Judges 11 — Shan

1ယေႇၽသႃႉ ၵူၼ်းမဵဝ်း ၵီႉလတ်ႉ ၼၼ်ႉ ပဵၼ်ၵူၼ်းသိုၵ်းဢၼ်ႁႅင်းယႂ်ႇၼႃႇလူင်လၢင်ဢေႃႈ။ မၼ်းၼၼ်ႉပဵၼ်လုၵ်ႈၸၢႆးမႄႈမွၵ်ႇယႃႈလႄႈ ပေႃႈမၼ်းၸမ်ႉ၊ ပဵၼ် ၵီႉလတ်ႉ ဢေႃႈ။-

2မေး ၵီႉလတ်ႉ ၼၼ်ႉ ၵိူတ်ႇလဵင်ႉလုၵ်ႈၸၢႆးတင်းလၢႆမႃးတီႈမၼ်းလႄႈ မိူဝ်ႈဢၼ်လုၵ်ႈၸၢႆးမေးမၼ်းၸိူဝ်းၼၼ်ႉ ယႂ်ႇမႃးၼၼ်ႉၸိုင်၊ ၶဝ်ၼၼ်ႉဢွၼ်ၵၼ်ႁေႃႈ ယေႇၽသႃႉ ဢွၵ်ႇပႅတ်ႈသေလႄႈ လၢတ်ႈတီႈမၼ်းလႄႈဝႃႈ၊ ၵွပ်ႈပိူဝ်ႈဢၼ်မႂ်းပဵၼ်လုၵ်ႈၸၢႆးမႄႈယိင်းတၢင်ႇတီႈတၢင်ႇလႅၼ်လႄႈ မႂ်းဢမ်ႇလႆႈၶၢမ်ႇဢမူၺ်ႇလူၺ်ႈၵၼ်တင်းပီႈၼွင်ႉၸိူဝ်ႉၶိူဝ်းႁဝ်း၊ ဝႃႈၼင်ႇၼႆဢေႃႈ။-

3မိူဝ်ႈၼၼ်ႉ ယေႇၽသႃႉ ဢွၵ်ႇပၢႆႈသေၵႃႈတီႈပီႈၼွင်ႉမၼ်းၸိူဝ်းၼၼ်ႉၵႂႃႇလႄႈ ယူႇၵႃႈတီႈမိူင်း တေႃႇၽႃႉ သေယဝ်ႉ၊ ၶဝ်ၸိူဝ်းဢၼ်လႄႇလၢဝ်းမဝ်မၢင်ၼၼ်ႉ ၸူႉၵၼ်တုမ်ၵၼ်တီႈမၼ်းလႄႈ ၸွမ်းလင်မၼ်းယူႇဢေႃႈ။-

4လိုၼ်းၼၼ်ႉ ႁိုင်တၢၼ်ႇတၢၼ်ႇ ၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉ တိုၵ်းတေႃးမဵဝ်း ဢီႉသရေႇလႃႉ ဢေႃႈ။-

5ၼင်ႇၼၼ်လႄႈ မိူဝ်ႈဢၼ်ၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉတိုၵ်းတေႃးမဵဝ်း ဢီႉသရေႇလႃႉ ၼၼ်ႉၸိုင်၊ ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမိူင်း ၵီႉလတ်ႉ ၸိူဝ်းၼၼ်ႉ ဢွၼ်ၵၼ်ၵႂႃႇႁႂ်ႈလႆႈႁွင်ႉဢဝ် ယေႇၽသႃႉ သေၵႃႈၼႂ်းမိူင်း တေႃႇၽႃႉ ၼၼ်ႉလႄႈ-

6လၢတ်ႈတီႈ ယေႇၽသႃႉ လႄႈဝႃႈ၊ မႃးလႄႈႁဵတ်းၶုၼ်ပူဝ်ႇၶျုၵ်ႈႁဝ်း ႁႂ်ႈႁဝ်းလႆႈတိုၵ်းၵၼ်တင်းၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

7ယေႇၽသႃႉ လၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမိူင်း ၵီႉလတ်ႉ ၸိူဝ်းၼၼ်ႉလႄႈဝႃႈ၊ သူၸင်းၵဝ်လႄႈႁေႃႈၵဝ်ဢွၵ်ႇသေၵႃႈၼႂ်းႁိူၼ်းပေႃႈၵဝ်မႃးယဝ်ႉဢမ်ႇၸႂ်ႈႁိုဝ်။ တေႃႈလဵဝ်ၼႆႉ မိူဝ်ႈဢၼ်သူႁွတ်ႈထိုင်တုၵ်ႉၶႃႉတၢင်းၽၢၼ်ၸိုင်၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူမႃးၵႃႈတီႈၵဝ်ၼင်ႇႁိုဝ်။ ဝႃႈၼင်ႇၼႆဢေႃႈ။-

8ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမိူင်း ၵီႉလတ်ႉ ၸိူဝ်းၼၼ်ႉၶိုၼ်းတွင်းပၢၼ်ႇတီႈ ယေႇၽသႃႉ လႄႈဝႃႈ၊ ပိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈ မိူဝ်ႈလဵဝ်ၼႆႉႁဝ်းသမ်ႉမႃးတီႈၸဝ်ႈ ႁႂ်ႈၸဝ်ႈလႆႈၵႂႃႇလူၺ်ႈၵၼ်တင်းႁဝ်းလႄႈ တိုၵ်းၵၼ်တင်းၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉသေယဝ်ႉ ပဵၼ်ၸိၵ်းပဵၼ်ၸွမ်ၵူၼ်းဝၢၼ်ႈၵူၼ်းမိူင်း ၵီႉလတ်ႉ တင်းလၢႆၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

9ယေႇၽသႃႉ ထၢမ်တီႈၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမိူင်း ၵီႉလတ်ႉ ၸိူဝ်းၼၼ်ႉလႄႈဝႃႈ၊ ပေႃးသူသမ်ႉၶိုၼ်းဢဝ်ၵဝ်မိူဝ်းႁႂ်ႈလႆႈတိုၵ်းၵၼ်တင်းၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉလႄႈ ထႃႇဝရႃႉၽြႃးဢဝ်ၶဝ်ဢၢပ်ႈပၼ်ၵႃႈတီႈၽၢႆႇၼႃႈၵဝ်ၸိုင် ၵဝ်တၵ်းလႆႈပဵၼ်ၸိၵ်းပဵၼ်ၸွမ်သူႁိုဝ်။ ဝႃႈၼင်ႇၼႆသေယဝ်ႉ၊-

10ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမိူင်း ၵီႉလတ်ႉ ၸိူဝ်းၼၼ်ႉ ဢွၼ်ၵၼ်ၶိုၼ်းလၢတ်ႈတီႈ ယေႇၽသႃႉ လႄႈဝႃႈ၊ ပေႃးႁဝ်းဢမ်ႇႁဵတ်းၸွမ်းၵႃႈၼင်ႇၵႂၢမ်းဢၼ်ၸဝ်ႈလၢတ်ႈၼၼ်ႉၸိုင် ႁႂ်ႈထႃႇဝရႃႉၽြႃး ပဵၼ်သၢၵ်ႈသေႇၵႃႈတီႈဝူင်ႈၵၢင်ၸဝ်ႈတင်းႁဝ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

11မိူဝ်ႈၼၼ်ႉ ယေႇၽသႃႉ ၵႂႃႇလူၺ်ႈၵၼ်တင်း ၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းမိူင်း ၵီႉလတ်ႉ ၸိူဝ်းၼၼ်ႉလႄႈ ၵူၼ်းတင်းလၢႆ ဢဝ်မၼ်းၶၢၼ်းဝႆႉၼႂ်းဢရႃႇၸိၵ်းၸွမ်ၶုၼ်ပူဝ်ႇၶျုၵ်ႈဢေႃႈ။ ယေႇၽသႃႉ ၵေႃႈ ဢဝ်ၵႂၢမ်းမၼ်းၵူႈၸိူဝ်ႉၵူႈပိူင်ၶိုၼ်းလဝ်ႊၶိုၼ်းလၢတ်ႈၵႃႈတီႈၽၢႆႇၼႃႈထႃႇဝရႃႉၽြႃး ၵႃႈၼႂ်းဝဵင်း မီႉၸပႃႇ ဢေႃႈ။-

12လိုၼ်းၼၼ်ႉ ယေႇၽသႃႉ ပွႆႇၸႂ်ႉသၢၼ်ႇတမၢၼ်ႇတင်းလၢႆၵႂႃႇၸူးၵႃႈတီႈၶုၼ်ႁေႃၶမ်းမဵဝ်း ဢမ်ႇမုၼ်ႇ လႄႈ တွင်ႈထၢမ်လႄႈဝႃႈ၊ ၸဝ်ႈမႃးတီႈၵဝ် ႁႂ်ႈလႆႈတိုၵ်းတေႃးဝၢၼ်ႈမိူင်းၵဝ်လႄႈ ၸဝ်ႈၸၢပ်ႈသႅင်ႇၵၼ်တင်းၵဝ်ၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

13ၶုၼ်ႁေႃၶမ်းမဵဝ်း ဢမ်ႇမုၼ်ႇ ၶိုၼ်းလၢတ်ႈတီႈသၢၼ်ႇတမၢၼ်ႇ ယေႇၽသႃႉ ၸိူဝ်းၼၼ်ႉလႄႈဝႃႈ၊ ၵွပ်ႈပိူဝ်ႈဢၼ်မဵဝ်း ဢီႉသရေႇလႃႉ ႁိမ်ဢဝ်လိၼ်ၵဝ် ၸႃႉၸဵမ်ၼမ်ႉႁွင်ႈ ဢႃႇၼုၼ်ႇ တေႃႇထိုင်ႁွတ်ႈၼမ်ႉႁွင်ႈ ယပ်ႉပုၵ်ႉ တင်းၼမ်ႉႁွင်ႈ ယေႃးတၢၼ်ႇ ၼႂ်းမိူဝ်ႈဢၼ် ၶဝ်လုၵ်ႉသေၵႃႈတီႈမိူင်း ဢေႇၵိပ်ႉတူႉ မႃးၼၼ်ႉလႄႈ ၵဝ်ႁဵတ်းဢေႃႈ။ လိၼ်ၼၼ်ႉၸိုင် မိူဝ်ႈလဵဝ်ၼႆႉၶိုၼ်းပၼ်လီလီငၢမ်းငၢမ်းသေၵမ်း၊ ဝႃႈၼင်ႇၼႆဢေႃႈ။

14ယေႇၽသႃႉ ၼၼ်ႉပွႆႇၸႂ်ႉသၢၼ်ႇတမၢၼ်ႇတင်းလၢႆၵႂႃႇၸူးၵႃႈတီႈၶုၼ်ႁေႃၶမ်းမဵဝ်း ဢမ်ႇမုၼ်ႇ ၼၼ်ႉလႄႈလၢတ်ႈဝႃႈ၊-

15ယေႇၽသႃႉ သင်ႇလၢတ်ႈမႃးလႄႈဝႃႈၸမ်ႉ၊ မဵဝ်း ဢီႉသရေႇလႃႉ ႁိမ်ဢဝ်လိၼ် မေႃႇၽႃႉ ဢိၵ်ႇတင်းလိၼ်ၵူၼ်းမဵဝ်း ဢမ်ႇမုၼ်ႇ ဢမ်ႇၸႂ်ႈ။-

16မိူဝ်ႈဢၼ်မဵဝ်း ဢီႉသရေႇလႃႉ လုၵ်ႉသေၵႃႈတီႈမိူင်း ဢေႇၵိပ်ႉတူႉ မႃးလႄႈ ပႆလတ်းၵႃႈၼႂ်းထိူၼ်ႇၸူးပၢင်ႇလၢႆႇသေယဝ်ႉ၊ ႁွတ်ႈထိုင်ၵႃႈတီႈဝၢၼ်ႈ ၵႃႇတေႇသႃႉ ၼၼ်ႉၸိုင်၊-

17မဵဝ်း ဢီႉသရေႇလႃႉ ပွႆႇၸႂ်ႉသၢၼ်ႇတမၢၼ်ႇတင်းလၢႆၵႂႃႇၸူးၵႃႈတီႈၶုၼ်ႁေႃၶမ်း ဢေႇတုမ်ႇ လႄႈ ယွၼ်းဢၶႂၢင်ႉလႄႈဝႃႈ၊ ႁႂ်ႈႁဝ်းၶႃႈလႆႈပႆလတ်းၵႃႈၼႂ်းမိူင်းၶုၼ်လူင်ၵႂႃႇသေၵမ်း၊ ဝႃႈၼင်ႇၼႆသေၵေႃႈ၊ ၶုၼ်ႁေႃၶမ်း ဢေႇတုမ်ႇ ဢမ်ႇထွမ်ႇဢမ်ႇဢဝ်။ မိူၼ်ၸိူဝ်ႉၼင်ႇၼၼ် ၶဝ်သမ်ႉပွႆႇၸႂ်ႉၵႂႃႇၵႃႈတီႈၶုၼ်ႁေႃၶမ်း မေႃႇၽႃႉ လႄႈ ၵွပ်ႈပိူဝ်ႈဢၼ်မၼ်းၼၼ်ႉၵေႃႈ ဢမ်ႇပၼ်ဢၶႂၢင်ႉလႄႈ မဵဝ်း ဢီႉသရေႇလႃႉ လႆႈယူႇၵႃႈတီႈ ၵႃႇတေႇသႃႉ ဢေႃႈ။-

18လိုၼ်းၼၼ်ႉ ၶဝ်ပႆလတ်းၵႃႈၼႂ်းထိူၼ်ႇယူႇ၊ လဵပ်ႈၸွမ်းႁိမ်းမိူင်း ဢေႇတုမ်ႇ ဢိၵ်ႇတင်းမိူင်း မေႃႇၽႃႉ ယူႇသေလႄႈ ႁွတ်ႈထိုင်ၵႃႈတီႈၽၢႆႇဝၼ်းဢွၵ်ႇမိူင်း မေႃႇၽႃႉ သေယဝ်ႉ ၶျႃးတပ်ႉၶဝ်ၵႃႈတီႈၽၢႆႇပုၼ်ႉၼမ်ႉႁွင်ႈ ဢႃႇၼုၼ်ႇ ဢေႃႈ။ မိူဝ်ႈၼၼ်ႉ ၶဝ်ဢမ်ႇၶဝ်ႈၵႂႃႇၵႃႈၼႂ်းၼမ်ႉၼႂ်းလိၼ်မိူင်း မေႃႇၽႃႉ ။ ၼမ်ႉႁွင်ႈ ဢႃႇၼုၼ်ႇ ၼၼ်ႉ ပဵၼ်ၶွပ်ႇၼမ်ႉလႅၼ်လိၼ်မိူင်း မေႃႇၽႃႉ ဢေႃႈ။-

19မဵဝ်း ဢီႉသရေႇလႃႉ သမ်ႉပွႆႇၸႂ်ႉသၢၼ်ႇတမၢၼ်ႇတင်းလၢႆ ၵႂႃႇၸူးၵႃႈတီႈ သီႉႁုၼ်ႇ ၶုၼ်ႁေႃၶမ်း ႁေႇသၽုၼ်ႇ မဵဝ်း ဢႃႇမေႃးရီႉ ၼၼ်ႉလႄႈ မဵဝ်း ဢီႉသရေႇလႃႉ ယွၼ်းဢၶႂၢင်ႉလႄႈဝႃႈ၊ ႁႂ်ႈႁဝ်းၶႃႈလႆႈပႆလတ်းၵႃႈၼႂ်းမိူင်းၶုၼ်လူင်ၵႂႃႇၸူးၵႃႈတီႈ တီႈယူႇႁဝ်းၶႃႈၼၼ်ႉ သေၵမ်း၊ ဝႃႈၼင်ႇၼႆသေၵေႃႈ၊-

20သီႉႁုၼ်ႇ ၼၼ်ႉဢမ်ႇယုမ်ႇမဵဝ်း ဢီႉသရေႇလႃႉ ၊ ဢမ်ႇပၼ်ဢၶႂၢင်ႉဢၼ်လႆႈပႆလတ်းၵႃႈၼႂ်းမိူင်းမၼ်းၼၼ်ႉၵႂႃႇ ဢမ်ႇၵႃး၊ သီႉႁုၼ်ႇ ၼၼ်ႉ ႁႂ်ႈၵူၼ်းမၼ်းတင်းသဵင်ႈတင်းလူင်ၸူႉၵၼ်တုမ်ၵၼ်လႄႈ ၶျႃးတပ်ႉၵႃႈတီႈဝဵင်း ယႃႇႁတ်ႉ သေယဝ်ႉ တိုၵ်းတေႃးမဵဝ်း ဢီႉသရေႇလႃႉ ဢေႃႈ။-

21ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢဝ်ၶုၼ် သီႉႁုၼ်ႇ ဢိၵ်ႇလူၺ်ႈၵၼ်တင်းၵူၼ်းမၼ်းၵႃႈမီးၼၼ်ႉ ဢၢပ်ႈပၼ်ၵႃႈၼႂ်းမိုဝ်းမဵဝ်း ဢီႉသရေႇလႃႉ လႄႈ ၶဝ်တိုၵ်းတေႃးယႃႉပႅတ်ႈၶဝ်ၼၼ်ႉဢေႃႈ။ ၼင်ႇၼၼ်လႄႈ မဵဝ်း ဢီႉသရေႇလႃႉ သိမ်းဢဝ်ၼမ်ႉဢဝ်လိၼ်ၵူၼ်း ဢႃႇမေႃးရီႉ ဢၼ်ယူႇၵႃႈတီႈမိူင်းၼၼ်ႉတင်းသဵင်ႈတင်းမူတ်းဢေႃႈ။-

22ၶဝ်သိမ်းဢဝ်ၼမ်ႉဢဝ်လိၼ်ၵူၼ်း ဢႃႇမေႃးရီႉ ၸိူဝ်းၼၼ်ႉ တင်းသဵင်ႈတင်းမူတ်းၸႃႉၸဵမ်ၼမ်ႉႁွင်ႈ ဢႃႇၼုၼ်ႇ တေႃႇထိုင်ႁွတ်ႈၼမ်ႉႁွင်ႈ ယပ်ႉပုၵ်ႉ ဢိၵ်ႇတင်းၸႃႉၸဵမ်ထိူၼ်ႇတေႃႇထိုင်ႁွတ်ႈၼမ်ႉႁွင်ႈ ယေႃးတၢၼ်ႇ ဢေႃႈ။-

23ၼင်ႇၼၼ်လႄႈ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ လႆႈၼုၵ်ႈဢဝ်ၼမ်ႉဢဝ်လိၼ် ၵူၼ်း ဢႃႇမေႃးရီႉ ၸိူဝ်းၼၼ်ႉ ၵႃႈတီႈၽၢႆႇၼႃႈမဵဝ်း ဢီႉသရေႇလႃႉ ယဝ်ႉလႄႈ ၸဝ်ႈတၵ်းလႆႈသိမ်းဢဝ်ႁိုဝ်။-

24ၸဝ်ႈတၵ်းလႆႈသိမ်းဢဝ်ၼမ်ႉဢဝ်လိၼ်ဢၼ်ၽြႃးၸဝ်ႈဢၼ်ဝႃႈ ၶႄးမူႉသႃႉ ၼၼ်ႉ ပၼ်ပိူင်ႇၼၼ်ႉဢမ်ႇၸႂ်ႈႁိုဝ်။ မိူၼ်ၸိူဝ်ႉၼင်ႇၼၼ် ႁဝ်းတၵ်းလႆႈသိမ်းဢဝ်ၼမ်ႉဢဝ်လိၼ်ၶဝ်ၸိူဝ်းဢၼ် ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈႁဝ်းၼၼ်ႉဢေႃႈ။-

25ၸဝ်ႈယဵင်ႈၶႅၼ်းမျၢတ်ႈလီၼႃႇသေ ပႃႇလၵ်ႈ လုၵ်ႈၸၢႆး ၸီႉၽေႃႇ ၶုၼ်ႁေႃၶမ်း မေႃႇၽႃႉ ၼၼ်ႉႁိုဝ်။ မၼ်းၼၼ်ႉယၢမ်ႈၽိတ်းၵၼ်တင်းမဵဝ်း ဢီႉသရေႇလႃႉ ႁိုဝ်။ ယၢမ်ႈတိုၵ်းသိုၵ်းၵၼ်ႁိုဝ်။-

26ၼႂ်းမိူဝ်ႈဢၼ်မဵဝ်း ဢီႉသရေႇလႃႉ ယူႇၵႃႈတီႈဝဵင်း ႁေႇသၽုၼ်ႇ ဢိၵ်ႇတင်းဝၢၼ်ႈမၼ်းတင်းလၢႆ၊ ဝဵင်း ဢႃႇရေႃႇ ဢိၵ်ႇတင်းဝၢၼ်ႈမၼ်းတင်းလၢႆ၊ ဝၢၼ်ႈဝဵင်းဢၼ်မီးၸွမ်းၼမ်ႉႁွင်ႈ ဢႃႇၼုၼ်ႇ တင်းသဵင်ႈတင်းလူင်ၼၼ်ႉ သၢမ်ပၢၵ်ႇပီႊတဵမ်တဵမ်ယူႇၼၼ်ႉၸိုင် ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူဢမ်ႇၶိုၼ်းလႆႈၼင်ႇႁိုဝ်။-

27ပိူဝ်ႈၼႆလႄႈ ၵဝ်ဢမ်ႇၽိတ်းပိူင်ႈၸဝ်ႈ။ ၸဝ်ႈတိုၵ်းတေႃးၵဝ်လႄႈၼိၵ်ႈၸၢၵ်ႈငႅၼ်းသႄးၵဝ်ဢေႃႈ။ ႁႂ်ႈထႃႇဝရႃႉၽြႃး ဢၼ်ပဵၼ်ၵူၼ်းလူင်ဢၼ်ၸီႇယၢင်ႇတြႃးၼၼ်ႉ ၸီႇယၢင်ႇတႅပ်းတၢတ်ႈတြႃး ဝၼ်းမိူဝ်ႈၼႆႉၵႃႈတီႈဝူင်ႈၵၢင်ၵူၼ်းမဵဝ်း ဢီႉသရေႇလႃႉ တင်းၵူၼ်းမဵဝ်း ဢမ်ႇမုၼ်ႇ သေၵမ်းလူၺ်ႈ၊ ဝႃႈၼင်ႇၼႆဢေႃႈ။-

28ၵူၺ်းၵႃႈ ၶုၼ်ႁေႃၶမ်းၵူၼ်းမဵဝ်း ဢမ်ႇမုၼ်ႇ ၼၼ်ႉ ယင်းဢမ်ႇထွမ်ႇဢမ်ႇဢဝ် ၵႂၢမ်းဢၼ် ယေႇၽသႃႉ သင်ႇလၢတ်ႈၵႂႃႇၼၼ်ႉလႄႈယူႇဢေႃႈ။-

29မိူဝ်ႈၼၼ်ႉ ဝီႉၺိၺ်ႇထႃႇဝရႃႉၽြႃး တူၵ်းႁွတ်ႈၵႃႈၼိူဝ် ယေႇၽသႃႉ လႄႈ မၼ်းၼၼ်ႉၽႃႇလတ်းမိူင်း ၵီႉလတ်ႉ တင်းမိူင်း မၼႃႇသေႇ သေယဝ်ႉ၊ ပူၼ်ႉဝဵင်း မီႉၸပႃႇ မိူင်း ၵီႉလတ်ႉ ၵႂႃႇလႄႈ ၶီႇၵႂႃႇၸူးၵႃႈတီႈဢၼ် ၵူၼ်းမဵဝ်း ဢမ်ႇမုၼ်ႇ မီးၼၼ်ႉဢေႃႈ။-

30ယေႇၽသႃႉ ၼၼ်ႉ ႁဵတ်းၵတီႉသဵတ်ႈၸႃႇတီႈထႃႇဝရႃႉၽြႃးသေလႄႈလဝ်ႊလၢတ်ႈဝႃႈ၊ ပေႃးၸဝ်ႈႁဝ်းဢဝ်ၵူၼ်းမဵဝ်း ဢမ်ႇမုၼ်ႇ တင်းလၢႆ ဢၢပ်ႈပၼ်ၵႃႈၼႂ်းမိုဝ်းၶႃႈၸဝ်ႈဢမၢၼ်ႇၶၼ်ပဵၼ်ၸိုင်၊-

31ၵေႃႉဢၼ်ဢွၵ်ႇသေၵႃႈၼႂ်းႁူးၽၵ်းတူႁိူၼ်းၶႃႈၸဝ်ႈမႃး ႁႂ်ႈလႆႈႁပ်ႉႁူဝ်တၢင်းၶႃႈၸဝ်ႈ ၼႂ်းမိူဝ်ႈဢၼ်ၶႃႈၸဝ်ႈလုၵ်ႉသေၵႃႈတီႈ ဢၼ်ၵူၼ်းမဵဝ်း ဢမ်ႇမုၼ်ႇ တင်းလၢႆမီးၼၼ်ႉ ၶိုၼ်းမႃးၼိမ်ၼိမ်လီလီၼၼ်ႉၼၼ်ႉ တၵ်းလႆႈပဵၼ်ဢုၵ်ႉၸႃႇထႃႇဝရႃႉၽြႃးဢမၢၼ်ႇၶၼ်ပဵၼ်လႄႈ ၶႃႈၸဝ်ႈတၵ်းဢဝ်ႁဵတ်းယိတ်ႈဢၼ်တုတ်ႇၽႆးပုၵ်ႈၸေႃႇတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

32ယေႇၽသႃႉ ၶီႇၵႂႃႇၸူး ၵႃႈတီႈၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉ ႁႂ်ႈလႆႈတိုၵ်းၵၼ်တင်းၶဝ်ၼၼ်ႉလႄႈ ထႃႇဝရႃႉၽြႃးဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းမၼ်းသေယဝ်ႉ၊-

33မၼ်းတိုၵ်းတေႃးယႃႉပႅတ်ႈဝဵင်းသၢဝ်းၼိုင်ႈၸႃႉၸဵမ်ဝဵင်း ဢႃႇရေႃႇ တေႃႇထိုင်ႁွတ်ႈဝဵင်း မိၼ်းၼိတ်ႉ ဢိၵ်ႇတင်းတေႃႇထိုင်ႁွတ်ႈ ဢႃႇပေႇလႃႉၶေႇရမိမ်း ၼၼ်ႉလႄႈ ဢဝ်ၶဝ်တၢႆၼႃႇလူင်လၢင်ဢေႃႈ။ ၼင်ႇၼၼ်လႄႈ ၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉ လႆႈၶၢမ်ႇတၢင်းဢၼ်တူၵ်းသုမ်းၵႃႈတီႈၽၢႆႇၼႃႈ ၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။

34မိူဝ်ႈဢၼ် ယေႇၽသႃႉ ၼၼ်ႉႁွတ်ႈမႃးၵႃႈတီႈႁိူၼ်းမၼ်းၵႃႈၼႂ်းဝဵင်း မီႉၸပႃႇ ၼၼ်ႉၸိုင် လုၵ်ႈယိင်းမၼ်းႁႆႇၵွင်ယူႇ၊ ၵႃႈယူႇသေလႄႈ ဢွၵ်ႇမႃးႁႂ်ႈလႆႈႁပ်ႉႁူဝ်တၢင်းမၼ်းဢေႃႈ။ မၼ်းၼၼ်ႉပဵၼ်လုၵ်ႈယိင်းၵေႃႉလဵဝ်ၵူၺ်းတီႈမၼ်းလႄႈ ၼွၵ်ႈသေမၼ်းၼၼ်ႉ မၼ်းဢမ်ႇမီးလုၵ်ႈၸၢႆးလုၵ်ႈယိင်း။-

35မၼ်းႁၼ်မၼ်းၼၼ်ႉသေယဝ်ႉ တိုတ်ႉသိၵ်ႇၶူဝ်းၼုင်ႈမၼ်းသေလႄႈလၢတ်ႈဝႃႈ၊ ဢလူဝ်း၊ ဢလူဝ်း၊ လုၵ်ႈယိင်းၵဝ်ဢိူၺ်း၊ မႂ်းၼႆႉၶျႃးၵဝ်တူၵ်းတီႈတႅမ်ႇၼႃႇလူင်လၢင်ယဝ်ႉလူင်ပႄႇ။ ပဵၼ်ၵေႃႉဢၼ်ယႃႉယူၵ်ႉၵဝ်ၵေႃႉၼိုင်ႈလူင်ပႄႇ။ ၵဝ်လဝ်ႊလၢတ်ႈတီႈထႃႇဝရႃႉၽြႃးဝႆႉယဝ်ႉ။ ဢၶႂၢင်ႉဢၼ်လႆႈၼုၵ်ႈဢဝ်ဢမ်ႇမီး၊ မိူဝ်ႈဢၼ်ဝႃႈၼင်ႇၼႆၸိုင်၊-

36မၼ်းၼၼ်ႉလၢတ်ႈလႄႈဝႃႈ၊ ၸဝ်ႈပေႃႈဢိူၺ်း၊ ပေႃးၸဝ်ႈပေႃႈလႆႈဝႃႈဢွၵ်ႇသူပ်းလဝ်ႊလၢတ်ႈတီႈထႃႇဝရႃႉၽြႃးယဝ်ႉၸိုင်၊ ႁဵတ်းတီႈၵဝ်ၶႃႈၸွမ်းၵႃႈၼင်ႇဢၼ်လႆႈဝႃႈဢွၵ်ႇသူပ်းလဝ်ႊလၢတ်ႈယဝ်ႉၼၼ်ႉသေၵမ်းၶႃႈ။ လွင်ႈမၼ်းၸမ်ႉ ထႃႇဝရႃႉၽြႃးတွပ်ႇတႅၼ်းပၼ်ဢပႅတ်ႈတီႈရၢၼ်ႇသူႇၸဝ်ႈပေႃႈ ဢၼ်ဝႃႈၵူၼ်းမဵဝ်း ဢမ်ႇမုၼ်ႇ ၸိူဝ်းၼၼ်ႉ ႁႂ်ႈၸႂ်ၸဝ်ႈပေႃႈလႆႈပေႇယဝ်ႉ၊ ဝႃႈၼင်ႇၼႆဢေႃႈ။-

37မၼ်းၼၼ်ႉသမ်ႉလၢတ်ႈတီႈပေႃႈမၼ်းလႄႈဝႃႈ၊ ၶႅၼ်းတေႃႈပၼ်ဢၶႂၢင်ႉၼႆႉသေၵမ်းၶႃႈ။ ႁႂ်ႈလႆႈယူႇလွတ်ႈယူႇသွင်လိူၼ်တဵမ်တဵမ် ႁႂ်ႈၵဝ်ၶႃႈဢိၵ်ႇလူၺ်ႈၵၼ်တင်းၵေႃႉသေႈၵဝ်ၶႃႈတင်းလၢႆ လႆႈလႄႇၵႂႃႇလႄႇမႃးၵႃႈၼိူဝ်သၼ်လွႆတႄးလွႆသေလႄႈ ႁွင်ႉႁႆႈၶၢင်းၶီၶၢင်းၽၢၼ် လူၺ်ႈလွင်ႈဢၼ်ၵဝ်ၶႃႈယင်းပဵၼ်သၢဝ်ၵၼ်ႇၺႃႇယူႇၼၼ်ႉသေၵမ်းၶႃႈ၊ ဝႃႈၼင်ႇၼႆလႄႈ၊-

38ပေႃႈမၼ်းလၢတ်ႈလႄႈဝႃႈ၊ ၵႂႃႇတႃႉ၊ ဝႃႈၼင်ႇၼႆသေလႄႈ ၶိၼ်းဝႆႉသွင်လိူၼ်လႄႈ ပွႆႇၵႂႃႇသေယဝ်ႉ၊ မၼ်းၼၼ်ႉဢိၵ်ႇလူၺ်ႈၵၼ်တင်း ၵေႃႉသေႈမၼ်းတင်းလၢႆ ဢွၼ်ၵၼ်ၵႂႃႇလႄႈ ႁွင်ႉႁႆႈၶၢင်းၶီၶၢင်းၽၢၼ်လူၺ်ႈလွင်ႈဢၼ် မၼ်းယင်းပဵၼ်သၢဝ်ၵၼ်ႇၺႃႇယူႇၼၼ်ႉ ၵႃႈၼိူဝ်သၼ်လွႆတႄးလွႆဢေႃႈ။-

39မိူဝ်ႈဢၼ်ၸေးသွင်လိူၼ်ယဝ်ႉၼၼ်ႉ၊ မၼ်းၼၼ်ႉၶိုၼ်းမႃးၸူးၵႃႈတီႈပေႃႈမၼ်းလႄႈ ပေႃႈမၼ်းဢဝ်ႁဵတ်းၸွမ်းၵႃႈၼင်ႇဢၼ် ၵတီႉသဵတ်ႈၸႃႇ ဢၼ်မၼ်းႁဵတ်းဝႆႉၼၼ်ႉမီးၼၼ်ႉဢေႃႈ။ မၼ်းၼၼ်ႉပဵၼ်ၵေႃႉဢၼ်ဢမ်ႇပႆႇတွၼ်ႉယၢမ်ႈတိူဝ်ႉထုၵ်ႇၵၼ်တင်းၵူၼ်းၸၢႆး။-

40လိုၼ်းၼၼ်ႉ ပဵၼ်ထုင်းၸၢမ်ႇ ဢီႉသရေႇလႃႉ ဢၼ်လုၵ်ႈယိင်းသၢဝ် ဢီႉသရေႇလႃႉ တင်းလၢႆ ဢွၼ်ၵၼ်ၵႂႃႇႁႂ်ႈလႆႈယွင်ႈယေႃးလုၵ်ႈယိင်း ယေႇၽသႃႉ ၵူၼ်းမဵဝ်း ၵီႉလတ်ႉ ၼၼ်ႉ ယေႈပီႊသီႇဝၼ်းတဵမ်တဵမ်ၵူႈပီႊဢေႃႈ။