Judges 21

Shan

← Chapter 20 Jump to:

1ၵူၼ်းမဵဝ်း ဢီႉသရေႇလႃႉ တင်းလၢႆ လႆႈႁဵတ်းတၢင်းဢၼ်ၵိၼ်ႇဢၼ်ဝႃႈ ၵႃႈတီႈဝဵင်း မီႉၸပႃႇ လႄႈဝႃႈ၊ ႁဝ်းသေၵေႃႉသေၵူၼ်း ဢမ်ႇလႆႈဢဝ်လုၵ်ႈယိင်းႁဝ်းပၼ်တီႈ ၵူၼ်းမဵဝ်း ပိၼ်ႇယႃႇမိၼ်ႇ ၊ ဝႃႈၼင်ႇၼႆဝႆႉထႃႈယဝ်ႉ။-

2ၵူၼ်းတင်းလၢႆမႃးၵႃႈတီႈဝဵင်း ပေႇသလႃႉ လႄႈ ယူႇၵႃႈတီႈၼၼ်ႈၵႃႈတီႈၽၢႆႇၼႃႈၽြႃးပဵၼ်ၸဝ်ႈတေႃႇထိုင်ႁွတ်ႈၶိင်ႇႁူဝ်ၶမ်ႈယူႇ၊ ၵိဝ်သဵင်လႄႈႁွင်ႉႁႆႈၼႃႇလူင်လၢင်ယူႇသေလႄႈ လဝ်ႊလၢတ်ႈလႄႈဝႃႈ၊-

3ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ တီႈၶႃႈ၊ ဢမူႉဢၼ်မဵဝ်းၼိုင်ႈ လုတ်ႈႁၢမ်းၵႂႃႇၵႃႈၼႂ်းမဵဝ်း ဢီႉသရေႇလႃႉ တင်းလၢႆၼႆႉၼၼ်ႉ ပဵၼ်မႃးၵွပ်ႈပိူဝ်ႈၸိူဝ်ႉၼင်ႇႁိုဝ်တီႈၶႃႈ၊ ဝႃႈၼင်ႇၼႆဢေႃႈ။-

4ဝၼ်းမိူဝ်ႈၽုၵ်ႈၼၼ်ႉၶိင်ႇၵၢင်ၼႂ်ၸဝ်ႉၸဝ်ႉ ၵူၼ်းတင်းလၢႆလုၵ်ႉသေလႄႈ ဢွၼ်ၵၼ်တႄႇႁဵတ်းယိတ်ႈပလၢင်ႇလႄႈပုၵ်ႈၸေႃႇယိတ်ႈဢၼ်တုတ်ႇၽႆး ဢိၵ်ႇတင်းယိတ်ႈမိၵ်ႉသႃႇႁႃယႃႉတင်းလၢႆဢေႃႈ။-

5ၵူၼ်းမဵဝ်း ဢီႉသရေႇလႃႉ တင်းလၢႆတွင်ႈထၢမ်လႄႈဝႃႈ၊ ၵႃႈၼႂ်းၵူၼ်းမဵဝ်း ဢီႉသရေႇလႃႉ ၵူႈမဵဝ်းၼႆႉ ၽူႈလႂ်ယင်းဢမ်ႇမႃးႁူမ်ႈလူၺ်ႈၵၼ်တင်းပရဵၵ်ႈသၢတ်ႈတင်းလၢႆ ၵႃႈတီႈထႃႇဝရႃႉၽြႃးလႄႈယူႇ၊ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ ၶဝ်လႆႈႁဵတ်းတၢင်းဢၼ်ၵိၼ်ႇဢၼ်ဝႃႈ ဢၼ်ယႂ်ႇၼႃႇလူၺ်ႈလွင်ႈၵေႃႉဢၼ်ယင်းဢမ်ႇမႃးၵႃႈတီႈထႃႇဝရႃႉၽြႃး တီႈဝဵင်း မီႉၸပႃႇ လႄႈယူႇၼၼ်ႉလႄႈဝႃႈ၊ ႁႂ်ႈၵေႃႉၼၼ်ႉလႆႈၶၢမ်ႇတၢင်းဢၼ် ဢဝ်တၢႆဢမၢၼ်ႇၶၼ်ပဵၼ်တႃႉ၊ ဝႃႈၼင်ႇၼႆဝႆႉထႃႈယဝ်ႉ။-

6ၵူၼ်းမဵဝ်း ဢီႉသရေႇလႃႉ တင်းလၢႆ ၶုၵ်းၸႂ်လႆႈမႆႈၸႂ်လူၺ်ႈၼွင်ႉၸၢႆးၶဝ် ပိၼ်ႇယႃႇမိၼ်ႇ ၼၼ်ႉယူႇသေလႄႈလၢတ်ႈၵၼ်လႄႈဝႃႈ၊ ၼႂ်းမဵဝ်း ဢီႉသရေႇလႃႉ တင်းလၢႆၼႆႉမဵဝ်းၼိုင်ႈ လႆႈၶၢမ်ႇတၢင်းဢၼ်ပႄႇပႅတ်ႈယဝ်ႉ ၼႂ်းဝၼ်းမိူဝ်ႈၼႆႉဢေႃႈ။-

7ၵွပ်ႈပိူဝ်ႈဢၼ်ႁဝ်းဢဝ်ထႃႇဝရႃႉၽြႃး တိူင်ႇဝႃႈလႄႈ ၵိၼ်ႇဝႃႈလွင်ႈဢၼ်ႁဝ်းတၵ်းဢမ်ႇလႆႈဢဝ်လုၵ်ႈယိင်းႁဝ်းပၼ်တီႈၶဝ်ၼၼ်ႉလႄႈ ႁဝ်းတၵ်းႁဵတ်းၸိူဝ်ႉၼင်ႇႁိုဝ် ႁႂ်ႈလႆႈမႄႈယိင်းပၼ် ပုၼ်ႈၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇဝႆႉၼၼ်ႉ၊ ဝႃႈၼင်ႇၼႆဢေႃႈ။

8ၶဝ်သမ်ႉတွင်ႈထၢမ်လႄႈဝႃႈ၊ ၼႂ်းမဵဝ်း ဢီႉသရေႇလႃႉ တင်းလၢႆၼၼ်ႉ ၽူႈလႂ်ယင်းဢမ်ႇမႃးၵႃႈတီႈထႃႇဝရႃႉၽြႃး တီႈဝဵင်း မီႉၸပႃႇ လႄႈယူႇ၊ ဝႃႈၼင်ႇၼႆသေယဝ်ႉ၊ ႁူႉႁၼ်လွင်ႈဢၼ်ၵူၼ်းဝဵင်း ယႃႇပႅတ်ႉ မိူင်း ၵီႉလတ်ႉ ၸိူဝ်းၼၼ်ႉဢမ်ႇမႃးဢမ်ႇႁွတ်ႈ ၵႃႈတီႈတပ်ႉပရဵၵ်ႈသၢတ်ႈ တီႈၸူႉတီႈတုမ်ၼၼ်ႉသေၵေႃႉသေၵူၼ်းၼၼ်ႉဢေႃႈ။-

9မိူဝ်ႈဢၼ်ၼပ်ႉဢၢၼ်ႇတူၺ်းၵူၼ်းတင်းလၢႆၼၼ်ႉၸိုင်၊ ၵူၼ်းဝဵင်း ယႃႇပႅတ်ႉ မိူင်း ၵီႉလတ်ႉ ၼၼ်ႉဢမ်ႇပႃးသေၵေႃႉသေၵူၼ်း။-

10မိူဝ်ႈၼၼ်ႉ ပရဵၵ်ႈသၢတ်ႈၸိူဝ်းၼၼ်ႉ ပွႆႇၸႂ်ႉၵူၼ်းသိုၵ်းဢၼ်ႁႅင်းယႂ်ႇၼႃႇလူင်လၢင်ၼၼ်ႉ မိုၼ်ႇၼိုင်ႈပၢႆသွင်ႁဵင်သေလႄႈ သင်ႇလၢတ်ႈတီႈၶဝ်လႄႈဝႃႈ၊ သူဢွၼ်ၵၼ်ၵႂႃႇလႄႈတိုၵ်းတေႃးယႃႉပႅတ်ႈၵူၼ်းၸၢႆးၵူၼ်းယိင်းလုၵ်ႈဢွၼ်ႇၵူၼ်းဝဵင်း ယႃႇပႅတ်ႉ မိူင်း ၵီႉလတ်ႉ ၸိူဝ်းၼၼ်ႉ လူၺ်ႈၶူမ်းလၢပ်ႇၶူမ်းလႅဝ်းတႃႉ။-

11လွင်ႈဢၼ်သူတၵ်းလႆႈႁဵတ်းၸမ်ႉ၊ သူပႄႇၽဵဝ်ႈၵူၼ်းၸၢႆးၵႃႈမီးဢိၵ်ႇတင်း ၵူၼ်းယိင်းဢၼ်လႆႈတိူဝ်ႉထုၵ်ႇၵၼ်တင်းၵူၼ်းၸၢႆးယဝ်ႉတင်းသဵင်ႈတင်းလူင်ၼၼ်ႉပႅတ်ႈမူတ်းမူတ်းတႃႉ၊ ဝႃႈၼင်ႇၼႆလႄႈ၊-

12ၶဝ်ၼၼ်ႉထူပ်းၵူၼ်းယိင်းသၢဝ်ၵၼ်ႇၺႃႇ ဢၼ်ဢမ်ႇပႆႇတိူဝ်ႉထုၵ်ႇၵၼ်တင်းၵူၼ်းၸၢႆးၼၼ်ႉသီႇပၢၵ်ႇ ၵႃႈၼႂ်းၵူၼ်းဝဵင်း ယႃႇပႅတ်ႉ မိူင်း ၵီႉလတ်ႉ ၸိူဝ်းၼၼ်ႉလႄႈ ဢဝ်ၶဝ်မႃးၵႃႈတီႈတပ်ႉ ၵႃႈတီႈဝဵင်း သီႉလေႃႇ ဢၼ်မီးၵႃႈၼႂ်းမိူင်း ၶႃႇၼၢၼ်ႇ ၼၼ်ႉဢေႃႈ။-

13လႆႈသမ်ႉ ပရဵၵ်ႈသၢတ်ႈတင်းသဵင်ႈတင်းလူင်ၼၼ်ႉ ပွႆႇၸႂ်ႉလႄႈလၢတ်ႈတီႈၵူၼ်းမဵဝ်း ပိၼ်ႇယႃႇမိၼ်ႇ ဢၼ်မီးယူႇၵႃႈတီႈမၢၵ်ႇႁိၼ်မၢၵ်ႇၽႃ ရိမ်ႇမုၼ်ႇ ၼၼ်ႉ ၸိူဝ်းၼၼ်ႉလႄႈ မွၵ်ႇလၢတ်ႈလွင်ႈတၢင်းဢၼ်ထၢတ်ႇသိုၵ်းယဵၼ်သိုၵ်းယဝ်ႉၼၼ်ႉ တီႈၶဝ်ၼၼ်ႉဢေႃႈ။-

14မိူဝ်ႈၼၼ်ႉ ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ဢွၼ်ၵၼ်ၶိုၼ်းမႃးလႄႈ ၶဝ်ဢဝ်လုၵ်ႈယိင်းၵူၼ်းဝဵင်း ယႃႇပႅတ်ႉ မိူင်း ၵီႉလတ်ႉ ဢၼ်ဝႆႉပၼ်ဢသၢၵ်ႈလိပ်းဝႆႉၸိူဝ်းၼၼ်ႉ ပၼ်ၵၼ်တင်းၶဝ်ၼၼ်ႉဢေႃႈ။ ၵူၺ်းၵႃႈ မႄႈယိင်းၸိူဝ်းၼၼ်ႉ ဢမ်ႇပေႃးဢမ်ႇၵုမ်ႇ။-

15ၵူၼ်းတင်းလၢႆၶုၵ်းၸႂ်လႆႈမႆႈၸႂ်လူၺ်ႈ မဵဝ်း ပိၼ်ႇယႃႇမိၼ်ႇ ၵွပ်ႈပိူဝ်ႈဢၼ် ထႃႇဝရႃႉၽြႃးႁဵတ်းတၢင်းဢၼ် ၵိူၼ်ႇပင်းလူႉလႅဝ် ၵႃႈၼႂ်းမဵဝ်း ဢီႉသရေႇလႃႉ တင်းလၢႆၸိူဝ်ႉၼင်ႇၼၼ်ၼၼ်ႉဢေႃႈ။-

16ၵူၼ်းဢၼ်ပဵၼ်ၵႄႇပဵၼ်ႁူဝ်ၵႃႈၼႂ်းပရဵၵ်ႈသၢတ်ႈၸိူဝ်းၼၼ်ႉၵေႃႈလၢတ်ႈလႄႈဝႃႈ၊ ၵွပ်ႈပိူဝ်ႈဢၼ်လႆႈပႄႇၽဵဝ်ႈမႄႈယိင်းပႅတ်ႈသေ ၵႃႈၼႂ်းမဵဝ်း ပိၼ်ႇယႃႇမိၼ်ႇ ၼၼ်ႉလႄႈ ႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ် ႁႂ်ႈလႆႈမႄႈယိင်းပုၼ်ႈၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇၼၼ်ႉ၊ ဝႃႈၼင်ႇၼႆလႄႈ၊-

17သမ်ႉလၢတ်ႈလႄႈဝႃႈ၊ လွင်ႈၼင်ႇႁိုဝ်မဵဝ်းၼိုင်ႈ တၵ်းဢမ်ႇလႆႈမွတ်ႇႁၢႆသေၵႃႈၼႂ်းမဵဝ်း ဢီႉသရေႇလႃႉ တင်းလၢႆၸိုင်၊ တၵ်းလႆႈမီးလိၼ် တီႈဢၼ်တၵ်းၶၢမ်ႇဢမူၺ်ႇပုၼ်ႈၵူၼ်းမဵဝ်း ပိၼ်ႇယႃႇမိၼ်ႇ ဢၼ်ၵၢင်းလွတ်ႈတၢင်းၽေးတၢႆၸိူဝ်းၼၼ်ႉဢေႃႈ။-

18ၼႂ်းဝႃႈၼၼ်သေၵေႃႈ ႁဝ်းဢမ်ႇဢဝ်လုၵ်ႈယိင်းႁဝ်းပၼ်ၵၼ်တင်းၶဝ် ၵွပ်ႈပိူဝ်ႈဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ ႁဵတ်းတၢင်းဢၼ်တိူင်ႇလႄႈဝႃႈ၊ ႁႂ်ႈၵေႃႉဢၼ်ဢဝ်လုၵ်ႈယိင်းမၼ်းပၼ်ၵၼ်တင်းမဵဝ်း ပိၼ်ႇယႃႇမိၼ်ႇ ၼၼ်ႉ ပဵၼ်ၵေႃႉဢၼ်ထုၵ်ႇၵိၼ်ႇထုၵ်ႇဝႃႈသေၵမ်းလူၺ်ႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆသေလႄႈ၊-

19သမ်ႉလၢတ်ႈလႄႈဝႃႈ၊ တူၺ်းလူး၊ ၸၢင်ႈၶၢမ်ႇပွႆးဢၸႅၼ်ႇပုၼ်ႈထႃႇဝရႃႉၽြႃး ၼႂ်းလိၼ် သီႉလေႃႇ ၼႃႈတၢင်းႁွင်ႇ ဝဵင်း ပေႇသလႃႉ ၊ ၼႃႈဝၼ်းဢွၵ်ႇ သဵၼ်ႈတၢင်းဢၼ်လုၵ်ႉၵႃႈတီႈဝဵင်း ပေႇသလႃႉ ၵႂႃႇၸူးၵႃႈတီႈဝဵင်း သေႇၶိမ်ႇ ၊ ၼႃႈတၢင်းၸၢၼ်း ဝဵင်း လေႇပေႃႇၼႃႉ ၼၼ်ႉ ယေႈပီႊယေႈပွၵ်ႈဢေႃႈ၊ ဝႃႈၼင်ႇၼႆသေယဝ်ႉ၊-

20သင်ႇလၢတ်ႈတီႈၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉလႄႈဝႃႈ၊ သူၵႂႃႇလႄႈလွမ်ပႂ်ႉယူႇၵႃႈတီႈသူၼ်ဢူးယဵၼ်ႇမၢၵ်ႇၸပိတ်ႈတႃႉ။-

21မိူဝ်ႈဢၼ်လုၵ်ႈယိင်းဝဵင်း သီႉလေႃႇ ၸိူဝ်းၼၼ်ႉ ၵႃႈယူႇဝႅၼ်ယူႇသေလႄႈ မႃးႁႂ်ႈလႆႈၶၢမ်ႇပွႆးၼၼ်ႉၸိုင်၊ သူဢွၵ်ႇသေၵႃႈၼႂ်းသူၼ် ဢူးယဵၼ်ႇၸပိတ်ႈသေလႄႈ တီႉၵမ်ဢဝ်လုၵ်ႈယိင်းဝဵင်း သီႉလေႃႇ ၸိူဝ်းၼၼ်ႉ ႁင်းၽႂ်ႁင်းမၼ်းပုၼ်ႈဢၼ်တၵ်းႁႂ်ႈပဵၼ်မေးတူဝ်ၸဝ်ႈၵဝ်ႇလႄႈ ဢဝ်မိူဝ်းၵႂႃႇၵႃႈတီႈမိူင်း ပိၼ်ႇယႃႇမိၼ်ႇ ပုၼ်ႉတႃႉ။-

22မိူဝ်ႈဢၼ်ပေႃႈၶဝ်၊ ဢမ်ႇၼၼ် ပီႈၸၢႆးၼွင်ႉၸၢႆးၶဝ် မႃးၵႃႈတီႈႁဝ်းလႄႈ ႁဵတ်းဢမူႉၼၼ်ႉၸိုင်၊ ႁဝ်းတၵ်းၶိုၼ်းလၢတ်ႈတီႈၶဝ်လႄႈဝႃႈ၊ ထွၵ်ႈလူၺ်ႈၼႃႈႁဝ်းသေလႄႈ ဢဵတ်းလူပၼ်တီႈႁဝ်းသေၵမ်း။ ၼႂ်းမိူဝ်ႈဢၼ်ႁဝ်းတိုၵ်းသိုၵ်းၼၼ်ႉ၊ ႁဝ်းဢမ်ႇလႆႈဢဝ်မေးပၼ်ပုၼ်ႈၶဝ်ၵူႈၵေႃႉၵူႈၵူၼ်းႁင်းၽႂ်ႁင်းမၼ်း။ သူၵေႃႈဢမ်ႇလႆႈဢဝ်ပၼ်ၵၼ်တင်းၶဝ် ၵွပ်ႈပိူဝ်ႈဢၼ်ဢပႅတ်ႈတၵ်းႁွတ်ႈထိုင် ၵႃႈတီႈသူၼၼ်ႉဢေႃႈ၊ ဝႃႈၼင်ႇၼႆဢေႃႈ။-

23ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ႁဵတ်းၸိူဝ်ႉၼင်ႇၼၼ်လႄႈ ၸွမ်းလူၺ်ႈတၢင်းဢၼ်ၼပ်ႉဢၼ်ဢၢၼ်ႇၶဝ်ၼၼ်ႉသေလႄႈ တီႉၵမ်ဢဝ်မႄႈယိင်းဢၼ်ၵႃႈယူႇဝႅၼ်ယူႇၸိူဝ်းၼၼ်ႉ ပုၼ်ႈဢၼ်တၵ်းႁဵတ်းမေးၶဝ်လႄႈ ဢဝ်ၶဝ်ၵႂႃႇဢေႃႈ။ ၶဝ်ၶိုၼ်းႁွတ်ႈထိုင်ၵႃႈတီႈလိၼ်ဢၼ်ၶဝ်ၶၢမ်ႇဢမူၺ်ႇၼၼ်ႉသေယဝ်ႉ၊ ၶိုၼ်းမႄးႁဵတ်းဝဵင်းသေလႄႈယူႇဢေႃႈ။-

24မိူဝ်ႈၼၼ်ႉၵူၼ်းမဵဝ်း ဢီႉသရေႇလႃႉ တင်းလၢႆၵေႃႈ ဢွၼ်ၵၼ်လုၵ်ႉသေၵႃႈတီႈၼၼ်ႈ ၶိုၼ်းမိူဝ်းၵႂႃႇၸူးၵႃႈတီႈမဵဝ်းတူဝ်ၸဝ်ႈၵဝ်ႇ၊ တီႈယူႇပီႈၼွင်ႉၸိူဝ်ႉၶိူဝ်းတူဝ်ၸဝ်ႈၵဝ်ႇ၊ လိၼ်တီႈဢၼ်တူဝ်ၸဝ်ႈၵဝ်ႇၶၢမ်ႇဢမူၺ်ႇၼၼ်ႉ ႁင်းၽႂ်ႁင်းမၼ်းသေဢေႃႈ။-

25ၼႂ်းၶိင်ႇမိုဝ်ႉဝၼ်းၼၼ်ႉ ၶုၼ်ႁေႃၶမ်း ဢီႉသရေႇလႃႉ ဢမ်ႇမီး။ ၵူႈၵေႃႉၵူႈၵူၼ်းႁဵတ်းၸွမ်းၵႃႈဢၼ်ထုၵ်ႇတႃတူဝ်ၸဝ်ႈၵဝ်ႇ ႁင်းၽႂ်ႁင်းမၼ်းၼၼ်ႉဢေႃႈ။ လိၵ်ႈမၢတ်ႈလွင်ႈၵူၼ်းလူင်ဢၼ်ၸီႇယၢင်ႇတြႃးယဝ်ႉယဝ်ႉဢေႃႈ။

← Chapter 20 Jump to: