Judges 14

Shan

← Chapter 13 Jump to: Chapter 15 →

1ၽဝ်ႇၼိုင်ႈ သၢမ်ႇသုၼ်ႇ လူင်းၵႂႃႇၵႃႈတီႈဝဵင်း တီႉမၼႃႉ လႄႈ ႁၼ်မႄႈယိင်းၵေႃႉၼိုင်ႈ ဢၼ်ပဵၼ်မဵဝ်း ၽီႉလိတ်ႉတီႉ ၵႃႈတီႈဝဵင်း တီႉမၼႃႉ ၼၼ်ႉသေယဝ်ႉ၊-

2ၶိုၼ်းမႃးၸူးၵႃႈတီႈပေႃႈမႄႈမၼ်းလႄႈလၢတ်ႈဝႃႈ ၵဝ်ၶႃႈႁၼ်မႄႈယိင်းၵေႃႉၼိုင်ႈ ဢၼ်ပဵၼ်မဵဝ်း ၽီႉလိတ်ႉတီႉ ၵႃႈတီႈဝဵင်း တီႉမၼႃႉ ၼၼ်ႉယဝ်ႉ။ တွင်ႈယွၼ်းဢဝ်လႄႈ ပၼ်ပုၼ်ႈဢၼ်တၵ်းပဵၼ်မေးၵဝ်ၶႃႈသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

3ပေႃႈမႄႈမၼ်းၵေႃႈတွင်ႈထၢမ်လႄႈဝႃႈ၊ လွင်ႈၼင်ႇႁိုဝ်မႂ်းတၵ်းလႆႈၵႂႃႇလႄႈ ဢဝ်မေးၵႃႈၼႂ်းၵူၼ်း ၽီႉလိတ်ႉတီႉ ဢၼ်ဢမ်ႇတွၼ်ႉၶၢမ်ႇတၢင်းဢၼ်ထိူဝ်ႁိမ်းၸိူဝ်းၼၼ်ႉၸိုင်၊ ၵႃႈၼႂ်းလုၵ်ႈယိင်းပီႈမႂ်းၼွင်ႉမႂ်း ဢိၵ်ႇတင်းၵႃႈၼႂ်းလုၵ်ႈယိင်းမဵဝ်းၸိူဝ်ႉၶိူဝ်းႁဝ်းၼႆႉ ဢမ်ႇမီးမႄႈယိင်းသေၵေႃႉသေၵူၼ်းႁိုဝ်။ ဝႃႈၼင်ႇၼႆသေၵေႃႈ၊ သၢမ်ႇသုၼ်ႇ လၢတ်ႈ တီႈပေႃႈမၼ်းလႄႈဝႃႈ တွင်ႈယွၼ်းဢဝ်မၼ်းၼၼ်ႉလႄႈ ပၼ်ၵဝ်ၶႃႈသေၵမ်း။ မၼ်းထုၵ်ႇၸႂ်ၵျိူၵ်ႈၸႂ်ၵဝ်ၶႃႈၼႃႇလူင်လၢင်ဢေႃႈ၊ ဝႃႈၼင်ႇၼႆဢေႃႈ။-

4ပေႃႈမႄႈမၼ်းၼၼ်ႉ ဢမ်ႇႁူႉလွင်ႈဢၼ်ပဵၼ်ၵွပ်ႈပိူဝ်ႈထႃႇဝရႃႉၽြႃးၼၼ်ႉ။ လွင်ႈမၼ်းၸမ်ႉ မၼ်းႁႃဢမူႉတီႈၵူၼ်း ၽီႉလိတ်ႉတီႉ တင်းလၢႆဢေႃႈ။ မိူဝ်ႈၶိင်ႇၵႃႇလႃႉၼၼ်ႉ ၵူၼ်း ၽီႉလိတ်ႉတီႉ ဢုပ်ႉပိူင်ႇၵႃႈၼိူဝ်မဵဝ်း ဢီႉသရေႇလႃႉ ယူႇဢေႃႈ။-

5မိူဝ်ႈၼၼ်ႉ သၢမ်ႇသုၼ်ႇ ဢိၵ်ႇတင်းပေႃႈမႄႈမၼ်းၸိူဝ်းၼၼ်ႉ လူင်းၸူးၵႃႈတီႈဝဵင်း တီႉမၼႃႉ လႄႈ ႁွတ်ႈထိုင်ၵႃႈတီႈသူၼ်ဢူးယဵၼ်ႇၸပိတ်ႈ တီႉမၼႃႉ ၸိူဝ်းၼၼ်ႉသေယဝ်ႉ၊ သၢင်ႇသီႈတူဝ်ၼုမ်ႇတူဝ်ၼိုင်ႈထူပ်းႁၼ်မၼ်းလႄႈ ႁွင်ႉႁဝ်ႇၶၢင်းၸူးဢေႃႈ။-

6မိူဝ်ႈၼၼ်ႉ ဝီႉၺိၺ်ႇထႃႇဝရႃႉၽြႃး တူၵ်းႁွတ်ႈၵႃႈၼိူဝ်မၼ်းၼႃႇလူင်လၢင်လႄႈ မၼ်းဢမ်ႇပႃးသေၸိူဝ်ႉသေပိူင်ၵႃႈတီႈမိုဝ်းမၼ်းလႄႈ မၼ်းတိုတ်ႉသိၵ်ႇသၢင်ႇသီႈၼၼ်ႉၶၢတ်ႇ မိူၼ်ၸိူဝ်ႉၼင်ႇဢၼ်တိုတ်ႉသိၵ်ႇပႄႉဢွၼ်ႇၶၢတ်ႇၼၼ်ႉဢေႃႈ။ ၵူၺ်းၵႃႈ မၼ်းဢမ်ႇမွၵ်ႇဢမ်ႇလၢတ်ႈလွင်ႈတၢင်းဢၼ် မၼ်းႁဵတ်းၼၼ်ႉတီႈပေႃႈမႄႈမၼ်း။-

7မၼ်းလူင်းၸူးလႄႈ တၵ်ႉလၢတ်ႈၵၼ်တင်းမႄႈယိင်းသေယဝ်ႉ၊ မႄႈယိင်းၼၼ်ႉပဵၼ်ဢၼ်ထုၵ်ႇၸႂ်ၵျိူၵ်ႈၸႂ် သၢမ်ႇသုၼ်ႇ ဢေႃႈ။-

8ႁိုင်တၢၼ်ႇတၢၼ်ႇသေယဝ်ႉ၊ ၼႂ်းမိူဝ်ႈဢၼ်မၼ်းယင်းတိုၵ်ႉၵႂႃႇ ႁႂ်ႈလႆႈသိမ်းဢဝ်မႄႈယိင်းၼၼ်ႉယူႇၼၼ်ႉၸိုင်၊ မၼ်းဝႄႈပိူင်ႈဢွၵ်ႇသေၵႃႈၼႂ်းသဵၼ်ႈတၢင်းၵႂႃႇ ႁႂ်ႈလႆႈလူလႆႈတူၺ်း တူဝ်သၢင်ႇသီႈၼၼ်ႉလႄႈ ထူပ်းႁၼ်ၽုင်ၽိုင်ႈ ဢိၵ်ႇတင်းၼမ်ႉၽိုင်ႈၵႃႈၼႂ်းတူဝ်သၢင်ႇသီႈၼၼ်ႉသေယဝ်ႉ၊-

9ဢဝ်မိုဝ်းမၼ်းၸူၵ်းၵမ်ဢဝ်လႄႈၵိၼ်ၸွမ်းတၢင်းၵႂႃႇယူႇဢေႃႈ။ မၼ်းႁွတ်ႈထိုင်ၵႃႈတီႈပေႃႈမႄႈမၼ်းသေယဝ်ႉ၊ ဢဝ်ပၼ်တီႈၶဝ်လႄႈ ၶဝ်ၵေႃႈၵိၼ်ဢေႃႈ။ ၵူၺ်းၵႃႈ မၼ်းဢမ်ႇမွၵ်ႇဢမ်ႇလၢတ်ႈလွင်ႈဢၼ် မၼ်းၸူၵ်းၵမ်ဢဝ်ၼမ်ႉၽိုင်ႈၼၼ်ႉၵႃႈၼႂ်းတူဝ်သၢင်ႇသီႈၼၼ်ႉတီႈၶဝ်ၼၼ်ႉ။

10ပေႃႈမၼ်းၵေႃႈ သမ်ႉၶိုၼ်းလူင်းၸူးၵႃႈတီႈမႄႈယိင်းၼၼ်ႉထႅင်ႈလႄႈ သၢမ်ႇသုၼ်ႇ ႁဵတ်းပွႆးၸွမ်းၵႃႈၼင်ႇဢၼ်ထုင်းၸၢမ်ႇၽူႈမၢဝ်ႇမီးၼၼ်ႉဢေႃႈ။-

11မိူဝ်ႈဢၼ်ၶဝ်ႁၼ် သၢမ်ႇသုၼ်ႇ ၼၼ်ႉၸိုင် ၶဝ်ႁွင်ႉပၢင်းဢဝ်ၵေႃႉသေႈသၢမ်သိပ်းၵေႃႉ မႃးႁႂ်ႈလႆႈၶၢမ်ႇပွႆးလူၺ်ႈၵၼ်တင်းမၼ်းဢေႃႈ။-

12သၢမ်ႇသုၼ်ႇ ၵေႃႈ လၢတ်ႈတီႈၶဝ်ၼၼ်ႉလႄႈဝႃႈ၊ ၵဝ်တၵ်းလၢတ်ႈၵႂၢမ်းသိူင်ႇၵႂၢမ်းဢမ်တီႈသူဢေႃႈ။ ပေႃးသူၽုၺ်ႇဢွၵ်ႇၼႄပျႃး ၼႂ်းၸဵတ်းဝၼ်းမိူဝ်ႈၶၢမ်ႇပွႆးၼႆႉလႄႈ ၵႄႇလိတ်ႈလႆႈၸိုင်၊ ၵဝ်တၵ်းပၼ်သိူဝ်ႈယၢဝ်းသၢမ်သိပ်း ဢိၵ်ႇတင်းသိူဝ်ႈဢၼ်တၵ်းပုတ်ႈတၵ်းလၢႆႈ သၢမ်သိပ်းတီႈသူဢေႃႈ။-

13ပေႃးသူဢမ်ႇၽုၺ်ႇဢွၵ်ႇၼႄပျႃးတီႈၵဝ်လႆႈၸိုင်၊ သူတၵ်းလႆႈပၼ်သိူဝ်ႈယၢဝ်းသၢမ်သိပ်း ဢိၵ်ႇတင်းသိူဝ်ႈဢၼ်တၵ်းပုတ်ႈတၵ်းလၢႆႈ သၢမ်သိပ်းတီႈၵဝ်ဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ဢွၼ်ၵၼ်ၶိုၼ်းလၢတ်ႈတီႈမၼ်းလႄႈဝႃႈ၊ မွၵ်ႇလၢတ်ႈၵႂၢမ်းသိူင်ႇၵႂၢမ်းဢမ်မႂ်း ႁႂ်ႈႁဝ်းငိၼ်းသေၵမ်း၊ ဝႃႈၼင်ႇၼႆဢေႃႈ။-

14မၼ်းၵေႃႈလၢတ်ႈတီႈၶဝ်လႄႈဝႃႈ၊ ၵႃႈၼႂ်းၵေႃႉဢၼ်ၸၢင်ႈၵိၼ်ၸၢင်ႈၶူပ်းၼၼ်ႉ တၢင်းၵိၼ်တၢင်းၶူပ်းဢွၵ်ႇမႃးလႄႈ ၵႃႈၼႂ်းၵေႃႉဢၼ်ၵတ်ႉၶၼ်ႁႅင်းယႂ်ႇၼၼ်ႉ ဢၼ်ဝၢၼ်ဢၼ်ၸဵမ်းဢွၵ်ႇမႃးဢေႃႈ၊ ဝႃႈၼင်ႇၼႆဢေႃႈ။ ဢၼၢၵ်ႈဢထိၵ်ႈပႄႇ ၵႂၢမ်းသိူင်ႇၵႂၢမ်းဢမ်ၼၼ်ႉၸိုင် ၶဝ်ႁႃဢဝ်သၢမ်ဝၼ်းတဵမ်တဵမ်လႄႈ ဢမ်ႇထူပ်းဢမ်ႇလႆႈ။-

15ႁွတ်ႈထိုင်ဝၼ်းၸတုၵ်ႉထႃႉသေယဝ်ႉ၊ ၶဝ်ၼၼ်ႉလၢတ်ႈတီႈမေး သၢမ်ႇသုၼ်ႇ ၼၼ်ႉလႄႈဝႃႈ၊ မႂ်းတၵ်းလႆႈၶျေႃးၽူဝ်မႂ်း ႁႂ်ႈမၼ်းၽုၺ်ႇဢွၵ်ႇၼႄပျႃးဢၼၢၵ်ႈဢထိၵ်ႈပႄႇၵႂၢမ်းသိူင်ႇၵႂၢမ်းဢမ်ၼၼ်ႉဢေႃႈ။ ပေႃးဢမ်ႇၼၼ် ႁဝ်းတၵ်းဢဝ်ၽႆးတုတ်ႇမႂ်းဢိၵ်ႇတင်းပီႈၼွင်ႉၸိူဝ်ႉၶိူဝ်းမႂ်းဢေႃႈ။ မႂ်းႁွင်ႉပၢင်းႁဝ်းမႃးႁႂ်ႈလႆႈႁိမ်ဢဝ်ဢုၵ်ႉၸႃႇႁဝ်းႁိုဝ်။ ဝႃႈၼင်ႇၼႆဢေႃႈ။-

16မေး သၢမ်ႇသုၼ်ႇ ႁႆႈႁွင်ႉၵႃႈတီႈၽၢႆႇၼႃႈမၼ်းသေလႄႈလၢတ်ႈလႄႈဝႃႈ၊ ၸဝ်ႈၸင်းၵဝ်ၶႃႈဢေႃႈ။ ၸဝ်ႈဢမ်ႇႁၵ်ႉၵဝ်ၶႃႈ။ ၸဝ်ႈလၢတ်ႈၵႂၢမ်းသိူင်ႇၵႂၢမ်းဢမ်တီႈပီႈၼွင်ႉၸိူဝ်ႉၶိူဝ်းၵဝ်ၶႃႈလႄႈ ၸဝ်ႈယင်းဢမ်ႇၼႄပျႃးတီႈၵဝ်ၶႃႈလူင်ပႄႇ၊ ဝႃႈၼင်ႇၼႆဢေႃႈ။ မၼ်းၵေႃႈလၢတ်ႈတီႈမၼ်းၼၼ်ႉလႄႈဝႃႈ၊ တေႃႈၵႃႈပေႃႈမႄႈၵဝ်ၼၼ်ႉ၊ ၵဝ်ယင်းဢမ်ႇၼႄပျႃးလႄႈ ၵဝ်တၵ်းလႆႈၼႄပျႃးတီႈမႂ်းႁိုဝ်။ ဝႃႈၼင်ႇၼႆသေယဝ်ႉ၊-

17မၼ်းၼၼ်ႉႁႆႈႁွင်ႉၵႃႈတီႈၽၢႆႇၼႃႈမၼ်းတင်းၸဵတ်းဝၼ်း ၼႂ်းမိူဝ်ႈဢၼ်ၶၢမ်ႇပွႆးယူႇၼၼ်ႉလႄႈ ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉ မၼ်းၽုၺ်ႇဢွၵ်ႇၼႄပျႃးတီႈမၼ်းၼၼ်ႉ ၵွပ်ႈပိူဝ်ႈဢၼ်တုၵ်းတဝ်ၼႃႇလူင်လၢင်ၼၼ်ႉဢေႃႈ။ မၼ်းၼၼ်ႉၵေႃႈ ဢဝ်ဢၼၢၵ်ႈၵႂၢမ်းသိူင်ႇၵႂၢမ်းဢမ်ၼၼ်ႉ ၶိုၼ်းမွၵ်ႇလၢတ်ႈတီႈပီႈၼွင်ႉၸိူဝ်ႉၶိူဝ်းမၼ်းၸိူဝ်းၼၼ်ႉဢေႃႈ။-

18ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉ ၸူဝ်ႈဢၼ်ၵၢင်ဝၼ်းဢမ်ႇပႆႇတၼ်းတူၵ်းၼၼ်ႉၸိုင်၊ ၵူၼ်းဝဵင်းၸိူဝ်းၼၼ်ႉဢွၼ်ၵၼ်မႃးလႄႈ လၢတ်ႈတီႈမၼ်းလႄႈဝႃႈ၊ ဢၼ်လႂ်ဝၢၼ်ၸဵမ်းလိူဝ်တွၼ်းသေၼမ်ႉၽိုင်ႈ။ ဢၼ်လႂ်ၵတ်ႉၶၼ်ႁႅင်းၼႃႇသေသၢင်ႇသီႈ၊ ဝႃႈၼင်ႇၼႆဢေႃႈ။ မၼ်းၵေႃႈလၢတ်ႈတီႈၶဝ်လႄႈဝႃႈ၊ ပေႃးသူဢမ်ႇဢဝ်ဝူဝ်းမႄႈၼုမ်ႇၵဝ်ထႆၸိုင်၊ သူႁႃဢဝ်ဢၼၢၵ်ႈၵႂၢမ်းသိူင်ႇၵႂၢမ်းဢမ်ၵဝ်လႄႈ ဢမ်ႇထူပ်းဢမ်ႇႁၼ်လႆႈ၊ ဝႃႈၼင်ႇၼႆဢေႃႈ။-

19ဝီႉၺိၺ်ႇထႃႇဝရႃႉၽြႃး တူၵ်းႁွတ်ႈၵႃႈၼိူဝ် သၢမ်ႇသုၼ်ႇ ၼႃႇလူင်လၢင်သေယဝ်ႉ၊ မၼ်းလူင်းၸူးၵႃႈတီႈဝဵင်း ဢႃႇသၵေႇလုၼ်ႇ လႄႈ တိုၵ်းတေႃးယႃႉပႅတ်ႈၵူၼ်းဝဵင်းၼၼ်ႉတၢႆ သၢမ်သိပ်းသေယဝ်ႉ၊ ႁိမ်ဢဝ်ဢုၵ်ႉၸႃႇၶူဝ်းလဵင်းၶဝ်ၼၼ်ႉသေလႄႈ ပၼ်ၶူဝ်းၼုင်ႈၶူဝ်းမႆတီႈၶဝ်ၸိူဝ်းဢၼ် ၽုၺ်ႇဢွၵ်ႇၼႄပျႃး ဢၼၢၵ်ႈၵႂၢမ်းသိူင်ႇၵႂၢမ်းဢမ်ၸိူဝ်းၼၼ်ႉသေယဝ်ႉ၊ တၢင်းၸႂ်မႆႈၶႆႈၸႃႉမၼ်းဢွၵ်ႇလႄႈ မၼ်းၶိုၼ်းမိူဝ်းၵႂႃႇၸူးၵႃႈတီႈႁိူၼ်းပေႃႈမၼ်းၼၼ်ႉသေဢေႃႈ။-

20မေး သၢမ်ႇသုၼ်ႇ ၼၼ်ႉၸမ်ႉ၊ ၶဝ်ဢဝ်ပၼ်တီႈၵေႃႉသေႈမၼ်း ဢၼ်မၼ်းဢဝ်ႁဵတ်းၵေႃႉႁဵတ်းသေႈမၼ်းၼၼ်ႉသေဢေႃႈ။

← Chapter 13 Jump to: Chapter 15 →