Judges 3

Shan

← Chapter 2 Jump to: Chapter 4 →

1ၵူၼ်းမဵဝ်းဢၼ်ထႃႇဝရႃႉၽြႃး ဝႆႉၵိုတ်းဝႆႉၵျၢၼ်ႇႁႂ်ႈလႆႈၸၢမ်းတူၺ်းၵူၼ်းမဵဝ်း ဢီႉသရေႇလႃႉ တင်းလၢႆဢၼ်ဝႃႈ ၶဝ်ၸိူဝ်းဢၼ်ဢမ်ႇႁူႉ ဢမူႉသိုၵ်းၵႃႈဢၼ်တိုၵ်းၵႃႈတီႈမိူင်း ၶႃႇၼၢၼ်ႇ ၼၼ်ႉ-

2ဢိၵ်ႇတင်းႁႂ်ႈၵူၼ်းမဵဝ်း ဢီႉသရေႇလႃႉ သိုပ်ႇသိုပ်ႇတၢမ်းတၢမ်း ဢၼ်ဝႃႈၶဝ်ၸိူဝ်းဢၼ်ဢမ်ႇပႆႇႁူႉဢမူႉသိုၵ်းၼၼ်ႉ တၵ်းသွၼ်ဢဝ်ဢတၢတ်ႈသိုၵ်းလႄႈ ႁႂ်ႈၸၢင်ႈႁႂ်ႈမေႃၼၼ်ႉၸိူဝ်းၼၼ်ႉၸမ်ႉ၊-

3ပဵၼ်ၶုၼ် ၽီႉလိတ်ႉတီႉ ႁႃႈပႃး၊ ၵႃႈပဵၼ်ၵူၼ်း ၶႃႇၼၼီႉ ၊ ၵူၼ်း ၸီႉတုၼ်ႇ ၊ ၵူၼ်း ႁီႉဝီႉ ၊ ဢၼ်ယူႇၵႃႈၼိူဝ်လွႆ လေႇပၼုၼ်ႇ ဢဝ်ၵႃႈတီႈလွႆ ပႃႇလႃႉႁေရမုၼ်ႇ တေႃႇထိုင်ႁွတ်ႈသူပ်းသဵၼ်ႈတၢင်း ႁႃႇမတ်ႉ ၼၼ်ႉၸိူဝ်းၼၼ်ႉဢေႃႈ။-

4ၶဝ်ၼၼ်ႉ ပဵၼ်ပုၼ်ႈဢၼ်တၵ်းဢဝ်ၸၢမ်းတူၺ်းမဵဝ်း ဢီႉသရေႇလႃႉ ႁႂ်ႈလႆႈႁူႉလွင်ႈဢၼ် ၶဝ်တၵ်းၵမ်ၵျၢင်ႉၸွမ်းၵႃႈၼင်ႇပိင်းၺၢပ်ႈထႃႇဝရႃႉၽြႃး ဢၼ်မၼ်းၸဝ်ႈတင်း မူဝ်းသေႇ သင်ႇလၢတ်ႈဝႆႉတီႈပူႇမွၼ်ႇၶဝ်ၼၼ်ႉႁိုဝ်။ ဢမ်ႇၵမ်ၵျၢင်ႉႁိုဝ်ၼၼ်ႉဢေႃႈ။-

5ၵူၼ်းမဵဝ်း ဢီႉသရေႇလႃႉ တင်းလၢႆ ယူႇၵႃႈၼႂ်းၵူၼ်း ၶႃႇၼၼီႉ ၊ ၵူၼ်း ႁိတ်ႉတီႉ ၊ ၵူၼ်း ဢႃႇမေႃးရီႉ ၊ ၵူၼ်း ၽေႇရၸီႉ ၊ ၵူၼ်း ႁီႉဝီႉ ၊ ၵူၼ်း ယေႇပူႉသီႉ ၸိူဝ်းၼၼ်ႉလႄႈ-

6ႁဵတ်းတၢင်းဢၼ်ဢဝ်ၵၼ်တင်းလုၵ်ႈယိင်းၶဝ်ယူႇ၊ ဢဝ်လုၵ်ႈယိင်းၶဝ်ပၼ်ၵၼ်တင်းၶဝ်ၼၼ်ႉယူႇသေလႄႈ ဢွၼ်ၵၼ်ႁဵတ်းဝၢတ်ႈတီႈၽြႃးၶဝ်ယူႇဢေႃႈ။

7ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ လူင်လိုမ်းထႃႇဝရႃႉၽြႃး ၽြႃးပဵၼ်ၸဝ်ႈၶဝ်ပႅတ်ႈသေယဝ်ႉ၊ ဢွၼ်ၵၼ်ႁဵတ်းဝၢတ်ႈတီႈၽြႃး ပႃႇလႃႉ တင်းလၢႆ ဢိၵ်ႇတင်းတူၼ်ႈ ဢႃႇသရႃႉ ၶဝ်ဢေႃႈ။-

8ပိူဝ်ႈၼႆလႄႈ တၢင်းၸႂ်မႆႈၶႆႈၸႃႉထႃႇဝရႃႉၽြႃး ဢွၵ်ႇႁႅင်းယႂ်ႇၼႃႇလူင်လၢင် တီႈမဵဝ်း ဢီႉသရေႇလႃႉ လႄႈ မၼ်းၸဝ်ႈဢဝ်ၶဝ်ၶၢႆပၼ်တီႈ ၶူႉသၼ်ႇရီႉသသိမ်ႇ ၊ ၶုၼ်ႁေႃၶမ်း မေႇသေႃးပေႃးတႃႇမီႉ သေယဝ်ႉ၊ ၵူၼ်းမဵဝ်း ဢီႉသရေႇလႃႉ တင်းလၢႆ လႆႈၶၢမ်ႇႁဵတ်းၶႃႈတီႈၶုၼ်လူင် ၶူႉသၼ်ႇရီႉသသိမ်ႇ ၼၼ်ႉ ပႅတ်ႇပီႊတဵမ်တဵမ်ဢေႃႈ။-

9မိူဝ်ႈဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ႁွင်ႉသႅၼ်ႇတီႈထႃႇဝရႃႉၽြႃးၼၼ်ႉၸိုင် ထႃႇဝရႃႉၽြႃးႁႂ်ႈၵေႃႉဢၼ်ၵႄႇသႄႇၶျွတ်ႈဢဝ် ဢၼ်ဝႃႈၼွင်ႉၸၢႆး ၵႃႇလႅပ်ႉ၊ ဢေႃးထၼ်ႇယေႇလႃႉ ဢၼ်ပဵၼ်လုၵ်ႈၸၢႆး ၵေးၼတ်ႉ ၼၼ်ႉ ပေႃႇဢွၵ်ႇပဵၼ်မႃးပုၼ်ႈၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။-

10ဝီႉၺိၺ်ႇထႃႇဝရႃႉၽြႃး တူၵ်းႁွတ်ႈၵႃႈၼိူဝ်မၼ်းၼၼ်ႉသေယဝ်ႉ မၼ်းၼၼ်ႉလႆႈၸီႇယၢင်ႇမဵဝ်း ဢီႉသရေႇလႃႉ သေလႄႈ ၶီႇသိုၵ်းလႄႈ ထႃႇဝရႃႉၽြႃးဢဝ် ၶူႉသၼ်ႇရီႉသသိမ်ႇ ၶုၼ်ႁေႃၶမ်း မေႇသေႃးပေႃးတႃႇမီႉ ဢၢပ်ႈပၼ်ၵႃႈၼႂ်းမိုဝ်းမၼ်းသေယဝ်ႉ မၼ်းၼၼ်ႉပႄႉၼႅင်ႇၶုၼ်လူင် ၶူႉသၼ်ႇရီႉသသိမ်ႇ ၼၼ်ႉဢေႃႈ။-

11မိူင်းတင်းမိူင်း ၼိမ်လီယဵၼ်လီ သီႇသိပ်းပီႊတဵမ်တဵမ်လႄႈ၊ ဢေႃးထၼ်ႇယေႇလႃႉ လုၵ်ႈၸၢႆး ၵေးၼတ်ႉ ၼၼ်ႉ တၢႆသေဢေႃႈ။

12ၵူၼ်းမဵဝ်း ဢီႉသရေႇလႃႉ တင်းလၢႆ သမ်ႉႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃးထႅင်ႈဢေႃႈ။ ထႃႇဝရႃႉၽြႃး ႁႂ်ႈ ဢေႇၵလုၼ်ႇ ၶုၼ်ႁေႃၶမ်း မေႃႇၽႃႉ ပျေႉၸုမ်ႇတင်းႁႅင်းတၼ်းၶူဝ်းယူႇၽၢႆႇၼိုင်ႈတင်းမဵဝ်း ဢီႉသရေႇလႃႉ ၵွပ်ႈပိူဝ်ႈဢၼ်ၶဝ်ႁဵတ်းတူႉၸရိူၵ်ႈ သိုဝ်ႈၼႃႈတႂ်ႈတႃထႃႇဝရႃႉၽြႃးထႅင်ႈၼၼ်ႉဢေႃႈ။-

13ၶုၼ်ၼၼ်ႉ ႁႂ်ႈၵူၼ်းမဵဝ်း ဢမ်ႇမုၼ်ႇ ဢိၵ်ႇတင်းၵူၼ်းမဵဝ်း ဢႃႇမလႅၵ်ႉ တင်းလၢႆၸူႉၵၼ်တုမ်ၵၼ်တီႈမၼ်းလႄႈ ၶီႇၵႂႃႇတိုၵ်းတေႃးယႃႉပႅတ်ႈၵူၼ်းမဵဝ်း ဢီႉသရေႇလႃႉ တင်းလၢႆသေလႄႈ သိမ်းဢဝ်ဝဵင်းတူၼ်ႈထၢၼ်သေယဝ်ႉ၊-

14ၵူၼ်းမဵဝ်း ဢီႉသရေႇလႃႉ တင်းလၢႆ လႆႈၶၢမ်ႇႁဵတ်းၶႃႈတီႈ ဢေႇၵလုၼ်ႇ ၶုၼ်ႁေႃၶမ်း မေႃႇၽႃႉ ၼၼ်ႉ သိပ်းပႅတ်ႇပီႊဢေႃႈ။-

15မိူဝ်ႈဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ ႁွင်ႉသႅၼ်ႇတီႈထႃႇဝရႃႉၽြႃးၼၼ်ႉၸိုင် ထႃႇဝရႃႉၽြႃးႁႂ်ႈၵေႃႉဢၼ်ၵႄႇသႄႇၶျွတ်ႈဢဝ်ဢၼ်ဝႃႈ ဢေႇႁူႉတႃႉ ၊ လုၵ်ႈၸၢႆး ၵေးရႃႉ ၊ မဵဝ်း ပိၼ်ႇယႃႇမိၼ်ႇ ၊ ဢၼ်ၸၢင်ႈဢဝ်ၶွၼ်သၢႆႉယိပ်းသုင်းၼၼ်ႉ ပေႃႇဢွၵ်ႇပဵၼ်မႃးဢေႃႈ။ ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ ဢဝ်လၢၵ်ႈသွင်ႇသႂ်ႇပၼ်ၵႃႈၼႂ်းမိုဝ်းမၼ်းၼၼ်ႉ ၵႂႃႇၸူးၵႃႈတီႈ ဢေႇၵလုၼ်ႇ ၊ ၶုၼ်ႁေႃၶမ်း မေႃႇၽႃႉ ၼၼ်ႉဢေႃႈ။-

16ဢေႇႁူႉတႃႉ ၼၼ်ႉ ႁဵတ်းလၢပ်ႇဢၼ်မီးၶူမ်းသွင်ၽၢႆႇဢၼ်တၢင်းယၢဝ်းမၼ်းမီးသွၵ်ႇၼိုင်ႈလႄႈ ဢဝ်မတ်ႉၸပ်းသႂ်ႇဝႆႉၵႃႈတီႈၶႃၶွၼ်ၶႂႃမၼ်း ၵႃႈၼႂ်းၶူဝ်းၼုင်ႈမၼ်းသေယဝ်ႉ-

17ဢဝ်လၢၵ်ႈသွင်ႇသၢၵ်ႈတီႈ ဢေႇၵလုၼ်ႇ ၶုၼ်ႁေႃၶမ်း မေႃႇၽႃႉ ၼၼ်ႉဢေႃႈ။ ဢေႇၵလုၼ်ႇ ၼၼ်ႉ ပဵၼ်ၵေႃႉဢၼ်ပီးပုၵ်းၼႃႇလူင်လၢင်ဢေႃႈ။-

18ဢေႇႁူႉတႃႉ ၼၼ်ႉ ဢဝ်လၢၵ်ႈသွင်ႇသၢၵ်ႈလႄႈယဝ်ႉတူဝ်ႈယဝ်ႉၸင်ႇ ပွႆႇၶဝ်ၸိူဝ်းဢၼ်လႆႈႁပ်ႉလၢၵ်ႈသွင်ႇၼၼ်ႉၵႂႃႇသေလႄႈ၊-

19တူဝ်မၼ်းလုၵ်ႉသေၵႃႈတီႈမေႃႇမၢၵ်ႇႁိၼ်တင်းလၢႆ ဢၼ်မီးၵႃႈတီႈႁိမ်းဝဵင်း ၵီႉလႃႉၵႃႇလႃႉ ၼၼ်ႉၶိုၼ်းမႃးလႄႈလဝ်ႊလၢတ်ႈလႄႈဝႃႈ၊ ၸဝ်ႈပဵၼ်ၸဝ်ႈတီႈၶႃႈ၊ ၶႃႈၸဝ်ႈမီးလွင်ႈဢၼ်တၵ်းတဵတ်ႇတဵတ်ႇလွမ်လဝ်ႊလွမ်လၢတ်ႈတီႈၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းၸဝ်ႈမီးဢမိင်ႉလႄႈဝႃႈ၊ ယူႇတဵတ်ႇတဵတ်ႇယဵၼ်ယဵၼ်၊ ဝႃႈၼင်ႇၼႆလႄႈ ၵူၼ်းၵႃႈဢၼ်ၸုၵ်းၶႃးၸႃးယူႇၵႃႈတီႈမၼ်းၸဝ်ႈၸိူဝ်းၼၼ်ႉ ဢွၼ်ၵၼ်ဢွၵ်ႇၵႂႃႇသေၵႃႈတီႈမၼ်းၸဝ်ႈၼၼ်ႉဢေႃႈ။-

20မိူဝ်ႈၼၼ်ႉ ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉၼင်ႈယူႇၵေႃႉလဵဝ်ၵူၺ်းမၼ်းၸဝ်ႈ ၵႃႈတီႈႁေႃၵတ်းႁေႃယဵၼ် ဢၼ်ယူႇမိူဝ်ႈၶိင်ႇမႆႈၼၼ်ႉယူႇၼၼ်ႉ ဢေႇႁူႉတႃႉ သုတ်ႉၸပ်းသုတ်ႉၸူးလႄႈလဝ်ႊဝႃႈ၊ ၶႃႈၸဝ်ႈပႃးဢဝ်ဢမိင်ႉၽြႃးပဵၼ်ၸဝ်ႈမႃးတီႈၸဝ်ႈႁဝ်းတီႈၶႃႈဢေႃႈ။ မိူဝ်ႈဢၼ်ဝႃႈၼင်ႇၼႆၸိုင် မၼ်းၸဝ်ႈလုၵ်ႉသေၵႃႈတီႈ တီႈၼင်ႈမၼ်းၸဝ်ႈဢေႃႈ။-

21ဢေႇႁူႉတႃႉ ၼၼ်ႉ ယဵတ်ႇမိုဝ်းၶွၼ်သၢႆႉမၼ်းသေလႄႈ ၸူၵ်းထွတ်ႇဢဝ်လၢပ်ႇသေၵႃႈတီႈၶႃၶွၼ်ၶႂႃမၼ်းလႄႈ တႅင်းသႂ်ႇပုမ်မၼ်းၸဝ်ႈၼၼ်ႉသေယဝ်ႉ၊-

22ၵၼ်းမၼ်းၸူမ်ၶဝ်ႈၸွမ်းလင်မၢၵ်ႈမၼ်းလႄႈ ၵွၼ်ႈၶႆၵွၼ်ႈမၼ်းႁူမ်ႇသုမ်ႇလၢပ်ႇဝႆႉထၼ်ႈပေႃးဢမ်ႇထွတ်ႇဢဝ်လႆႈသေၵႃႈၼႂ်းပုမ်မၼ်းၼၼ်ႉလႄႈ မၢၵ်ႈလၢပ်ႇပွင်ႇဢွၵ်ႇၵႂႃႇ ၵႃႈတီႈၽၢႆႇတၢင်းၵူၼ်ႈမၼ်းယူႇဢေႃႈ။-

23မိူဝ်ႈၼၼ်ႉ ဢေႇႁူႉတႃႉ ၼၼ်ႉ ဢွၵ်ႇၸူးၵႃႈတီႈၼႃႈႁေႃသေယဝ်ႉ၊ ဢိုတ်းၽၵ်းတူလုၵ်းၸိူဝ်းၼၼ်ႉဝႆႉသေလႄႈ ၶတ်းသေႃးဝႆႉသေဢေႃႈ။-

24လိုၼ်းသေဢၼ်မၼ်းဢွၵ်ႇၵႂႃႇယဝ်ႉၼၼ်ႉ ၶႃႈမၼ်းၸဝ်ႈၵမ်ႈၽွင်ႈမႃးလႄႈ ထူပ်းႁၼ်လွင်ႈဢၼ်ၽၵ်းတူၶတ်းသေႃးဝႆႉၼၼ်ႉသေယဝ်ႉ လၢတ်ႈလႄႈဝႃႈ၊ မၼ်းၸဝ်ႈႁူမ်ႇသုမ်ႇတိၼ်မၼ်းၸဝ်ႈၵႃႈၼႂ်းႁေႃၵတ်းႁေႃယဵၼ် ဢၼ်မၼ်းၸဝ်ႈယူႇမိူဝ်ႈၶိင်ႇမႆႈၼၼ်ႉ ဢမၢၼ်ႇၶၼ်ပဵၼ်ယဝ်ႉ၊ ဝႃႈၼင်ႇၼႆသေလႄႈ-

25ဢွၼ်ၵၼ်ပႂ်ႉထႃႈယူႇတေႃႇထိုင်ႁွတ်ႈၶဝ်ထၼ်ႈပေႃးလီဢူၵ်းလီဢၢႆယဝ်ႉၸင်ႇ ၵွပ်ႈပိူဝ်ႈဢၼ်မၼ်းၸဝ်ႈဢမ်ႇၽုၺ်ႇၽၵ်းတူၸိူဝ်းၼၼ်ႉလႄႈ ၶဝ်ဢဝ်သေႃးၽုၺ်ႇလႄႈထူပ်းႁၼ်ၸဝ်ႈၶဝ်ၼၼ်ႉလူမ်ႉတၢႆဝႆႉမီးယူႇၵႃႈၼိူဝ်လိၼ်ယဝ်ႉၼၼ်ႉဢေႃႈ။-

26ၼႂ်းမိူဝ်ႈဢၼ် ၶဝ်ပႂ်ႉထႃႈယူႇၸိူဝ်ႉၼင်ႇၼၼ်ၼၼ်ႉ၊ ဢေႇႁူႉတႃႉ ၼၼ်ႉ ပူၼ်ႉမေႃႇမၢၵ်ႇႁိၼ်ၸိူဝ်းၼၼ်ႉၵႂႃႇသေလႄႈ လွတ်ႈၽေးလွတ်ႈရၢၼ်ႇႁွတ်ႈထိုင်ၵႃႈတီႈဝၢၼ်ႈ ၸီႉရပ်ႉ ဢေႃႈ။-

27ႁွတ်ႈထိုင်သေယဝ်ႉ ဢဝ်ၼႄးၶရႃႇပဝ်ႇတိုင်ႈၵႃႈၼိူဝ်ႁၢၼ်ႉလွႆ ဢေႇၽရိမ်ႇ လႄႈ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်လူင်းၵႃႈၼိူဝ်ႁၢၼ်ႉလွႆၸွမ်းလူၺ်ႈၵၼ်တင်းမၼ်းယူႇသေလႄႈ မၼ်းၵေႃႈဢွၼ်ႁူဝ်ၶဝ်ၵႂႃႇဢေႃႈ။-

28မၼ်းၵေႃႈလၢတ်ႈတီႈၶဝ်လႄႈဝႃႈ၊ ၸွမ်းပႃႈလင်ၵဝ်တႃႉ။ ထႃႇဝရႃႉၽြႃး ဢဝ်ရၢၼ်ႇသူႇသူ ၵူၼ်း မေႃႇၽႃႉ တင်းလၢႆ ဢၢပ်ႈပၼ်ၵႃႈၼႂ်းမိုဝ်းသူယဝ်ႉ၊ ဝႃႈၼင်ႇၼႆလႄႈ ၶဝ်ဢွၼ်ၵၼ်လူင်းၸွမ်းပႃႈလင်မၼ်းလႄႈ ပႂ်ႉႁႄႉပႂ်ႉၶၢမ်ႇယူႇၵႃႈတီႈတိုဝ်ႉတႃႈ တီႈဢၼ်ၶၢမ်ႈၼမ်ႉႁွင်ႈ ယေႃးတၢၼ်ႇ သဵၼ်ႈတၢင်းဢၼ်ၵႂႃႇၸူး ၵႃႈတီႈမိူင်း မေႃႇၽႃႉ ၼၼ်ႉသေလႄႈ ဢမ်ႇပၼ်ႁႂ်ႈၽူႈလႂ်လႆႈၶၢမ်ႈသေၵေႃႉသေၵူၼ်း။-

29မိူဝ်ႈၼၼ်ႉ ၶဝ်တိုၵ်းတေႃးယႃႉပႅတ်ႈၵူၼ်း မေႃႇၽႃႉ ဢၼ်ပီးလီမၼ်းလီလႄႈႁႅင်းယႂ်ႇၼႃႇၼၼ်ႉ မိုၼ်ႇၼိုင်ႈလႄႈ ဢမ်ႇလွတ်ႈၵႂႃႇသေၵေႃႉသေၵူၼ်း။-

30ၼင်ႇၼၼ်လႄႈ မဵဝ်း မေႃႇၽႃႉ တူၵ်းသုမ်းၵႃႈတီႈမိုဝ်းမဵဝ်း ဢီႉသရေႇလႃႉ ၼႂ်းဝၼ်းၼၼ်ႉလႄႈ မိူင်းတင်းမိူင်းၼိမ်လီယဵၼ်လီယူႇ ပႅတ်ႇသိပ်းပီႊတဵမ်တဵမ်ဢေႃႈ။

31လိုၼ်းသေမၼ်းၼၼ်ႉ သမ်းၵႃး ဢၼ်ပဵၼ်လုၵ်ႈၸၢႆး ဢႃႇၼတ်ႉ လႄႈ တိုၵ်းတေႃးယႃႉပႅတ်ႈၵူၼ်း ၽီႉလိတ်ႉတီႉ ႁူၵ်းပၢၵ်ႇလူၺ်ႈၶွၼ်ႉလႅမ်ဝူဝ်းၼၼ်ႉ ပေႃႇဢွၵ်ႇမႃးလႄႈ မၼ်းၵေႃႈၵႄႇသႄႇၶျွတ်ႈဢဝ်မဵဝ်း ဢီႉသရေႇလႃႉ ဢေႃႈ။

← Chapter 2 Jump to: Chapter 4 →