Judges 18

Shan

← Chapter 17 Jump to: Chapter 19 →

1မိူဝ်ႈၶိင်ႇၼၼ်ႉ ၶုၼ်ႁေႃၶမ်း ဢီႉသရေႇလႃႉ ဢမ်ႇမီး။ မိူဝ်ႈၶိင်ႇၼၼ်ႉ ၵူၼ်းမဵဝ်း တၢၼ်ႇ တင်းလၢႆ ႁႃလိၼ်တီႈဢၼ်ၶဝ်တၵ်းၶၢမ်ႇဢမူၺ်ႇလႄႈယူႇဢေႃႈ။ လွင်ႈမၼ်းၸမ်ႉ တေႃႇထိုင်ႁွတ်ႈၶိင်ႇမိုဝ်ႉဝၼ်းၼၼ်ႉလႄႈ ဢမူၺ်ႇၶဝ်ဢမ်ႇပႆႇႁွတ်ႈထိုင်ၵႃႈၼႂ်းမိုဝ်းၶဝ်ၼႂ်း မဵဝ်း ဢီႉသရေႇလႃႉ တင်းလၢႆၼၼ်ႉ။-

2ပိူဝ်ႈၼႆလႄႈ ၵူၼ်းမဵဝ်း တၢၼ်ႇ ၸိူဝ်းၼၼ်ႉ ဢဝ်ၵႃႈၼႂ်းၵူၼ်းမဵဝ်းၶဝ်ၵႃႈဢၼ်မီးၼၼ်ႉလႄႈ ပွႆႇၸႂ်ႉၵူၼ်းသိုၵ်းဢၼ်ႁႅင်းယႂ်ႇၼႃႇႁႃႈၵေႃႉ ဢွၵ်ႇသေၵႃႈတီႈဝဵင်း ၸေႃးရႃႉ ဢိၵ်ႇတင်းဝဵင်း ဢေးသတေႃးလႃႉ ၼၼ်ႉ ၵႂႃႇႁႂ်ႈလႆႈႁဵတ်းၽၢႆႇၼႂ်းတီႈမိူင်းသေလႄႈ လူတူၺ်းလွမ်တူၺ်းလႄႈ သင်ႇလၢတ်ႈတီႈၶဝ်လႄႈဝႃႈ၊ ၵႂႃႇလႄႈလွမ်တူၺ်းမိူင်းၼၼ်ႉတႃႉ၊ ဝႃႈၼင်ႇၼႆလႄႈ၊ ၶဝ်ၼၼ်ႉႁွတ်ႈထိုင် ၵႃႈၼိူဝ်ႁၢၼ်ႉလွႆ ဢေႇၽရိမ်ႇ ၵႃႈတီႈႁိူၼ်း မီႉၶႃႇ ၼၼ်ႉသေယဝ်ႉ၊ သွၼ်ႈပိုင်ႈၵႃႈတီႈၼၼ်ႈဢေႃႈ။-

3မိူဝ်ႈဢၼ်ၶဝ်ယင်းမီးယူႇၵႃႈတီႈႁိမ်းႁိူၼ်း မီႉၶႃႇ ၼၼ်ႉၸိုင်၊ ၶဝ်တွင်းသဵင်ၵႂၢမ်းၵူၼ်းဢွၼ်ႇမဵဝ်း လေႇဝီႉ ၼၼ်ႉလႄႈ ဝႄႉၶဝ်ႈၸူးၵႃႈတီႈမၼ်းၼၼ်ႉသေလႄႈ တွင်ႈထၢမ်လႄႈဝႃႈ၊ ၽူႈလႂ်ဢဝ်မႂ်းမႃးသူင်ႇႁွတ်ႈၵႃႈတီႈၼႆႈ။ မႂ်းသၢင်ႈႁဵတ်းၵၢၼ်ငၢၼ်းၵႃႈသင်ယူႇၵႃႈတီႈၼႆႈ။ မႂ်းမီးလွင်ႈၵႃႈသင်ၵႃႈတီႈၼႆႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

4မၼ်းၼၼ်ႉၶိုၼ်းလၢတ်ႈလႄႈဝႃႈ၊ မီႉၶႃႇ ၼႆႉႁဵတ်းၸိူဝ်ႉၼင်ႇၼႆၸိူဝ်ႉၼင်ႇၼၼ်တီႈၵဝ်သေလႄႈ ၸင်ႇဢဝ်ၵဝ်လႄႈ၊ ၵဝ်လႆႈႁဵတ်းယိတ်ႈပရေႃးႁဵၵ်ႈမၼ်းယူႇဢေႃႈ၊ ဝႃႈၼင်ႇၼႆဢေႃႈ။-

5ၶဝ်ၼၼ်ႉၵေႃႈ၊ လၢတ်ႈတီႈမၼ်းလႄႈဝႃႈ၊ ၶႅၼ်းတေႃႈတွင်ႈထၢမ်ၽြႃးပဵၼ်ၸဝ်ႈ ႁႂ်ႈႁဝ်းၶႃႈလႆႈႁူႉလွင်ႈဢၼ်သဵၼ်ႈတၢင်းႁဝ်းၶႃႈ ဢၼ်ႁဝ်းၶႃႈတၵ်းၵႂႃႇၼၼ်ႉ တၵ်းပဵၼ်ႁိုဝ်။ ဢမ်ႇပဵၼ်ႁိုဝ်ၼၼ်ႉသေၵမ်း။ ႁဝ်းၶႃႈတွင်းပၢၼ်ႇဢေႃႈ၊ ဝႃႈၼင်ႇၼႆလႄႈ၊-

6ယိတ်ႈပရေႃးႁဵၵ်ႈၼၼ်ႉၶိုၼ်းလၢတ်ႈလႄႈဝႃႈ၊ ၵႂႃႇၼိမ်ၼိမ်တႃႉ။ ထႃႇဝရႃႉၽြႃး လူတူၺ်းသဵၼ်ႈတၢင်းဢၼ်သူၵႂႃႇၼၼ်ႉယူႇဢေႃႈ၊ ဝႃႈၼင်ႇၼႆဢေႃႈ။

7မိူဝ်ႈၼၼ်ႉ ၵူၼ်းႁႃႈၵေႃႉၼၼ်ႉ ဢွၵ်ႇၵႂႃႇလႄႈႁွတ်ႈထိုင်ၵႃႈတီႈဝဵင်း လေႇသႃႉ သေယဝ်ႉ၊ ႁၼ်လွင်ႈဢၼ်ၵူၼ်းဝဵင်းၸိူဝ်းၼၼ်ႉ ယင်းဢမ်ႇထၢင်ႇဢမ်ႇထိူမ်လႄႈ ယူႇမိူၼ်ၸိူဝ်ႉၼင်ႇၵူၼ်းဝဵင်း ၸီႉတုၼ်ႇ ၸိူဝ်းၼၼ်ႉယူႇ၊ ယင်းဢမ်ႇမႆႈၸႂ်လႄႈယူႇၼိမ်ၼိမ်ယူႇ ဢိၵ်ႇတင်းလွင်ႈဢၼ်ဢမ်ႇမီးၶုၼ်သေၵေႃႉသေၵူၼ်းဢၼ်ဢုပ်ႉပိူင်ႇၶဝ်လႄႈ မီးဢၶႂၢင်ႉဢၼ်ႁဵတ်း ႁႂ်ႈၶဝ်လီဢူၵ်းလီဢၢႆၼႂ်းလွင်ႈတၢင်းသေၸိူဝ်ႉသေပိူင်လႆႈ တင်းလွင်ႈဢၼ်ၶဝ်ၵႆၵၼ်တင်းၵူၼ်းဝဵင်း ၸီႉတုၼ်ႇ တင်းလၢႆလႄႈ ဢမ်ႇႁဵတ်းတၢင်းဢၼ်ၶဝ်ႈဢၼ်ဢွၵ်ႇတီႈပိူၼ်ႈ သေၵေႃႉသေၵူၼ်းၼၼ်ႉသေယဝ်ႉ၊-

8ဢွၼ်ၵၼ်ၶိုၼ်းမႃးၸူးၵႃႈတီႈဝဵင်း ၸေႃးရႃႉ တင်းဝဵင်း ဢေးသတေႃးလႃႉ တီႈဢၼ်ပီႈၼွင်ႉၸိူဝ်ႉၶိူဝ်းၶဝ်မီးၼၼ်ႉလႄႈ ပီႈၼွင်ႉၸိူဝ်ႉၶိူဝ်းၶဝ်ၸိူဝ်းၼၼ်ႉ ဢွၼ်ၵၼ်ထၢမ်လႄႈဝႃႈ။ သူမီးလွင်ႈဢၼ်တၵ်းၶိုၼ်းလၢတ်ႈၸိူဝ်ႉၼင်ႇႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊-

9ၶဝ်ၼၼ်ႉဢွၼ်ၵၼ်ၶိုၼ်းလၢတ်ႈလႄႈဝႃႈ၊ လုၵ်ႉလႄႈၵႂႃႇတိုၵ်းတေႃးၶဝ်တႃႉႁဝ်း။ ႁဝ်းႁၼ်မိူင်းၼၼ်ႉယဝ်ႉလႄႈ ပဵၼ်မိူင်းဢၼ်လီဢၼ်ငၢမ်းဢေႃႈ။ သူယင်းယူႇၼိမ်ၼိမ်လီလီယူႇႁိုဝ်။ ယႃႇပေႁဵတ်းၵွႆႈႁဵတ်းထိူင်းလွင်ႈဢၼ်တၵ်းလႆႈၵႂႃႇလႄႈ ၶဝ်ႈသိမ်းဢဝ်ၸၢမ်ႇၸႃးမိူင်းၼၼ်ႉသေၵမ်း။-

10မိူဝ်ႈဢၼ်သူၵႂႃႇၼၼ်ႉ သူတၵ်းထူပ်းႁၼ်ၵူၼ်းမဵဝ်းဢၼ်ဢမ်ႇထၢင်ႇဢမ်ႇထိူမ်ၵႃႈသင် ဢိၵ်ႇတင်းမိူင်းဢၼ်ၵႂၢင်ႈလီလႃးလီဢေႃႈ။ ၽြႃးပဵၼ်ၸဝ်ႈလႆႈဢၢပ်ႈပၼ်ၵႃႈၼႂ်းမိုဝ်းသူယဝ်ႉ။ ပဵၼ်တီႈဢၼ်ဢမ်ႇလူဝ်ႇထႅင်ႈသေၸိူဝ်ႉသေပိူင် ဢၼ်မီးၵႃႈၼိူဝ်လိၼ်မိူင်းၼႆႉဢေႃႈ၊ ဝႃႈၼင်ႇၼႆဢေႃႈ။-

11မိူဝ်ႈၼၼ်ႉ ၵူၼ်းမဵဝ်း တၢၼ်ႇ ႁူၵ်းပၢၵ်ႇ ပႃးဢဝ်တင်းလၢၵ်ႈၼၢၵ်ႈတိုၵ်းသိုၵ်းယူႇသေလႄႈ ၶီႇဢွၵ်ႇသေၵႃႈတီႈဝဵင်း ၸေႃးရႃႉ တင်းဝဵင်း ဢေးသတေႃးလႃႉ လႄႈၵႂႃႇဢေႃႈ။-

12ၶဝ်ၶီႇၵႂႃႇလႄႈ ၶျႃးတပ်ႉၶဝ်ၵႃႈတီႈဝဵင်း ၵီႉရယတ်ႉယႃႇရိမ်ႇ ၼႂ်းဢိူင်ႇ ယူႉတႃႉ ဢေႃႈ။ ပိူဝ်ႈၼႆလႄႈ ၶဝ်ႁွင်ႉႁဵၵ်ႈၸိုဝ်ႈတီႈၼၼ်ႉ တပ်ႉမဵဝ်း တၢၼ်ႇ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။ မီးၵႃႈတီႈၽၢႆႇလင်ဝဵင်း ၵီႉရယတ်ႉယႃႇရိမ်ႇ ဢေႃႈ။-

13ၶဝ်ၼၼ်ႉသမ်ႉလုၵ်ႉၵႃႈတီႈၼၼ်ႈသေလႄႈ ၵႂႃႇၵႃႈၼိူဝ်ႁၢၼ်ႉလွႆ ဢေႇၽရိမ်ႇ လႄႈ ႁွတ်ႈထိုင်ၵႃႈတီႈႁိူၼ်း မီႉၶႃႇ ဢေႃႈ။

14မိူဝ်ႈၼၼ်ႉ ၵူၼ်းႁႃႈၵေႃႉဢၼ်ၵႂႃႇႁႂ်ႈလႆႈလွမ်တူၺ်းလိၼ် ဝဵင်း လေႇသႃႉ ၼၼ်ႉ လၢတ်ႈတီႈပီႈၼွင်ႉၸိူဝ်ႉၶိူဝ်းၶဝ်ၼၼ်ႉလႄႈဝႃႈ၊ သူႁူႉလွင်ႈဢၼ် သိူဝ်ႈသုပ်းၸဝ်ႈ၊ ရုၵ်ႈထူႉ တေႇရၽိမ်ႇ ၊ ရုၵ်ႈထူႉဢၼ်တွင်ႈႁဵတ်းၶၵ်းႁဵတ်း၊ ရုၵ်ႈထူႉဢၼ်သွၼ်းႁဵတ်းလေႃႇႁဵတ်း မီးၵႃႈၼႂ်းႁိူၼ်းၼႆႉႁိုဝ်။ မိူဝ်ႈလဵဝ်ၼႆႉ ၶႆႈၸႂ်ဝူၼ်ႉၸႂ်လွင်ႈဢၼ်သူတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

15ၶဝ်ဢွၼ်ၵၼ်ငႅၵ်းၵႂႃႇၸူးၵႃႈတီႈၼၼ်ႈသေယဝ်ႉ၊ ႁွတ်ႈထိုင်ၵႃႈတီႈႁိူၼ်းတီႈယူႇၵူၼ်းဢွၼ်ႇမဵဝ်း လေႇဝီႉ ဢၼ်ဝႃႈႁိူၼ်း မီႉၶႃႇ ၼၼ်ႉလႄႈ တၵ်ႉလၢတ်ႈၵၼ်တင်းမၼ်းၼၼ်ႉဢေႃႈ။-

16ၵူၼ်းမဵဝ်း တၢၼ်ႇ ႁူၵ်းပၢၵ်ႇဢၼ်ပႃးလၢၵ်ႈၼၢၵ်ႈတိုၵ်းသိုၵ်းၸိူဝ်းၼၼ်ႉ ဢွၼ်ၵၼ်ၸုၵ်းယူႇၵႃႈတီႈႁူးၽၵ်းတူဢေႃႈ။-

17ၵူၼ်းႁႃႈၵေႃႉဢၼ်ၵႂႃႇႁႂ်ႈလႆႈလွမ်တူၺ်းမိူင်းၸိူဝ်းၼၼ်ႉ ၶိုၼ်ႈၸူးလႄႈၶဝ်ႈၵႂႃႇၵႃႈၼႂ်းႁိူၼ်းသေယဝ်ႉ၊ သိမ်းဢဝ်ရုၵ်ႈထူႉ ဢၼ်တွင်ႈႁဵတ်းၶၵ်းႁဵတ်း၊ သိူဝ်ႈသုပ်းၸဝ်ႈ၊ ရုၵ်ႈထူႉ တေႇရၽိမ်ႇ ၊ ရုၵ်ႈထူႉဢၼ်သွၼ်းႁဵတ်းလေႃႇႁဵတ်းၸိူဝ်းၼၼ်ႉဢေႃႈ။ ယိတ်ႈပရေႃးႁဵၵ်ႈၼၼ်ႉၸုၵ်းယူႇၵႃႈတီႈႁူးၽၵ်းတူ ဢိၵ်ႇလူၺ်ႈၵၼ်တင်းၵူၼ်းႁူၵ်းပၢၵ်ႇဢၼ်ပႃးလၢၵ်ႈၼၢၵ်ႈတိုၵ်းသိုၵ်းၸိူဝ်းၼၼ်ႉဢေႃႈ။-

18မိူဝ်ႈဢၼ်ၵူၼ်းၸိူဝ်းၼၼ်ႉ ၶဝ်ႈၵႃႈၼႂ်းႁိူၼ်း မီႉၶႃႇ လႄႈ သိမ်းဢဝ်ရုၵ်ႈထူႉဢၼ်တွင်ႈႁဵတ်းၶၵ်းႁဵတ်း၊ သိူဝ်ႈသုပ်းၸဝ်ႈ၊ ရုၵ်ႈထူႉ တေႇရၽိမ်ႇ ၊ ရုၵ်ႈထူႉဢၼ်သွၼ်းႁဵတ်းလေႃႇႁဵတ်းၸိူဝ်းၼၼ်ႉယဝ်ႉၼၼ်ႉၸိုင်၊ ယိတ်ႈပရေႃးႁဵၵ်ႈၼၼ်ႉ တွင်ႈထၢမ်တီႈၶဝ်လႄႈဝႃႈ၊ သူႁဵတ်းၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

19ၶဝ်ၼၼ်ႉဢွၼ်ၵၼ်ၶိုၼ်းလၢတ်ႈလႄႈဝႃႈ၊ ယူႇတဵတ်ႇတဵတ်ႇသေၵမ်း။ ဢဝ်မိုဝ်းၸဝ်ႈတူမ်းသူပ်းၸဝ်ႈယူႇသေလႄႈ ၵႂႃႇလူၺ်ႈၵၼ်တင်းႁဝ်းၶႃႈသေၵမ်း။ ႁဵတ်းပေႃႈႁဝ်းၶႃႈ၊ ယိတ်ႈပရေႃးႁဵၵ်ႈႁဝ်းၶႃႈသေၵမ်း။ လီႁဵတ်းယိတ်ႈပရေႃးႁဵၵ်ႈတီႈႁိူၼ်းလဵဝ်ၵူၺ်းႁိုဝ်။ ဢမ်ႇၼၼ် လီႁဵတ်းယိတ်ႈပရေႃးႁဵၵ်ႈတီႈမဵဝ်းၼိုင်ႈ၊ တင်းပီႈၼွင်ႉၸိူဝ်ႉၶိူဝ်းၶိူဝ်းၼိုင်ႈ ၵႃႈၼႂ်းမဵဝ်း ဢီႉသရေႇလႃႉ ႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

20ယိတ်ႈပရေႃးႁဵၵ်ႈၼၼ်ႉ မီးၸႂ်ဢၼ်ၸူမ်းသိူဝ်းမူၼ်ႈပျေႃႇလႄႈ ဢဝ်သိူဝ်ႈသုပ်း၊ ရုၵ်ႈထူႉ တေႇရၽိမ်ႇ ၊ ရုၵ်ႈထူႉဢၼ်တွင်ႈႁဵတ်း ၶၵ်းႁဵတ်းၼၼ်ႉသေယဝ်ႉ၊ ပႃးၸွမ်းၵႂႃႇၵႃႈၼႂ်းမုၵ်ႉၵူၼ်းၸိူဝ်းၵူၼ်းၼၼ်ႉဢေႃႈ။-

21ၶဝ်ၼၼ်ႉဝၢႆႇၶိုၼ်းၵႂႃႇလႄႈ ဢဝ်လုၵ်ႈဢွၼ်ႇလႂ်၊ တရိၵ်ႈသၢၼ်ႇလႂ်၊ ၶူဝ်းႁၢပ်ႇလႂ် ဝႆႉဢွၼ်တၢင်းၶဝ်ဢေႃႈ။

22မိူဝ်ႈဢၼ်ၵႆၵၼ်တင်းႁိူၼ်း မီႉၶႃႇ ယဝ်ႉၼၼ်ႉၸိုင်၊ ၵူၼ်းဢၼ်ယူႇႁိူၼ်းၸမ်ၵၼ်တင်းႁိူၼ်း မီႉၶႃႇ ၼၼ်ႉၸိူဝ်းၼၼ်ႉ ၸူႉၵၼ်တုမ်ၵၼ်သေလႄႈ လိုပ်ႈၸွမ်းလမ်းၸွမ်းႁႂ်ႈထၼ်ႈပေႃးၶိုတ်းၵူၼ်းမဵဝ်း တၢၼ်ႇ ၸိူဝ်းၼၼ်ႉဢေႃႈ။-

23မိူဝ်ႈဢၼ်ၶဝ်ႁွင်ႉသႅၼ်ႇတီႈၵူၼ်းမဵဝ်း တၢၼ်ႇ ၸိူဝ်းၼၼ်ႉၸိုင်၊ ၶဝ်ၼၼ်ႉဝၢႆႇၼႃႈၶဝ်ၶိုၼ်းယူႇသေလႄႈတွင်ႈထၢမ်တီႈ မီႉၶႃႇ လႄႈဝႃႈ၊ မႂ်းၼႆႉမီးလွင်ႈၵႃႈသင်လႄႈ ပႃးဢဝ်တင်းမုၵ်ႉၵူၼ်းၸိူဝ်းၵူၼ်းထၢၼ်ႇၼႆႉၸွမ်းမႃး၊ မိူဝ်ႈဢၼ်ဝႃႈၼင်ႇၼႆၸိုင်၊-

24မၼ်းၼၼ်ႉလၢတ်ႈလႄႈဝႃႈ သူဢဝ်ၽြႃးဢၼ်ၵဝ်ႁဵတ်းၸိူဝ်းၼၼ်ႉ ဢိၵ်ႇတင်းယိတ်ႈပရေႃးႁဵၵ်ႈသေလႄႈ ၵႂႃႇလူင်ပႄႇ။ ၼွၵ်ႈသေၼၼ်ႉ ၵဝ်ယင်းမီးလွင်ႈတၢင်းဢၼ်လႂ်လူးၵွၼ်ႇ။ ၵူၺ်းၵႃႈ သူယင်းထၢမ်လႄႈဝႃႈ၊ မီးလွင်ႈၵႃႈသင်၊ ဝႃႈၼင်ႇၼႆလူင်ပႄႇ၊ မိူဝ်ႈဢၼ်ဝႃႈၼင်ႇၼႆၸိုင်၊-

25ၵူၼ်းမဵဝ်း တၢၼ်ႇ ၸိူဝ်းၼၼ်ႉ လၢတ်ႈတီႈမၼ်းလႄႈဝႃႈ၊ ယႃႇပေႁႂ်ႈၵႃႈၼႂ်းႁဝ်းၼႆႉ လႆႈငိၼ်းၵႂၢမ်းမႂ်းသေၵမ်း။ ပေႃးဢမ်ႇၼၼ် ၵူၼ်းဢၼ် ၸႂ်လမ်သႆႈၵမ်ႇၸိူဝ်းၼၼ်ႉ တၵ်းဢွၼ်ၵၼ်ႁဵတ်းတီႈမႂ်းလႄႈ ဢသၢၵ်ႈမႂ်းဢိၵ်ႇတင်းဢသၢၵ်ႈၵူၼ်းႁိူၼ်းၵူၼ်းယေးမႂ်းတင်းလၢႆ ၸၢင်ႈၶႄးတၵ်းသုမ်းဢေႃႈ၊ ဝႃႈၼင်ႇၼႆယူႇသေလႄႈ၊-

26ၵူၼ်းမဵဝ်း တၢၼ်ႇ ၸိူဝ်းၼၼ်ႉၵႂႃႇတၢင်းပႆတၢင်းယူႇဢေႃႈ။ မီႉၶႃႇ ၼၼ်ႉႁူႉႁၼ်လွင်ႈဢၼ်ၶဝ်ပဵၼ်ဢၼ်ႁႅင်းယႂ်ႇၼႃႇသေမၼ်းၼၼ်ႉသေယဝ်ႉ၊ ဝၢႆႇၶိုၼ်းလႄႈမိူဝ်းၵႂႃႇၸူးၵႃႈတီႈႁိူၼ်းမၼ်းသေဢေႃႈ။-

27ၶဝ်ၼၼ်ႉဢဝ်ၶိူင်ႈပိူင်ဢၼ် မီႉၶႃႇ ႁဵတ်းၼၼ်ႉ ဢိၵ်ႇတင်းယိတ်ႈပရေႃးႁဵၵ်ႈဢၼ်ယူႇၵႃႈတီႈမၼ်းၼၼ်ႉၵႂႃႇလႄႈ ႁွတ်ႈထိုင်ၵႃႈတီႈဝဵင်း လေႇသႃႉ တီႈဢၼ်ၵူၼ်းတင်းလၢႆ ယင်းဢမ်ႇထၢင်ႇဢမ်ႇထိူမ်ၵႃႈသင်လႄႈ ယူႇၼိမ်ၼိမ်လီလီၼၼ်ႉသေယဝ်ႉ၊ တိုၵ်းတေႃးယႃႉၶဝ်ပႅတ်ႈ လူၺ်ႈၶူမ်းလၢပ်ႇၶူမ်းလႅဝ်းလႄႈ ဢဝ်ၽႆးတုတ်ႇဝဵင်းပႅတ်ႈဢေႃႈ။-

28ၵွပ်ႈပိူဝ်ႈဢၼ်ၵႆၵၼ်တင်းဝဵင်း ၸီႉတုၼ်ႇ ဢိၵ်ႇတင်းၵွပ်ႈပိူဝ်ႈဢၼ်ဢမ်ႇႁဵတ်းတၢင်းဢၼ်ၶဝ်ႈဢၼ်ဢွၵ်ႇတီႈပိူၼ်ႈ သေၵေႃႉသေၵူၼ်းၼၼ်ႉလႄႈ ဢမ်ႇမီးၵေႃႉဢၼ်ၵႄႇသႄႇၼုၵ်ႈဢဝ်ၶဝ်။ ဝဵင်းၼၼ်ႉမီးယူႇၵႃႈၼႂ်းပၢင်ႇႁူၺ်ႈ ဢၼ်မီးၵႃႈတီႈႁိမ်းဝဵင်း ပႅတ်ႉရႁေႃႇၽႃႉ ၼၼ်ႉဢေႃႈ။ ၵႃႈတီႈၼၼ်ႈ ၶဝ်တႄႇႁဵတ်းဝဵင်းဢၼ်မႂ်ႇသေလႄႈယူႇဢေႃႈ။-

29ဝဵင်းၼၼ်ႉၸိုင် ၶဝ်ၸွမ်းလူၺ်ႈၸိုဝ်ႈသဵင် တၢၼ်ႇ ဢၼ်ပဵၼ်ပေႃႈမဵဝ်းၶဝ် ဢၼ်ပဵၼ်လုၵ်ႈၸၢႆး ဢီႉသရေႇလႃႉ ၼၼ်ႉသေလႄႈ ႁွင်ႉႁဵၵ်ႈၸိုဝ်ႈ ဝဵင်း တၢၼ်ႇ ဢေႃႈ။ ၸိုဝ်ႈၵဝ်ႇသဵင်ၵဝ်ႇဝဵင်းၼၼ်ႉၸမ်ႉ၊ ပဵၼ် လေႇသႃႉ ဢေႃႈ။-

30ၵူၼ်းမဵဝ်း တၢၼ်ႇ ၸိူဝ်းၼၼ်ႉ ဢဝ်ရုၵ်ႈထူႉ ဢၼ် မီႉၶႃႇ တွင်ႈႁဵတ်းၶၵ်းႁဵတ်းၼၼ်ႉ တႄႇဝႆႉတင်ႈဝႆႉပုၼ်ႈၶဝ်လႄႈ ယေႃးၼသၼ်ႇ လုၵ်ႈၸၢႆး ၵေႇရသုၼ်ႇ လုၵ်ႈၸၢႆး မူဝ်းသေႇ ၼၼ်ႉ ဢိၵ်ႇလူၺ်ႈၵၼ်တင်းလုၵ်ႈၸၢႆးမၼ်းတင်းလၢႆ ႁဵတ်းယိတ်ႈပရေႃးႁဵၵ်ႈတီႈမဵဝ်း တၢၼ်ႇ တေႃႇထိုင်ႁွတ်ႈဝၼ်းမိူဝ်ႈဢၼ် ဢဝ်ၵူၼ်းဝၢၼ်ႈၵူၼ်းမိူင်းတင်းလၢႆ ၶၢႆႉတီႈၵႂႃႇၼၼ်ႉဢေႃႈ။-

31ၼင်ႇၼၼ်လႄႈ ၶဝ်ဢဝ်ရုၵ်ႈထူႉဢၼ် မီႉၶႃႇ သွၼ်းႁဵတ်းလေႃႇႁဵတ်းၼၼ်ႉ တႄႇဝႆႉတင်ႈဝႆႉၼႂ်းၶိင်ႇၵႃႇလႃႉ ၸူဝ်ႈပၢၼ်ဢၼ်ႁိူၼ်းၽြႃးပဵၼ်ၸဝ်ႈ မီးယူႇၵႃႈတီႈဝဵင်း သီႉလေႃႇ ၼၼ်ႉ တဵမ်တဵမ်ၼၼ်ႉဢေႃႈ။

← Chapter 17 Jump to: Chapter 19 →