Judges 15

Shan

← Chapter 14 Jump to: Chapter 16 →

1လိုၼ်းၼၼ်ႉ ႁိုင်တၢၼ်ႇတၢၼ်ႇသေယဝ်ႉ ၼႂ်းၶိင်ႇမိူဝ်ႈဢၼ်ပၢတ်ႇၶဝ်ႈၵျုင်ႇၼၼ်ႉ၊ သၢမ်ႇသုၼ်ႇ ပႃးဢဝ်ပႄႉဢွၼ်ႇသေလႄႈ ၵႂႃႇႁႂ်ႈလႆႈသူႇလႆႈၸႂ်းမေးမၼ်းလႄႈ ၵျၢမ်ႇငႃတၵ်းၶဝ်ႈၸူးတီႈမၼ်း ၵႃႈၼႂ်းလုၵ်းမၼ်းၼၼ်ႉလႄႈ ပူႇၼၢႆးမၼ်းႁႄႉၶႅၼ်ႁႂ်ႈဢမ်ႇလႆႈၶဝ်ႈၸူးလႄႈဝႃႈ၊-

2ၵွပ်ႈပိူဝ်ႈဢၼ်ၵဝ်ထၢင်ႇမႂ်းၸင်းမၼ်းတႄႉတႄႉဝႃႈဝႃႈယဝ်ႉလႄႈ၊ ၵဝ်လႆႈဢဝ်မၼ်းပၼ်တီႈၵေႃႉသေႈမႂ်းယဝ်ႉ။ ၼွင်ႉယိင်းမၼ်းၼၼ်ႉ ယဵင်ႈၶႅၼ်းႁၢင်ႈလီသေမၼ်းဢမ်ႇၸႂ်ႈႁိုဝ်။ ဢဝ်ၼွင်ႉယိင်းမၼ်းၼၼ်ႉ ပုၼ်ႈတၢင်တူဝ်မၼ်းတႃႉ၊ ဝႃႈၼင်ႇၼႆဢေႃႈ။-

3သၢမ်ႇသုၼ်ႇ လၢတ်ႈတီႈၶဝ်လႄႈဝႃႈ၊ ၵမ်းၼႆႉ ၵဝ်တၵ်းလွတ်ႈတင်းတီႈဢၼ်ၵူၼ်း ၽီႉလိတ်ႉတီႉ တင်းလၢႆ တၵ်းတၢင်ႇဢပႅတ်ႈၼႂ်းမိူဝ်ႈဢၼ် ၵဝ်ႁဵတ်းဢပႅတ်ႈတီႈၶဝ်ၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

4သၢမ်ႇသုၼ်ႇ ၵႂႃႇလႄႈ တီႉဢဝ်မႃၼႆးသၢမ်ပၢၵ်ႇသေလႄႈ ဢဝ်ၵၢၼ်ႈၽႆးလႄႈ ႁဵတ်းႁႂ်ႈႁၢင်မႃၼႆးဢၼ်ၼိုင်ႈလႄႈဢၼ်ၼိုင်ႈ ႁွမ်းၵၼ်သေယဝ်ႉ၊ ဢဝ်ၵၢၼ်ႈၽႆးမတ်ႉၸပ်းၵႃႈတီႈၵႄႈႁၢင်သွင်ဢၼ်သေလႄႈ၊-

5ဢဝ်ၽႆးၸပ်းတီႈၵၢၼ်ႈၽႆးၸိူဝ်းၼၼ်ႉယဝ်ႉၸင်ႇ ဢဝ်ပွႆႇပႅတ်ႈၵႃႈၼႂ်းတူင်ႈၼႃးၶဝ်ႈၵျုင်ႇၵူၼ်း ၽီႉလိတ်ႉတီႉ တင်းလၢႆလႄႈ ၽႆးမႆႈလိုၼ်ႈၶဝ်ႈၵျုင်ႇၶဝ်၊ တူၼ်ႈၶဝ်ႈၵျုင်ႇၶဝ်၊ တင်းသူၼ်ဢူးယဵၼ်ႇ သၢၼ်ႇလုၼ်ႇ ၶဝ်ဢေႃႈ။-

6ၵူၼ်း ၽီႉလိတ်ႉတီႉ တင်းလၢႆၵေႃႈ တွင်ႈထၢမ်လႄႈဝႃႈ၊ ၽူႈလႂ်ႁဵတ်းဢမူႉၼႆႉ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၶိုၼ်းလၢတ်ႈလႄႈဝႃႈ၊ သၢမ်ႇသုၼ်ႇ လုၵ်ႈၶူၺ်ၵူၼ်းဝဵင်း တီႉမၼႃႉ ၼၼ်ႉႁဵတ်းယဝ်ႉ။ ၶဝ်ဢဝ်မေးမၼ်းပၼ်တီႈၵေႃႉသေႈမၼ်းလူင်ပႄႇ၊ ဝႃႈၼင်ႇၼႆသေယဝ်ႉ၊ ၵူၼ်း ၽီႉလိတ်ႉတီႉ တင်းလၢႆ ဢွၼ်ၵၼ်မႃးလႄႈ ဢဝ်မႄႈယိင်းၼၼ်ႉ ဢိၵ်ႇတင်းပေႃႈမၼ်းတုတ်ႇၽဝ်ၽႆးပႅတ်ႈဢေႃႈ။-

7သၢမ်ႇသုၼ်ႇ ၵေႃႈ လၢတ်ႈတီႈၶဝ်လႄႈဝႃႈ၊ ပေႃးသူႁဵတ်းၸိူဝ်ႉၼင်ႇၼၼ်ၸိုင်၊ ၵဝ်တၵ်းႁဵတ်းႁႂ်ႈပေႇၸႂ်ၵဝ်လူးၵွၼ်ႇဢေႃႈ။ ပေႇၸႂ်ၵဝ်ယဝ်ႉ ၵဝ်ၸင်ႇတၵ်းယူႇၼိမ်ၼိမ်လီလီဢေႃႈ၊ ဝႃႈၼင်ႇၼႆယူႇသေလႄႈ၊-

8ႁဵတ်းတၢင်းဢၼ်ၶႃႈၽၼ်းဢဝ်တၢႆဢၼ်ယႂ်ႇၼႃႇလူင်လၢင်ယူႇသေလႄႈ တိုၵ်းတေႃးပေႃႉယႅၼ်ႉငဝ်ႈၵုမ်ႇၶႅပ်းၶႃၶဝ်ပႅတ်ႈသေယဝ်ႉ၊ လူင်းၵႂႃႇလႄႈ ယူႇၵႃႈၼႂ်းၵႄႈငၢပ်ႇမၢၵ်ႇႁိၼ်မၢၵ်ႇၽႃ ဢေးတမ်ႇ ဢေႃႈ။

9လႆႈသမ်ႉ ၵူၼ်း ၽီႉလိတ်ႉတီႉ တင်းလၢႆ ၶီႇၶိုၼ်ႈၵႂႃႇလႄႈၶျႃးတပ်ႉၶဝ်ၵႃႈၼႂ်းမိူင်း ယူႉတႃႉ သေလႄႈ ယူႇၸွတ်ႇယူႇတူဝ်ႈၵႃႈတီႈ လေးႁီႉ ဢေႃႈ။-

10ၵူၼ်း ယူႉတႃႉ တင်းလၢႆၵေႃႈတွင်ႈထၢမ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူၶီႇမႃး၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၶိုၼ်းလၢတ်ႈလႄႈဝႃႈ၊ ႁဝ်းၶီႇမႃးႁႂ်ႈလႆႈတီႉမတ်ႉဢဝ် သၢမ်ႇသုၼ်ႇ လႄႈ ႁဵတ်းတီႈမၼ်းမိူၼ်ၸိူဝ်ႉၼင်ႇဢၼ်မၼ်းႁဵတ်းတီႈႁဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။-

11မိူဝ်ႈၼၼ်ႉ ၵူၼ်း ယူႉတႃႉ သၢမ်ႁဵင် ဢွၼ်ၵၼ်လူင်းၸူးၵႃႈတီႈၵႄႈငၢပ်ႇမၢၵ်ႇႁိၼ်မၢၵ်ႇၽႃ ဢေးတမ်ႇ ၼၼ်ႉသေလႄႈ တွင်ႈထၢမ်တီႈ သၢမ်ႇသုၼ်ႇ လႄႈဝႃႈ၊ မႂ်းဢမ်ႇႁူႉလွင်ႈဢၼ်ၵူၼ်း ၽီႉလိတ်ႉတီႉ တင်းလၢႆ ပဵၼ်ၸဝ်ႈႁဝ်းၼၼ်ႉႁိုဝ်။ မႂ်းႁဵတ်းၸိူဝ်ႉၼင်ႇႁိုဝ်တီႈႁဝ်း၊ ဝႃႈၼင်ႇၼႆလႄႈ၊ မၼ်းၶိုၼ်းလၢတ်ႈတီႈၶဝ်လႄႈဝႃႈ၊ ၵဝ်ႁဵတ်းတီႈၶဝ် မိူၼ်ၸိူဝ်ႉၼင်ႇဢၼ်ၶဝ်ႁဵတ်းတီႈၵဝ်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

12ၶဝ်ၼၼ်ႉၵေႃႈလၢတ်ႈလႄႈဝႃႈ၊ မိူဝ်ႈလဵဝ်ၼႆႉႁဝ်းမႃးႁႂ်ႈလႆႈတီႉမတ်ႉမႂ်းသေလႄႈ ဢဝ်ဢၢပ်ႈပၼ်ၵႃႈၼႂ်းမိုဝ်းၵူၼ်း ၽီႉလိတ်ႉတီႉ ၸိူဝ်းၼၼ်ႉယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊ သၢမ်ႇသုၼ်ႇ ၵေႃႈလၢတ်ႈတီႈၶဝ်လႄႈဝႃႈ၊ သူၵိၼ်ႇဝႃႈလွင်ႈဢၼ်တူဝ်သူ တၵ်းဢမ်ႇႁဵတ်းတီႈၵဝ်ၼၼ်ႉတႃႉ၊ ဝႃႈၼင်ႇၼႆသေယဝ်ႉ၊-

13ၶဝ်ၼၼ်ႉၵေႃႈဢွၼ်ၵၼ်လၢတ်ႈတီႈမၼ်းလႄႈဝႃႈ၊ ႁဝ်းဢမ်ႇႁဵတ်း။ ၵူၺ်းၵႃႈ ႁဝ်းတၵ်းမတ်ႉၽုၵ်ႇမႂ်းၼႃႇၼႃႇသေလႄႈ ဢဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၼၼ်ႉဢေႃႈ။ ႁဝ်းဢမ်ႇဢဝ်မႂ်းတၢႆဢမၢၼ်ႇၶၼ်ပဵၼ်၊ ဝႃႈၼင်ႇၼႆယူႇသေလႄႈ ဢဝ်ၸိူၵ်ႈမႂ်ႇသွင်သဵၼ်ႈမတ်ႉၽုၵ်ႇမၼ်းလႄႈ ဢဝ်မၼ်းဢွၵ်ႇသေၵႃႈၼႂ်းမၢၵ်ႇႁိၼ်မၢၵ်ႇၽႃၼၼ်ႉ ၶိုၼ်းၶိုၼ်ႈမႃးဢေႃႈ။-

14မိူဝ်ႈဢၼ်မၼ်းႁွတ်ႈထိုင်ၵႃႈတီႈ လေးႁီႉ ၼၼ်ႉၸိုင် ၵူၼ်း ၽီႉလိတ်ႉတီႉ တင်းလၢႆဢွၼ်ၵၼ်ႁုၼ်ႉဢေႃႈ။ ဝီႉၺိၺ်ႇထႃႇဝရႃႉၽြႃး တူၵ်းႁွတ်ႈၵႃႈၼိူဝ်မၼ်းၼႃႇလူင်လၢင်သေယဝ်ႉ၊ ၸိူၵ်ႈဢၼ်မတ်ႉၽုၵ်ႇၵႃႈတီႈမိုဝ်းမၼ်းၸိူဝ်းၼၼ်ႉ ပဵၼ်ၸိူဝ်ႉၼင်ႇမႆပၢၼ်ႇ ဢၼ်တိူဝ်ႉၽႆးၼၼ်ႉမႃးလႄႈ ဢၼ်မတ်ႉဢၼ်ၽုၵ်ႇၼၼ်ႉ လွတ်ႈသေၵႃႈတီႈမိုဝ်းမၼ်းၵႂႃႇဢေႃႈ။-

15မၼ်းၵေႃႈထူပ်းႁၼ်လုပ်ႇၵၢင်းလီႈ ဢၼ်ယင်းလိပ်းဝႆႉၼၼ်ႉလႄႈ ယိုၼ်ႈမိုဝ်းယိပ်းၵမ်ဢဝ်သေယဝ်ႉ၊ ဢဝ်ၵူၼ်းတၢႆႁဵင်ၼိုင်ႈဢေႃႈ။-

16သၢမ်ႇသုၼ်ႇ ၼၼ်ႉလၢတ်ႈလႄႈဝႃႈ၊ ဢဝ်တင်းလုပ်ႇၵၢင်းလီႈ ပဵၼ်ၵွင်ပဵၼ်ၵွင်လႄႈ ဢဝ်တင်းလုပ်ႇၵၢင်းလီႈ ဢဝ်ၵူၼ်းတၢႆႁဵင်ၼိုင်ႈယဝ်ႉယဝ်ႉ၊ ဝႃႈၼင်ႇၼႆလႄႈ၊-

17လိုၼ်းသေဢၼ်ဝႃႈယဝ်ႉၼၼ်ႉ မၼ်းဢဝ်လုပ်ႇၵၢင်းလီႈၼၼ်ႉ ထိမ်ႈပႅတ်ႈသေၵႃႈၼႂ်းမိုဝ်းမၼ်းလႄႈ ၵႃႈတီႈၼၼ်ႈလႆႈၸိုဝ်ႈ ရႃႇမတ်ႉလေးႁီႉ ဢေႃႈ။-

18မၼ်းၼၼ်ႉ ယၢၵ်ႇၼမ်ႉၼႃႇလူင်လၢင်လႄႈ သူးတွင်းတီႈထႃႇဝရႃႉၽြႃးယူႇသေလႄႈဝႃႈ၊ ၸဝ်ႈႁဝ်းဢဝ်မိုဝ်းၶႃႈၸဝ်ႈႁဝ်းပၼ် တၢင်းဢၼ်ၵႄႇသႄႇၶျွတ်ႈဢဝ်ဢၼ်ယႂ်ႇၼႃႇၼႆႉယဝ်ႉလႄႈ မိူဝ်ႈလဵဝ်ၼႆႉ ၶႃႈၸဝ်ႈယၢၵ်ႇၼမ်ႉယူႇသေလႄႈတၵ်းလႆႈတၢႆလႄႈ ႁွတ်ႈထိုင်ၵႃႈၼႂ်းမိုဝ်းၵူၼ်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၸိူဝ်းၼၼ်ႉတီႈၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

19ၽြႃးပဵၼ်ၸဝ်ႈၽႃႇသပ်း ၵႃႈတီႈၶူင်ႈႁူၺ်ႈၵႃႈၼႂ်းတီႈ လေးႁီႉ ၼၼ်ႉလႄႈ ၼမ်ႉဢွၵ်ႇမႃးဢေႃႈ။ မၼ်းၼၼ်ႉၵိၼ်ၼမ်ႉသေယဝ်ႉ ၶိုၼ်းထူၺ်ႈၸႂ်လႄႈႁွမ်ႁႅင်းယူႇဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ တီႈၶူင်ႈႁူၺ်ႈၼၼ်ႉ လႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ ဢိၼ်ႇႁၵ်ႉၵေႃးရႃႉ လႄႈ မီးယူႇၵႃႈတီႈ လေးႁီႉ ၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

20သၢမ်ႇသုၼ်ႇ ၵေႃႈ ၸီႇယၢင်ႇၵႃႈၼိူဝ် မဵဝ်း ဢီႉသရေႇလႃႉ ၸူဝ်ႈပၢၼ်ၵူၼ်း ၽီႉလိတ်ႉတီႉ ၼၼ်ႉ သၢဝ်းပီႊဢေႃႈ။

← Chapter 14 Jump to: Chapter 16 →