Judges 13

Shan

← Chapter 12 Jump to: Chapter 14 →

1ၵူၼ်းမဵဝ်း ဢီႉသရေႇလႃႉ တင်းလၢႆသမ်ႉႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ထႃႇဝရႃႉၽြႃးဢဝ်ၶဝ်ဢၢပ်ႈၵႃႈၼႂ်းမိုဝ်းၵူၼ်း ၽီႉလိတ်ႉတီႉ တင်းလၢႆ သီႇသိပ်းပီႊတဵမ်တဵမ်ဢေႃႈ။-

2မိူဝ်ႈၼၼ်ႉ မီးၵူၼ်းဝဵင်း ၸေႃးရႃႉ ၊ မဵဝ်းၸိူဝ်ႉၶိူဝ်း တၢၼ်ႇ ဢၼ်လႆႈၸိုဝ်ႈလႆႈသဵင် မႃႇၼေႃႇ ၵေႃႉၼိုင်ႈဢေႃႈ။ မေးမၼ်းၼၼ်ႉ ဢမ်ႇၵိူတ်ႇလဵင်ႉလုၵ်ႈလဵင်ႉလၢင်းလႄႈ ပဵၼ်ဢၼ်မၼ်ဢေႃႈ။-

3တမၢၼ်ႇၵၢင်ႁၢဝ်ထႃႇဝရႃႉၽြႃး ပေႃႇမႃးတီႈမႄႈယိင်းၼၼ်ႉသေလႄႈ လၢတ်ႈတီႈမၼ်းလႄႈဝႃႈ၊ တူၺ်းလူး၊ မိူဝ်ႈလဵဝ်ၼႆႉ မႂ်းၼႆႉပဵၼ်ဢၼ်မၼ်လႄႈ ဢမ်ႇၵိူတ်ႇလဵင်ႉလုၵ်ႈလဵင်ႉလၢင်း။ မႂ်းတၵ်းပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးမႃးဢေႃႈ။-

4ပိူဝ်ႈၼႆလႄႈ ႁဵတ်းသတီႉတႃႉ။ ယႃႇပေၵိၼ်ၼမ်ႉၸပိတ်ႈ။ ယႃႇပေၵိၼ်လဝ်ႈ။ ယႃႇပေၵိၼ်တၢင်းၵိၼ်ဢၼ်ဢမ်ႇမူတ်းသႂ်ၼၼ်ႉ။-

5လွင်ႈမၼ်းၸမ်ႉ မႂ်းတၵ်းပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးမႃးဢေႃႈ။ မၼ်းၼၼ်ႉ ဢမ်ႇလႆႈၶၢမ်ႇတၢင်းဢၼ်ထႃႁူဝ်။ လွင်ႈမၼ်းၸမ်ႉ လုၵ်ႈဢွၼ်ႇၼၼ်ႉတၵ်းလႆႈပဵၼ်ၵူၼ်း ၼႃႇၸရီႉ ၽြႃးပဵၼ်ၸဝ်ႈ ၸႃႉၸဵမ်ၼႂ်းတွင်ႉမႄႈမၼ်းၼၼ်ႉဢေႃႈ။ မၼ်းတၵ်းၸႃႉႁဵတ်းတၢင်းဢၼ်ၵႄႇသႄႇၼုၵ်ႈဢဝ်မဵဝ်း ဢီႉသရေႇလႃႉ ဢွၵ်ႇသေၵႃႈၼႂ်းမိုဝ်းၵူၼ်း ၽီႉလိတ်ႉတီႉ တင်းလၢႆဢေႃႈ၊ ဝႃႈၼင်ႇၼႆဢေႃႈ။-

6မႄႈယိင်းၼၼ်ႉၵေႃႈ ၵႂႃႇလႄႈလၢတ်ႈတီႈၽူဝ်မၼ်းလႄႈဝႃႈ၊ ၵူၼ်းၽြႃးပဵၼ်ၸဝ်ႈၵေႃႉၼိုင်ႈ ဢၼ်မီးၼႃႈဢၼ်လီၵူဝ်လီႁႄၸိူဝ်ႉၼင်ႇၼႃႈတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈၼၼ်ႉ မႃးၸူးၵႃႈတီႈၵဝ်ၶႃႈၶႃႈဢေႃႈ။ ၵဝ်ၶႃႈၵေႃႈဢမ်ႇထၢမ်လွင်ႈဢၼ်မၼ်းလုၵ်ႉၵႃႈတီႈလႂ်မႃးၼၼ်ႉၶႃႈ။ မၼ်းၵေႃႈဢမ်ႇလၢတ်ႈၸိုဝ်ႈလၢတ်ႈသဵင်မၼ်းတီႈၵဝ်ၶႃႈၶႃႈ။-

7ၵူၺ်းၵႃႈ မၼ်းလၢတ်ႈတီႈၵဝ်ၶႃႈလႄႈဝႃႈ၊ တူၺ်းလူး၊ မႂ်းၼႆႉတၵ်းပႃးပတိၵ်ႉသၼ်ႇထေႇလႄႈ ၵိူတ်ႇလဵင်ႉလုၵ်ႈၸၢႆးမႃးဢေႃႈ။ ယႃႇပေၵိၼ်ၼမ်ႉၸပိတ်ႈ။ ယႃႇပေၵိၼ်လဝ်ႈ။ ယႃႇပေၵိၼ်တၢင်းၵိၼ်ဢၼ်ဢမ်ႇမူတ်းသႂ်ၼၼ်ႉ။ လွင်ႈမၼ်းၸမ်ႉ လုၵ်ႈဢွၼ်ႇၼၼ်ႉတၵ်းလႆႈပဵၼ်ၵူၼ်း ၼႃႇၸရီႉ ၽြႃးပဵၼ်ၸဝ်ႈ ဢဝ်ၸႃႉၸဵမ်ၼႂ်းတွင်ႉမႄႈမၼ်းလႄႈ တေႃႇထိုင်ႁွတ်ႈဝၼ်းဢၼ်မၼ်းတၢႆၼၼ်ႉဢေႃႈ၊ ဝႃႈၼင်ႇၼႆၶႃႈယဝ်ႉ၊ ဝႃႈၼင်ႇၼႆဢေႃႈ။

8မိူဝ်ႈၼၼ်ႉ မႃႇၼေႃႇ လဝ်ႊလၢတ်ႈတီႈထႃႇဝရႃႉၽြႃးလႄႈဝႃႈ၊ ၸဝ်ႈၽြႃးတီႈၶႃႈ၊ ၶႅၼ်းတေႃႈႁႂ်ႈၵူၼ်းၽြႃးပဵၼ်ၸဝ်ႈ ဢၼ်ၸဝ်ႈႁဝ်းပွႆႇၸႂ်ႉမႃးၼၼ်ႉ သမ်ႉမႃးတီႈၶႃႈၸဝ်ႈႁဝ်းၸိူဝ်းၼႆႉထႅင်ႈလႄႈ သင်ႇသွၼ်ပၼ်လွင်ႈဢၼ်ၶႃႈၸဝ်ႈႁဝ်းၸိူဝ်းၼႆႉ တၵ်းလႆႈႁဵတ်းၸိူဝ်ႉၼင်ႇႁိုဝ် တီႈလုၵ်ႈဢွၼ်ႇဢၼ်တၵ်းၵိူတ်ႇလဵင်ႉမႃးၼၼ်ႉသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊-

9ၽြႃးပဵၼ်ၸဝ်ႈထွမ်ႇဢဝ်ၵႂၢမ်း မႃႇၼေႃႇ လႄႈ တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈ သမ်ႉၶိုၼ်းမႃးၵႃႈတီႈမႄႈယိင်းၼၼ်ႉ ၼႂ်းမိူဝ်ႈဢၼ်မၼ်းၼင်ႈယူႇၵႃႈၼႂ်းတူင်ႈၼႃးၼၼ်ႉဢေႃႈ။ မိူဝ်ႈၼၼ်ႉ ၽူဝ်မၼ်း မႃႇၼေႃႇ ၼၼ်ႉ ဢမ်ႇမီးလူၺ်ႈၵၼ်တင်းမၼ်း။-

10မႄႈယိင်းၼၼ်ႉႁိပ်ႈၼႅတ်ႈလႄႈ ၶုၼ်ႇလႅၼ်ႈၵႂႃႇၸူးၵႃႈတီႈၽူဝ်မၼ်းၶၼ်ၶၼ်ၽႂ်းၽႂ်းသေလႄႈ မွၵ်ႇလၢတ်ႈလႄႈဝႃႈ၊ တူၺ်းလူး၊ ၵေႃႉဢၼ်မႃးမိူဝ်ႈဝၼ်းဢွၼ်ၼၼ်ႉၼၼ်ႉ မိူဝ်ႈလဵဝ်ၼႆႉပေႃႇမႃးတီႈၵဝ်ၶႃႈၶႃႈယဝ်ႉ၊ ဝႃႈၼင်ႇၼႆသေယဝ်ႉ၊-

11မႃႇၼေႃႇ လုၵ်ႉလႄႈၸွမ်းလူၺ်ႈၵၼ်တင်းမေးမၼ်းၵႂႃႇၵႃႈတီႈၵေႃႉၼၼ်ႉလႄႈ တွင်ႈထၢမ်လႄႈဝႃႈ၊ ၸဝ်ႈၸႂ်ႈၵေႃႉဢၼ်လၢတ်ႈတီႈမႄႈယိင်းၼႆႉၼၼ်ႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းလၢတ်ႈလႄႈဝႃႈ၊ ၸႂ်ႈယဝ်ႉ၊ ဝႃႈၼင်ႇၼႆဢေႃႈ။-

12မႃႇၼေႃႇ ၵေႃႈလဝ်ႊထၢမ်လႄႈဝႃႈ၊ ႁႂ်ႈၵႂၢမ်းၸဝ်ႈႁဝ်းၼၼ်ႉ ပျေႉၸုမ်ႇသေၵမ်းလူၺ်ႈ။ လုၵ်ႈဢွၼ်ႇၼၼ်ႉတၵ်းပဵၼ်ၵေႃႉၸိူဝ်ႉၼင်ႇႁိုဝ်ၶႃႈ။ တၵ်းလႆႈႁဵတ်းၸိူဝ်ႉၼင်ႇႁိုဝ်တီႈမၼ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

13တမၢၼ်ႇၵၢင်ႁၢဝ်ထႃႇဝရႃႉၽြႃး လၢတ်ႈတီႈ မႃႇၼေႃႇ လႄႈဝႃႈ၊ ၵႃႈဢၼ်ၵဝ်မွၵ်ႇလၢတ်ႈဝႆႉၼၼ်ႉ မႄႈယိင်းၼႆႉ တၵ်းလႆႈဝႄႈပႅတ်ႈဢေႃႈ။-

14မၼ်းဢမ်ႇလႆႈၵိၼ်ၵႃႈဢၼ်ပဵၼ်တီႈတူၼ်ႈၶိူဝ်းမၢၵ်ႇၸပိတ်ႈသေၸိူဝ်ႉသေပိူင်။ မၼ်းဢမ်ႇလႆႈၵိၼ်ၸႃႉၸဵမ် ၼမ်ႉၸပိတ်ႈလႄႈလဝ်ႈ။ မၼ်းဢမ်ႇလႆႈၵိၼ်တၢင်းၵိၼ်ဢၼ်ဢမ်ႇမူတ်းသႂ်ၼၼ်ႉ။ ၵႃႈၼင်ႇဢၼ်ၵဝ်သင်ႇလၢတ်ႈဝႆႉၼၼ်ႉ မၼ်းတၵ်းလႆႈပႂ်ႉလႆႈၵမ်ဢေႃႈ၊ ဝႃႈၼင်ႇၼႆဢေႃႈ။-

15မႃႇၼေႃႇ ၵေႃႈလဝ်ႊလၢတ်ႈတီႈတမၢၼ်ႇၵၢင်ႁၢဝ်ထႃႇဝရႃႉၽြႃးလႄႈဝႃႈ၊ ႁႂ်ႈလႆႈႁၢမ်ႈတၢပ်ႈၸဝ်ႈႁဝ်းဝႆႉတေႃႇထိုင်ႁွတ်ႈမႄးႁႅၼ်းပႄႉဢွၼ်ႇမႃးပုၼ်ႈၸဝ်ႈႁဝ်းၼၼ်ႉသေၵမ်းၶႃႈ၊ ဝႃႈၼင်ႇၼႆသေယဝ်ႉ၊-

16တမၢၼ်ႇၵၢင်ႁၢဝ်ထႃႇဝရႃႉၽြႃးၶိုၼ်းလၢတ်ႈတီႈ မႃႇၼေႃႇ လႄႈဝႃႈ ပိၵ်ႉသမ်ႉမႂ်းႁၢမ်ႈတၢပ်ႈၵဝ်ဝႆႉသေၵေႃႈ၊ ၵဝ်တၵ်းဢမ်ႇၵိၼ်တၢင်းၵိၼ်မႂ်း။ ပေႃးမႂ်းမီးဢလူဝ်ႇၶႂ်ႈပုၵ်ႈၸေႃႇယိတ်ႈဢၼ်တုတ်ႇၽႆးၸိုင်၊ မႂ်းတၵ်းလႆႈပုၵ်ႈၸေႃႇတီႈထႃႇဝရႃႉၽြႃးဢေႃႈ၊ ဝႃႈၼင်ႇၼႆဢေႃႈ။ လွင်ႈဢၼ်မၼ်းၼၼ်ႉပဵၼ်တမၢၼ်ႇၵၢင်ႁၢဝ် ထႃႇဝရႃႉၽြႃးၼၼ်ႉၸိုင် မႃႇၼေႃႇ ဢမ်ႇပႆႇႁူႉ။-

17မႃႇၼေႃႇ ၵေႃႈ တွင်ႈထၢမ်တီႈတမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉလႄႈဝႃႈ၊ လွင်ႈၼင်ႇႁိုဝ်ႁဝ်းၶႃႈ တၵ်းလႆႈယွင်ႈယေႃးၸဝ်ႈႁဝ်း ၼႂ်းမိူဝ်ႈဢၼ်ၵႂၢမ်းၸဝ်ႈႁဝ်းပျေႉၸုမ်ႇၼၼ်ႉၸိုင်၊ ၸိုဝ်ႈသဵင်ၸဝ်ႈႁဝ်းၸမ်ႉ ႁွင်ႉႁဵၵ်ႈၸိုဝ်ႈသဵင်ၸိူဝ်ႉၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

18တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉလၢတ်ႈလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ထၢမ်ၸိုဝ်ႈသဵင်ၵဝ်ၼင်ႇႁိုဝ်။ ပဵၼ်ၸိုဝ်ႈသဵင်ဢၼ်လီဢၢမ်းၼႃႇဢေႃႈ၊ ဝႃႈၼင်ႇၼႆဢေႃႈ။-

19မႃႇၼေႃႇ ဢဝ်ပႄႉဢွၼ်ႇဢိၵ်ႇတင်းၶိူင်ႈပုၵ်ႈၸေႃႇၽေႃးၸဵၼ်ႇလႄႈ ပုၵ်ႈၸေႃႇၵႃႈၼိူဝ်မၢၵ်ႇႁိၼ်တီႈထႃႇဝရႃႉၽြႃးဢေႃႈ။ လွင်ႈတၢင်းဢၼ်လီဢၢမ်းဢၼ် မႃႇၼေႃႇ ၶဝ်ၽူဝ်မေးၼၼ်ႉ လႆႈတူၺ်းလႄႈႁၼ်ၼၼ်ႉၸမ်ႉ၊-

20ၼႂ်းမိူဝ်ႈဢၼ်ပဵဝ်ၽႆးယင်းတိုၵ်ႉဢွၵ်ႇသေၵႃႈၼိူဝ်ယိတ်ႈပလၢင်ႇၶိုၼ်ႈၵႃႈၼိူဝ်ၵၢင်ႁၢဝ်ယူႇၼၼ်ႉၸိုင်၊ တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉ ၶိုၼ်ႈၸွမ်းၵႃႈၼႂ်းပဵဝ်ၽႆးယိတ်ႈပလၢင်ႇၼၼ်ႉဢေႃႈ။ မႃႇၼေႃႇ သွင်ၶႃၽူဝ်မေးၼၼ်ႉ တူၺ်းႁၼ်သေယဝ်ႉ၊ ၵူမ်ႈမူပ်ႇတဵတ်ႇယူႇၵႃႈၼိူဝ်လိၼ်ဢေႃႈ။-

21တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉ ဢမ်ႇသမ်ႉၶိုၼ်းပေႃႇမႃးတီႈ မႃႇၼေႃႇ သွင်ၶႃၽူဝ်မေးၼၼ်ႉထႅင်ႈ။ မိူဝ်ႈၼၼ်ႉ မႃႇၼေႃႇ ႁူႉလွင်ႈဢၼ် ပဵၼ်တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉဢေႃႈ။-

22မႃႇၼေႃႇ ၵေႃႈ လၢတ်ႈတီႈမေးမၼ်းလႄႈဝႃႈ၊ ႁဝ်းတၵ်းလႆႈတၢႆဢမၢၼ်ႇၶၼ်ပဵၼ်ဢေႃႈ။ လွင်ႈမၼ်းၸမ်ႉ ႁဝ်းႁၼ်ၽြႃးပဵၼ်ၸဝ်ႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

23မေးမၼ်းၶိုၼ်းလၢတ်ႈလႄႈဝႃႈ၊ ပေႃးထႃႇဝရႃႉၽြႃး မီးဢလူဝ်ႇၶႂ်ႈဢဝ်ႁဝ်းတၢႆၸိုင်၊ မၼ်းၸဝ်ႈဢမ်ႇၶၢမ်ႇဢဝ်ယိတ်ႈဢၼ်တုတ်ႇၽႆး ဢိၵ်ႇတင်းၶိူင်ႈပုၵ်ႈၸေႃႇၽေႃးၸဵၼ်ႇၵႃႈတီႈမိုဝ်းႁဝ်း။ လွင်ႈတၢင်းၵူႈၸိူဝ်ႉၵူႈပိူင်ၸိူဝ်းၼႆႉၵေႃႈ မၼ်းၸဝ်ႈဢမ်ႇၼႄဢမ်ႇပျႃး။ ၵႂၢမ်းဢၼ်ၸိူဝ်ႉၼင်ႇၼႆ မိူဝ်ႈလဵဝ်ၼႆႉၼၼ်ႉၵေႃႈ၊ မၼ်းၸဝ်ႈဢမ်ႇမီးဢမိင်ႉၵူၺ်ႉ၊ ဝႃႈၼင်ႇၼႆဢေႃႈ။-

24မႄႈယိင်းၼၼ်ႉ ၵိူတ်ႇလဵင်ႉလုၵ်ႈၸၢႆးမႃးလႄႈ ႁွင်ႉႁဵၵ်ႈၸိုဝ်ႈ သၢမ်ႇသုၼ်ႇ ဢေႃႈ။ လုၵ်ႈဢွၼ်ႇၼၼ်ႉယႂ်ႇမႃးလႄႈ ထႃႇဝရႃႉၽြႃးပၼ်တၢင်းလီတီႈမၼ်းဢေႃႈ။-

25ဝီႉၺိၺ်ႇထႃႇဝရႃႉၽြႃးၼၼ်ႉ မၢင်ၽဝ်ႇမၢင်ပွၵ်ႈ ၸႃႉတိုၵ်းယူင်းၸူဝ်းဢဝ်မၼ်း ၵႃႈတီႈတပ်ႉမဵဝ်း တၢၼ်ႇ ၼႂ်းဝူင်ႈၵၢင်ဝဵင်း ၸေႃးရႃႉ တင်းဝဵင်း ဢေးသတေႃးလႃႉ ၼၼ်ႉဢေႃႈ။

← Chapter 12 Jump to: Chapter 14 →