Judges 6 — Shan

1လႆႈသမ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ ႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးထႅင်ႈလႄႈ ထႃႇဝရႃႉၽြႃးသမ်ႉဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်း မီႉတျၼ်ႇ ၸဵတ်းပီႊတဵမ်တဵမ်ဢေႃႈ။-

2မဵဝ်း မီႉတျၼ်ႇ ၼၼ်ႉ ႁဵတ်းပႄႉႁဵတ်းၼႅင်ႇမဵဝ်း ဢီႉသရေႇလႃႉ လႄႈ ၵူၼ်းမဵဝ်း ဢီႉသရေႇလႃႉ တင်းလၢႆ လႆႈမႄးႁဵတ်းႁွင်ႈႁဵတ်းၶူးဢၼ်မီးၵႃႈတီႈၵႄႈလွႆ ဢိၵ်ႇတင်းႁူးထမ်ႈႁူးလွႆတၢင်ႇတီႈဢၼ်မၼ်ႈဢၼ်ၶိူင်ႇတင်းလၢႆပုၼ်ႈၶဝ် ၵွပ်ႈပိူဝ်ႈမဵဝ်း မီႉတျၼ်ႇ ၼၼ်ႉဢေႃႈ။-

3မိူဝ်ႈဢၼ်မဵဝ်း ဢီႉသရေႇလႃႉ ဝၢၼ်ႇၸိူဝ်ႉဝၢၼ်ႇၽၼ်းယဝ်ႉၼၼ်ႉၸိုင် ၵူၼ်းမိူင်း မီႉတျၼ်ႇ ဢိၵ်ႇတင်းၵူၼ်းမိူင်း ဢႃႇမလႅၵ်ႉ တင်းၵူၼ်းမိူင်းဝၼ်းဢွၵ်ႇတင်းလၢႆ ဢွၼ်ၵၼ်မႃးလႄႈ၊-

4ၶီႇသိုၵ်းၶဝ်သေလႄႈ ၶျႃးတပ်ႉၶဝ်သေယဝ်ႉ ပႄႇၽဵဝ်ႈပႅတ်ႈမၢၵ်ႇလိၼ်ႁူင်းလိၼ်တေႃႇထိုင်ႁွတ်ႈ ဝဵင်း ၵႃႇၸႃႉ ယူႇသေလႄႈ ဢမ်ႇဝႆႉၵိုတ်းဝႆႉၵျၢၼ်ႇပုၼ်ႈဢၼ်တၵ်းၵိၼ်တၵ်းၶူပ်း ဢိၵ်ႇတင်းသူဝ်း၊ ဝူဝ်း၊ လီႈ သေၸိူဝ်ႉသေပိူင်။-

5ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၶဝ်ၼၼ်ႉပႃးတင်းတရိၵ်ႈသၢၼ်ႇၶဝ်တင်းမူဝ်းၵႃႇၶဝ်သေလႄႈ မႃးၼမ်ၼႃႇလူင်လၢင် မိူၼ်ၸိူဝ်ႉၼင်ႇမႅင်းၵႅင်းၼၼ်ႉဢေႃႈ။ ၶဝ်ဢိၵ်ႇတင်းၵလႃးဢုၵ်ႉၶဝ်ၸိူဝ်းၼၼ်ႉ ၼမ်ၼႃႇထၼ်ႈပေႃး ဢမ်ႇၼပ်ႉဢမ်ႇဢၢၼ်ႇလႆႈလႄႈ ဢွၼ်ၵၼ်မႃးႁႂ်ႈလႆႈယႃႉဝၢၼ်ႈယႃႉမိူင်းပႅတ်ႈဢေႃႈ။-

6ၵူၼ်းမဵဝ်း ဢီႉသရေႇလႃႉ တင်းလၢႆ တူၵ်းတႅမ်ႇတူၵ်းယေႃႈၼႃႇလူင်လၢင် ၵွပ်ႈပိူဝ်ႈၵူၼ်းမဵဝ်း မီႉတျၼ်ႇ ၸိူဝ်းၼၼ်ႉလႄႈ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ႁွင်ႉသႅၼ်ႇတီႈထႃႇဝရႃႉၽြႃးဢေႃႈ။

7ၼင်ႇၼၼ်လႄႈ မိူဝ်ႈဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ ႁွင်ႉသႅၼ်ႇတီႈထႃႇဝရႃႉၽြႃး ၵွပ်ႈပိူဝ်ႈၵူၼ်းမဵဝ်း မီႉတျၼ်ႇ တင်းလၢႆၼၼ်ႉၸိုင်၊-

8ထႃႇဝရႃႉၽြႃး ပွႆႇၸႂ်ႉပရေႃးၽႅတ်ႈၵေႃႉၼိုင်ႈ မႃးၵႃႈတီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈ မၼ်းၼၼ်ႉလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ မီးဢမိင်ႉလႄႈဝႃႈၸမ်ႉ၊ ၵဝ်ၼုၵ်ႈဢဝ်သူဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ လႄႈ ဢဝ်သူဢွၵ်ႇသေၵႃႈၼႂ်းတီႈဢၼ်ၶၢမ်ႇႁဵတ်းၶႃႈၼၼ်ႉမႃးယဝ်ႉ။-

9ၵဝ်ၵႄႇသႄႇၼုၵ်ႈဢဝ်သူဢွၵ်ႇသေၵႃႈၼႂ်းမိုဝ်းၵူၼ်း ဢေႇၵိပ်ႉတူႉ တင်းလၢႆ ဢိၵ်ႇတင်းၵႃႈၼႂ်းမိုဝ်းၶဝ်ၸိူဝ်းဢၼ်ၼိၵ်ႈၸၢၵ်ႈငႅၼ်းသႄးသူတင်းသဵင်ႈတင်းလူင်ၼၼ်ႉလႄႈ ႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈသူလႄႈ ဢဝ်မိူင်းၶဝ်ပၼ်တီႈသူယဝ်ႉ။-

10ၵဝ်ပိင်းၺၢပ်ႈဝႆႉတီႈသူလႄႈဝႃႈ၊ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူဢေႃႈ။ ယႃႇပေၵူဝ်ပေႁႄၽြႃးၵူၼ်း ဢႃႇမေႃးရီႉ ဢၼ်သူယူႇၵႃႈၼႂ်းမိူင်းၶဝ်ၼၼ်ႉ ဝႃႈၼင်ႇၼႆသေၵေႃႈ၊ သူဢမ်ႇထွမ်ႇဢမ်ႇဢဝ်ၵႂၢမ်းၵဝ်၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။

11လႆႈသမ်ႉ တမၢၼ်ႇၵၢင်ႁၢဝ်ထႃႇဝရႃႉၽြႃး မႃးလႄႈၼင်ႈယူႇၵႃႈတီႈတႂ်ႈတူၼ်ႈမႆႉၼိမ် ၵႃႈတီႈဝၢၼ်ႈ ဢေႃႇၽရႃႉ ဢၼ် ယေႃးသႃႉ ၵူၼ်းမဵဝ်း ဢပျေႇၸႃႇ ပိူင်ႇၼၼ်ႉဢေႃႈ။ ၵီႉတီႉဢုၼ်ႇ လုၵ်ႈၸၢႆးမၼ်းၼၼ်ႉ ပေႃႉၶဝ်ႈၵျုင်ႇမၼ်းယူႇၵႃႈၼႂ်းၶုမ်ၶိူင်ႈယဵပ်ႇမၢၵ်ႇၸပိတ်ႈ ႁႂ်ႈလႆႈဢဝ်သိူင်ႇဢဝ်မႅပ်ႉ ၵူၼ်းမဵဝ်း မီႉတျၼ်ႇ တင်းလၢႆဢေႃႈ။-

12တမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးတီႈမၼ်းလႄႈ လၢတ်ႈတီႈမၼ်းလႄႈဝႃႈ၊ ၵူၼ်းသိုၵ်းဢၼ်ႁႅင်းယႂ်ႇၼႃႇၼႆႉဢိူၺ်း၊ ထႃႇဝရႃႉၽြႃးမီးယူႇလူၺ်ႈၵၼ်တင်းမႂ်းဢေႃႈ၊ ဝႃႈၼင်ႇၼႆသေယဝ်ႉ၊-

13ၵီႉတီႉဢုၼ်ႇ ၼၼ်ႉ ၶိုၼ်းလၢတ်ႈလႄႈဝႃႈ၊ ၸဝ်ႈၵဝ်ၶႃႈဢိူၺ်း၊ ပေႃးထႃႇဝရႃႉၽြႃးမီးယူႇလူၺ်ႈၵၼ်တင်းႁဝ်းၶႃႈဢမၢၼ်ႇၶၼ်ပဵၼ်ၸိုင်၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ဢမူႉလူင်ၼႆႉႁွတ်ႈထိုင်ၵႃႈၼိူဝ်ႁဝ်းၶႃႈၼင်ႇႁိုဝ်ၶႃႈ။ လွင်ႈတၢင်းဢၼ်လီဢၢမ်းဢၼ်မၼ်းၸဝ်ႈ ႁဵတ်းၵႃႈၼင်ႇဢၼ်ပူႇပေႃႈႁဝ်းၶႃႈ လၢတ်ႈတီႈႁဝ်းၶႃႈလႄႈဝႃႈ၊ ထႃႇဝရႃႉၽြႃးၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးဢေႃႈ၊ ဝႃႈၼင်ႇၼႆၵႃႈမီးတင်းသဵင်ႈတင်းလူင်ၼၼ်ႉ မီးၵႃႈလႂ်ၶႃႈ။ တေႃႈလဵဝ်ၼႆႉ ထႃႇဝရႃႉၽြႃးၸုၼ်ႉပႅတ်ႈႁဝ်းၶႃႈလႄႈ ဢဝ်ႁဝ်းၶႃႈဢၢပ်ႈပၼ်ၵႃႈၼႂ်းမိုဝ်းၵူၼ်းမဵဝ်း မီႉတျၼ်ႇ တင်းလၢႆယဝ်ႉလူင်ပႄႇ၊ မိူဝ်ႈဢၼ်ဝႃႈၼင်ႇၼႆၸိုင်၊-

14ထႃႇဝရႃႉၽြႃးၼၼ်ႉယႅၵ်ႉတူၺ်းမၼ်းလႄႈမီးဢမိင်ႉလႄႈဝႃႈ၊ ဢိင်ပိုင်ႈတၼ်းၶူဝ်းဢၼ်မႂ်းလႆႈတေႃႈလဵဝ်ၼႆႉယူႇသေလႄႈ ၵႂႃႇတႃႉ။ မႂ်းတၵ်းလႆႈၵႄႇသႄႇၼုၵ်ႈဢဝ်မဵဝ်း ဢီႉသရေႇလႃႉ ၵႃႈၼႂ်းမိုဝ်းၵူၼ်းမဵဝ်း မီႉတျၼ်ႇ တင်းလၢႆၼၼ်ႉဢေႃႈ။ ၵဝ်ပွႆႇၸႂ်ႉမႂ်းယဝ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။-

15မၼ်းၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈၵဝ်ၶႃႈဢိူၺ်း၊ ၵဝ်ၶႃႈၼႆႉတၵ်းႁဵတ်းၸိူဝ်ႉၼင်ႇႁိုဝ်ၵႄႇသႄႇၼုၵ်ႈဢဝ်မဵဝ်း ဢီႉသရေႇလႃႉ လႆႈၶႃႈ။ ၼႂ်းမဵဝ်း မၼႃႇသေႇ ၼႆႉ ပီႈၼွင်ႉၸိူဝ်ႉၶိူဝ်းၵဝ်ၶႃႈ ပဵၼ်ဢၼ်ယၢၵ်ႈဢၼ်ၽၢၼ်ၼႃႇသေပိူၼ်ႈၶႃႈဢေႃႈ။ ၵဝ်ၶႃႈၼႆႉၵေႃႈ ပဵၼ်ၵေႃႉဢၼ်ယုတ်ႈဢၼ်ယွမ်းၼႃႇသေပိူၼ်ႈ ၵႃႈၼႂ်းပီႈၼွင်ႉၸိူဝ်ႉၶိူဝ်းၵဝ်ၶႃႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

16ထႃႇဝရႃႉၽြႃး မီးဢမိင်ႉလႄႈဝႃႈ၊ ၵဝ်တၵ်းမီးယူႇလူၺ်ႈၵၼ်တင်းမႂ်းဢမၢၼ်ႇၶၼ်ပဵၼ်လႄႈ မႂ်းတၵ်းလႆႈတိုၵ်းတေႃးယႃႉပႅတ်ႈၵူၼ်းမဵဝ်း မီႉတျၼ်ႇ တင်းလၢႆ မိူၼ်ၸိူဝ်ႉၼင်ႇဢၼ်တိုၵ်းတေႃးယႃႉပႅတ်ႈၵူၼ်းၵေႃႉလဵဝ်ၵူၺ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။-

17မၼ်းၵေႃႈတွင်းပၢၼ်ႇတီႈမၼ်းၸဝ်ႈလႄႈဝႃႈ၊ တေႃႈလဵဝ်ၼႆႉ ပေႃးၵဝ်ၶႃႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းၸိုင် ၶႅၼ်းတေႃႈၼႄပျႃးၼီႉမိၵ်ႈလၢၵ်ႈၶၼႃႇ လွင်ႈဢၼ်ပဵၼ်ၸဝ်ႈႁဝ်းဢၼ်လၢတ်ႈၵႂၢမ်းတေႃႇၵၼ်တင်းၵဝ်ၶႃႈၼၼ်ႉသေၵမ်းၶႃႈ။-

18ၶႅၼ်းတေႃႈယႃႇပေၵႂႃႇသေၵႃႈတီႈၼႆႈ တေႃႇထိုင်ႁွတ်ႈၵဝ်ၶႃႈၶိုၼ်းမႃးတီႈၸဝ်ႈႁဝ်းလႄႈ ဢဝ်ၶိူင်ႈပုၵ်ႈၸေႃႇၽေႃးၸဵၼ်ႇ မႃးတၢင်ႇတမ်းၵႃႈတီႈၽၢႆႇၼႃႈၸဝ်ႈႁဝ်းၼၼ်ႉသေၵမ်းၶႃႈ၊ ဝႃႈၼင်ႇၼႆသေယဝ်ႉ၊ မၼ်းၸဝ်ႈမီးဢမိင်ႉလႄႈဝႃႈ၊ ၵဝ်တၵ်းယူႇတေႃႇထိုင်ႁွတ်ႈမႂ်းၶိုၼ်းမႃးၼၼ်ႉဢေႃႈ၊ ဝႃႈၼင်ႇၼႆဢေႃႈ။

19ၵီႉတီႉဢုၼ်ႇ ၼၼ်ႉၶဝ်ႈၵႃႈၼႂ်းလႄႈ မႄးႁဵတ်းမႄးႁႅၼ်းပႄႉဢွၼ်ႇတူဝ်ၼိုင်ႈ ဢိၵ်ႇတင်းၶဝ်ႈမုၼ်းၶႅပ်းဢၼ်ဢမ်ႇပႃးၸိူဝ်ႉပႅင်ႈ ဢၼ်ဢဝ်တင်းၽွင်ၶဝ်ႈမုၼ်း ဢေးၽႃႇ ၼိုင်ႈႁဵတ်းၼၼ်ႉဢေႃႈ။ မၼ်းဢဝ်ၼိူဝ်ႉပႄႉၼၼ်ႉသႂ်ႇၵႃႈၼႂ်းပဵတ်ႈလႄႈ ဢဝ်ၼမ်ႉတူမ်ႈၼိူဝ်ႉပႄႉၼၼ်ႉ ထွၵ်ႇသႂ်ႇၵႃႈၼႂ်းမေႃႈသေယဝ်ႉ ဢဝ်မႃးၵႃႈတီႈမၼ်းၸဝ်ႈၵႃႈတႂ်ႈတူၼ်ႈမႆႉၼိမ်ၼၼ်ႉလႄႈ သၢၵ်ႈၵၢပ်ႈဢေႃႈ။-

20တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉၵေႃႈ မီးဢမိင်ႉတီႈမၼ်းလႄႈဝႃႈ၊ ဢဝ်ၼိူဝ်ႉၼၼ်ႉဢိၵ်ႇတင်းၶဝ်ႈမုၼ်းၶႅပ်းဢၼ်ဢမ်ႇပႃးၸိူဝ်ႉပႅင်ႈၸိူဝ်းၼၼ်ႉ တၢင်ႇဝႆႉၵႃႈၼိူဝ်မၢၵ်ႇႁိၼ်ၼႆႉတႃႉ။ ဢဝ်ၼမ်ႉတူမ်ႈၼိူဝ်ႉၼၼ်ႉထွၵ်ႇႁူတ်းသႂ်ႇတႃႉ၊ ဝႃႈၼင်ႇၼႆသေယဝ်ႉ၊ မၼ်းႁဵတ်းၸိူဝ်ႉၼင်ႇၼၼ်ဢေႃႈ။-

21မိူဝ်ႈၼၼ်ႉ တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉ ဢဝ်ပၢႆၶွၼ်ႉတဝ်ႉဢၼ်မိုဝ်းမၼ်းယိပ်းၵမ်ယူႇၼၼ်ႉ ယိုၼ်ႈလႄႈတိူဝ်ႉသႂ်ႇၼိူဝ်ႉ ဢိၵ်ႇတင်းၶဝ်ႈမုၼ်းၶႅပ်း ဢၼ်ဢမ်ႇပႃးၸိူဝ်ႉပႅင်ႈၸိူဝ်းၼၼ်ႉသေလႄႈ ၽႆးလုၵ်ႉဢွၵ်ႇမႃးၵႃႈၼႂ်းမၢၵ်ႇႁိၼ်ၼၼ်ႉလႄႈ မႆႈၼိူဝ်ႉဢိၵ်ႇတင်းၶဝ်ႈမုၼ်းၶႅပ်း ဢၼ်ဢမ်ႇပႃးၸိူဝ်ႉပႅင်ႈၸိူဝ်းၼၼ်ႉသေယဝ်ႉ၊ တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉ လပ်ႉႁၢႆၵႂႃႇသေဢေႃႈ။-

22မိူဝ်ႈဢၼ် ၵီႉတီႉဢုၼ်ႇ ႁူႉႁၼ်လွင်ႈဢၼ်ပဵၼ်တမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉၸိုင်၊ ၵီႉတီႉဢုၼ်ႇ လဝ်ႊလၢတ်ႈလႄႈဝႃႈ၊ ဢူဝ်းၸဝ်ႈထႃႇဝရႃႉၽြႃးတီႈၶႃႈ၊ ၵဝ်ၶႃႈၼႆႉလႆႈတေႃႇၼႃႈၵၼ်တင်းတမၢၼ်ႇၵၢင်ႁၢဝ်ထႃႇဝရႃႉၽြႃးသေလႄႈ ႁၼ်ယဝ်ႉတီႈၶႃႈလူင်ပႄႇ၊ မိူဝ်ႈဢၼ်ဝႃႈၼင်ႇၼႆၸိုင်-

23ထႃႇဝရႃႉၽြႃးမီးဢမိင်ႉလႄႈဝႃႈ၊ ႁႂ်ႈမႂ်းၵတ်းယဵၼ်ၶျၢမ်းသႃႇတႃႉ။ ယႃႇပေမႆႈၸႂ်။ မႂ်းဢမ်ႇလႆႈတၢႆၵူၺ်ႉ၊ ဝႃႈၼင်ႇၼႆဢေႃႈ။-

24မိူဝ်ႈၼၼ်ႉ ၵီႉတီႉဢုၼ်ႇ ၼၼ်ႉ တႄႇႁဵတ်းယိတ်ႈပလၢင်ႇပုၼ်ႈထႃႇဝရႃႉၽြႃး ၵႃႈတီႈၼၼ်ႈလႄႈႁွင်ႉႁဵၵ်ႈၸိုဝ်ႈ ယေႇႁေႃးဝႃႇသႃႇလုမ်ႇ ဢေႃႈ။ မီးယူႇၵႃႈတီႈဝၢၼ်ႈ ဢေႃႇၽရႃႉ တီႈဢၼ်ၵူၼ်း ဢပျေႇၸႃႇ ယူႇၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

25ၼႂ်းၶိုၼ်းၼၼ်ႉၵမ်းလဵဝ် ထႃႇဝရႃႉၽြႃးမီးဢမိင်ႉတီႈမၼ်းလႄႈဝႃႈ၊ မႂ်းဢဝ်ဝူဝ်းၼုမ်ႇဢွၼ်ႇပေႃႈမႂ်း ဢိၵ်ႇတင်းဝူဝ်းပေႃႈတူႉတီႉယႃႉ ဢၼ်ဢသၢၵ်ႈလႆႈၸဵတ်းပီႊၼၼ်ႉသေယဝ်ႉ ၵိူၼ်ႇယႃႉယိတ်ႈပလၢင်ႇၽြႃး ပႃႇလႃႉ ဢၼ်ပေႃႈမႂ်းတႄႇႁဵတ်းၼၼ်ႉပႅတ်ႈလႄႈ ၽၼ်းလူမ်ႉတူၼ်ႈ ဢႃႇသရႃႉ ဢၼ်မီးၵႃႈတီႈႁိမ်းမၼ်းၼၼ်ႉပႅတ်ႈတႃႉ။-

26တႄႇႁဵတ်းယိတ်ႈပလၢင်ႇပုၼ်ႈထႃႇဝရႃႉၽြႃး ၽြႃးပဵၼ်ၸဝ်ႈမႂ်းၵႃႈၼိူဝ် ပၢႆၸိၵ်းထႃႇၼႃႉတီႈဢၼ်မၼ်ႈဢၼ်ၶိူင်ႇၼႆႉ ၸွမ်းၵႃႈၼင်ႇတၢင်းဢၼ်လီမႄးလီႁႅၼ်းၼၼ်ႉသေယဝ်ႉ၊ ဢဝ်ဝူဝ်းပေႃႈတူႉတီႉယႃႉ ဢိၵ်ႇလူၺ်ႈၵၼ်တင်းမႆႉ တူၼ်ႈ ဢႃႇသရႃႉ ဢၼ်မႂ်းတၵ်းၽၼ်းလူမ်ႉၼၼ်ႉ ပုၵ်ႈၸေႃႇယိတ်ႈဢၼ်တုတ်ႇၽႆးတႃႉ၊ ဝႃႈၼင်ႇၼႆဢေႃႈ။-

27ၵီႉတီႉဢုၼ်ႇ ၵေႃႈ ႁွင်ႉဢဝ်ၶႃႈမၼ်းသိပ်းၵေႃႉလႄႈ ႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉၼၼ်ႉဢေႃႈ။ ၵွပ်ႈပိူဝ်ႈဢၼ် ၵူဝ်ႁႄၵူၼ်းႁိူၼ်းၵူၼ်းယေးပေႃႈမၼ်း ဢိၵ်ႇတင်းၵူၼ်းဝဵင်းတင်းလၢႆလႄႈ မၼ်းဢမ်ႇႁတ်းႁဵတ်းၼႂ်းၶိင်ႇၵၢင်ဝၼ်း၊ မၼ်းႁဵတ်းၼႂ်းၶိင်ႇၵၢင်ၶိုၼ်းဢေႃႈ။-

28မိူဝ်ႈဢၼ်ၵူၼ်းဝဵင်းတင်းလၢႆ လုၵ်ႉၶိင်ႇၵၢင်ၼႂ်ၸဝ်ႉၸဝ်ႉၼၼ်ႉၸိုင် ၶဝ်ထူပ်းႁၼ်ယိတ်ႈပလၢင်ႇၽြႃး ပႃႇလႃႉ ၵိူၼ်ႇလူႉယူႇ တူၼ်ႈ ဢႃႇသရႃႉ ဢၼ်မီးၵႃႈတီႈႁိမ်းမၼ်းၼၼ်ႉ လႆႈၶၢမ်ႇတၢင်းဢၼ်ၽၼ်းလူမ်ႉယူႇ ဢဝ်ဝူဝ်းပေႃႈတူႉတီႉယႃႉ ပုၵ်ႈၸေႃႇၵႃႈၼိူဝ်ယိတ်ႈပလၢင်ႇ ဢၼ်တႄႇႁဵတ်းဝႆႉၼၼ်ႉယူႇၼၼ်ႉသေယဝ်ႉ၊-

29ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်လၢတ်ႈၵၼ်ထၢမ်ၵၼ်လႄႈဝႃႈ၊ ၽူႈလႂ်ႁဵတ်းဢမူႉၼႆႉ၊ ဝႃႈၼင်ႇၼႆဢေႃႈ။ ၶဝ်ၸႅတ်ႈထၢမ်ၸႅတ်ႈတူၺ်းၵၼ်ၸိူဝ်ႉၼင်ႇၼၼ်သေယဝ်ႉ ၵမ်ႈၽွင်ႈလၢတ်ႈလႄႈဝႃႈ၊ ၵီႉတီႉဢုၼ်ႇ လုၵ်ႈၸၢႆး ယေႃးသႃႉ ၼၼ်ႉ ႁဵတ်းဢမူႉၼႆႉယဝ်ႉ၊ ဝႃႈၼင်ႇၼႆဢေႃႈ။-

30မိူဝ်ႈၼၼ်ႉ ၵူၼ်းဝဵင်းတင်းလၢႆ ဢွၼ်ၵၼ်လၢတ်ႈတီႈ ယေႃးသႃႉ လႄႈဝႃႈ၊ ဢဝ်လုၵ်ႈၸၢႆးမႂ်းၼၼ်ႉ ဢွၵ်ႇႁႂ်ႈမၼ်းလႆႈၶၢမ်ႇတၢႆ ၵွပ်ႈပိူဝ်ႈဢၼ်မၼ်းၵိူၼ်ႇယႃႉယိတ်ႈပလၢင်ႇၽြႃး ပႃႇလႃႉ ပႅတ်ႈလႄႈ ၽၼ်းလူမ်ႉတူၼ်ႈ ဢႃႇသရႃႉ ဢၼ်မီးၵႃႈတီႈႁိမ်းမၼ်းၼၼ်ႉပႅတ်ႈၼၼ်ႉတႃႉ၊ ဝႃႈၼင်ႇၼႆသေၵေႃႈ၊-

31ယေႃးသႃႉ ၶိုၼ်းလၢတ်ႈတီႈၶဝ်ၸိူဝ်းဢၼ် ၸုၵ်းယူႇၵႃႈတီႈႁိမ်းႁွမ်းလဵပ်ႈႁွပ်ႈမၼ်း တင်းသဵင်ႈတင်းလူင်ၼၼ်ႉလႄႈဝႃႈ၊ သူတၵ်းယူႇၽၢႆႇၽြႃး ပႃႇလႃႉ သေလႄႈလၢတ်ႈဢမူႉႁိုဝ်။ သူတၵ်းၵႄႇသႄႇၶျွတ်ႈဢဝ်မၼ်းႁိုဝ်။ ႁႂ်ႈၵေႃႉဢၼ်ယူႇၽၢႆႇမၼ်းသေလႄႈ လၢတ်ႈဢမူႉၼၼ်ႉ ၶၢမ်ႇတၢႆၼႂ်းၶိင်ႇၵၢင်ၼႂ်ၼႆႉၵမ်းလဵဝ်သေ။ ပေႃးမၼ်းၸႂ်ႈၽြႃးၸိုင် ႁႂ်ႈမၼ်းယူႇၽၢႆႇတူဝ်ၸဝ်ႈၵဝ်ႇသေလႄႈ လၢတ်ႈဢမူႉမၼ်း ၵွပ်ႈပိူဝ်ႈဢၼ်သေၵေႃႉသေၵူၼ်း ၵိူၼ်ႇယႃႉယိတ်ႈပလၢင်ႇမၼ်းပႅတ်ႈၼၼ်ႉသေ၊ ဝႃႈၼင်ႇၼႆဢေႃႈ။-

32ပိူဝ်ႈၼႆလႄႈ ၼႂ်းဝၼ်းၼၼ်ႉ ၶဝ်ႁွင်ႉႁဵၵ်ႈၸိုဝ်ႈလုၵ်ႈၸၢႆးမၼ်းၼၼ်ႉ ယေႇရုပ်ႉပႃႇလႃႉ လႄႈဝႃႈ၊ ၵွပ်ႈပိူဝ်ႈဢၼ်သေၵေႃႉသေၵူၼ်း ၵိူၼ်ႇယႃႉပႅတ်ႈယိတ်ႈပလၢင်ႇ ပႃႇလႃႉ ၼၼ်ႉလႄႈ ႁႂ်ႈ ပႃႇလႃႉ ယူႇၽၢႆႇတူဝ်ၸဝ်ႈၵဝ်ႇသေလႄႈ လၢတ်ႈဢမူႉၵၼ်တင်းမၼ်းၼၼ်ႉသေ၊ ဝႃႈၼင်ႇၼႆၼၼ်ႉဢေႃႈ။

33မိူဝ်ႈၼၼ်ႉ ၵူၼ်းမိူင်း မီႉတျၼ်ႇ ဢိၵ်ႇတင်းၵူၼ်းမိူင်း ဢႃႇမလႅၵ်ႉ တင်းၵူၼ်းမိူင်းဝၼ်းဢွၵ်ႇတင်းသဵင်ႈတင်းလူင်ၸိူဝ်းၼၼ်ႉ ၸူႉၵၼ်တုမ်ၵၼ်သေလႄႈ ၶၢမ်ႈမႃးလႄႈၶျႃးတပ်ႉၶဝ် ၵႃႈၼႂ်းပၢင်ႇႁူၺ်ႈ ယေႇၸရေႇလႃႉ ဢေႃႈ။-

34ဝီႉၺိၺ်ႇထႃႇဝရႃႉၽြႃး ႁွတ်ႈထိုင်ၵႃႈၼိူဝ် ၵီႉတီႉဢုၼ်ႇ သေယဝ်ႉ မၼ်းပဝ်ႇၼႄးၶရႃႇၵႂႃႇလႄႈ ၵူၼ်းမဵဝ်း ဢပျေႇၸႃႇ ဢွၼ်ၵၼ်ၸွမ်းလင်မၼ်းဢေႃႈ။-

35မၼ်းပွႆႇၸႂ်ႉတမၢၼ်ႇတင်းလၢႆၵႂႃႇၼႂ်းဢိူင်ႇ မၼႃႇသေႇ ၵူႈတီႈၵူႈလႅၼ်လႄႈ ၶဝ်ၼၼ်ႉဢွၼ်ၵၼ်ၸွမ်းလင်မၼ်းဢေႃႈ။ မၼ်းသမ်ႉပွႆႇၸႂ်ႉတမၢၼ်ႇတင်းလၢႆၵႂႃႇ ၵႃႈတီႈဢိူင်ႇ ဢႃႇသႃႇ ၊ ဢိူင်ႇ ၸေႇပူႉလုၼ်ႇ ၊ ဢိူင်ႇ ၼပ်ႉထလီႉ လႄႈ ၶဝ်ၼၼ်ႉၵေႃႈဢွၼ်ၵၼ်မႃးႁႂ်ႈလႆႈထူပ်းႁၼ်ၶဝ်ဢေႃႈ။-

36ၵီႉတီႉဢုၼ်ႇ ၵေႃႈ လဝ်ႊယွၼ်းတီႈၽြႃးပဵၼ်ၸဝ်ႈလႄႈဝႃႈ၊ ပေႃးၸဝ်ႈႁဝ်းတၵ်းဢဝ်ၶႃႈၸဝ်ႈၵႄႇသႄႇၶျွတ်ႈဢဝ်ၵူၼ်းမဵဝ်း ဢီႉသရေႇလႃႉ တင်းလၢႆၸွမ်းၵႃႈၼင်ႇဢၼ် ၸဝ်ႈႁဝ်းမီးဢမိင်ႉဝႆႉၼၼ်ႉဢမၢၼ်ႇၶၼ်ပဵၼ်ၸိုင်၊-

37ၶႃႈၸဝ်ႈတၵ်းဢဝ်ၶူၼ်သူဝ်းတူဝ်ၼိုင်ႈဝႆႉၵႃႈတီႈတလၢင်းယဵပ်ႇၶဝ်ႈတီႈၶႃႈဢေႃႈ။ ပေႃးၼမ်ႉၼၢႆးယမ်းၶူၼ်သူဝ်းၵူၺ်းလႄႈ ၼိူဝ်ၼႃႈလိၼ်တင်းသဵင်ႈတင်းလူင် ႁႅင်ႈႁွင်ယူႇၸိုင် ၶႃႈၸဝ်ႈတၵ်းလႆႈႁူႉလွင်ႈဢၼ်ၸဝ်ႈႁဝ်း တၵ်းဢဝ်ၶႃႈၸဝ်ႈၵႄႇသႄႇၶျွတ်ႈဢဝ်မဵဝ်း ဢီႉသရေႇလႃႉ မႅၼ်ႈၵႃႈၼင်ႇဢၼ်ၸဝ်ႈႁဝ်းမီးဢမိင်ႉဝႆႉၼၼ်ႉတီႈၶႃႈဢေႃႈ၊ ဝႃႈၼင်ႇၼႆလႄႈ ပဵၼ်ၸိူဝ်ႉၼင်ႇၼၼ်ဢေႃႈ။-

38မၼ်းလုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ႁုပ်ႈဢဝ်ၶူၼ်သူဝ်းၼၼ်ႉသေယဝ်ႉ မိပ်ႇပၼ်ႈႁႂ်ႈၼမ်ႉၼၢႆးဢွၵ်ႇၵႃႈၼႂ်းၶူၼ်သူဝ်းၼၼ်ႉလႄႈ ၼမ်ႉၼၢႆးၼၼ်ႉလႆႈတဵမ်မေႃႈဢႅင်ႇလုၵ်ႈၼိုင်ႈဢေႃႈ။-

39ၵီႉတီႉဢုၼ်ႇ သမ်ႉလဝ်ႊယွၼ်းတီႈၽြႃးပဵၼ်ၸဝ်ႈထႅင်ႈလႄႈဝႃႈ၊ ၶႅၼ်းတေႃႈယႃႇပေႁႂ်ႈတၢင်းၸႂ်မႆႈၶႆႈၸႃႉၸဝ်ႈႁဝ်း ဢွၵ်ႇတီႈၶႃႈၸဝ်ႈသေၵမ်းတီႈၶႃႈ၊ ၶႃႈၸဝ်ႈတၵ်းလဝ်ႊယွၼ်းထႅင်ႈၵမ်းၼိုင်ႈၵူၺ်းလူးၵွၼ်ႇတီႈၶႃႈဢေႃႈ။ ၶႅၼ်းတေႃႈပၼ်ဢၶႂၢင်ႉဢၼ်လႆႈဢဝ် ၶူၼ်သူဝ်းတူဝ်ၼိုင်ႈၸၢမ်းတူၺ်းမိူဝ်ႈလဵဝ်ၼႆႉထႅင်ႈပွၵ်ႈၼိုင်ႈလူးၵွၼ်ႇသေၵမ်းတီႈၶႃႈ။ ႁႂ်ႈၶူၼ်သူဝ်းၵူၺ်းႁႅင်ႈႁွင်ဝႆႉလႄႈ ၼႃႈလိၼ်တင်းသဵင်ႈတင်းမူတ်းယမ်းၼမ်ႉၼၢႆးယူႇသေၵမ်းလူၺ်ႈတီႈၶႃႈ၊ ဝႃႈၼင်ႇၼႆလႄႈ၊-

40ၼႂ်းၶိုၼ်းၼၼ်ႉၵေႃႈ ၽြႃးပဵၼ်ၸဝ်ႈႁဵတ်းၸိူဝ်ႉၼင်ႇၼၼ်ဢေႃႈ။ ၶူၼ်သူဝ်းၼၼ်ႉၵူၺ်းႁႅင်ႈႁွင်ဝႆႉလႄႈ ၼႃႈလိၼ်တင်းသဵင်ႈတင်းမူတ်းယမ်းၼမ်ႉၼၢႆးယူႇဢေႃႈ။