Judges 9 — Shan

1ဢၽီႉမလႅၵ်ႉ လုၵ်ႈၸၢႆး ယေႇရုပ်ႉပႃႇလႃႉ ၼၼ်ႉ ၵႂႃႇၵႃႈတီႈဝဵင်း သေႇၶိမ်ႇ တီႈဢၼ်လုင်းမၼ်းတင်းလၢႆယူႇၼၼ်ႉလႄႈ တၵ်ႉလၢတ်ႈတီႈၶဝ် ဢိၵ်ႇတင်းပီႈၼွင်ႉၸိူဝ်ႉၶိူဝ်းပူႇမၼ်း ဢၼ်ပဵၼ်ပေႃႈမႄႈမၼ်းတင်းလၢႆၼၼ်ႉသေလႄႈဝႃႈ၊-

2ၵဝ်တွင်းပၢၼ်ႇသူႁႂ်ႈသူလႆႈလၢတ်ႈထိုင်ႁူ ၵူၼ်းဝဵင်း သေႇၶိမ်ႇ တင်းသဵင်ႈတင်းလူင်လႄႈဝႃႈ၊ လုၵ်ႈၸၢႆး ယေႇရုပ်ႉပႃႇလႃႉ ၸဵတ်းသိပ်းၵေႃႉၼၼ်ႉ ထုၵ်ႇလီလႆႈဢုပ်ႉပိူင်ႇသူႁိုဝ်။ လုၵ်ႈၸၢႆးၵေႃႉလဵဝ်ၵူၺ်းထုၵ်ႇလီလႆႈဢုပ်ႉပိူင်ႇသူႁိုဝ်။ သူဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်ၵဝ်ပဵၼ်လုပ်ႇသူၼိူဝ်ႉသူၼၼ်ႉသေၵမ်း၊ ဝႃႈၸိူဝ်ႉၼင်ႇၼႆဢေႃႈ၊ ဝႃႈၼင်ႇၼႆဢေႃႈ။-

3ၵႂၢမ်းၵႃႈမီးၼၼ်ႉၸိုင် လုင်းမၼ်းၸိူဝ်းၼၼ်ႉ ဢွၼ်ၵၼ်ၶိုၼ်းလၢတ်ႈထိုင်ႁူၵူၼ်းဝဵင်း သေႇၶိမ်ႇ တင်းသဵင်ႈတင်းလူင်လႄႈ ၶဝ်ၼၼ်ႉ မီးၸႂ်ဢၼ်ဢူၼ်ႈၼူပ်ႈၵွမ်းၸူးၶႂ်ႈၸွမ်းလင် ဢၽီႉမလႅၵ်ႉ ၼၼ်ႉလႄႈ ဢွၼ်ၵၼ်လၢတ်ႈလႄႈဝႃႈ၊ မၼ်းၼႆႉ ပဵၼ်ပီႈၼွင်ႉႁဝ်းဢေႃႈ၊ ဝႃႈၼင်ႇၼႆသေယဝ်ႉ၊-

4ထုတ်ႇဢဝ်ငိုၼ်းၸဵတ်းသိပ်းၵျၢပ်ႈဢွၵ်ႇသေၵႃႈၼႂ်းႁိူၼ်း ပႃႇလႃႉပေႇရိတ်ႉ လႄႈ ပၼ်တီႈမၼ်းသေယဝ်ႉ၊ ဢၽီႉမလႅၵ်ႉ ၼၼ်ႉ ဢဝ်ငိုၼ်းၼၼ်ႉၸၢင်ႈငႃဢဝ် ၶဝ်ၸိူဝ်းဢၼ်လၢႆလၢႆလွၵ်ႇလွၵ်ႇလႄႈ မဝ်မၢင်ၼၼ်ႉၸွမ်းလင်မၼ်းဢေႃႈ။-

5မၼ်းသမ်ႉၵႂႃႇၵႃႈတီႈႁိူၼ်းပေႃႈမၼ်း ဢၼ်မီးၵႃႈတီႈဝဵင်း ဢေႃႇၽရႃႉ ၼၼ်ႉလႄႈ ဢဝ်ပီႈမၼ်းၼွင်ႉမၼ်း ဢၼ်ပဵၼ်လုၵ်ႈၸၢႆး ယေႇရုပ်ႉပႃႇလႃႉ ၸဵတ်းသိပ်းၵေႃႉၸိူဝ်းၼၼ်ႉ တၢႆၵႃႈၼိူဝ်မၢၵ်ႇႁိၼ်လုၵ်ႈလဵဝ်ၵၼ်ဢေႃႈ။ ၵူၺ်းၵႃႈ ယေႃးသမ်ႇ လုၵ်ႈၸၢႆး ယေႇရုပ်ႉပႃႇလႃႉ ဢၼ်လဵၵ်ႉသေပိူၼ်ႈၼၼ်ႉ ၵိုတ်းၵျၢၼ်ႇဝႆႉ ၵွပ်ႈပိူဝ်ႈဢၼ်မၼ်းတဵတ်ႇမႅပ်ႉယူႇၼၼ်ႉဢေႃႈ။-

6ၵူၼ်းဝဵင်း သေႇၶိမ်ႇ တင်းသဵင်ႈတင်းလူင်ဢိၵ်ႇတင်းပီႈၼွင်ႉၸိူဝ်ႉၶိူဝ်း မီႉလေႃႇ တင်းလၢႆၼၼ်ႉ ၸူႉၵၼ်တုမ်ၵၼ်သေလႄႈ ၵႂႃႇလႄႈ ဢဝ် ဢၽီႉမလႅၵ်ႉ ၼၼ်ႉ ၶၢၼ်းဝႆႉၼႂ်းဢရႃႇၶုၼ်ႁေႃၶမ်းၶဝ် ၵႃႈတီႈႁိမ်းတူၼ်ႈမႆႉၼိမ် သဝ်တီႈမၢတ်ႈတီႈတွင်းဢၼ်မီးၵႃႈၼႂ်းဝဵင်း သေႇၶိမ်ႇ ၼၼ်ႉဢေႃႈ။-

7မိူဝ်ႈဢၼ်ပိူၼ်ႈလၢတ်ႈလွင်ႈတၢင်းၼၼ်ႉ တီႈ ယေႃးသမ်ႇ ၼၼ်ႉၸိုင် မၼ်းၵႂႃႇလႄႈၸုၵ်းယူႇၵႃႈၼိူဝ်ပၢႆလွႆ ၵေႇရၸိမ်ႇ ယူႇသေလႄႈ ၵိဝ်သဵင်ႁွင်ႉပၢဝ်ႇႁွင်ႉလၢတ်ႈလႄႈဝႃႈၸမ်ႉ ၵူၼ်းဝဵင်း သေႇၶိမ်ႇ ၶဝ်ဢိူၺ်း၊ လွင်ႈၼင်ႇႁိုဝ်ၽြႃးပဵၼ်ၸဝ်ႈတၵ်းထွမ်ႇငိၼ်းၵႂၢမ်းသူၸိုင် ဢွၼ်ၵၼ်ထွမ်ႇငိၼ်းၵႂၢမ်းၵဝ်တႃႉ။-

8ၽဝ်ႇၼိုင်ႈ တူၼ်ႈမႆႉတင်းလၢႆ ဢွၼ်ၵၼ်ဢွၵ်ႇၵႂႃႇႁႂ်ႈလႆႈၶၢၼ်းဝႆႉ ၼႂ်းဢရႃႇၶုၼ်ႁေႃၶမ်းဢၼ်တၵ်းဢုပ်ႉပိူင်ႇၶဝ်လႄႈ ပၼ်ၽိၵ်ႈသိၵ်ႈၼၼ်ႉလႄႈ လဝ်ႊလၢတ်ႈတီႈတူၼ်ႈ သၢၼ်ႇလုၼ်ႇ လႄႈဝႃႈ၊ ဢုပ်ႉပိူင်ႇၵႃႈၼိူဝ်ႁဝ်းၶႃႈသေၵမ်းၶႃႈ၊ ဝႃႈၼင်ႇၼႆသေယဝ်ႉ၊-

9တူၼ်ႈ သၢၼ်ႇလုၼ်ႇ ၼၼ်ႉၶိုၼ်းလၢတ်ႈတီႈၶဝ်လႄႈဝႃႈ၊ ၵဝ်တၵ်းလႆႈၸုၼ်ႉပႅတ်ႈၵွၼ်ႈၶႆၵွၼ်ႈမၼ်းၵဝ် ဢၼ်ၵူၼ်းဢဝ်လုမ်းလႃး သရေႇၽြႃး သရေႇၵူၼ်းၼၼ်ႉသေလႄႈ ၵႂႃႇႁူမ်ႇငမ်းၵႂႃႇငမ်းၶိုၼ်းယူႇ ၵႃႈၼိူဝ်တူၼ်ႈမႆႉတင်းလၢႆႁိုဝ်။ ဝႃႈၼင်ႇၼႆသေဢေႃႈ။-

10တူၼ်ႈမႆႉၸိူဝ်းၼၼ်ႉသမ်ႉလဝ်ႊလၢတ်ႈတီႈတူၼ်ႈမၢၵ်ႇလိူဝ်ႇသၢင်းၽေႃးလႄႈဝႃႈ၊ ၸဝ်ႈႁဝ်းမႃးလႄႈဢုပ်ႉပိူင်ႇၵႃႈၼိူဝ်ႁဝ်းၶႃႈသေၵမ်းၶႃႈ၊ ဝႃႈၼင်ႇၼႆသေယဝ်ႉ၊-

11တူၼ်ႈမၢၵ်ႇလိူဝ်ႇသၢင်းၽေႃးၼၼ်ႉၶိုၼ်းလၢတ်ႈတီႈၶဝ်လႄႈဝႃႈ၊ ၵဝ်တၵ်းလႆႈၸုၼ်ႉပႅတ်ႈဢရႃႉသႃႇဢၼ်ဝၢၼ်ဢၼ်ၸဵမ်း ဢိၵ်ႇတင်းမၢၵ်ႇဢၼ်လီဢၼ်ငၢမ်းၵဝ်သေလႄႈ ၵႂႃႇႁူမ်ႇငမ်းၵႂႃႇငမ်းၶိုၼ်းယူႇ ၵႃႈၼိူဝ်တူၼ်ႈမႆႉတင်းလၢႆႁိုဝ်။ ဝႃႈၼင်ႇၼႆသေဢေႃႈ။-

12တူၼ်ႈမႆႉၸိူဝ်းၼၼ်ႉသမ်ႉလဝ်ႊလၢတ်ႈတီႈ ၶိူဝ်းတူၼ်ႈမၢၵ်ႇၸပိတ်ႈလႄႈဝႃႈ၊ ၸဝ်ႈႁဝ်းမႃးလႄႈ ဢုပ်ႉပိူင်ႇၵႃႈၼိူဝ်ႁဝ်းၶႃႈသေၵမ်းၶႃႈ၊ ဝႃႈၼင်ႇၼႆသေယဝ်ႉ၊-

13ၶိူဝ်းတူၼ်ႈမၢၵ်ႇၸပိတ်ႈလၢတ်ႈလႄႈဝႃႈ၊ ၵဝ်တၵ်းလႆႈၸုၼ်ႉပႅတ်ႈၼမ်ႉၸပိတ်ႈၵဝ် ဢၼ်ႁႂ်ႈၸႂ်ၽြႃး ဢိၵ်ႇတင်းၸႂ်ၵူၼ်းသႂၢင်ႇသိူဝ်းၼၼ်ႉသေလႄႈ ၵႂႃႇႁူမ်ႇငမ်းၵႂႃႇငမ်းၶိုၼ်းယူႇ ၵႃႈၼိူဝ်တူၼ်ႈမႆႉတင်းလၢႆႁိုဝ်။ ဝႃႈၼင်ႇၼႆသေဢေႃႈ။-

14မိူဝ်ႈၼၼ်ႉ တူၼ်ႈမႆႉတင်းသဵင်ႈတင်းလူင်ၼၼ်ႉ သမ်ႉလဝ်ႊလၢတ်ႈတီႈတူၼ်ႈၼၢမ်လိၼ်လႄႈဝႃႈ၊ ၸဝ်ႈႁဝ်းမႃးလႄႈ ဢုပ်ႉပိူင်ႇၵႃႈၼိူဝ်ႁဝ်းၶႃႈသေၵမ်းၶႃႈ၊ ဝႃႈၼင်ႇၼႆသေယဝ်ႉ၊-

15တူၼ်ႈၼၢမ်လိၼ်ၼၼ်ႉၶိုၼ်းလၢတ်ႈတီႈတူၼ်ႈမႆႉၸိူဝ်းၼၼ်ႉလႄႈဝႃႈ၊ ပေႃးသူဢဝ်ၵဝ်ၶၢၼ်းဝႆႉ ႁႂ်ႈလႆႈပဵၼ်ၶုၼ်ႁေႃၶမ်းလႄႈ ပၼ်ၽိၵ်ႈသိၵ်ႈဢမၢၼ်ႇၶၼ်ပဵၼ်ၸိုင် ဢွၼ်ၵၼ်မႃးလႄႈသွၼ်ႈပိုင်ႈယူႇၵႃႈတီႈတႂ်ႈႁူမ်ႈၵဝ်တႃႉ။ ပေႃးဢမ်ႇၼၼ် ႁႂ်ႈၽႆးဢွၵ်ႇၵႃႈၼႂ်း တူၼ်ႈၼၢမ်လိၼ်လႄႈ မႆႈတူၼ်ႈ ဢႃႇရိတ်ႉလေႇပၼုၼ်ႇ တင်းလၢႆသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

16မိူဝ်ႈလဵဝ်ၼႆႉ သူဢဝ် ဢၽီႉမလႅၵ်ႉ ၶၢၼ်းဝႆႉၼႂ်းဢရႃႇၶုၼ်ႁေႃၶမ်းယဝ်ႉလႄႈ သူပႂ်ႉသဵတ်ႈၸႃႇလႄႈႁဵတ်းသိုဝ်ႈသိုဝ်ႈတေႃႇတေႃႇႁိုဝ်။ သူႁဵတ်းလီလီငၢမ်းငၢမ်းတီႈ ယေႇရုပ်ႉပႃႇလႃႉ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်း တွပ်ႇတႅၼ်းပၼ်ၵျေးၸူးတီႈမၼ်း ၸွမ်းၵႃႈၼင်ႇဢၼ်မၼ်းႁဵတ်းၵျေးၸူးလႄႈ ထိူၵ်ႈၶၢမ်ႇၼၼ်ႉယဝ်ႉႁိုဝ်။-

17ပေႃႈၵဝ်ၼၼ်ႉ တိုၵ်းသိုၵ်းပုၼ်ႈသူလႄႈ ဝႆႉၸႂ်ၸုၼ်ႉဢသၢၵ်ႈမၼ်းသေလႄႈ ၵႄႇသႄႇၼုၵ်ႈဢဝ်သူဢွၵ်ႇသေၵႃႈၼႂ်းမိုဝ်းမဵဝ်း မီႉတျၼ်ႇ ယဝ်ႉ။-

18သူဢွၼ်ၵၼ်လုၵ်ႉယူႇၽၢႆႇၼိုင်ႈတင်းပီႈၼွင်ႉပေႃႈၵဝ်ၸိူဝ်းၼၼ်ႉ ဝၼ်းမိူဝ်ႈၼႆႉလႄႈ ဢဝ်လုၵ်ႈၸၢႆးမၼ်းၸဵတ်းသိပ်းၵေႃႉၼၼ်ႉတၢႆၵႃႈၼိူဝ် မၢၵ်ႇႁိၼ်လုၵ်ႈလဵဝ်ၵၼ်သေယဝ်ႉ၊ ဢဝ် ဢၽီႉမလႅၵ်ႉ ဢၼ်ပဵၼ်လုၵ်ႈၸၢႆးမႄႈယိင်းၶႃႈၼၼ်ႉ ႁဵတ်းၶုၼ်ႁေႃၶမ်းၵႃႈၼိူဝ်ၵူၼ်းဝဵင်း သေႇၶိမ်ႇ တင်းလၢႆ ၵွပ်ႈပိူဝ်ႈဢၼ်မၼ်းပဵၼ်ပီႈၼွင်ႉသူၼၼ်ႉယဝ်ႉလူင်ပႄႇ။-

19မိူဝ်ႈလဵဝ်ၼႆႉ ပေႃးသူပႂ်ႉသဵတ်ႈၸႃႇလႄႈႁဵတ်းလီလီငၢမ်းငၢမ်းတီႈ ယေႇရုပ်ႉပႃႇလႃႉ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းၸိူဝ်းၼၼ်ႉဝၼ်းမိူဝ်ႈၼႆႉယဝ်ႉၸိုင် ဢွၼ်ၵၼ်ၸူမ်းသိူဝ်းၼႂ်း ဢၽီႉမလႅၵ်ႉ ၼၼ်ႉတႃႉ။ မၼ်းၼၼ်ႉၵေႃႈ ႁႂ်ႈၸူမ်းသိူဝ်းၼႂ်းသူသေၵမ်းလူၺ်ႈ။-

20ပေႃးဢမ်ႇၼၼ်ၸိုင် ႁႂ်ႈၽႆးဢွၵ်ႇသေၵႃႈၼႂ်း ဢၽီႉမလႅၵ်ႉ လႄႈ မႆႈၵူၼ်းဝဵင်း သေႇၶိမ်ႇ တင်းလၢႆ ဢိၵ်ႇတင်းပီႈၼွင်ႉၸိူဝ်ႉၶိူဝ်း မီႉလေႃႇ ၼၼ်ႉသေၵမ်းလူၺ်ႈ။ ႁႂ်ႈၽႆးဢွၵ်ႇသေၵႃႈၼႂ်းၵူၼ်းဝဵင်း သေႇၶိမ်ႇ တင်းလၢႆ ဢိၵ်ႇတင်းပီႈၼွင်ႉၸိူဝ်ႉၶိူဝ်း မီႉလေႃႇ ၼၼ်ႉလႄႈ မႆႈ ဢၽီႉမလႅၵ်ႉ သေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊-

21ယေႃးသမ်ႇ ၼၼ်ႉ ၶုၼ်ႇလႅၼ်ႈလႄႈဢွၵ်ႇပၢႆႈၶၼ်ၶၼ်ၽႂ်းၽႂ်းလႄႈၵႂႃႇၸူးၵႃႈတီႈဝဵင်း ပႄႇရႃႉ လႄႈ ယူႇၵႃႈတီႈၼၼ်ႈ ၵွပ်ႈပိူဝ်ႈဢၼ်ၵူဝ်ပီႈၸၢႆးမၼ်း ဢၽီႉမလႅၵ်ႉ ၼၼ်ႉဢေႃႈ။

22ဢၽီႉမလႅၵ်ႉ ၼၼ်ႉ ႁဵတ်းၶုၼ်ၵႃႈၼိူဝ်မဵဝ်း ဢီႉသရေႇလႃႉ သၢမ်ပီႊသေယဝ်ႉ၊-

23ၽြႃးပဵၼ်ၸဝ်ႈ ပွႆႇၸႂ်ႉဝီႉၺိၺ်ႇဢၼ်ႁၢႆႉၸူးၵႃႈတီႈဝူင်ႈၵၢင် ဢၽီႉမလႅၵ်ႉ တင်းၵူၼ်းဝဵင်း သေႇၶိမ်ႇ ၸိူဝ်းၼၼ်ႉလႄႈ ၵူၼ်းဝဵင်း သေႇၶိမ်ႇ ၸိူဝ်းၼၼ်ႉ ၽိုၼ်ႉသဵတ်ႈၸႃႇ ဢၽီႉမလႅၵ်ႉ ဢေႃႈ။-

24လွင်ႈမၼ်းၸမ်ႉ လွင်ႈၼင်ႇႁိုဝ်ဢပႅတ်ႈဢၼ်ႁဵတ်းႁၢႆႉၵျၢမ်းၼႃႇလူင်လၢင်တီႈလုၵ်ႈၸၢႆး ယေႇရုပ်ႉပႃႇလႃႉ ၸဵတ်းသိပ်းၵေႃႉၼၼ်ႉ တၵ်းလႆႈတူၵ်းႁွတ်ႈလႄႈ လိူတ်ႈၶဝ်ၼၼ်ႉတၵ်းလႆႈႁွတ်ႈထိုင်ၵႃႈၼိူဝ် ဢၽီႉမလႅၵ်ႉ ၼွင်ႉၸၢႆးၶဝ်ဢၼ်ဢဝ်ၶဝ်တၢႆၼၼ်ႉ ဢိၵ်ႇတင်းၵႃႈၼိူဝ်ၵူၼ်းဝဵင်း သေႇၶိမ်ႇ တင်းလၢႆ ဢၼ်ၽွမ်ႉၵၼ်ၸွႆႈထႅမ်ႁႅင်းမိုဝ်းမၼ်း ႁႂ်ႈမၼ်းလႆႈဢဝ်ပီႈၸၢႆးၼွင်ႉၸၢႆးမၼ်းတၢႆၼၼ်ႉၸိုင် ၸင်ႇပဵၼ်ဢေႃႈ။-

25ၵူၼ်း သေႇၶိမ်ႇ ၸိူဝ်းၼၼ်ႉ ဝႆႉၽူႈဝႆႉၵူၼ်း ႁႂ်ႈလႆႈပႂ်ႉလွမ်ပႂ်ႉၵျၢမ်ႇမၼ်းၵႃႈၼိူဝ်ပၢႆလွႆပၢႆၵုင်းလႄႈ ၶဝ်ၼၼ်ႉႁိမ်ဢဝ်ဢုၵ်ႉၸႃႇၶူဝ်းလဵင်းၵူၼ်း ၵႃႈဢၼ်ၵႂႃႇမႃးသဵၼ်ႈတၢင်းၼၼ်ႉဢေႃႈ။ ပိူၼ်ႈလဝ်ႊလၢတ်ႈလွင်ႈၼၼ်ႉ တီႈ ဢၽီႉမလႅၵ်ႉ ယူႇဢေႃႈ။-

26ၵႃႇလႃႉ ဢၼ်ပဵၼ်လုၵ်ႈၸၢႆး ဢေးပႅတ်ႉ ၼၼ်ႉ ပႃးဢဝ်တင်းပီႈၼွင်ႉမၼ်းမႃးလႄႈ ၶဝ်ႈယူႇၽၢႆႇဝဵင်း သေႇၶိမ်ႇ လႄႈ ၵူၼ်းဝဵင်း သေႇၶိမ်ႇ ၸိူဝ်းၼၼ်ႉ ၸႂ်ပိုင်ႈၸႂ်ဢိင်မၼ်းဢေႃႈ။-

27ၶဝ်ဢွၵ်ႇၸူးၵႃႈတီႈတူင်ႈႁႆႊတူင်ႈၼႃးၶဝ်ယူႇ၊ ၵဵပ်းဢဝ်သိမ်းဢဝ်မၢၵ်ႇၸပိတ်ႈၶဝ်ယူႇ၊ ဢဝ်တိၼ်ယဵပ်ႇမၢၵ်ႇၸပိတ်ႈယူႇ၊ ႁဵတ်းၶိူင်ႈပုၵ်ႈၸေႃႇတၢင်းဢၼ်မူၼ်ႈဢၼ်ပျေႃႇယူႇသေလႄႈ ၵႂႃႇၵႃႈတီႈၵျွင်းၽြႃးၶဝ်လႄႈ ၵိၼ်ၶူပ်းယူႇ၊ သူတ်ႉဢိုၵ်ႉယူႇသေလႄႈ ဢွၼ်ၵၼ်ၵိၼ်ႇလႃႇ ဢၽီႉမလႅၵ်ႉ ဢေႃႈ။-

28ၵႃႇလႃႉ လုၵ်ႈၸၢႆး ဢေးပႅတ်ႉ ၼၼ်ႉလၢတ်ႈလႄႈဝႃႈ၊ ဢၽီႉမလႅၵ်ႉ ၼၼ်ႉၸမ်ႉ ပဵၼ်ၽူႈလႂ်။ သေႇၶိမ်ႇ ၸမ်ႉ ပဵၼ်ၽူႈလႂ်လႄႈ ႁႂ်ႈႁဝ်းလႆႈပႂ်ႉဢမူႉမၼ်း။ မၼ်းပဵၼ်လုၵ်ႈၸၢႆး ယေႇရုပ်ႉပႃႇလႃႉ ဢမ်ႇၸႂ်ႈႁိုဝ်။ ၸေႇပူႉလႃႉ ၼၼ်ႉ ပဵၼ်ၵေႃႉဢၼ်ႁၢပ်ႇဢမူႉမၼ်းဢမ်ႇၸႂ်ႈႁိုဝ်။ ဢွၼ်ၵၼ်ႁၢပ်ႇဢမူႉၵူၼ်း ႁႃႇမေႃႇ ဢၼ်ပဵၼ်ပေႃႈ သေႇၶိမ်ႇ ၼၼ်ႉၸိူဝ်းၼၼ်ႉတႃႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁဝ်းတၵ်းလႆႈႁၢပ်ႇဢမူႉမၼ်းၼၼ်ႉၼင်ႇႁိုဝ်။-

29ႁႂ်ႈၵူၼ်းတင်းလၢႆၼႆႉ ႁွတ်ႈထိုင်ၵႃႈၼႂ်းမိုဝ်းၵဝ်သေၵမ်းလူၺ်ႈ။ ပေႃးပဵၼ်ၼင်ႇၼၼ်ၸိုင် ၵဝ်တၵ်းပႄႇ ဢၽီႉမလႅၵ်ႉ ၼၼ်ႉပႅတ်ႈသေဢေႃႈ၊ ဝႃႈၼင်ႇၼႆသေယဝ်ႉ၊ သမ်ႉလၢတ်ႈၵႂႃႇတီႈ ဢၽီႉမလႅၵ်ႉ လႄႈဝႃႈ၊ ဢဝ်ႁႂ်ႈပူဝ်ႇပႃႇၵူၼ်းသိုၵ်းမႂ်းယႂ်ႇၽႄႈၼမ်ၵိုၼ်းမႃးသေလႄႈ ဢွၵ်ႇမႃးတႃႉ၊ ဝႃႈၼင်ႇၼႆဢေႃႈ။-

30မိူဝ်ႈဢၼ်မဵဝ်ႉဢုၵ်ႉ ၸေႇပူႉလႃႉ ငိၼ်းၵႂၢမ်း ၵႃႇလႃႉ လုၵ်ႈၸၢႆး ဢေးပႅတ်ႉ ၼၼ်ႉၸိုင် တၢင်းၸႂ်မႆႈၶႆႈၸႃႉမၼ်းဢွၵ်ႇလႄႈ-

31မၼ်းႁဵတ်းပရီႉယႄႇပွႆႇၸႂ်ႉၵူၼ်းၵႂႃႇၸူးၵႃႈတီႈ ဢၽီႉမလႅၵ်ႉ သေလႄႈ လဝ်ႊလၢတ်ႈလႄႈဝႃႈ၊ တူၺ်းလူး၊ ၵႃႇလႃႉ လုၵ်ႈၸၢႆး ဢေးပႅတ်ႉ ဢိၵ်ႇတင်းပီႈၼွင်ႉမၼ်းတင်းလၢႆ မႃးၵႃႈတီႈဝဵင်း သေႇၶိမ်ႇ လႄႈ ႁဵတ်းႁႂ်ႈဝဵင်းယူႇၽၢႆႇၼိုင်ႈတင်းၸဝ်ႈႁဝ်းတီႈၶႃႈဢေႃႈ။-

32ပိူဝ်ႈၼႆလႄႈ ၶိင်ႇၵၢင်ၶိုၼ်း ၸဝ်ႈႁဝ်းဢိၵ်ႇလူၺ်ႈၵၼ်တင်းၶဝ်ၸိူဝ်းဢၼ်မီးတီႈၸဝ်ႈႁဝ်းၼၼ်ႉ လုၵ်ႉလႄႈလွမ်ပႂ်ႉယူႇၵႃႈတီႈတူင်ႈႁႆႊတူင်ႈၼႃးတဵတ်ႇတဵတ်ႇသေၵမ်းတီႈၶႃႈ။-

33ၶိင်ႇၵၢင်ၼႂ်ၸဝ်ႉၸဝ်ႉ ၶိင်ႇၵၢင်ဝၼ်းၸႃႉဢွၵ်ႇၼၼ်ႉ လုၵ်ႉလႄႈတိုၵ်းတေႃးဝဵင်းသေၵမ်းတီႈၶႃႈ။ မိူဝ်ႈဢၼ်မၼ်း ဢိၵ်ႇတင်းၶဝ်ၸိူဝ်းဢၼ်မီးတီႈမၼ်းၼၼ်ႉ ဢွၼ်ၵၼ်ဢွၵ်ႇႁႂ်ႈလႆႈႁႄႉၶႅၼ်တိုၵ်းတေႃးၼၼ်ႉၸိုင်၊ ၸဝ်ႈႁဝ်းၶႅၼ်းတေႃႈႁဵတ်းၵႃႈၼင်ႇဢၼ်သၢင်ႇထုၵ်ႇၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။

34ဢၽီႉမလႅၵ်ႉ ဢိၵ်ႇလူၺ်ႈၵၼ်တင်းၵူၼ်း ၵႃႈဢၼ်မီးတီႈမၼ်းၼၼ်ႉ ဢွၼ်ၵၼ်လုၵ်ႉၶိင်ႇၵၢင်ၶိုၼ်းလႄႈ ၽႄႁဵတ်းသီႇတပ်ႉသေယဝ်ႉ၊ လွမ်ပႂ်ႉဝဵင်း သေႇၶိမ်ႇ ယူႇဢေႃႈ။-

35ၵႃႇလႃႉ လုၵ်ႈၸၢႆး ဢေးပႅတ်ႉ ဢွၵ်ႇလႄႈၸုၵ်းယူႇၵႃႈတီႈႁူးၽၵ်းတူဝဵင်းဢေႃႈ။ ဢၽီႉမလႅၵ်ႉ ဢိၵ်ႇလူၺ်ႈၵၼ်တင်း ၶဝ်ၸိူဝ်းဢၼ်မီးတီႈမၼ်းၼၼ်ႉၵေႃႈ ဢွၼ်ၵၼ်လုၵ်ႉၵႃႈတီႈဢၼ်လွမ်ပႂ်ႉယူႇၼၼ်ႉလႄႈ၊-

36ၵႃႇလႃႉ ႁၼ်ၵူၼ်းၸိူဝ်းၼၼ်ႉသေယဝ်ႉ လၢတ်ႈတီႈ ၸေႇပူႉလႃႉ လႄႈဝႃႈ၊ တူၺ်းလူး၊ ၵူၼ်းၼမ်ၼႃႇလုၵ်ႉသေၵႃႈၼိူဝ်ပၢႆလွႆပၢႆၵုင်းပုၼ်ႉလူင်းမႃးဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ၸေႇပူႉလႃႉ ၶိုၼ်းလၢတ်ႈလႄႈဝႃႈ၊ ၸဝ်ႈႁၼ်ၵွင်ႉငဝ်းလွႆၼၼ်ႉပဵၼ်မိူၼ်ၸိူဝ်ႉၼင်ႇၵူၼ်းဝႆႉဢေႃႈ၊ ဝႃႈၼင်ႇၼႆဢေႃႈ။-

37ၵႃႇလႃႉ သမ်ႉလၢတ်ႈလႄႈဝႃႈ၊ တူၺ်းလူး၊ ၵူၼ်းၵမ်ႈၽွင်ႈလူင်းသေၵႃႈၼိူဝ်သၼ်လွႆၼၼ်ႉမႃးဢေႃႈ။ ၵူၼ်းၵမ်ႈၽွင်ႈၵေႃႈၸွမ်းသဵၼ်ႈတၢင်းတူၼ်ႈမႆႉၼိမ် ၵူၼ်းဢၼ်ႁဵတ်းၽိူဝ်ႉၼၼ်ႉမႃးဢေႃႈ၊ ဝႃႈၼင်ႇၼႆသေယဝ်ႉ၊-

38ၸေႇပူႉလႃႉ လၢတ်ႈတီႈမၼ်းလႄႈဝႃႈ၊ သူပ်းၸဝ်ႈဢၼ်လၢတ်ႈလႄႈဝႃႈ၊ ဢၽီႉမလႅၵ်ႉ ပဵၼ်ၽူႈလႂ်ႁႂ်ႈႁဝ်းလႆႈႁၢပ်ႇဢမူႉမၼ်း၊ ဝႃႈၼင်ႇၼႆၼၼ်ႉ၊ တေႃႈလဵဝ်ၼႆႉမီးၵႃႈလႂ်။ ၵူၼ်းၸိူဝ်းၼၼ်ႉပဵၼ်ၵူၼ်းဢၼ်ၸဝ်ႈႁဵတ်းဢမ်ႇပေႃးၼင်ႇႁိုဝ်လႄႈယူႇၼၼ်ႉဢမ်ႇၸႂ်ႈႁိုဝ်။ တေႃႈလဵဝ်ၼႆႉဢွၵ်ႇလႄႈတိုၵ်းၵၼ်တင်းၶဝ်ၼၼ်ႉသေၵမ်းတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

39ၵႃႇလႃႉ ၼၼ်ႉဢွၵ်ႇၵႃႈတီႈၽၢႆႇၼႃႈၵူၼ်းဝဵင်း သေႇၶိမ်ႇ တင်းလၢႆလႄႈ တိုၵ်းၵၼ်တင်း ဢၽီႉမလႅၵ်ႉ ဢေႃႈ။-

40ဢၽီႉမလႅၵ်ႉ လိုပ်ႈၸွမ်းလမ်းၸွမ်းမၼ်းလႄႈ မၼ်းဢွၵ်ႇပၢႆႈၵႃႈတီႈၽၢႆႇၼႃႈမၼ်းၼၼ်ႉသေယဝ်ႉ၊ ၵူၼ်းၼမ်ၼႃႇၼၼ်ႉ ၶၢမ်ႇတၢင်းဢၼ်တိူဝ်ႉဢၼ်မၢတ်ႇလႄႈ လူမ်ႉတၢႆတေႃႇထိုင်ႁွတ်ႈႁူးၽၵ်းတူဝဵင်းဢေႃႈ။-

41ဢၽီႉမလႅၵ်ႉ ၼၼ်ႉ ယူႇၵႃႈတီႈဝဵင်း ဢရူႉမႃႇ လႄႈ ၸေႇပူႉလႃႉ ၼၼ်ႉ ႁေႃႈ ၵႃႇလႃႉ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းဢွၵ်ႇ ႁႂ်ႈဢမ်ႇလႆႈယူႇၵႃႈၼႂ်းဝဵင်း သေႇၶိမ်ႇ ဢေႃႈ။-

42ဝၼ်းမိူဝ်ႈၽုၵ်ႈ ၵူၼ်းတင်းလၢႆဢွၵ်ႇၸူးၵႃႈတီႈတူင်ႈႁႆႊတူင်ႈၼႃးလႄႈ ပိူၼ်ႈလၢတ်ႈလွင်ႈၼၼ်ႉတီႈ ဢၽီႉမလႅၵ်ႉ သေယဝ်ႉ-

43မၼ်းဢဝ်ၵူၼ်းမၼ်းတင်းလၢႆ ၽႄႁဵတ်းသၢမ်မုၵ်ႉသေလႄႈ လွမ်ပႂ်ႉယူႇၵႃႈတီႈတူင်ႈႁႆႊတူင်ႈၼႃးလႄႈ မိူဝ်ႈဢၼ်ႁၼ်ၵူၼ်းဝဵင်းတင်းလၢႆဢွၵ်ႇၼၼ်ႉၸိုင် လုၵ်ႉလႄႈတိုၵ်းတေႃးယႃႉပႅတ်ႈၶဝ်ဢေႃႈ။-

44ဢၽီႉမလႅၵ်ႉ ဢိၵ်ႇလူၺ်ႈၵၼ်တင်းၵူၼ်းမုၵ်ႉၼိုင်ႈၶုၼ်ႇလႅၼ်ႈၶိုၼ်ႈၸူးလႄႈ ဢွၼ်ၵၼ်ၸုၵ်းပႂ်ႉယူႇၵႃႈတီႈႁူးၽၵ်းတူဝဵင်းဢေႃႈ။ ၵူၼ်းသွင်မုၵ်ႉၸမ်ႉ ဢွၼ်ၵၼ်ၶုၼ်ႇလႅၼ်ႈၸူးၵႃႈတီႈၵူၼ်းဢၼ်မီးၵႃႈၼႂ်းတူင်ႈႁႆႊတူင်ႈၼႃးၸိူဝ်းၼၼ်ႉလႄႈ ဢဝ်တၢႆဢေႃႈ။-

45ဢၽီႉမလႅၵ်ႉ တိုၵ်းတေႃးဝဵင်းၼၼ်ႉတင်းဝၼ်းလႄႈ လႆႈဝဵင်းသေယဝ်ႉ ဢဝ်ၵူၼ်းဢၼ်ထူပ်းၵႃႈၼႂ်းဝဵင်းၼၼ်ႉၸိူဝ်းၼၼ်ႉတၢႆလႄႈ ၵိူၼ်ႇယႃႉလမ်းဝဵင်းပႅတ်ႈသေလႄႈ ဢဝ်ၵိူဝ်ၸၢတ်ႇပိုၼ်ၵႃႈတီႈဝဵင်းၼၼ်ႉဢေႃႈ။

46မိူဝ်ႈဢၼ်ၵူၼ်းၼႂ်းတိူၵ်ႈတီႈတိုၵ်းသိုၵ်း သေႇၶိမ်ႇ တင်းသဵင်ႈတင်းလူင် ငိၼ်းလွင်ႈၼၼ်ႉၸိုင်၊ ၶဝ်ၸူႉၵၼ်တုမ်ၵၼ်ၵႃႈၼႂ်းလုၵ်းဢၼ်မၼ်ႈၶိူင်ႇ ၵႃႈတီႈၵျွင်းၽြႃး ပေႇရိတ်ႉ ဢေႃႈ။-

47မိူဝ်ႈဢၼ်ပိူၼ်ႈလၢတ်ႈလွင်ႈဢၼ်ၵူၼ်းၼႂ်းတိူၵ်ႈတီႈတိုၵ်းသိုၵ်း သေႇၶိမ်ႇ တင်းသဵင်ႈတင်းလူင် ၸူႉၵၼ်တုမ်ၵၼ်ၼၼ်ႉတီႈ ဢၽီႉမလႅၵ်ႉ ၼၼ်ႉၸိုင်၊-

48ၸႃႉၸဵမ်တူဝ် ဢၽီႉမလႅၵ်ႉ လႄႈၶဝ်ၸိူဝ်းဢၼ်မီးတီႈမၼ်းတင်းသဵင်ႈတင်းလူင်ၼၼ်ႉ ဢွၼ်ၵၼ်ၶိုၼ်ႈၸူးၵႃႈတီႈလွႆ ၸႃႇလမုၼ်ႇ သေလႄႈ၊ ဢၽီႉမလႅၵ်ႉ ဢဝ်တႃမၢတ်ႇ တႅပ်းၽၼ်းၵိင်ႇမႆႉလႄႈ ႁၢပ်ႇတၢင်ႇၵႃႈၼိူဝ်ႁူဝ်မႃႇမၼ်းသေယဝ်ႉ၊ လၢတ်ႈတီႈၶဝ်ၸိူဝ်းဢၼ်မီးတီႈမၼ်းၼၼ်ႉလႄႈဝႃႈ၊ ၵႃႈၼင်ႇဢၼ်သူႁၼ်ၵဝ်ႁဵတ်းၼႆႉ သူဢွၼ်ၵၼ်ႁဵတ်းၸွမ်းၶၼ်ၶၼ်ၽႂ်းၽႂ်းတႃႉ၊ ဝႃႈၼင်ႇၼႆသေယဝ်ႉ၊-

49ၵူၼ်းမၼ်းတင်းသဵင်ႈတင်းလူင်ၼၼ်ႉ ဢွၼ်ၵၼ်တႅပ်းၽၼ်းၵိင်ႇမႆႉႁင်းၽႂ်ႁင်းမၼ်းမိူၼ်ၸိူဝ်ႉၼင်ႇၼၼ်လႄႈ ၸွမ်းလင် ဢၽီႉမလႅၵ်ႉ ၵႂႃႇသေလႄႈ ဢဝ်သႂ်ႇၵႃႈတီႈလုၵ်းဢၼ်မၼ်ႈၶိူင်ႇၼၼ်ႉလႄႈ ဢဝ်ၽႆးတုတ်ႇလုၵ်းဢၼ်မၼ်ႈၶိူင်ႇၼၼ်ႉပႃးလူၺ်ႈၵၼ်တင်းၶဝ်ဢေႃႈ။ ၼင်ႇၼၼ်လႄႈ ၵူၼ်းၼႂ်းတိူၵ်ႈတီႈတိုၵ်းသိုၵ်း သေႇၶိမ်ႇ တင်းသဵင်ႈတင်းလူင်ၼၼ်ႉ ၵူၼ်းၸၢႆးၵူၼ်းယိင်းတၢႆသေႁဵင်ၼိုင်ႈၸမ်ၸမ်ဢေႃႈ။-

50လိုၼ်းၼၼ်ႉ ဢၽီႉမလႅၵ်ႉ ၼၼ်ႉ ၵႂႃႇၸူးၵႃႈတီႈဝဵင်း ထေႇပႅတ်ႉ လႄႈ ၶျႃးတပ်ႉယူႇၽၢႆႇၼိုင်ႈတင်း ဝဵင်း ထေႇပႅတ်ႉ ၼၼ်ႉသေလႄႈ တိုၵ်းဢဝ်ဢေႃႈ။-

51ၵူၺ်းၵႃႈ ၵႃႈၼႂ်းဝဵင်းၼၼ်ႉမီးတိူၵ်ႈတီႈတိုၵ်းသိုၵ်းဢၼ်မၼ်ႈၶိူင်ႇဢၼ်ၼိုင်ႈလႄႈ ၽူႈယိင်းၽူႈၸၢႆးၵူၼ်းဝဵင်းၵႃႈမီးၼၼ်ႉ ဢွၼ်ၵၼ်ပၢႆႈၶဝ်ႈၵႃႈၼႂ်းတိူၵ်ႈတီႈတိုၵ်းသိုၵ်းၼၼ်ႉသေယဝ်ႉ ဢိုတ်းၽၵ်းတူဝႆႉသေလႄႈ ဢွၼ်ၵၼ်ၶိုၼ်ႈယူႇၵႃႈၼိူဝ်မုင်းတိူၵ်ႈတီႈတိုၵ်းသိုၵ်းၼၼ်ႉဢေႃႈ။-

52ဢၽီႉမလႅၵ်ႉ ၼၼ်ႉ မႃးၸူးၵႃႈတီႈတိူၵ်ႈတီႈတိုၵ်းသိုၵ်းၼၼ်ႉလႄႈ တိုၵ်းတေႃးယူႇသေလႄႈ မိူဝ်ႈဢၼ်မၼ်းသုတ်ႉၸပ်းသုတ်ႉၸူး ၵႃႈတီႈႁူးၽၵ်းတူတိူၵ်ႈတီႈတိုၵ်းသိုၵ်းၼၼ်ႉ ႁႂ်ႈလႆႈဢဝ်ၽႆးတုတ်ႇၼၼ်ႉၸိုင်၊-

53မႄႈယိင်းၵေႃႉၼိုင်ႈ ဢဝ်ၽၢၵ်ႇမၢၵ်ႇႁိၼ်လူၺ်ၽၢၵ်ႇၼိုင်ႈ ထိမ်ႈတူၵ်းသႂ်ႇၵႃႈၼိူဝ်ႁူဝ် ဢၽီႉမလႅၵ်ႉ လႄႈ လုပ်ႇၵွၵ်းႁူဝ်မၼ်းတႅၵ်ႇလႅဝ်ၵႂႃႇဢေႃႈ။-

54မၼ်းႁွင်ႉဢဝ်ၵူၼ်းဢွၼ်ႇဢၼ်ယိပ်းလၢၵ်ႈၼၢၵ်ႈမၼ်းၼၼ်ႉၶၼ်ၶၼ်ၽႂ်းၽႂ်းလႄႈလၢတ်ႈဝႃႈ၊ ၼင်ႇႁိုဝ်ၵူၼ်းတင်းလၢႆ တၵ်းဢမ်ႇမီးတီႈလၢတ်ႈလႄႈဝႃႈ၊ မႄႈယိင်းဢဝ်မၼ်းတၢႆဢေႃႈ၊ ဝႃႈၼင်ႇၼႆၼၼ်ႉၸိုင် ထွတ်ႇဢဝ်လၢပ်ႇမႂ်းဢွၵ်ႇသေလႄႈ ဢဝ်ၵဝ်တၢႆတႃႉ၊ ဝႃႈၼင်ႇၼႆလႄႈ ၵူၼ်းဢွၼ်ႇမၼ်းၼၼ်ႉတႅင်းသႂ်ႇမၼ်းလႄႈ မၼ်းတၢႆဢေႃႈ။-

55ၵူၼ်းမဵဝ်း ဢီႉသရေႇလႃႉ တင်းလၢႆ ႁူႉႁၼ်လွင်ႈဢၼ် ဢၽီႉမလႅၵ်ႉ တၢႆၼၼ်ႉသေယဝ်ႉ ဢွၼ်ၵၼ်ၶိုၼ်းမိူဝ်းၵႂႃႇၸူးၵႃႈတီႈဢၼ်ၶဝ်ယူႇၼၼ်ႉႁင်းၽႂ်ႁင်းမၼ်းသေဢေႃႈ။-

56ၼင်ႇၼၼ်လႄႈ ၽြႃးပဵၼ်ၸဝ်ႈတွပ်ႇတႅၼ်းပၼ်တူႉၸရိူၵ်ႈဢပႅတ်ႈ ဢၼ် ဢၽီႉမလႅၵ်ႉ ႁဵတ်းမႅၼ်ႈတီႈပေႃႈမၼ်းလႄႈ ဢဝ်ပီႈမၼ်းၼွင်ႉမၼ်းၸဵတ်းသိပ်းၵေႃႉ တၢႆၼၼ်ႉဢေႃႈ။-

57တူႉၸရိူၵ်ႈဢပႅတ်ႈၵႃႈဢၼ် ၵူၼ်းဝဵင်း သေႇၶိမ်ႇ ၸိူဝ်းၼၼ်ႉႁဵတ်းၼၼ်ႉၵေႃႈ ၽြႃးပဵၼ်ၸဝ်ႈ ႁႂ်ႈတူၵ်းႁွတ်ႈၵႃႈၼိူဝ်ႁူဝ်ၶဝ်သေယဝ်ႉ၊ ၶဝ်လႆႈၶၢမ်ႇမႅၼ်ႈၸွမ်းၵႃႈၼင်ႇၵႂၢမ်းဢၼ် ယေႃးသမ်ႇ လုၵ်ႈၸၢႆး ယေႇရုပ်ႉပႃႇလႃႉ ၵိၼ်ႇဝႃႈၼၼ်ႉဢေႃႈ။