Judges 5

Shan

← Chapter 4 Jump to: Chapter 6 →

1တေႇပေႃးရႃႇ တင်း ပႃႇရၵ်ႉ လုၵ်ႈၸၢႆး ဢၽီႉၼွင်ႇ ၼၼ်ႉ ႁဵတ်းၵႂၢမ်းၼႂ်းဝၼ်းၼၼ်ႉလႄႈဝႃႈၸမ်ႉ၊-

2ၵွပ်ႈပိူဝ်ႈဢၼ် ၶုၼ်ဢၼ်ပဵၼ်ငဝ်ႈပဵၼ်ႁူဝ်ၸိူဝ်းၼၼ်ႉ ႁဵတ်းႁူဝ်ဢွၼ်ႁူဝ်မဵဝ်း ဢီႉသရေႇလႃႉ ဢိၵ်ႇတင်းၵွပ်ႈပိူဝ်ႈဢၼ်ၵူၼ်းတင်းလၢႆ ပႃးတင်းၸႂ်ၸေႇတၼႃႇဢဝ်တူဝ်ၸဝ်ႈၵဝ်ႇလူႇၼၼ်ႉလႄႈ ဢွၼ်ၵၼ်ယွင်ႈယေႃးၵျေးၸူးထႃႇဝရႃႉၽြႃးတႃႉ။-

3ၶုၼ်ႁေႃၶမ်းၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။ ၶုၼ်ၶဝ်ဢိူၺ်း၊ ဢွၼ်ၵၼ်ဝၢႆႇႁူႁေႈႁူသူတႃႉ။ ၵဝ်ဢၼ်ဝႃႈၵဝ်ၼႆႉတၵ်းႁဵတ်းၵႂၢမ်းတီႈထႃႇဝရႃႉၽြႃးဢေႃႈ။ ၵဝ်တၵ်းႁဵတ်းၵႂၢမ်းယွင်ႈယေႃးထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ဢေႃႈ။-

4ထႃႇဝရႃႉၽြႃးတီႈၶႃႈဢိူၺ်း၊ မိူဝ်ႈဢၼ်ၸဝ်ႈႁဝ်းလုၵ်ႉသေၵႃႈတီႈလွႆ ၸီႉရႃႉ ၵႂႃႇ၊ မိူဝ်ႈဢၼ်ၸဝ်ႈႁဝ်းလုၵ်ႉသေၵႃႈတီႈထိူၼ်ႇ ဢေႇတုမ်ႇ ၶီႇၵႂႃႇၼၼ်ႉ လိၼ်မိူင်းသၼ်ႇဝႆလႄႈ ၽႃႉၵၢင်ႁၢဝ်ယွတ်ႇႁူဝ်ႈတူၵ်းယူႇ၊ ၽႃႈၽူၼ်တင်းလၢႆၵေႃႈ ယွတ်ႇၼမ်ႉႁူဝ်ႈၼမ်ႉတူၵ်းယူႇတီႈၶႃႈဢေႃႈ။-

5လွႆတင်းလၢႆၼၼ်ႉ တူင်ႉၼိုင်ၶွၼ်းၶဝ်ႇယူႇ ၵႃႈတီႈၽၢႆႇၼႃႈထႃႇဝရႃႉၽြႃးလႄႈ လွႆ သီႉၼႃႉ ၼၼ်ႉ တူင်ႉၼိုင်ၶွၼ်းၶဝ်ႇယူႇၵႃႈတီႈၽၢႆႇၼႃႈ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ တီႈၶႃႈဢေႃႈ။

6ၼႂ်းၸူဝ်ႈပၢၼ် သမ်းၵႃး လုၵ်ႈၸၢႆး ဢႃႇၼတ်ႉ ၼၼ်ႉ ဢိၵ်ႇတင်းၼႂ်းၸူဝ်ႈပၢၼ် ယေႇလႃႉ ၼၼ်ႉ၊ သဵၼ်ႈတၢင်းလူင်တင်းလၢႆ မီးတၢင်းဢၼ်သဵတ်ႇဢၼ်ယဵၼ်ဝႆႉလႄႈ ၵူၼ်းၵႂႃႇတၢင်းပႆတၢင်းတင်းလၢႆ ပႆၸွမ်းၵႂႃႇၸွမ်းသဵၼ်ႈတၢင်းဢၼ်ၵူတ်ႉဢၼ်ငွၵ်းဢေႃႈ။-

7ဝၢၼ်ႈၼွၵ်ႈၼႃးပၢင်ႇတင်းလၢႆ မီးတၢင်းဢၼ်သဵတ်ႇဢၼ်ယဵၼ်ဝႆႉဢေႃႈ။ မီးတၢင်းဢၼ်သဵတ်ႇဢၼ်ယဵၼ်ဝႆႉ တေႃႇထိုင်ႁွတ်ႈၵဝ် တေႇပေႃးရႃႇ ၼႆႉပေႃႇဢွၵ်ႇမႃး၊ တေႃႇထိုင်ႁွတ်ႈၵဝ်ၼႆႉပေႃႇဢွၵ်ႇမႃး ပဵၼ်မႄႈမဵဝ်း ဢီႉသရေႇလႃႉ ၼၼ်ႉဢေႃႈ။-

8ၶဝ်လိူၵ်ႈၵဵပ်းဢဝ်ၽြႃးဢၼ်မႂ်ႇဢေႃႈ။ မိူဝ်ႈၼၼ်ႉ ပဵၼ်သိုၵ်းပဵၼ်သိူဝ်ၵႃႈၼႂ်းၽၵ်းတူဝဵင်းၶဝ်ဢေႃႈ။ မိူဝ်ႈၼၼ်ႉ လႆႈႁၼ်ၶိူင်ႈႁႄႉလၢၵ်ႈၼၢၵ်ႈသေဢၼ်၊ ႁွၵ်ႇသေမၢၵ်ႈ ၵႃႈၼႂ်းမဵဝ်း ဢီႉသရေႇလႃႉ သီႇမိုၼ်ႇၼၼ်ႉႁိုဝ်။-

9ၵဝ်ၸႂ်ဢူၼ်ႈဢွၼ်ႇၼူပ်ႈၸူးတီႈၶုၼ်မဵဝ်း ဢီႉသရေႇလႃႉ ဢၼ်ဝႃႈ ၶဝ်ၸိူဝ်းဢၼ်မီးၸႂ်ၸေႇတၼႃႇသေလႄႈ ဢဝ်တူဝ်ၸဝ်ႈၵဝ်ႇလူႇၵႃႈၼႂ်းၵူၼ်းတင်းလၢႆၼၼ်ႉဢေႃႈ။ ဢွၼ်ၵၼ်ယွင်ႈယေႃးထႃႇဝရႃႉၽြႃးတႃႉ။-

10ၵေႃႉဢၼ်ၶီႇလီႈဢၼ်ၽိူၵ်ႇဢၼ်ၶၢဝ်၊ ၵေႃႉဢၼ်ၼင်ႈယူႇၵႃႈၼိူဝ်ၵေႃႇၸေႃးတၢၼ်းသိူဝ်ႇ၊ ၵေႃႉဢၼ်ၵႂႃႇတၢင်းပႆတၢင်းၶဝ်ဢိူၺ်း၊ ဢွၼ်ၵၼ်ၶႆႈၸႂ်ဝူၼ်ႉၸႂ်လူး။-

11မိူဝ်ႈဢၼ်ငိၼ်းသဵင်ၶဝ်ၸိူဝ်းဢၼ် ယိုဝ်းၵၢင်ႇယိုဝ်းပိုၼ်ၼၼ်ႉ ၵႃႈၼႂ်းတီႈဢၼ်တဵၵ်းၼမ်ႉၸိူဝ်းၼၼ်ႉၸိုင် တၵ်းလႆႈဢွၼ်ၵၼ်ယွင်ႈယေႃးဢမူႉဢၼ်တြႃးထႃႇဝရႃႉၽြႃးဢၼ်ဝႃႈ ဢမူႉမၼ်းၸဝ်ႈႁဵတ်းၸွမ်းၼင်ႇတြႃးတီႈဝၢၼ်ႈဝဵင်း ဢီႉသရေႇလႃႉ တင်းလၢႆၼၼ်ႉ ၵႃႈတီႈၼၼ်ႈဢေႃႈ။ မိူဝ်ႈၼၼ်ႉ ၵူၼ်းထႃႇဝရႃႉၽြႃးတင်းလၢႆ တၵ်းဢွၼ်ၵၼ်ၶိုၼ်းလူင်းၸူး ၵႃႈတီႈၽၵ်းတူၶဝ်ဢေႃႈ။-

12တိုၼ်ႇမႃးသေၵမ်း။ တိုၼ်ႇမႃးသေၵမ်း။ တေႇပေႃးရႃႇ ဢိူၺ်း၊ တိုၼ်ႇမႃးသေၵမ်း။ တိုၼ်ႇမႃးသေၵမ်း။ ႁဵတ်းၵႂၢမ်းသေၵမ်း။ ပႃႇရၵ်ႉ ဢိူၺ်း၊ လုၵ်ႉသေၵမ်း။ လုၵ်ႈၸၢႆး ဢၽီႉၼွင်ႇ ဢိူၺ်း၊ ဢဝ်ၶဝ်ၸိူဝ်းဢၼ်မႂ်းတီႉၵမ်ၶျုၵ်ႈဝႆႉၼၼ်ႉ ၵႂႃႇတီႉၵမ်ၶျုၵ်ႈဝႆႉသေၵမ်း။

13မိူဝ်ႈၼၼ်ႉ ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇယူႇၵႃႈၼႂ်းၶုၼ်တင်းလၢႆ ဢိၵ်ႇတင်းၵူၼ်းတင်းလၢႆၼၼ်ႉ ဢွၼ်ၵၼ်လူင်းၸူးဢေႃႈ။ ထႃႇဝရႃႉၽြႃးလူင်းၸူးၵႃႈတီႈၶဝ် ၵႃႈၼႂ်းၶဝ်ၸိူဝ်းဢၼ်ႁႅင်းတၼ်းၶူဝ်းယႂ်ႇၼႃႇၼၼ်ႉဢေႃႈ။-

14ၶဝ်ၸိူဝ်းဢၼ်တူၵ်းတီႈယူႇတီႈသဝ်း ၵႃႈၼႂ်းတီႈယူႇ ဢႃႇမလႅၵ်ႉ ၼၼ်ႉ ဢွၼ်ၵၼ်ဢွၵ်ႇသေၵႃႈၼႂ်းဢိူင်ႇ ဢေႇၽရိမ်ႇ လူင်းၸူးဢေႃႈ။ လိုၼ်းမႂ်းၼၼ်ႉ ၵူၼ်းမဵဝ်း ပိၼ်ႇယႃႇမိၼ်ႇ ပႃးမႃးၵႃႈၼႂ်းၵူၼ်းမဵဝ်းမႂ်းတင်းလၢႆၼၼ်ႉဢေႃႈ။ ၶုၼ်တင်းလၢႆဢွၼ်ၵၼ်ဢွၵ်ႇသေၵႃႈၼႂ်းမဵဝ်း မႃႇၶီႉရႃႉ ၊ ၶဝ်ၸိူဝ်းဢၼ်ၸၢင်ႈယိပ်းၵမ်ၵၼ်းႁွၵ်ႇရႃႇၸႃႉၼၼ်ႉ ဢွၼ်ၵၼ်ဢွၵ်ႇသေၵႃႈၼႂ်းမဵဝ်း ၸေႇပူႉလုၼ်ႇ ၼၼ်ႉသေလႄႈ လူင်းၸူးဢေႃႈ။-

15ၵူၼ်း ဢီႉသၶႃႇ တင်းလၢႆၵေႃႈ ပႃးလူၺ်ႈၵၼ်တင်း တေႇပေႃးရႃႇ လႄႈ မဵဝ်း ဢီႉသၶႃႇ ဢိၵ်ႇလူၺ်ႈၵၼ်တင်း ပႃႇရၵ်ႉ ဢွၼ်ၵၼ် ပႆတိၼ်လႅၼ်ႈၸူးၵႃႈတီႈပၢင်ႇတီႈႁူၺ်ႈဢေႃႈ။ ၵႃႈတီႈၼမ်ႉပဵၼ်ႁွင်ႈပဵၼ်ၵႄး တီႈယူႇမဵဝ်း ရူႉပိၼ်ႇ ၼၼ်ႉ မီးတၢင်းဢၼ်ဝႆႉၸႂ်ႁႅင်းယႂ်ႇၼႃႇ ၼမ်ၼႃႇလူင်လၢင်ဢေႃႈ။-

16ႁဵတ်းသင်လႄႈ မႂ်းၼင်ႈယူႇၼႂ်းၵႄႈၼႂ်းၵၢင်ၶွၵ်ႈသူဝ်း ႁႂ်ႈလႆႈထွမ်ႇလႆႈငိၼ်းသဵင်ဢၼ်ၽုင်သူဝ်းႁွင်ႉၼၼ်ႉၼင်ႇႁိုဝ်။ ၵႃႈတီႈၼမ်ႉပဵၼ်ႁွင်ႈပဵၼ်ၵႄး တီႈယူႇမဵဝ်း ရူႉပိၼ်ႇ ၼၼ်ႉ မီးတၢင်းဢၼ်ၶႆႈၸႂ်ဝူၼ်ႉၸႂ်ႁႅင်းယႂ်ႇၼႃႇၼမ်ၼႃႇဢေႃႈ။-

17မိူင်း ၵီႉလတ်ႉ ၼၼ်ႉယူႇၼိမ်ၼိမ်ယူႇ ၵႃႈတီႈၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ ၼၼ်ႉဢေႃႈ။ မဵဝ်း တၢၼ်ႇ ၼၼ်ႉ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၵိုတ်းသဝ်းယူႇၵႃႈတီႈႁိမ်းတႃႈႁိူဝ်းသၢင်းၽေႃးတင်းလၢႆၼၼ်ႉၼင်ႇႁိုဝ်။ မဵဝ်း ဢႃႇသႃႇ ၵေႃႈ ၼင်ႈယူႇၵႃႈႁိမ်းၽင်ႇပၢင်ႇလၢႆႇလႄႈ ယူႇၼိမ်ၼိမ် ယူႇၵႃႈတီႈၵူတ်ႉၼမ်ႉမၼ်းၸိူဝ်းၼၼ်ႉလူင်ပႄႇ။-

18မဵဝ်း ၸေႇပူႉလုၼ်ႇ ၸမ်ႉ ပဵၼ်ဢၼ်ႁတ်းႁၢၼ်တေႃႇထိုင်ႁွတ်ႈထၼ်ႈပေႃး ၸုၼ်ႉဢသၢၵ်ႈတူဝ်ၸဝ်ႈၵဝ်ႇလႄႈမဵဝ်း ၼပ်ႉထလီႉ ၵေႃႈႁဵတ်းမိူၼ်ၸိူဝ်ႉၼင်ႇၼၼ် ၵႃႈတီႈဢၼ်သုင်တင်းလၢႆၵႃႈၼႂ်းထိူၼ်ႇၼၼ်ႉဢေႃႈ။-

19ၶုၼ်ႁေႃၶမ်းတင်းလၢႆ ဢွၼ်ၵၼ်မႃးလႄႈတိုၵ်းသိုၵ်းဢေႃႈ။ ၶုၼ်ႁေႃၶမ်း ၶႃႇၼၼီႉ ၸိူဝ်းၼၼ်ႉ ဢွၼ်ၵၼ်တိုၵ်းသိုၵ်း ၵႃႈတီႈဝဵင်း တႃႇၼၵ်ႉ ၵႃႈတီႈႁိမ်းၼမ်ႉ မေႇၵိတ်ႉတေႃႇ ၼၼ်ႉဢေႃႈ။ ၵူၺ်းၵႃႈ ၶဝ်ႁိမ်ဢဝ်ငိုၼ်းလႄႈဢမ်ႇလႆႈ။-

20ၸွႆႈသိုၵ်းထႅမ်သိုၵ်းသေၵႃႈၼိူဝ်ၵၢင်ႁၢဝ်ယူႇဢေႃႈ။ လၢဝ်တင်းလၢႆယူႇၵႃႈၼႂ်းတီႈဢၼ်ၶဝ်ပၼ်ႇလဵပ်ႈယူႇၸိူဝ်းၼၼ်ႉ ၸွႆႈသိုၵ်းထႅမ်သိုၵ်းတေႃႇ သီႉသရႃႉ ဢေႃႈ။-

21ၼမ်ႉႁွင်ႈ ၵီႉသုၼ်ႇ ပတ်ႉထူဝ်းဢဝ်ၶဝ်ၵႂႃႇယဝ်ႉ။ ၼမ်ႉႁွင်ႈဢၼ်မီးဝႆႉၸႃႉၸဵမ် မိူဝ်ႈၵွၼ်ႇဢွၼ်ၼႆႉၼၼ်ႉ ဢၼ်ဝႃႈၼမ်ႉႁွင်ႈ ၵီႉသုၼ်ႇ ၼၼ်ႉဢေႃႈ။ ဝီႉၺိၺ်ႇၵဝ်ဢိူၺ်း၊ မီးတင်းႁႅင်းတၼ်းၶူဝ်းသေလႄႈၶီႇယဵပ်ႇၵႂႃႇတႃႉ။-

22မိူဝ်ႈၼၼ်ႉ ၵိပ်ႇမႃႉတင်းလၢႆထိပ်ႇၽၢင်ႈလိၼ် ၵွပ်ႈပိူဝ်ႈဢၼ်ၵူၼ်းဢၼ်ႁႅင်းယႂ်ႇၼႃႇၸိူဝ်းၼၼ်ႉ ႁိပ်ႈၼႅတ်ႈႁေႃႈငိုတ်ႈယူႇ၊ ႁိပ်ႈၼႅတ်ႈႁေႃႈငိုတ်ႈယူႇသေလႄႈ ၶီႇမႃႉၵႂႃႇၼၼ်ႉဢေႃႈ။-

23တမၢၼ်ႇၵၢင်ႁၢဝ်ထႃႇဝရႃႉၽြႃး သင်ႇလၢတ်ႈလႄႈဝႃႈ၊ ၵိၼ်ႇဝႃႈဝဵင်း မေႇရေႃးၸႃႉ တႃႉ။ ၵိၼ်ႇဝႃႈၶဝ်ၸိူဝ်းဢၼ်ယူႇၵႃႈတီႈဝဵင်းၼၼ်ႉ ၼႃႇၼႃႇတႃႉ။ လွင်ႈမၼ်းၸမ်ႉ ၶဝ်ဢမ်ႇၽွမ်ႉၵၼ်တင်းၵူၼ်းဢၼ်ႁႅင်းယႂ်ႇၼႃႇၵႃႈတီႈၽၢႆႇထႃႇဝရႃႉၽြႃးလႄႈ ၸွႆႈထႅမ်မႃႉၸႃႉၵႃႈတီႈၽၢႆႇ ထႃႇဝရႃႉၽြႃးၼၼ်ႉဢေႃႈ။-

24ယေႇလႃႉ မေး ႁေႇပႃႇ ၵူၼ်းမဵဝ်း ၵေႇၼီႉ ၼၼ်ႉမီးမင်ႇၵလႃႇဢၼ်မျၢတ်ႈၼႃႇလူင်လၢင် လိူဝ်တွၼ်းၼႃႇသေမႄႈယိင်းတင်းလၢႆဢေႃႈ။ မၼ်းမီးမင်ႇၵလႃႇဢၼ်မျၢတ်ႈၼႃႇလူင်လၢင် လိူဝ်တွၼ်းၼႃႇသေမႄႈယိင်းတင်းလၢႆ ဢၼ်ယူႇၵႃႈၼႂ်းမူဝ်းၵႃႇဢေႃႈ။

25ၵေႃႉၼၼ်ႉယွၼ်းၼမ်ႉလႄႈ မၼ်းပၼ်ၼမ်ႉၼူမ်းဢေႃႈ။ ဢဝ်ၵွၵ်းဢၼ်ၶုၼ်သုင်းၼၼ်ႉ သႂ်ႇၼမ်ႉၼူမ်းၵၢမ်ႈပၼ်ဢေႃႈ။-

26မၼ်းယဵတ်ႇမိုဝ်းမၼ်းဢဝ်သႄႈမူဝ်းၵႃႇလႄႈ ဢဝ်တင်းမိုဝ်းၶွၼ်ၶႂႃမၼ်းယိပ်းၵမ်ဢဝ်ၶွၼ်ႉတွၵ်ႇၵူၼ်းဢၼ်ႁဵတ်းဢၼ်သၢင်ႈသေယဝ်ႉ ဢဝ်ၶွၼ်ႉတွၵ်ႇၼၼ်ႉတွၵ်ႇသႂ်ႇ သီႉသရႃႉ လႄႈ တွၵ်ႇသႂ်ႇႁႂ်ႈၵွၵ်းႁူဝ်မၼ်းထၼ်ႈပေႃးတႅၵ်ႇဢေႃႈ။ မၼ်းတွၵ်ႇသဵပ်ႇသႂ်ႇလႄႈ သဵပ်ႇတႅင်းသႂ်ႇသီႈမႅပ်ႉမၼ်းပွင်ႇပဵဝ်ၵႂႃႇဢေႃႈ။-

27ၵေႃႉၼၼ်ႉ ၵူမ်ႈမူပ်ႇယူႇ၊ လူမ်ႉယူႇ၊ ယဵတ်ႇယူႇဢိူၼ်လိူၼ် ၵႃႈတီႈတိၼ်မၼ်းဢေႃႈ။ ၵေႃႉၼၼ်ႉၵူမ်ႈမူပ်ႇယူႇ၊ လူမ်ႉယူႇၵႃႈတီႈတိၼ်မၼ်းလႄႈ လူမ်ႉတၢႆယူႇၵႃႈတီႈဢၼ်ၵူမ်ႈမူပ်ႇၼၼ်ႉဢေႃႈ။-

28မႄႈမၼ်းၼၼ်ႉ ယူႇၵႃႈတီႈႁူးလၢင်းတဵၼ် လွမ်တူၺ်းယူႇသေလႄႈဝႃႈ၊ မႄႈ သီႉသရႃႉ ယူႇၵႃႈတီႈႁူးၽႃသေလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ လေႃႉရထႃးမၼ်းၼၼ်ႉၼၢၼ်းမႃးၼင်ႇႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မၢၵ်ႇလေႃႉရထႃးမၼ်းၸိူဝ်းၼၼ်ႉ ထိူင်းၼင်ႇႁိုဝ်။ ဝႃႈၼင်ႇၼႆယူႇဢေႃႈ။-

29ၸိူင်ႉၼၢင်းမၼ်း ဢၼ်မီးပိင်ႇၺႃႇၸိူဝ်းၼၼ်ႉ ၶိုၼ်းလဝ်ႊလၢတ်ႈၵူၺ်းဢမ်ႇၵႃး၊ တူဝ်မၼ်းၶိုၼ်းလၢတ်ႈတီႈတူဝ်မၼ်းလႄႈဝႃႈၸမ်ႉ၊-

30ၶဝ်ထူပ်းႁၼ်လႄႈ ၶဝ်ဢဝ်ဢုၵ်ႉၸႃႇဢၼ်ႁိမ်လႆႈၼၼ်ႉ ၽႄမႅင်ႇယူႇဢမ်ႇၸႂ်ႈႁိုဝ်။ ပုၼ်ႈၵူၼ်းသိုၵ်းယေႈၵေႃႉ၊ ၵၼ်ႇၺႃႇလုၵ်ႈယိင်းသၢဝ်ယေႈၵေႃႉသွင်ၵေႃႉ၊ ပုၼ်ႈ သီႉသရႃႉ ၸမ်ႉ၊ ၶူဝ်းၼုင်ႈဢၼ်ယွမ်ႉပဵၼ်မွၵ်ႇပဵၼ်မႂ်၊ ၶိူင်ႈၶူဝ်းၼုင်ႈဢၼ်ဢဝ်ယွမ်ႉပဵၼ်မွၵ်ႇပဵၼ်မႂ်တမ်ႇၵၢမ်းၵၼ်လႄႈႁၢင်ႈၶိူင်ႈ၊ ၶိူင်ႈၶူဝ်းၼုင်ႈဢၼ်ဢဝ်ယွမ်ႉပဵၼ်မွၵ်ႇပဵၼ်မႂ်လႄႈ တမ်ႇၵၢမ်းၵၼ်ႁၢင်ႈၶိူင်ႈ၊ သွင်ၽၢၵ်ႇသွင်ၼႃႈၼၼ်ႉ ပုၼ်ႈဢၼ်တၵ်းပဵၼ်ဢုၵ်ႉၸႃႇဢၼ်ႁိမ်လႆႈၼၼ်ႉလႄႈ ႁွႆႈဝႆႉၵႃႈတီႈၶေႃးမၼ်းၼၼ်ႉၸိုင် မီးဝႆႉယဝ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆယူႇဢေႃႈ။-

31ဢူဝ်းထႃႇဝရႃႉၽြႃး၊ ႁႂ်ႈရၢၼ်ႇသူႇၸဝ်ႈႁဝ်းတင်းသဵင်ႈတင်းလူင်ၼၼ်ႉ ႁွတ်ႈထိုင်တၢင်းလူႉတၢင်းလႅဝ်ၸိူဝ်ႉၼင်ႇၼၼ်သေၵမ်းလူၺ်ႈ။ ႁႂ်ႈၶဝ်ၸိူဝ်းဢၼ်ႁၵ်ႉမၼ်းၸဝ်ႈၼၼ်ႉ ပဵၼ်ၸိူဝ်ႉၼင်ႇၵၢင်ဝၼ်း ဢၼ်ပႃးႁႅင်းတၼ်းၶူဝ်းသေလႄႈဢွၵ်ႇမႃးၼၼ်ႉသေၵမ်းလူၺ်ႈ၊ ဝႃႈၼင်ႇၼႆဢေႃႈ။ လိုၼ်းၼၼ်ႉမိူင်းတင်းမိူင်း ၼိမ်လီယဵၼ်လီသီႇသိပ်းပီႊတဵမ်တဵမ်ဢေႃႈ။

← Chapter 4 Jump to: Chapter 6 →