Judges 17

Shan

← Chapter 16 Jump to: Chapter 18 →

1မိူဝ်ႈၼၼ်ႉမီးၵူၼ်းလွႆ ဢေႇၽရိမ်ႇ ၵေႃႉၼိုင်ႈ ဢၼ်လႆႈၸိုဝ်ႈ မီႉၶႃႇ ဢေႃႈ။-

2မၼ်းၼၼ်ႉလၢတ်ႈတီႈမႄႈမၼ်းလႄႈဝႃႈ၊ ငိုၼ်းႁဵင်ပၢႆပၢၵ်ႇၵျၢပ်ႈ ဢၼ်ႁၢႆၵႂႃႇသေၵႃႈတီႈမႄႈႁဝ်း ဢၼ်မႄႈႁဝ်းဢဝ်လွင်ႈမၼ်းၵိၼ်ႇလႃႇၵိၼ်ႇဝႃႈလႄႈ တီႈႁူၵဝ်ၶႃႈၵေႃႈလၢတ်ႈထိုင်ၼၼ်ႉ မီးၵႃႈတီႈၵဝ်ၶႃႈဢေႃႈ။ ၵဝ်ၶႃႈဢဝ်မႅၼ်ႈၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင် မႄႈမၼ်းလၢတ်ႈလႄႈဝႃႈ ႁႂ်ႈလုၵ်ႈၸၢႆးၵဝ်လႆႈၶၢမ်ႇတၢင်းလီတီႈထႃႇဝရႃႉၽြႃးသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

3မိူဝ်ႈၼၼ်ႉ မၼ်းဢဝ်ငိုၼ်းႁဵင်ပၢႆပၢၵ်ႇၵျၢပ်ႈၼၼ်ႉ ၶိုၼ်းပၼ်တီႈမႄႈမၼ်းလႄႈ၊ မႄႈမၼ်းလၢတ်ႈလႄႈဝႃႈ၊ ၵဝ်လႆႈဢဝ်ငိုၼ်းၼႆႉ ႁႂ်ႈမူတ်းၸၢင်ႇတီႈထႃႇဝရႃႉၽြႃး ပုၼ်ႈလုၵ်ႈၸၢႆးၵဝ်ႁႂ်ႈလႆႈဢဝ်ႁဵတ်းရုၵ်ႈထူႉဢၼ်တွင်ႈႁဵတ်းၶၵ်းႁဵတ်း ဢိၵ်ႇတင်းရုၵ်ႈထူႉဢၼ်သွၼ်းႁဵတ်းလေႃႇႁဵတ်းၼၼ်ႉဝႆႉထႃႈယဝ်ႉ။ ပိူဝ်ႈၼႆလႄႈ ၵဝ်တၵ်းၶိုၼ်းဢဝ်ပၼ်တီႈမႂ်းတေႃႈလဵဝ်ၼႆႉဢေႃႈ၊ ဝႃႈၼင်ႇၼႆသေယဝ်ႉ၊-

4မၼ်းၼၼ်ႉဢဝ်ငိုၼ်းၼၼ်ႉ ပၼ်တီႈမႄႈမၼ်းဢေႃႈ။ မႄႈမၼ်းၵေႃႈ ဢဝ်သွင်ပၢၵ်ႇၵျၢပ်ႈဢၢပ်ႈပၼ်တီႈၸၢင်ႈၶမ်းသေယဝ်ႉ၊ မၼ်းၼၼ်ႉ ႁဵတ်းရုၵ်ႈထူႉဢၼ်တွင်ႈႁဵတ်းၶၵ်းႁဵတ်းတင်းရုၵ်ႈထူႉဢၼ်သွၼ်းႁဵတ်းလေႃႇႁဵတ်းသေလႄႈ မီးဝႆႉယူႇၵႃႈတီႈႁိူၼ်း မီႉၶႃႇ ၼၼ်ႉဢေႃႈ။-

5ၵေႃႉၼၼ်ႉဢၼ်ဝႃႈ မီႉၶႃႇ ၼၼ်ႉ မီးၵျွင်းၽြႃးလႄႈ ႁဵတ်းသိူဝ်ႈသုပ်းၸဝ်ႈ ဢိၵ်ႇတင်းရုၵ်ႈထူႉ တေႇရၽိမ်ႇ သေလႄႈ ဢဝ်လုၵ်ႈၸၢႆးမၼ်းၵေႃႉၼိုင်ႈ ၶၢၼ်းဝႆႉၵႃႈၼႂ်းဢရႃႇယိတ်ႈပရေႃးႁဵၵ်ႈမၼ်းဢေႃႈ။-

6မိူဝ်ႈၶိင်ႇၼၼ်ႉ ၶုၼ်ႁေႃၶမ်း ဢီႉသရေႇလႃႉ ဢမ်ႇမီး။ ၵူၼ်းၵူႈၵေႃႉၵူႈၵူၼ်း ႁဵတ်းၸွမ်းၵႃႈဢၼ်ထုၵ်ႇတႃတူဝ်ၸဝ်ႈၵဝ်ႇ ႁင်းၽႂ်ႁင်းမၼ်းၼၼ်ႉဢေႃႈ။-

7ၵူၼ်းဢွၼ်ႇဢၼ်ပဵၼ်ၵူၼ်းဝဵင်း ပႅတ်ႉလႁႅမ်ႇ ၼႂ်းဢိူင်ႇ ယူႉတႃႉ ဢၼ်ပဵၼ်ၵူၼ်းမဵဝ်း လေႇဝီႉ ဢၼ်ယူႇၵႃႈၼႂ်းမဵဝ်းၸိူဝ်ႉၶိူဝ်း ယူႉတႃႉ ၼၼ်ႉ သွၼ်ႈပိုင်ႈယူႇၵႃႈၼႂ်းဝဵင်းၼၼ်ႉလႄႈ-

8လုၵ်ႉသေၵႃႈတီႈဝဵင်းၼၼ်ႉဢၼ်ဝႃႈဝဵင်း ပႅတ်ႉလႁႅမ်ႇ ၼႂ်းဢိူင်ႇ ယူႉတႃႉ ၼၼ်ႉ ဢွၵ်ႇၵႂႃႇႁႂ်ႈလႆႈသွၼ်ႈပိုင်ႈ ၼႂ်းတီႈဢၼ်ထူပ်းႁၼ်လႆႈၼၼ်ႉလႄႈ ႁွတ်ႈထိုင်ၵႃႈတီႈႁိူၼ်း မီႉၶႃႇ လွႆ ဢေႇၽရိမ်ႇ ၼႂ်းမိူဝ်ႈဢၼ် မၼ်းယင်းတိုၵ်ႉၵႂႃႇတၢင်းပႆတၢင်းယူႇၼၼ်ႉဢေႃႈ။-

9မီႉၶႃႇ ၼၼ်ႉၵေႃႈ ထၢမ်တီႈမၼ်းလႄႈဝႃႈ၊ မႂ်းလုၵ်ႉသေၵႃႈတီႈလႂ်မႃး၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၵေႃႈၶိုၼ်းလၢတ်ႈလႄႈဝႃႈ၊ ၵဝ်ပဵၼ်ၵူၼ်းမဵဝ်း လေႇဝီႉ ၊ ၵူၼ်းဝဵင်း ပႅတ်ႉလႁႅမ်ႇ ၼႂ်းဢိူင်ႇ ယူႉတႃႉ ဢေႃႈ။ ၵဝ်လႄႇၵႂႃႇႁႂ်ႈလႆႈသွၼ်ႈပိုင်ႈတီႈဢၼ်ထူပ်းလႆႈၼၼ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်-

10မီႉၶႃႇ လၢတ်ႈတီႈမၼ်းလႄႈဝႃႈ၊ ယူႇလူၺ်ႈၵၼ်တင်းၵဝ်ၶႃႈသေၵမ်း။ ႁဵတ်းပေႃႈၵဝ်ၶႃႈ၊ ယိတ်ႈပရေႃးႁဵၵ်ႈၵဝ်ၶႃႈသေၵမ်း။ ၵဝ်ၶႃႈတၵ်းပၼ်ငိုၼ်းယေႈပီႊသိပ်းၵျၢပ်ႈ ဢိၵ်ႇတင်းၶူဝ်းၼုင်ႈၶူဝ်းမႆ၊ တၢင်းၵိၼ်တၢင်းၶူပ်းၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ၵူၼ်းမဵဝ်း လေႇဝီႉ ၼၼ်ႉၶဝ်ႈၸူးဢေႃႈ။-

11ၵူၼ်းမဵဝ်း လေႇဝီႉ ၼၼ်ႉ ၶျႃးၸႂ်မၼ်းၼႂ်းလွင်ႈဢၼ်တၵ်းယူႇလူၺ်ႈၵၼ်တင်းၵေႃႉၼၼ်ႉလႄႈ ၵူၼ်းဢွၼ်ႇၼၼ်ႉ ပဵၼ်တီႈၵေႃႉၼၼ်ႉ မိူၼ်ၸိူဝ်ႉၼင်ႇလုၵ်ႈၸၢႆးမၼ်းၵေႃႉၼိုင်ႈ ၼႂ်းလုၵ်ႈၸၢႆးမၼ်းတင်းလၢႆၼၼ်ႉဢေႃႈ။-

12မီႉၶႃႇ ၼၼ်ႉၵေႃႈ ဢဝ်ၵူၼ်းမဵဝ်း လေႇဝီႉ ၼၼ်ႉ ၶၢၼ်းဝႆႉၼႂ်းဢရႃႇယိတ်ႈပရေႃးႁဵၵ်ႈသေယဝ်ႉ၊ ၵူၼ်းဢွၼ်ႇၼၼ်ႉ ႁဵတ်းယိတ်ႈပရေႃးႁဵၵ်ႈမၼ်းလႄႈ ယူႇၵႃႈတီႈႁိူၼ်း မီႉၶႃႇ ၼၼ်ႉဢေႃႈ။-

13မီႉၶႃႇ ၼၼ်ႉၵေႃႈလၢတ်ႈလႄႈဝႃႈ၊ မိူဝ်ႈလဵဝ်ၼႆႉ ၵဝ်ႁူႉလွင်ႈဢၼ် ထႃႇဝရႃႉၽြႃး တၵ်းႁဵတ်းၵျေးၸူးတီႈၵဝ် ၵွပ်ႈပိူဝ်ႈဢၼ်ၵူၼ်းမဵဝ်း လေႇဝီႉ ပဵၼ်ယိတ်ႈပရေႃးႁဵၵ်ႈၵဝ်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။

← Chapter 16 Jump to: Chapter 18 →