Judges 20 — Shan

1မိူဝ်ႈၼၼ်ႉၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢွၼ်ၵၼ်လုၵ်ႉလႄႈပရဵၵ်ႈသၢတ်ႈတင်းလၢႆ ဢဝ်ၵႃႈတီႈဝဵင်း တၢၼ်ႇ တေႃႇထိုင်ႁွတ်ႈဝဵင်း ပေႇရသေႇၽႃႉ ၼၼ်ႉလႄႈ ပႃးတင်းၵူၼ်းမိူင်း ၵီႉလတ်ႉ ၸိူဝ်းၼၼ်ႉသေလႄႈ ၸူႉၵၼ်တုမ်ၵၼ် မိူၼ်ၸိူဝ်ႉၼင်ႇၵူၼ်းၵေႃႉလဵဝ်ၵူၺ်းၼၼ်ႉၵႃႈတီႈ ထႃႇဝရႃႉၽြႃး ၵႃႈၼႂ်းဝဵင်း မီႉၸပႃႇ ၼၼ်ႉဢေႃႈ။-

2ၵူၼ်းယႂ်ႇၵူၼ်းလူင်ၵႃႈၼႂ်းၵူၼ်းတင်းလၢႆ ဢၼ်ဝႃႈၵႃႈၼႂ်းမဵဝ်း ဢီႉသရေႇလႃႉ ၵူႈမဵဝ်းၼၼ်ႉ ဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈ ပရဵၵ်ႈသၢတ်ႈတီႈၸူႉတီႈတုမ်ၵူၼ်းၽြႃးပဵၼ်ၸဝ်ႈတင်းလၢႆလႄႈ မီးၵူၼ်းသိုၵ်းပႆတိၼ် ဢၼ်ယိပ်းၵမ်လၢၵ်ႈၼၢၵ်ႈလၢပ်ႇၼၼ်ႉ သီႇသႅၼ်ဢေႃႈ။-

3ၵူၼ်းမဵဝ်း ပိၼ်ႇယႃႇမိၼ်ႇ တင်းလၢႆ လႆႈငိၼ်းလွင်ႈဢၼ် ၵူၼ်းမဵဝ်း ဢီႉသရေႇလႃႉ တင်းလၢႆ ၶိုၼ်ႈၸူးၵႃႈတီႈဝဵင်း မီႉၸပႃႇ ၼၼ်ႉဢေႃႈ။ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်တွင်ႈထၢမ်လႄႈဝႃႈ၊ ဢမူႉဢႃႉထမ်ႇမႃႉၼၼ်ႉ ပဵၼ်မႃးၸိူဝ်ႉၼင်ႇႁိုဝ်။ ဝႃႈၼင်ႇၼႆသေယဝ်ႉ၊-

4ၵူၼ်းမဵဝ်း လေႇဝီႉ ၽူဝ်မႄႈယိင်းဢၼ်လႆႈၶၢမ်ႇတၢင်းတၢႆၼၼ်ႉၶိုၼ်းလၢတ်ႈလႄႈဝႃႈ၊ ၵဝ်ၶႃႈဢိၵ်ႇတင်းမေးၼွႆႉၵဝ်ၶႃႈမႃးၵႃႈတီႈဝဵင်း ၵီႉပႃႉ ၼႂ်းလိၼ် ပိၼ်ႇယႃႇမိၼ်ႇ ၼၼ်ႉ ႁႂ်ႈလႆႈပူၼ်ႉၶိုၼ်းၵႃႈတီႈၼၼ်ႈၶႃႈဢေႃႈ။-

5ၶိင်ႇၵၢင်ၶိုၼ်းၵူၼ်း ၵီႉပႃႉ ၸိူဝ်းၼၼ်ႉဢွၼ်ၵၼ်လုၵ်ႉယူႇၽၢႆႇၼိုင်ႈ တင်းၵဝ်ၶႃႈလႄႈ လွမ်ႉႁွပ်ႈႁိူၼ်းတီႈဢၼ် ၵဝ်ၶႃႈသွၼ်ႈပိုင်ႈၼၼ်ႉယူႇသေလႄႈ ဢၢင်ႈတၵ်းဢဝ်ၵဝ်ၶႃႈတၢႆၶႃႈဢေႃႈ။ ၶဝ်ယႃႉသရေႇမေးၼွႆႉၵဝ်ၶႃႈထၼ်ႈပေႃးတၢႆၶႃႈဢေႃႈ။-

6ၵဝ်ၶႃႈၵေႃႈဢဝ်တူဝ်တၢႆမေးၼွႆႉၵဝ်ၶႃႈၼၼ်ႉလႄႈ တႅပ်းႁဵတ်းပွတ်းႁဵတ်းတွၼ်ႈသေယဝ်ႉ၊ ဢဝ်ပၼ်ၵႂႃႇၵႃႈၼႂ်းမိူင်းဢၼ် မဵဝ်း ဢီႉသရေႇလႃႉ ၶၢမ်ႇဢမူၺ်ႇၼၼ်ႉ ၵူႈတီႈၵူႈလႅၼ်ၶႃႈဢေႃႈ။ လွင်ႈမၼ်းၸမ်ႉ ၶဝ်ၼၼ်ႉႁဵတ်းဢမူႉဢၼ်ၵူဝ်ႈဢၼ်ၵိူၵ်ႇ၊ ဢမူႉဢၼ်ယုတ်ႈဢၼ်မိူၵ်ႈ ၵႃႈၼႂ်းမဵဝ်း ဢီႉသရေႇလႃႉ ၶႃႈယဝ်ႉ။-

7တူၺ်းလူး၊ သူၸဝ်ႈဢၼ်ပဵၼ်မဵဝ်း ဢီႉသရေႇလႃႉ ၵႃႈမီးတင်းသဵင်ႈတင်းလူင်ၶဝ်ဢိူၺ်း၊ တိူင်ႇပၢင်ႇၵၼ်သေလႄႈၸီႇယၢင်ႇၵႃႈတီႈၼႆႈသေၵမ်းၶႃႈ၊ ဝႃႈၼင်ႇၼႆဢေႃႈ။-

8ၵူၼ်းၵႃႈမီးၼၼ်ႉ ဢွၼ်ၵၼ်လုၵ်ႉမိူၼ်ၸိူဝ်ႉၼင်ႇၵူၼ်းၵေႃႉလဵဝ်ၵူၺ်းၼၼ်ႉလႄႈလၢတ်ႈဝႃႈ၊ ႁဝ်းဢမ်ႇၵႂႃႇၵႃႈတီႈမူဝ်းၵႃႇႁဝ်းသေၵေႃႉသေၵူၼ်း။ ႁဝ်းဢမ်ႇၶိုၼ်းမိူဝ်းၸူးၵႃႈတီႈႁိူၼ်းႁဝ်းသေၵေႃႉသေၵူၼ်း။-

9ႁဝ်းတၵ်းႁဵတ်းၸိူဝ်ႉၼင်ႇႁိုဝ်ၵႃႈတီႈဝဵင်း ၵီႉပႃႉ ၼၼ်ႉဝႃႈၼႆၸမ်ႉ၊ ႁဝ်းတၵ်းတူၵ်းၸႃႇၵွၵ်ႈသေလႄႈၶီႇၵႂႃႇဢေႃႈ။-

10ႁဝ်းတၵ်းလိူၵ်ႈၵဵပ်းဢဝ်ၵႃႈၼႂ်းၵူၼ်းယေႈပၢၵ်ႇယေႈသိပ်း၊ ၼႂ်းယေႈႁဵင်ယေႈပၢၵ်ႇ၊ ၼႂ်းယေႈမိုၼ်ႇယေႈႁဵင် ၵႃႈတီႈမဵဝ်း ဢီႉသရေႇလႃႉ ၵူႈမဵဝ်း ႁႂ်ႈလႆႈၸွမ်းသူင်ႇၸရိပ်ႈတၢင်းၵိၼ် ပုၼ်ႈၵူၼ်းတင်းလၢႆလွင်ႈၼင်ႇႁိုဝ် ၼႂ်းမိူဝ်ႈဢၼ်ၶဝ်ႁွတ်ႈထိုင် ၵႃႈတီႈဝဵင်း ၵီႉပႃႉ ၼႂ်းဢိူင်ႇ ပိၼ်ႇယႃႇမိၼ်ႇ ၼၼ်ႉ ၶဝ်တၵ်းပၼ်တၢမ်ႇဢပႅတ်ႈမႅၼ်ႈၸွမ်းၼင်ႇ ဢမူႉဢၼ်ယုတ်ႈဢၼ်မိူၵ်ႈၵႃႈဢၼ်ၶဝ်ၼၼ်ႉ ႁဵတ်းၵႃႈၼႂ်းမဵဝ်း ဢီႉသရေႇလႃႉ ၼၼ်ႉဢေႃႈ၊ ဝႃႈၼင်ႇၼႆလႄႈ၊-

11ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉ ၸူႉၵၼ်တုမ်ၵၼ်ၽၢႆႇၼိုင်ႈတင်းဝဵင်းၼၼ်ႉလႄႈ ႁဵတ်းမုၵ်ႉႁဵတ်းၸိူဝ်း မိူၼ်ၸိူဝ်ႉၼင်ႇၵူၼ်းၵေႃႉလဵဝ်ၵူၺ်းၼၼ်ႉလႄႈယူႇဢေႃႈ။

12မဵဝ်း ဢီႉသရေႇလႃႉ ၵူႈမဵဝ်းၼၼ်ႉ ပွႆႇၸႂ်ႉၵူၼ်းၵႂႃႇၵႃႈၼႂ်းလိၼ် ပိၼ်ႇယႃႇမိၼ်ႇ ၵူႈတီႈၵူႈလႅၼ်လႄႈသင်ႇလၢတ်ႈလႄႈဝႃႈ၊ ဢမူႉဢႃႉထမ်ႇမႃႉဢၼ်လႆႈႁဵတ်းမႃးယဝ်ႉၵႃႈၼႂ်းသူၼႆႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။-

13တေႃႈလဵဝ်ၼႆႉဢွၼ်ၵၼ်ဢဝ်ၵူၼ်းဢႃႉထမ်ႇမႃႉ ဢၼ်မီးၵႃႈတီႈဝဵင်း ၵီႉပႃႉ ၸိူဝ်းၼၼ်ႉဢၢပ်ႈပၼ်တီႈႁဝ်း ႁႂ်ႈႁဝ်းလႆႈဢဝ်ၶဝ်တၢႆလႄႈ ပႄႇၽဵဝ်ႈဢပႅတ်ႈတူႉၸရိူၵ်ႈပႅတ်ႈသေၵႃႈၼႂ်းမဵဝ်း ဢီႉသရေႇလႃႉ သေၵမ်း၊ ဝႃႈၼင်ႇၼႆဢေႃႈ။ ၵူၺ်းၵႃႈ ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ယင်းဢမ်ႇထွမ်ႇဢမ်ႇဢဝ်ၵႂၢမ်းပီႈၼွင်ႉၶဝ် ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉလႄႈ၊-

14ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ဢွၼ်ၵၼ်ဢွၵ်ႇသေၵႃႈၼႂ်းၵူႈဝၢၼ်ႈၵူႈဝဵင်းမႃးလႄႈ ၸူႉၵၼ်တုမ်ၵၼ်ၵႃႈတီႈဝဵင်း ၵီႉပႃႉ ႁႂ်ႈလႆႈၵႂႃႇတိုၵ်းၵၼ်တင်းၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။-

15မိူဝ်ႈၼၼ်ႉ ၼွၵ်ႈသေၵူၼ်းၸၢႆးလီ ၵႃႈတီႈဝဵင်း ၵီႉပႃႉ ဢၼ်ၼပ်ႉဢၢၼ်ႇပွင်းၵၼ်မီးၸဵတ်းပၢၵ်ႇၼၼ်ႉ၊ ၵူၼ်းမဵဝ်း ပိၼ်ႇယႃႇမိၼ်ႇ ဢၼ်လုၵ်ႉသေၵူႈဝၢၼ်ႈၵူႈဝဵင်းမႃးၸိူဝ်းၼၼ်ႉ ၼပ်ႉဢၢၼ်ႇပွင်းၵၼ်ၸမ်ႉ၊ မီးၵေႃႉဢၼ်ယိပ်းၵမ်လၢၵ်ႈၼၢၵ်ႈလၢပ်ႇ သွင်မိုၼ်ႇပၢႆႁူၵ်းႁဵင်ဢေႃႈ။-

16ၵႃႈၼႂ်းၵူၼ်းၵႃႈမီးၼၼ်ႉၼၼ်ႉ ပႃးၵူၼ်းၸၢႆးလီ ဢၼ်ၸၢင်ႈဢဝ်မိုဝ်းၶွၼ်သၢႆႉသုင်းသွင်ႇလႄႈ ဢဝ်မၢၵ်ႇၵူင်ၵွၼ်ပိုတ်းႁႂ်ႈမႅၼ်ႈသဵၼ်ႈၶူၼ်ႁူဝ်သဵၼ်ႈၼိုင်ႈလႄႈ ဢမ်ႇပိူင်ႈၵႂႃႇၼၼ်ႉၸဵတ်းပၢၵ်ႇဢေႃႈ။-

17ၼွၵ်ႈသေၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ၊ ၵူၼ်းမဵဝ်း ဢီႉသရေႇလႃႉ ဢၼ်ယိပ်းၵမ်လၢၵ်ႈၼၢၵ်ႈလၢပ်ႇၼၼ်ႉၸမ်ႉ၊ ၼပ်ႉဢၢၼ်ႇပွင်းၵၼ်လႄႈ မီးသီႇသႅၼ်ဢေႃႈ။ ၶဝ်ၼၼ်ႉပဵၼ်ၵူၼ်းသိုၵ်းတင်းသဵင်ႈတင်းမူတ်းဢေႃႈ။

18ၵူၼ်းမဵဝ်း ဢီႉသရေႇလႃႉ တင်းလၢႆဢွၼ်ၵၼ်လုၵ်ႉလႄႈ ၶိုၼ်ႈၸူးၵႃႈတီႈဝဵင်း ပေႇသလႃႉ သေလႄႈ လဝ်ႊထၢမ်တီႈၽြႃးပဵၼ်ၸဝ်ႈလႄႈဝႃႈ၊ ၵႃႈၼႂ်းၶႃႈၸဝ်ႈႁဝ်းၸိူဝ်းၼႆႉ ၽူႈလႂ်တၵ်းလႆႈဢွၼ်ႁူဝ်ၶီႇၵႂႃႇႁႂ်ႈလႆႈတိုၵ်းၵၼ်တင်းၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ထႃႇဝရႃႉၽြႃး မီးဢမိင်ႉလႄႈဝႃႈ၊ ယူႉတႃႉ တၵ်းလႆႈဢွၼ်ႁူဝ်ၶီႇၵႂႃႇဢေႃႈ၊ ဝႃႈၼင်ႇၼႆဢေႃႈ။-

19ၶိင်ႇၵၢင်ၼႂ်ၸဝ်ႉၸဝ်ႉၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်လုၵ်ႉလႄႈ ၵႂႃႇၶျႃးတပ်ႉၶဝ်ၵႃႈတီႈႁိမ်းဝဵင်း ၵီႉပႃႉ သေယဝ်ႉ၊-

20ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ၶီႇၵႂႃႇႁႂ်ႈလႆႈတိုၵ်းၵၼ်တင်း ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉလႄႈ ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ယၼ်ႇတပ်ႉၶၢင်းတပ်ႉၶဝ်ႁႂ်ႈလႆႈတိုၵ်းၵၼ်တင်းၶဝ်ၼၼ်ႉၵႃႈတီႈဝဵင်း ၵီႉပႃႉ ၼၼ်ႉလႄႈ ယူႇဢေႃႈ။-

21ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ဢွၵ်ႇသေၵႃႈၼႂ်းဝဵင်း ၵီႉပႃႉ ၼၼ်ႉမႃးသေယဝ်ႉ၊ ၼႂ်းဝၼ်းၼၼ်ႉဢဝ်ၵူၼ်းမဵဝ်း ဢီႉသရေႇလႃႉ လူမ်ႉတၢႆၵႃႈၼိူဝ်လိၼ်သွင်မိုၼ်ႇပၢႆသွင်ႁဵင်ဢေႃႈ။-

22ၼႂ်းဝႃႈၼၼ်သေၵေႃႈ ၵူၼ်းမဵဝ်း ဢီႉသရေႇလႃႉ တင်းလၢႆ ႁဵတ်းၸႂ်ဢၼ်ႁတ်းႁၢၼ်သေလႄႈ သမ်ႉၶိုၼ်းယၼ်ႇတပ်ႉၶၢင်းတပ်ႉၶဝ်ႈ ၵႃႈတီႈဢၼ်ၶဝ်ယၼ်ႇတပ်ႉၶၢင်းတပ်ႉဝၼ်းပထမႃႉၼၼ်ႉဢေႃႈ။-

23ၵူၼ်းမဵဝ်း ဢီႉသရေႇလႃႉ တင်းလၢႆ ၶိုၼ်ႈၸူးလႄႈႁွင်ႉႁႆႈၵႃႈတီႈၽၢႆႇၼႃႈထႃႇဝရႃႉၽြႃး တေႃႇထိုင်ႁွတ်ႈၶိင်ႇႁူဝ်ၶမ်ႈယူႇသေလႄႈ လဝ်ႊထၢမ်တီႈထႃႇဝရႃႉၽြႃးလႄႈဝႃႈ၊ ၶႃႈၸဝ်ႈႁဝ်းတၵ်းလႆႈသမ်ႉၶိုၼ်းၶီႇၵႂႃႇတိုၵ်းၵၼ်တင်း ၼွင်ႉၶႃႈၸဝ်ႈႁဝ်း ပိၼ်ႇယႃႇမိၼ်ႇ ၼၼ်ႉထႅင်ႈလူးၵွၼ်ႇတီႈၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ထႃႇဝရႃႉၽြႃးမီးဢမိင်ႉလႄႈဝႃႈ၊ ၶီႇၵႂႃႇတႃႉ၊ ဝႃႈၼင်ႇၼႆဢေႃႈ။-

24ၼႂ်းဝၼ်းတူႉတီႉယႃႉၼၼ်ႉ၊ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်သုတ်ႉၸပ်းသုတ်ႉၸူး ၵႃႈတီႈႁိမ်းၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉလႄႈ၊-

25ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ဢွၵ်ႇၵႃႈၼႂ်းဝဵင်း ၵီႉပႃႉ ၼၼ်ႉမႃးသေယဝ်ႉ၊ ဢဝ်ၵူၼ်းမဵဝ်း ဢီႉသရေႇလႃႉ ၼၼ်ႉလူမ်ႉတၢႆ ၵႃႈၼိူဝ်လိၼ် မိုၼ်ႇပၢႆပႅတ်ႇႁဵင်ဢေႃႈ။ ၶဝ်ၼၼ်ႉပဵၼ်ၵေႃႉဢၼ်ယိပ်းၵမ်လၢၵ်ႈၼၢၵ်ႈလၢပ်ႇ တင်းသဵင်ႈတင်းမူတ်းဢေႃႈ။-

26မိူဝ်ႈၼၼ်ႉ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢိၵ်ႇတင်းၵူၼ်းတင်းလၢႆ ဢွၼ်ၵၼ်ၶိုၼ်ႈၸူးလႄႈ ႁွတ်ႈထိုင်ၵႃႈတီႈဝဵင်း ပေႇသလႃႉ သေယဝ်ႉ ႁွင်ႉႁႆႈယူႇ၊ ၶုပ်ႉမူပ်ႇၵႃႈတီႈၽၢႆႇၼႃႈထႃႇဝရႃႉၽြႃးယူႇ၊ ၵမ်တၢင်းၵိၼ်တင်းဝၼ်း တေႃႇထိုင်ႁွတ်ႈၶိင်ႇႁူဝ်ၶမ်ႈယူႇသေလႄႈ ဢဝ်ယိတ်ႈဢၼ်တုတ်ႇၽႆး ဢိၵ်ႇတင်းယိတ်ႈမိၵ်ႉသႃႇႁႃယႃႉတင်းလၢႆ ပုၵ်ႈၸေႃႇဢေႃႈ။-

27ၵွပ်ႈပိူဝ်ႈဢၼ်တိူၵ်ႈတႃႇပတီႉၺိၺ်ႇၸဝ်ႈ မီးယူႇၵႃႈတီႈၼၼ်ႈၼႂ်းၶိင်ႇမိုဝ်ႉဝၼ်းၼၼ်ႉလႄႈ ၽီႉၼႁတ်ႉ လုၵ်ႈၸၢႆး ဢေးလႃႇၸႃႇ ဢၼ်ပဵၼ်လုၵ်ႈၸၢႆး ဢႃႇရုၼ်ႇ ၼၼ်ႉ ပႂ်ႉဢမူႉၵႃႈတီႈၽၢႆႇၼႃႈတိူၵ်ႈၸဝ်ႈၼၼ်ႉယူႇ ၼႂ်းၶိင်ႇမိုဝ်ႉဝၼ်းၼၼ်ႉလႄႈ၊ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်လဝ်ႊထၢမ်တီႈထႃႇဝရႃႉၽြႃးလႄႈဝႃႈ၊-

28ၶႃႈၸဝ်ႈႁဝ်းတၵ်းသမ်ႉလႆႈၶိုၼ်းၵႂႃႇလႄႈ တိုၵ်းၵၼ်တင်းၼွင်ႉၸၢႆးၶႃႈၸဝ်ႈႁဝ်းၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉထႅင်ႈတီႈၶႃႈႁိုဝ်။ ယင်းဢမ်ႇၵႂႃႇလႄႈ တၵ်းလႆႈယူႇတီႈၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ထႃႇဝရႃႉၽြႃးမီးဢမိင်ႉလႄႈဝႃႈ၊ ၵႂႃႇတႃႉ။ ၼႂ်းဝၼ်းမိူဝ်ႈၽုၵ်ႈ၊ ၵဝ်တၵ်းဢဝ်မၼ်းၼၼ်ႉဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ၊ ဝႃႈၼင်ႇၼႆဢေႃႈ။-

29ၵူၼ်းမဵဝ်း ဢီႉသရေႇလႃႉ တင်းလၢႆ ဝႆႉၶဝ်ၸိူဝ်းဢၼ်လွမ်ႉပႂ်ႉၼၼ်ႉၵႃႈတီႈလဵပ်ႈႁွပ်ႈဝဵင်း ၵီႉပႃႉ ၼၼ်ႉသေယဝ်ႉ၊-

30ၼႂ်းဝၼ်းတႃႉတီႉယႃႉၼၼ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ ၶီႇၵႂႃႇၸူးၵႃႈတီႈၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉလႄႈ ယၼ်ႇတပ်ႉၶၢင်းတပ်ႉၶဝ်ၵႃႈတီႈႁိမ်းဝဵင်း ၵီႉပႃႉ ၼၼ်ႉ မိူၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉသေလႄႈယူႇဢေႃႈ။-

31ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ဢွၵ်ႇႁႂ်ႈလႆႈတိုၵ်းၵူၼ်းတင်းလၢႆလႄႈ ၵႆယၢၼ်ၵၼ်တင်းဝဵင်းၵႂႃႇဢေႃႈ။ ၶဝ်ၼၼ်ႉၸင်ႇၸႃႉတိုၵ်းတေႃးယႃႉပႅတ်ႈလႄႈ ဢဝ်ၵူၼ်းတင်းလၢႆတၢႆမိူၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉ ၵႃႈၼႂ်းသဵၼ်ႈတၢင်းဢၼ်ၶိုၼ်ႈၸူးၵႃႈတီႈဝဵင်း ပေႇသလႃႉ ဢိၵ်ႇတင်းသဵၼ်ႈတၢင်းဢၼ်ၶိုၼ်ႈၸူးၵႃႈတီႈဝဵင်း ၵီႉပႃႉ ၼၼ်ႉၵႃႈၼႂ်းထိူၼ်ႇၼၼ်ႉလႄႈ ၵူၼ်းတၢႆသေသၢမ်သိပ်းၼိုင်ႈၸမ်ၸမ်ဢေႃႈ။-

32ပိၵ်ႉသမ်ႉၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ လၢတ်ႈၵၼ်လႄႈဝႃႈ၊ ၶဝ်ၼၼ်ႉတူၵ်းသုမ်းၵႃႈတီႈၽၢႆႇၼႃႈႁဝ်းမိူၼ်ၸိူဝ်ႉၼင်ႇၵမ်းဢွၼ်တၢင်းၼၼ်ႉယဝ်ႉ၊ ဝႃႈၼင်ႇၼႆသေၵေႃႈ၊ ၵူၼ်းမဵဝ်း ဢီႉသရေႇလႃႉ တင်းလၢႆ လၢတ်ႈၵၼ်လႄႈဝႃႈ၊ ပၢႆႈတႃႉႁဝ်း၊ ယွၵ်ႇဢဝ်ၶဝ်ၵႆယၢၼ်ၵၼ်တင်းဝဵင်းၸူးၵႃႈတီႈသဵၼ်ႈတၢင်းတင်းလၢႆတႃႉႁဝ်း၊ ဝႃႈၼင်ႇၼႆသေလႄႈ၊-

33ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် လုၵ်ႉသေၵႃႈတီႈဢၼ်ၶဝ်ယူႇၼၼ်ႉလႄႈ ယၼ်ႇတပ်ႉၶၢင်းတပ်ႉ ၵႃႈတီႈဝဵင်း ပႃႇလႃႉတႃႇမႃႇ ဢေႃႈ။ ၵူၼ်းမဵဝ်း ဢီႉသရေႇလႃႉ ဢၼ်လွမ်ပႂ်ႉလႄႈယူႇၸိူဝ်းၼၼ်ႉၵေႃႈ လုၵ်ႉသေၵႃႈတီႈပၢင်ႇပဵင်း ၵေႇပႃႉ တီႈဢၼ်ၶဝ်ယူႇၼၼ်ႉသေယဝ်ႉ၊-

34ၵူၼ်းၸၢႆးလီမဵဝ်း ဢီႉသရေႇလႃႉ မိုၼ်ႇၼိုင်ႈၼၼ်ႉ ၶီႇၸူးၵႃႈတီႈဝဵင်း ၵီႉပႃႉ လႄႈ၊ တၢင်းဢၼ်ႁႄႉႁပ်ႉတိုၵ်းတေႃးၼၼ်ႉပဵၼ်ဢၼ်ယၢပ်ႇၼႃႇလူင်လၢင် ၵွပ်ႈပိူဝ်ႈဢၼ်ၶဝ်ၼၼ်ႉ ဢမ်ႇႁူႉလွင်ႈဢၼ်ၽေးၸမ်တၵ်းႁွတ်ႈထိုင်တီႈၶဝ်ၼၼ်ႉဢေႃႈ။-

35ထႃႇဝရႃႉၽြႃးႁႂ်ႈၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ တူၵ်းသုမ်းၵႃႈတီႈၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆလႄႈ၊ ၼႂ်းဝၼ်းၼၼ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ ယႃႉၽဵဝ်ႈၵူၼ်းမဵဝ်း ပိၼ်ႇယႃႇမိၼ်ႇ ပႅတ်ႈ သွင်မိုၼ်ႇပၢႆသွင်ႁဵင်ပၢႆပၢၵ်ႇၼိုင်ႈဢေႃႈ။ ၶဝ်ၼၼ်ႉ ပဵၼ်ၵူၼ်းဢၼ်ယိပ်းၵမ်လၢၵ်ႈၼၢၵ်ႈလၢပ်ႇ တင်းသဵင်ႈတင်းမူတ်းဢေႃႈ။-

36ၼင်ႇၼၼ်လႄႈ ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ႁူႉႁၼ်လွင်ႈဢၼ်ၶဝ်တူၵ်းသုမ်းၼၼ်ႉဢေႃႈ။ လွင်ႈမၼ်းၸမ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ မိူဝ်ႈၸႃႉမၼ်းဢွၼ်ၵၼ်သုတ်ႉၶိုၼ်ႈ ၵႃႈတီႈၽၢႆႇၼႃႈၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ၵွပ်ႈပိူဝ်ႈဢၼ် ဢိင်ပိုင်ႈၶဝ်ၸိူဝ်းဢၼ်လွမ်ပႂ်ႉယူႇ ဢၼ်ၶဝ်ဝႆႉၵႃႈတီႈႁိမ်းဝဵင်း ၵီႉပႃႉ ၼၼ်ႉဢေႃႈ။

37ၶဝ်ၸိူဝ်းဢၼ်လွမ်ပႂ်ႉယူႇၼၼ်ႉ ႁိပ်ႈၼႅတ်ႈလႄႈဢွၼ်ၵၼ်လႅၼ်ႈၶဝ်ႈၵႃႈတီႈဝဵင်း ၵီႉပႃႉ သေယဝ်ႉ၊ လႄႇၸွတ်ႇတူဝ်ႈၵူႈၸွၵ်ႉၵူႈၸဵင်ႇယူႇသေလႄႈ တိုၵ်းတေႃးယႃႉပႅတ်ႈဝဵင်းတင်းဝဵင်း လူၺ်ႈၶူမ်းလၢပ်ႇၶူမ်းလႅဝ်းဢေႃႈ။-

38တီႈမၢတ်ႈတီႈတွင်းဢၼ်ၶႅၼ်ႈၵၼ်ဝႆႉ ၵႃႈတီႈၵႄႈဝူင်ႈၵၢင်ၵူၼ်းမဵဝ်း ဢီႉသရေႇလႃႉ တင်းလၢႆ ဢိၵ်ႇတင်းၶဝ်ၸိူဝ်းဢၼ်လွမ်ပႂ်ႉယူႇၸိူဝ်းၼၼ်ႉၸမ်ႉ၊ တၵ်းလႆႈႁႂ်ႈၵႂၼ်းၽႆးဢၼ်ယႂ်ႇၼႃႇလူင်လၢင် ဢွၵ်ႇၶိုၼ်ႈသေၵႃႈၼႂ်းဝဵင်းၼၼ်ႉဢေႃႈ။-

39မိူဝ်ႈဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ သုတ်ႉၶိုၼ်းၼႂ်းမိူဝ်ႈဢၼ်ယင်းတိုၵ်းသိုၵ်းယူႇၼၼ်ႉၸိုင်၊ ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ၸင်ႇၸႃႉတိုၵ်းတေႃးယႃႉပႅတ်ႈလႄႈ ဢဝ်ၵူၼ်းမဵဝ်း ဢီႉသရေႇလႃႉ တၢႆသေသၢမ်သိပ်းၼိုင်ႈၸမ်ၸမ်၊ ၵွပ်ႈပိူဝ်ႈဢၼ်ၶဝ်လၢတ်ႈလႄႈဝႃႈ၊ ၶဝ်တူၵ်းသုမ်းၵႃႈတီႈၽၢႆႇၼႃႈႁဝ်း မိူၼ်ၸိူဝ်ႉၼင်ႇဢၼ်ၶဝ်သုမ်းသိုၵ်း မိူဝ်ႈၵမ်းဢွၼ်တၢင်းၼၼ်ႉယဝ်ႉ၊ ဝႃႈၼင်ႇၼႆၼၼ်ႉဢေႃႈ။-

40ၵူၺ်းၵႃႈ မိူဝ်ႈဢၼ်ၵႂၼ်းၽႆးၸင်ႇၸႃႉဢွၵ်ႇၵႃႈၼႂ်းဝဵင်းလႄႈ ပဵၼ်လိမ်ႇလူင်ၶိုၼ်ႈယူႇၼၼ်ႉၸိုင် ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ဝၢႆႇတူၺ်းၶိုၼ်းတၢင်းလင်လႄႈ ႁၼ်ပဵဝ်ၽႆးဢၼ်မႆႈဝဵင်းၼၼ်ႉ ၶိုၼ်ႈၵႃႈၼိူဝ်ၵၢင်ႁၢဝ်ယူႇၼၼ်ႉသေယဝ်ႉ၊-

41ၵူၼ်းမဵဝ်း ဢီႉသရေႇလႃႉ တင်းလၢႆသမ်ႉဝၢႆႇၶိုၼ်းၸူးၼၼ်ႉလႄႈ ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ တူၵ်းၸႂ်ၵူဝ်ႁႄၼႃႇလူင်လၢင်ဢေႃႈ။ လွင်ႈမၼ်းၸမ်ႉ ၶဝ်ၼၼ်ႉႁူႉႁၼ်လွင်ႈဢၼ်ၽေးႁွတ်ႈထိုင်ၵႃႈၼိူဝ်ၶဝ်ယဝ်ႉၼၼ်ႉဢေႃႈ။-

42ပိူဝ်ႈၼႆလႄႈ ပိၵ်ႉသမ်ႉၶဝ်ဢွၼ်ၵၼ်ဝၢႆႇၶိုၼ်းဢွၵ်ႇပၢႆႈသေၵႃႈတီႈၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆ ၸူးသဵၼ်ႈတၢင်းထိူၼ်ႇသေၵေႃႈ၊ ၶဝ်ၸိူဝ်းဢၼ်ၸွမ်းတိုၵ်းၼၼ်ႉ ၶိုတ်းၶဝ်သေလႄႈ ယႃႉၽဵဝ်ႈၶဝ်ၼၼ်ႉ ဢိၵ်ႇတင်းၶဝ်ၸိူဝ်းဢၼ်ဢွၵ်ႇၵႃႈၼႂ်းဝဵင်းမႃးၼၼ်ႉ ၵႃႈၼႂ်းသဵၼ်ႈတၢင်းၼၼ်ႉဢေႃႈ။-

43ၶဝ်လွမ်ႉႁွပ်ႈၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉယူႇ၊ လိုပ်ႈၸွမ်းလမ်းၸွမ်းယူႇသေလႄႈ ယဵပ်ႇၶဝ်ပႅတ်ႈၵႃႈတီႈဢၼ်ၶဝ်ၸိူဝ်းၼၼ်ႉၵႂႃႇ တေႃႇထိုင်ႁွတ်ႈဝဵင်း ၵီႉပႃႉ ၽၢႆႇၵၢင်ဝၼ်းဢွၵ်ႇၼၼ်ႉဢေႃႈ။-

44မိူဝ်ႈၼၼ်ႉ ၵူၼ်းမဵဝ်း ပိၼ်ႇယႃႇမိၼ်ႇ လူမ်ႉတၢႆမိုၼ်ႇၼိုင်ႈပၢႆပႅတ်ႇႁဵင်ဢေႃႈ။ ၶဝ်ၼၼ်ႉ ပဵၼ်ၵေႃႉဢၼ်ႁႅင်းယႂ်ႇၼႃႇတင်းသဵင်ႈတင်းလူင်ဢေႃႈ။-

45ၼႂ်းမိူဝ်ႈဢၼ်ၶဝ်ၼၼ်ႉ ငႅၵ်းလႄႈပၢႆႈၵႂႃႇၵႃႈတီႈထိူၼ်ႇၸူးၵႃႈတီႈမၢၵ်ႇႁိၼ်မၢၵ်ႇၽႃ ရိမ်ႇမုၼ်ႇ ၼၼ်ႉယူႇၼၼ်ႉၸိုင်၊ ၶဝ်ၸွမ်းၵဵပ်းဢဝ်ဢၼ်တူၵ်းဢၼ်ႁူင်ႈမၼ်း ၵႃႈတႃႈၵႃႈတၢင်းၼၼ်ႉလႄႈ လႆႈၵူၼ်းႁႃႈႁဵင်ဢေႃႈ။ ၶဝ်ဢဝ်ႁႅင်းလိုပ်ႈၸွမ်းလမ်းၸွမ်းၶဝ်ၼၼ်ႉ တေႃႇထိုင်ႁွတ်ႈဝဵင်း ၵီႉတုမ်ႇ လႄႈ လႆႈဢဝ်ၵူၼ်းတၢႆထႅင်ႈသွင်ႁဵင်ဢေႃႈ။-

46ၼင်ႇၼၼ်လႄႈ ၵူၼ်းမဵဝ်း ပိၼ်ႇယႃႇမိၼ်ႇ ဢၼ်လူမ်ႉတၢႆၼႂ်းဝၼ်းၼၼ်ႉၸိူဝ်းၼၼ်ႉ မီးၵူၼ်းသွင်မိုၼ်ႇပၢႆႁႃႈႁဵင် ဢၼ်ပႃးလၢပ်ႇပႃးလႅဝ်းၵူၺ်းၵူၺ်းဢေႃႈ။ ၶဝ်ၼၼ်ႉ ပဵၼ်ၵေႃႉဢၼ်ႁႅင်းယႂ်ႇၼႃႇတင်းသဵင်ႈတင်းမူတ်းဢေႃႈ။-

47ၵူၼ်းႁူၵ်းပၢၵ်ႇငႅၵ်းလႄႈပၢႆႈၵႂႃႇ ၵႃႈတီႈထိူၼ်ႇၸူးၵႃႈတီႈ မၢၵ်ႇႁိၼ်မၢၵ်ႇၽႃ ရိမ်ႇမုၼ်ႇ ၼၼ်ႉသေလႄႈ ယူႇၵႃႈၼႂ်းမၢၵ်ႇႁိၼ်မၢၵ်ႇၽႃ ရိမ်ႇမုၼ်ႇ ၼၼ်ႉသီႇလိူၼ်ဢေႃႈ။-

48ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ သမ်ႉဝၢႆႇၶိုၼ်းၸူးၵႃႈတီႈၵူၼ်းမဵဝ်း ပိၼ်ႇယႃႇမိၼ်ႇ တင်းလၢႆသေလႄႈ တိုၵ်းတေႃးယႃႉပႅတ်ႈ ၵူၼ်းၵႃႈဢၼ်မီးၵႃႈၼႂ်းဝဵင်း ဢိၵ်ႇတင်းတရိၵ်ႈသၢၼ်ႇတင်းၵႃႈဢၼ်ထူပ်းႁၼ်ၼၼ်ႉ လူၺ်ႈၶူမ်းလၢပ်ႇၶူမ်းလႅဝ်းလႄႈ ဢဝ်ၽႆးတုတ်ႇဝၢၼ်ႈဝဵင်းၵႃႈဢၼ်ထူပ်းၼၼ်ႉဢေႃႈ။