Judges 12

Shan

← Chapter 11 Jump to: Chapter 13 →

1ၵူၼ်းမဵဝ်း ဢေႇၽရိမ်ႇ တင်းလၢႆ ၸူႉၵၼ်တုမ်ၵၼ်လႄႈၶီႇၵႂႃႇၽၢႆႇတၢင်းႁွင်ႇသေယဝ်ႉ ၶဝ်လၢတ်ႈတီႈ ယေႇၽသႃႉ လႄႈဝႃႈ၊ ၸဝ်ႈယင်းဢမ်ႇႁွင်ႉဢမ်ႇၸူဝ်းႁဝ်းလႄႈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၶီႇၵႂႃႇႁႂ်ႈလႆႈတိုၵ်းတေႃးၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉၼင်ႇႁိုဝ်။ ႁဝ်းတၵ်းဢဝ်ၽႆးတုတ်ႇႁိူၼ်းၸဝ်ႈၵႃႈၼိူဝ်ၸဝ်ႈၼႆႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

2ယေႇၽသႃႉ လၢတ်ႈတီႈၶဝ်လႄႈဝႃႈ၊ ၵဝ်ဢိၵ်ႇတင်းၵူၼ်းၵဝ်တင်းလၢႆ မီးဢမူႉဢၼ်ယႂ်ႇၼႃႇတီႈၵၼ်တင်းၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉလႄႈ မိူဝ်ႈဢၼ်ၵဝ်ႁွင်ႉၸူဝ်းဢဝ်သူၼၼ်ႉၸိုင် သူယင်းဢမ်ႇၵႄႇသႄႇၼုၵ်ႈဢဝ်ၵဝ် ဢွၵ်ႇသေၵႃႈၼႂ်းမိုဝ်းၶဝ်ၼၼ်ႉလႄႈယူႇဢေႃႈ။-

3မိူဝ်ႈဢၼ်ၵဝ်ႁူႉႁၼ်လွင်ႈဢၼ်သူဢမ်ႇၵႄႇသႄႇၼုၵ်ႈဢဝ်ၵဝ်ၼၼ်ႉၸိုင် ၵဝ်ၸုၼ်ႉဢသၢၵ်ႈၵဝ်သေလႄႈ ၶီႇၵႂႃႇႁႂ်ႈလႆႈတိုၵ်းၵၼ်တင်းၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉလႄႈ ထႃႇဝရႃႉၽြႃး ဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၵဝ်ယဝ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူမႃးတီႈၵဝ်ဝၼ်းမိူဝ်ႈၼႆႉ ႁႂ်ႈလႆႈတိုၵ်းတေႃးၵဝ်ၼင်ႇႁိုဝ်။ ဝႃႈၼင်ႇၼႆသေယဝ်ႉ၊-

4ယေႇၽသႃႉ ႁႂ်ႈၵူၼ်းမိူင်း ၵီႉလတ်ႉ ၵႃႈမီးၼၼ်ႉ ၸူႉၵၼ်တုမ်ၵၼ်သေလႄႈ တိုၵ်းၵၼ်တင်းမဵဝ်း ဢေႇၽရိမ်ႇ ဢေႃႈ။ ၵူၼ်းမိူင်း ၵီႉလတ်ႉ ၸိူဝ်းၼၼ်ႉ တိုၵ်းတေႃးယႃႉပႅတ်ႈၵူၼ်းမဵဝ်း ဢေႇၽရိမ်ႇ တင်းလၢႆ ၵွပ်ႈပိူဝ်ႈဢၼ်ၶဝ်သႄႉသွမ်းလႄႈဝႃႈ၊ သူဢၼ်ပဵၼ်ၵူၼ်းမိူင်း ၵီႉလတ်ႉ ၸိူဝ်းၼႆႉ ပဵၼ်ၵူၼ်းမဵဝ်း ဢေႇၽရိမ်ႇ ဢၼ်ဢွၵ်ႇပၢႆႈသေၵႃႈၼႂ်းမဵဝ်း ဢေႇၽရိမ်ႇ ဢိၵ်ႇတင်းမဵဝ်း မၼႃႇသေႇ ၼၼ်ႉဢေႃႈ၊ ဝႃႈၼင်ႇၼႆၼၼ်ႉဢေႃႈ။-

5ၵူၼ်းမိူင်း ၵီႉလတ်ႉ တင်းလၢႆ ဢွၼ်ၵၼ်ႁႄႉတၢင်းတီႈဢၼ်ၶၢမ်ႈၼမ်ႉႁွင်ႈ ယေႃးတၢၼ်ႇ ၵႃႈတီႈၽၢႆႇၼႃႈၵူၼ်း ဢေႇၽရိမ်ႇ ၸိူဝ်းၼၼ်ႉဝႆႉလႄႈ မိူဝ်ႈဢၼ်ၵူၼ်း ဢေႇၽရိမ်ႇ ဢၼ်ပၢႆႈလႄႈလွတ်ႈၵႂႃႇၼၼ်ႉ သေၵေႃႉသေၵူၼ်းယွၼ်းဢၶႂၢင်ႉလႄႈဝႃႈ၊ ႁႂ်ႈလႆႈၶၢမ်ႈၵႂႃႇသေၵမ်း၊ ဝႃႈၼင်ႇၼႆၸိုင်၊ ၵူၼ်းမိူင်း ၵီႉလတ်ႉ တင်းလၢႆ ၸႅတ်ႈထၢမ်လႄႈဝႃႈ၊ မႂ်းၼႆႉပဵၼ်ၵူၼ်းမဵဝ်း ဢေႇၽရိမ်ႇ ႁိုဝ်။ ဝႃႈၼင်ႇၼႆလႄႈ ပေႃးမၼ်းလၢတ်ႈလႄႈဝႃႈ ဢမ်ႇၸႂ်ႈၶႃႈ၊ ဝႃႈၼင်ႇၼႆၸိုင်၊-

6ၶဝ်လၢတ်ႈတီႈမၼ်းလႄႈဝႃႈ၊ မႂ်းလၢတ်ႈၵႂၢမ်းဢၼ်ဝႃႈ သီႉပေႃးလႅတ်ႉ ၼၼ်ႉလူး၊ မိူဝ်ႈဢၼ်ဝႃႈၼင်ႇၼႆၸိုင် မၼ်းၼၼ်ႉလၢတ်ႈလႄႈဝႃႈ၊ ၸီႉပေႃးလႅတ်ႉ ၊ ဝႃႈၼင်ႇၼႆ ၵွပ်ႈပိူဝ်ႈဢၼ်မၼ်းဢမ်ႇၸၢင်ႈလၢတ်ႈၵႂၢမ်းၼၼ်ႉ ႁႂ်ႈပီႇၼၼ်ႉဢေႃႈ။ ၶဝ်တီႉၵမ်ဢဝ်ၵေႃႉဢၼ်လၢတ်ႈ ၸိူဝ်ႉၼင်ႇၼၼ်ၼၼ်ႉလႄႈ ဢဝ်တၢႆၵႃႈတီႈဢၼ်ၶၢမ်ႈၼမ်ႉႁွင်ႈ ယေႃးတၢၼ်ႇ ၼၼ်ႉဢေႃႈ။ မိူဝ်ႈၼၼ်ႉ ၵူၼ်းမဵဝ်း ဢေႇၽရိမ်ႇ တၢႆ သီႇမိုၼ်ႇပၢႆသၢမ်ႁဵင်ဢေႃႈ။-

7ယေႇၽသႃႉ ၼၼ်ႉၸီႇယၢင်ႇၵႃႈၼိူဝ်မဵဝ်း ဢီႉသရေႇလႃႉ ႁူၵ်းပီႊတဵမ်တဵမ်ဢေႃႈ။ မိူဝ်ႈၼၼ်ႉ ယေႇၽသႃႉ ၵူၼ်းမိူင်း ၵီႉလတ်ႉ ၼၼ်ႉ တၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇ ၵႃႈတီႈဝဵင်း ၵီႉလတ်ႉ ဝဵင်းၼိုင်ႈဢေႃႈ။

8လိုၼ်းသေ ယေႇၽသႃႉ ၼၼ်ႉ၊ ဢီႉပၸၼ်ႇ ၵူၼ်းဝဵင်း ပႅတ်ႉလႁႅမ်ႇ ၼၼ်ႉ ၸီႇယၢင်ႇၵႃႈၼိူဝ်မဵဝ်း ဢီႉသရေႇလႃႉ ဢေႃႈ။-

9ၶုၼ်ၼၼ်ႉ မီးလုၵ်ႈၸၢႆးသၢမ်သိပ်း ဢိၵ်ႇတင်းလုၵ်ႈယိင်းဢၼ်မၼ်းပွႆႇၵႂႃႇတၢင်ႇတီႈတၢင်ႇလႅၼ်သၢမ်သိပ်း တင်းလုၵ်ႈပႂ်ႉဢၼ်ယူႇတၢင်ႇတီႈတၢင်ႇလႅၼ်လႄႈ မၼ်းသိမ်းဝႆႉပုၼ်ႈလုၵ်ႈၸၢႆးမၼ်းၸိူဝ်းၼၼ်ႉ သၢမ်သိပ်းဢေႃႈ။ မၼ်းၼၼ်ႉၸီႇယၢင်ႇၵႃႈၼိူဝ်မဵဝ်း ဢီႉသရေႇလႃႉ ၸဵတ်းပီႊတဵမ်တဵမ်ဢေႃႈ။-

10မိူဝ်ႈၼၼ်ႉ ဢီႉပၸၼ်ႇ ၼၼ်ႉတၢႆလႄႈ လႆႈၶၢမ်ႇတၢင်းဢၼ်သၢင်းၵျူဝ်ႇၵႃႈတီႈဝဵင်း ပႅတ်ႉလႁႅမ်ႇ ဢေႃႈ။-

11လိုၼ်းသေ ဢီႉပၸၼ်ႇ ၼၼ်ႉ၊ ဢေႇလုၼ်ႇ ၵူၼ်းမဵဝ်း ၸေႇပူႉလုၼ်ႇ ၼၼ်ႉၸီႇယၢင်ႇၵႃႈၼိူဝ်မဵဝ်း ဢီႉသရေႇလႃႉ သိပ်းပီႊတဵမ်တဵမ်ဢေႃႈ။-

12ဢေႇလုၼ်ႇ ၵူၼ်းမဵဝ်း ၸေႇပူႉလုၼ်ႇ ၼၼ်ႉတၢႆလႄႈ လႆႈၶၢမ်ႇတၢင်းဢၼ်သၢင်းၵျူဝ်ႇ ၵႃႈတီႈဝဵင်း ဢႃႇၸလုၼ်ႇ ဢိူင်ႇ ၸေႇပူႉလုၼ်ႇ ဢေႃႈ။-

13လိုၼ်းသေမၼ်းၼၼ်ႉ ဢႃႇပတုၼ်ႇ လုၵ်ႈၸၢႆး ႁီႉလေးလႃႉ ၵူၼ်းဝဵင်း ပီႉရသုၼ်ႇ ၼၼ်ႉ ၸီႇယၢင်ႇၵႃႈၼိူဝ် မဵဝ်း ဢီႉသရေႇလႃႉ ဢေႃႈ။-

14ၶုၼ်ၼၼ်ႉမီးလုၵ်ႈၸၢႆးသီႇသိပ်း၊ လၢၼ်ၸၢႆးသၢမ်သိပ်း ဢၼ်ၶီႇလီႈဢွၼ်ႇၸဵတ်းသိပ်းတူဝ်ဢေႃႈ။ မၼ်းၼၼ်ႉ ၸီႇယၢင်ႇၵႃႈၼိူဝ် မဵဝ်း ဢီႉသရေႇလႃႉ ပႅတ်ႇပီႊတဵမ်တဵမ်ဢေႃႈ။-

15မိူဝ်ႈၼၼ်ႉ ဢႃႇပတုၼ်ႇ လုၵ်ႈၸၢႆး ႁီႉလေးလႃႉ ၊ ၵူၼ်းဝဵင်း ပီႉရသုၼ်ႇ ၼၼ်ႉတၢႆလႄႈ လႆႈၶၢမ်ႇတၢင်းဢၼ်သၢင်းၵျူဝ်ႇၵႃႈတီႈဝဵင်း ပီႉရသုၼ်ႇ ဢိူင်ႇ ဢေႇၽရိမ်ႇ ၵႃႈၼိူဝ်ႁၢၼ်ႉလွႆ ဢႃႇမလႅၵ်ႉ ၼၼ်ႉဢေႃႈ။

← Chapter 11 Jump to: Chapter 13 →