႃႈ။

3လိုၼ်းသေမၼ်းၼၼ်ႉ ယႃႇဢီႉရႃႉ ၵူၼ်းမိူင်း ၵီႉလတ်ႉ ပေႃႇမႃးလႄႈ ၸီႇယၢင်ႇၵႃႈၼိူဝ်မဵဝ်း ဢီႉသရေႇလႃႉ သၢဝ်းပၢႆသွင်ပီႊတဵမ်တဵမ်ဢေႃႈ။-

4ၶုၼ်ၼၼ်ႉမီးလုၵ်ႈၸၢႆးသၢမ်သိပ်းၵေႃႉဢၼ်ၶီႇလီႈဢွၼ်ႇသၢမ်သိပ်းတူဝ်ယူႇသေလႄႈ ၵိၼ်ဝဵင်းသၢမ်သိပ်းဝဵင်း ဢၼ်ႁွင်ႉႁဵၵ်ႈၸိုဝ်ႈ ႁႃႇဝုတ်ႉယႃႇဢီႉရႃႉ တေႃႇထိုင်ႁွတ်ႈဝၼ်းမိူဝ်ႈၼႆႉလႄႈ မီးၵႃႈၼႂ်းမိူင်း ၵီႉလတ်ႉ ၼၼ်ႉဢေႃႈ။-

5ယႃႇဢီႉရႃႉ ၼၼ်ႉတၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇၵႃႈတီႈဝဵင်း ၵႃႇမုၼ်ႇ ဢေႃႈ။

6ၵူၼ်းမဵဝ်း ဢီႉသရေႇလႃႉ တင်းလၢႆသမ်ႉ ႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ႁဵတ်းဝၢတ်ႈတီႈၽြႃး ပႃႇလႃႉ ၊ ၽြႃး ဢႃႇသတႃႇရုတ်ႉ ၊ ၽြႃးမိူင်း သူႉရီႉ ၊ ၽြႃးမိူင်း ၸီႉတုၼ်ႇ ၊ ၽြႃးမိူင်း မေႃႇၽႃႉ ၊ ၽြႃးၵူၼ်းမဵဝ်း ဢမ်ႇမုၼ်ႇ ၊ ၽြႃးၵူၼ်း ၽီႉလိတ်ႉတီႉ ၸိူဝ်းၼၼ်ႉယူႇသေလႄႈ ၸုၼ်ႉပႅတ်ႈထႃႇဝရႃႉၽြႃးလႄႈ ဢမ်ႇႁဵတ်းဝၢတ်ႈတီႈမၼ်းၸဝ်ႈ။-

7တၢင်းၸႂ်မႆႈၶႆႈၸႃႉထႃႇဝရႃႉၽြႃး ဢွၵ်ႇတီႈမဵဝ်း ဢီႉသရေႇလႃႉ လႄႈ မၼ်းၸဝ်ႈဢဝ်ၶဝ်ၶၢႆပၼ်ၵႃႈၼႂ်းမိုဝ်းၵူၼ်း ၽီႉလိတ်ႉတီႉ ဢိၵ်ႇတင်းၵႃႈၼႂ်းမိုဝ်းၵူၼ်း ဢမ်ႇမုၼ်ႇ တင်းလၢႆသေယဝ်ႉ၊-

8ၶဝ်ၼၼ်ႉယႃႉယူၵ်ႉၼိၵ်ႈၸၢၵ်ႈငႅၼ်းသႄး ၵူၼ်းမဵဝ်း ဢီႉသရေႇလႃႉ တင်းလၢႆ ၼႂ်းပီႊၼၼ်ႉၵမ်းလဵဝ်လႄႈ သိပ်းပႅတ်ႇပီႊတဵမ်တဵမ် ၶဝ်ၼိၵ်ႈၸၢၵ်ႈငႅၼ်းသႄး ၵူၼ်းမဵဝ်း ဢီႉသရေႇလႃႉ ၵႃႈဢၼ်ယူႇၵႃႈတီႈၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ ၵႃႈၼႂ်းမိူင်းတီႈဢၼ်ၵူၼ်း ဢႃႇမေႃးရီႉ တင်းလၢႆယူႇၼၼ်ႉ ဢၼ်ပဵၼ်မိူင်း ၵီႉလတ်ႉ ၼၼ်ႉဢေႃႈ။-

9ၵူၼ်းမဵဝ်း ဢမ်ႇမုၼ်ႇ တင်းလၢႆၼၼ်ႉၵေႃႈ ၶၢမ်ႈၼမ်ႉႁွင်ႈ ယေႃးတၢၼ်ႇ ႁႂ်ႈလႆႈတိုၵ်းတေႃးၵူၼ်းမဵဝ်း ယူႉတႃႉ ၊ ၵူၼ်းမဵဝ်း ပိၼ်ႇယႃႇမိၼ်ႇ ၊ ၵူၼ်းမဵဝ်း ဢေႇၽရိမ်ႇ ၼၼ်ႉဢေႃႈ။ ၼင်ႇၼၼ်လႄႈ ၵူၼ်းမဵဝ်း ဢီႉသရေႇလႃႉ တင်းလၢႆ ႁွတ်ႈထိုင်တၢင်းဢၼ်တုၵ်ႉၶႃႉတၢင်းၽၢၼ်ယႂ်ႇၼႃႇလူင်လၢင်ဢေႃႈ။-

10မိူဝ်ႈၼၼ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ႁွင်ႉသႅၼ်ႇတီႈထႃႇဝရႃႉၽြႃးလႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ ၽိတ်းပိူင်ႈၸဝ်ႈႁဝ်းတီႈၶႃႈယဝ်ႉ။ ၸုၼ်ႉပႅတ်ႈၽြႃးပဵၼ်ၸဝ်ႈႁဝ်းၶႃႈၸိူဝ်းၼႆႉသေလႄႈ ဢွၼ်ၵၼ်ႁဵတ်းဝၢတ်ႈတီႈၽြႃး ပႃႇလႃႉ တင်းလၢႆ မႅၼ်ႈတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

11ထႃႇဝရႃႉၽြႃးၵေႃႈ မီးဢမိင်ႉတီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈဝႃႈ၊ ၵဝ်ၵႄႇသႄႇၼုၵ်ႈဢဝ်မႂ်းဢွၵ်ႇသေၵႃႈၼႂ်းမိုဝ်းၵူၼ်း ဢေႇၵိပ်ႉတူႉ ၊ ၵူၼ်း ဢႃႇမေႃးရီႉ ၊ ၵူၼ်းမဵဝ်း ဢမ်ႇမုၼ်ႇ ၊ ၵူၼ်း ၽီႉလိတ်ႉတီႉ ၸိူဝ်းၼၼ်ႉမႃးယဝ်ႉ ဢမ်ႇၸႂ်ႈႁိုဝ်။-

12မိူဝ်ႈဢၼ်ၵူၼ်း ၸီႉတုၼ်ႇ ၊ ၵူၼ်း ဢႃႇမလႅၵ်ႉ ၊ ၵူၼ်း မေႃးၼီႉ ၸိူဝ်းၼၼ်ႉ ၼိၵ်ႈၸၢၵ်ႈငႅၼ်းသႄးသူၼၼ်ႉၵေႃႈ၊ သူႁွင်ႉသႅၼ်ႇတီႈၵဝ်လႄႈ ၵဝ်ၵႄႇသႄႇၼုၵ်ႈဢဝ်သူဢွၵ်ႇသေ ၵႃႈၼႂ်းမိုဝ်းၶဝ်ၼၼ်ႉဢေႃႈ။-

13ၵူၺ်းၵႃႈ ၵွပ်ႈပိူဝ်ႈဢၼ်သူၸုၼ်ႉပႅတ်ႈၵဝ်လႄႈ ႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃးၼၼ်ႉလႄႈ ၵမ်းလိုၼ်းၵဝ်ဢမ်ႇၵႄႇသႄႇၼုၵ်ႈဢဝ်သူ။-

14ၵႂႃႇလႄႈဢွၼ်ၵၼ်ႁွင်ႉသႅၼ်ႇတီႈၽြႃးဢၼ်သူလိူၵ်ႈၵဵပ်းဢဝ်ၸိူဝ်းၼၼ်ႉတႃႉ။ ႁႂ်ႈၶဝ်ၼၼ်ႉၵႄႇသႄႇၼုၵ်ႈဢဝ်သူ ၼႂ်းၶိင်ႇၵႃႇလႃႉဢၼ်ဢမူႉႁွတ်ႈထိုင်ယူႇၼႆႉတႃႉ၊ ဝႃႈၼင်ႇၼႆဢေႃႈ။-

15ၵူၼ်းမဵဝ်း ဢီႉသရေႇလႃႉ တင်းလၢႆၵေႃႈ လဝ်ႊယွၼ်းတီႈထႃႇဝရႃႉၽြႃးလႄႈဝႃႈ၊ ၶႃႈၸဝ်ႈႁဝ်းၸိူဝ်းၼႆႉ ၽိတ်းပိူင်ႈတီႈၶႃႈယဝ်ႉ။ ၸဝ်ႈႁဝ်းၶႅၼ်းတေႃႈႁဵတ်းတီႈၶႃႈၸဝ်ႈႁဝ်းၸိူဝ်းၼႆႉ ၸွမ်းၵႃႈၼင်ႇဢၼ်ထုၵ်ႇၸႂ်ၵျိူၵ်ႈၸႂ်ၸဝ်ႈႁဝ်းၼၼ်ႉသေၵမ်းတီႈၶႃႈ၊ လွင်ႈၼင်ႇႁိုဝ် ၸဝ်ႈႁဝ်းတၵ်းၵႄႇသႄႇၼုၵ်ႈဢဝ်ၶႃႈၸဝ်ႈႁဝ်းၸိူဝ်းၼႆႉၼႂ်းဝၼ်းမိူဝ်ႈၼႆႉၼၼ်ႉၵူၺ်းၸိုင် ၶႃႈၸဝ်ႈႁဝ်းၸိူဝ်းၼႆႉ တွင်းပၢၼ်ႇတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

16ဢွၼ်ၵၼ်ပႄႇပႅတ်ႈၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉသေလႄႈ ႁဵတ်းဝၢတ်ႈတီႈထႃႇဝရႃႉၽြႃးဢေႃႈ။ မိူဝ်ႈၼၼ်ႉ ထႃႇဝရႃႉၽြႃးၼႅင်ၸႂ် ၵွပ်ႈပိူဝ်ႈတုၵ်ႉၶႃႉတၢင်းၽၢၼ် ဢၼ်မဵဝ်း ဢီႉသရေႇလႃႉ လႆႈၶၢမ်ႇၼၼ်ႉဢေႃႈ။-

17ၵူၼ်းမဵဝ်း ဢမ်ႇမုၼ်ႇ တင်းလၢႆၼၼ်ႉ ၸူႉၵၼ်တုမ်ၵၼ်လႄႈ ၶျႃးတပ်ႉၶဝ်ၵႃႈတီႈမိူင်း ၵီႉလတ်ႉ ဢေႃႈ။ ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ ၸူႉၵၼ်တုမ်ၵၼ်လႄႈၶျႃးတပ်ႉၶဝ် ၵႃႈတီႈဝဵင်း မီႉၸပႃႇ ဢေႃႈ။-

18ၵူၼ်းတင်းလၢႆဢၼ်ဝႃႈ ၶုၼ်မိူင်း ၵီႉလတ်ႉ ၸိူဝ်းၼၼ်ႉ တိူင်ႇပၢင်ႇလၢတ်ႈၸႃၵၼ်လႄႈဝႃႈ၊ ၽူႈလႂ်သေဢမ်ႇဝႃႈ၊ ၵေႃႉဢၼ်ၸႃႉတိုၵ်းတေႃးၵူၼ်းမဵဝ်း ဢမ်ႇမုၼ်ႇ တင်းလၢႆဢွၼ်တၢင်းပိူၼ်ႈၼၼ်ႉ၊ ႁႂ်ႈၵေႃႉၼၼ်ႉပဵၼ်ၸိၵ်းပဵၼ်ၸွမ် ၵူၼ်းဝၢၼ်ႈၵူၼ်းမိူင်း ၵီႉလတ်ႉ တင်းသဵင်ႈတင်းလူင်သေ၊ ဝႃႈၼင်ႇၼႆဢေႃႈ။

← Chapter 9 Jump to: Chapter 11 →