Judges 7

Shan

← Chapter 6 Jump to: Chapter 8 →

1ယေႇရုပ်ႉပႃႇလႃႉ ဢၼ်ဝႃႈ ၵီႉတီႉဢုၼ်ႇ ၼၼ်ႉ ဢိၵ်ႇလူၺ်ႈၵၼ်တင်းၶဝ်ၸိူဝ်းဢၼ်မီးတီႈမၼ်းၵႃႈမီးတင်းသဵင်ႈတင်းလူင်ၼၼ်ႉ ဢွၼ်ၵၼ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ၶျႃးတပ်ႉၶဝ်ၵႃႈတီႈႁိမ်းၼမ်ႉဢွၵ်ႇႁူး ႁႃႇရုတ်ႉ လႄႈ တပ်ႉ မီႉတျၼ်ႇ ၼၼ်ႉ မီးၵႃႈတီႈၽၢႆႇတၢင်းႁွင်ႇၶဝ်ၵႃႈတီႈႁိမ်းလွႆ မေႃႇရေး ၵႃႈၼႂ်းပၢင်ႇႁူၺ်ႈၼၼ်ႉဢေႃႈ။-

2ထႃႇဝရႃႉၽြႃးၵေႃႈ မီးဢမိင်ႉတီႈ ၵီႉတီႉဢုၼ်ႇ လႄႈဝႃႈ၊ ၵူၼ်းတင်းလၢႆဢၼ်ပႃးတီႈမႂ်းၼႆႉ ပဵၼ်ဢၼ်ၼမ်ၼႃႇလူင်လၢင်လႄႈ ၵဝ်ဢမ်ႇဢဝ်ၵူၼ်း မီႉတျၼ်ႇ တင်းလၢႆၼၼ်ႉ ဢၢပ်ႈပၼ်ၵႃႈၼႂ်းမိုဝ်းၶဝ်။ ၵူၼ်းမဵဝ်း ဢီႉသရေႇလႃႉ တၵ်းယူႇၽၢႆႇၼိုင်ႈတင်းၵဝ်သေလႄႈ ဢုပ်ႇဢၢတ်ႇလႄႈဝႃႈ၊ ႁႅင်းမိုဝ်းၵဝ်ၼႆႉ ၵႄႇသႄႇၶျွတ်ႈဢဝ်ၵဝ်ယဝ်ႉ၊ ဝႃႈၼင်ႇၼႆဢေႃႈ။-

3ပိူဝ်ႈၼႆလႄႈ ၵႂႃႇလႄႈပၢဝ်ႇသေႃႇထိုင်ႁူၵူၼ်းတင်းလၢႆလႄႈဝႃႈ၊ ႁႂ်ႈၵေႃႉဢၼ်ၸၢင်ႈၵူဝ်ႁႄလႄႈတူၵ်းၸႂ်ၼၼ်ႉ ဝၢႆႇၶိုၼ်းလႄႈလုၵ်ႉသေၵႃႈတီႈလွႆ ၵီႉလတ်ႉ ၼႆႉ မိူဝ်းၵႂႃႇသေ၊ ဝႃႈၼင်ႇၼႆတႃႉ၊ ဝႃႈၼင်ႇၼႆသေယဝ်ႉ၊ ၵူၼ်းသွင်မိုၼ်ႇပၢႆသွင်ႁဵင် ဢွၼ်ၵၼ်ၶိုၼ်းမိူဝ်းၵႂႃႇလႄႈ ၵိုတ်းဝႆႉၵူၼ်းမိုၼ်ႇၼိုင်ႈၵူၺ်းဢေႃႈ။-

4ထႃႇဝရႃႉၽြႃးသမ်ႉမီးဢမိင်ႉတီႈ ၵီႉတီႉဢုၼ်ႇ ထႅင်ႈလႄႈဝႃႈ၊ ၵူၼ်းၸိူဝ်းၼႆႉ ယင်းၼမ်ၼႃႇလူင်လၢင်ဢေႃႈ။ ႁွင်ႉၶဝ်လူင်းၸူးၵႃႈတီႈတႃႈၼမ်ႉတႃႉ။ ၵဝ်တၵ်းၸၢမ်းတူၺ်းၶဝ် ၵႃႈတီႈၼၼ်ႈပုၼ်ႈမႂ်းဢေႃႈ။ မိူဝ်ႈၼၼ်ႉ ပေႃးၵဝ်လၢတ်ႈလႄႈဝႃႈ၊ ၵေႃႉဢၼ်ၸိူဝ်ႉၼင်ႇၼႆၼၼ်ႉ တၵ်းလႆႈၵႂႃႇလူၺ်ႈၵၼ်တင်းမႂ်းဢေႃႈ၊ ဝႃႈၼင်ႇၼႆၸိုင်၊ ၵေႃႉၼၼ်ႉတၵ်းလႆႈၵႂႃႇဢေႃႈ။ ပေႃးၵဝ်လၢတ်ႈလႄႈဝႃႈ၊ ၵေႃႉဢၼ်ၸိူဝ်ႉၼင်ႇၼႆၼၼ်ႉ ဢမ်ႇလႆႈၵႂႃႇလူၺ်ႈၵၼ်တင်းမႂ်း၊ ဝႃႈၼင်ႇၼႆၸိုင်၊ ၵေႃႉၼၼ်ႉဢမ်ႇလႆႈၵႂႃႇၵူၺ်ႉ၊ ဝႃႈၼင်ႇၼႆလႄႈ၊-

5မၼ်းႁွင်ႉဢဝ်ၵူၼ်းၸိူဝ်းၼၼ်ႉ လူင်းၸူးၵႃႈတီႈတႃႈၼမ်ႉလႄႈ ထႃႇဝရႃႉၽြႃးမီးဢမိင်ႉတီႈ ၵီႉတီႉဢုၼ်ႇ လႄႈဝႃႈ၊ ၽႄဢဝ်ၵေႃႉဢၼ်ဢဝ်လိၼ်ႉသေလႄႈ လေးၵိၼ်ၸိူဝ်ႉၼင်ႇဢၼ်မႃလေးၵိၼ်ၼမ်ႉၼၼ်ႉၸူႉၼိုင်ႈ ဢိၵ်ႇတင်းၵေႃႉဢၼ်ဢဝ်ႁူဝ်ၶဝ်ႇတဝ်ႉသေလႄႈ ၵူမ်ႈၵိၼ်ၼၼ်ႉၸူႉၼိုင်ႈ သွင်ၸူႉၼၼ်ႉဝႆႉႁင်းၽႂ်ႁင်းမၼ်းတႃႉ၊ ဝႃႈၼင်ႇၼႆဢေႃႈ။-

6မိူဝ်ႈၼၼ်ႉ ၶဝ်ၸိူဝ်းဢၼ်ဢဝ်ဢူင်ႈမိုဝ်းၶဝ်ဢဝ်ၼမ်ႉသေလႄႈ၊ လေးၵိၼ်ၼၼ်ႉ ၼပ်ႉဢၢၼ်ႇပွင်းၵၼ်မီးၵူၼ်း သၢမ်ပၢၵ်ႇဢေႃႈ။ ၵူၼ်းဢၼ်ၵိုတ်းဢၼ်ၵျၢၼ်ႇ ၵႃႈမီးၼၼ်ႉၸိုင် ဢဝ်ႁူဝ်ၶဝ်ႇၶဝ်တဝ်ႉသေလႄႈ ၵူမ်ႈမူပ်ႇႁႂ်ႈလႆႈၵိၼ်ၼမ်ႉဢေႃႈ။-

7ထႃႇဝရႃႉၽြႃးမီးဢမိင်ႉတီႈ ၵီႉတီႉဢုၼ်ႇ လႄႈဝႃႈ၊ ၵဝ်တၵ်းဢဝ်တင်းၵူၼ်းဢၼ်လေးသေလႄႈၵိၼ်သၢမ်ပၢၵ်ႇၼၼ်ႉ ၵႄႇသႄႇၶျွတ်ႈဢဝ်မႂ်းလႄႈ ဢဝ်ၵူၼ်း မီႉတျၼ်ႇ တင်းလၢႆ ဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ။ ႁႂ်ႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉ မိူဝ်းၵႂႃႇၵႃႈတီႈ တီႈယူႇၶဝ်သေ၊ ဝႃႈၼင်ႇၼႆဢေႃႈ။-

8ၶဝ်ဢွၼ်ၵၼ်ဢဝ်ၸရိပ်ႈတၢင်းၵိၼ်ၵူၼ်းတင်းလၢႆ ဢိၵ်ႇတင်းၼႄးၶရႃႇၶဝ်ၼၼ်ႉသေလႄႈ မၼ်းပွႆႇၵူၼ်းမဵဝ်း ဢီႉသရေႇလႃႉ ဢၼ်ၵိုတ်းဢၼ်ၵျၢၼ်ႇတင်းသဵင်ႈတင်းလူင်ၼၼ်ႉ မိူဝ်းၵႂႃႇၸူးၵႃႈတီႈမူဝ်းၵႃႇၶဝ်သေယဝ်ႉ၊ ဝႆႉၵိုတ်းၵူၼ်းသၢမ်ပၢၵ်ႇၼၼ်ႉၵူၺ်းတီႈမၼ်းဢေႃႈ။ တပ်ႉၵူၼ်း မီႉတျၼ်ႇ ၸိူဝ်းၼၼ်ႉ မီးၵႃႈတီႈႁၢၼ်ႉတႂ်ႈမၼ်း ၵႃႈၼႂ်းပၢင်ႇႁူၺ်ႈဢေႃႈ။

9ၼႂ်းၶမ်ႈၼၼ်ႉၵမ်းလဵဝ် ထႃႇဝရႃႉၽြႃးမီးဢမိင်ႉတီႈမၼ်းလႄႈဝႃႈ၊ လုၵ်ႉတႃႉ။ ၶီႇလူင်းၵႂႃႇၸူးၵႃႈတီႈတပ်ႉၼၼ်ႉတႃႉ။ ၵဝ်လႆႈဢဝ်ဢၢပ်ႈပၼ် ၵႃႈၼႂ်းမိုဝ်းမႂ်းယဝ်ႉ။-

10ပေႃးမႂ်းဢမ်ႇႁတ်းၶီႇလူင်းၵႂႃႇၸူးၸိုင်၊ ပႃးဢဝ်ၶႃႈမႂ်း ၽူႉရႃႉ သေလႄႈ တူဝ်မႂ်းလူင်းၵႂႃႇတႃႉ။-

11မႂ်းတၵ်းငိၼ်းလွင်ႈဢၼ်ၶဝ်လၢတ်ႈၵၼ်ၸိူဝ်ႉၼင်ႇႁိုဝ်ၼၼ်ႉဢေႃႈ။ လိုၼ်းၼၼ်ႉ ႁႅင်းမိုဝ်းမႂ်းတၵ်းႁႅင်းယႂ်ႇ ႁႂ်ႈလႆႈၶီႇလူင်းၵႂႃႇၸူးၵႃႈတီႈတပ်ႉၼၼ်ႉဢေႃႈ၊ ဝႃႈၼင်ႇၼႆလႄႈ မၼ်းပႃးဢဝ်ၶႃႈမၼ်း ၽူႉရႃႉ သေလႄႈ လူင်းၵႂႃႇၸူးၵႃႈတီႈႁိမ်းတီႈသုတ်းတပ်ႉတီႈဢၼ်ၵူၼ်းဢၼ်မႄးႁႅၼ်းလၢၵ်ႈၼၢၵ်ႈဝႆႉယဝ်ႉ တင်းလၢႆမီးၼၼ်ႉဢေႃႈ။-

12ၵူၼ်းမိူင်း မီႉတျၼ်ႇ ဢိၵ်ႇတင်း ၵူၼ်းမိူင်း ဢႃႇမလႅၵ်ႉ တင်းၵူၼ်းမိူင်းဝၼ်းဢွၵ်ႇ တင်းသဵင်ႈတင်းလူင်ၸိူဝ်းၼၼ်ႉ ဢွၼ်ၵၼ်ၶျႃးၼွၼ်းယူႇ ၵႃႈတီႈပၢင်ႇႁူၺ်ႈၼၼ်ႉလႄႈ ၼမ်ၼႃႇမိူၼ်ၸိူဝ်ႉၼင်ႇမႅင်းၵႅင်းဢေႃႈ။ ၵလႃးဢုၵ်ႉၶဝ်ၵေႃႈၼမ်ၼႃႇမိူၼ်ၸိူဝ်ႉၼင်ႇ သၢႆးၼမ်ႉသမ်ႇမုၵ်ႉတြႃႇလႄႈ ထၼ်ႈပေႃးဢမ်ႇႁူႉလႆႈဢေႃႈ။-

13မိူဝ်ႈဢၼ် ၵီႉတီႉဢုၼ်ႇ ၼၼ်ႉ ႁွတ်ႈထိုင်ၼၼ်ႉၸိုင် ၵူၼ်းၵေႃႉၼိုင်ႈၶိုၼ်းလၢတ်ႈလွင်ႈဢၼ်မၼ်းလႆႈၼွၼ်းၽၼ်ႁၼ်ၼၼ်ႉ တီႈၵေႃႉသေႈမၼ်းလႄႈဝႃႈ၊ ဢၼ်ၵဝ်ၼွၼ်းၽၼ်ႁၼ်ၸမ်ႉ ၶဝ်ႈမုၼ်းမူႉယေႃးၶႅပ်းၼိုင်ႈ ၵိင်ႈမႃးသႂ်ႇၵႃႈၼႂ်းတပ်ႉ မီႉတျၼ်ႇ လႄႈ ႁူပ်ႉထူပ်းမူဝ်းၵႃႇလင်ၼိုင်ႈသေယဝ်ႉ တိူဝ်ႉထုၵ်ႇသႂ်ႇလႄႈ ၶႂမ်ႈပိၼ်ႈၵိူၼ်ႇၶျႃးတူၵ်းပႅတ်ႈသေဢေႃႈ၊ မိူဝ်ႈဢၼ်ဝႃႈၼင်ႇၼႆၼၼ်ႉၸိုင်၊-

14ၵေႃႉသေႈမၼ်းၼၼ်ႉၶိုၼ်းလၢတ်ႈလႄႈဝႃႈ ပဵၼ်တၢင်ႇၸိူဝ်ႉတၢင်ႇဢၼ်ဢမ်ႇၸႂ်ႈ။ ပဵၼ်လၢပ်ႇ ၵီႉတီႉဢုၼ်ႇ လုၵ်ႈၸၢႆး ယေႃးသႃႉ ၵူၼ်းမဵဝ်း ဢီႉသရေႇလႃႉ ၼၼ်ႉဢေႃႈ။ ၽြႃးပဵၼ်ၸဝ်ႈလႆႈဢဝ်မဵဝ်း မီႉတျၼ်ႇ ဢိၵ်ႇတင်းပူဝ်ႇပႃႇတင်းသဵင်ႈတင်းလူင် ဢၢပ်ႈပၼ် ၵႃႈၼႂ်းမိုဝ်းမၼ်းၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

15မိူဝ်ႈဢၼ် ၵီႉတီႉဢုၼ်ႇ ငိၼ်းတၢင်းဢၼ်ၶႆႈဢၼ်လၢတ်ႈ တၢင်းဢၼ်ၼွၼ်းၽၼ်ႁၼ် ဢိၵ်ႇတင်းဢၼၢၵ်ႈဢထိၵ်ႈပႄႇမၼ်းၼၼ်ႉၸိုင် မၼ်းၵူဝ်းၵႂၢႆႇလႄႈၶိုၼ်းမိူဝ်းၸူးၵႃႈတီႈတပ်ႉ ဢီႉသရေႇလႃႉ သေယဝ်ႉ လၢတ်ႈလႄႈဝႃႈ၊ ဢွၼ်ၵၼ်လုၵ်ႉတႃႉ။ ထႃႇဝရႃႉၽြႃးလႆႈဢဝ်ပူဝ်ႇပႃႇ မီႉတျၼ်ႇ တင်းလၢႆဢၢပ်ႈပၼ်ၵႃႈၼႂ်းမိုဝ်းမႂ်းယဝ်ႉ၊ ဝႃႈၼင်ႇၼႆဢေႃႈ။

16မိူဝ်ႈၼၼ်ႉ မၼ်းၽႄၵူၼ်းသၢမ်ပၢၵ်ႇၼၼ်ႉ ႁဵတ်းသၢမ်မုၵ်ႉသေလႄႈ ဢဝ်ၼႄးၶရႃႇတင်းလၢႆ ဢိၵ်ႇတင်းမေႃႈဢၼ်ပဝ်ႇတင်းလၢႆ တင်းၵၢၼ်ႈၽႆးဢၼ်ပႃးၵႃႈၼႂ်းမေႃႈၸိူဝ်းၼၼ်ႉ သႂ်ႇပၼ်ၵႃႈၼႂ်းမိုဝ်းၶဝ်ၼၼ်ႉ ၵူႈၵေႃႉဢေႃႈ။-

17မၼ်းသင်ႇလၢတ်ႈလႄႈဝႃႈ၊ တူၺ်းၵဝ်လႄႈ ႁဵတ်းၸွမ်းၵႃႈၼင်ႇဢၼ်ၵဝ်ႁဵတ်းၼၼ်ႉတႃႉ။ မိူဝ်ႈဢၼ်ၵဝ်ႁွတ်ႈထိုင်ၵႃႈတီႈႁိမ်းတီႈသုတ်းတပ်ႉၼၼ်ႉၸိုင် သူဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ၵဝ်ႁဵတ်းၼၼ်ႉတႃႉ။-

18မိူဝ်ႈဢၼ်ၵဝ် ဢိၵ်ႇတင်းၶဝ်ၸိူဝ်းဢၼ်ပႃးတီႈၵဝ်ၵႃႈမီးၼၼ်ႉ ပဝ်ႇၼႄးၶရႃႇၼၼ်ႉၸိုင် သူဢွၼ်ၵၼ်ပဝ်ႇၼႄးၶရႃႇသူ ၵႃႈတီႈႁိမ်းႁွမ်းတပ်ႉၼၼ်ႉ တင်းတပ်ႉၵူႈၽၢႆႇၵူႈပႃႈသေလႄႈ ႁွင်ႉသႅၼ်ႇလႄႈဝႃႈ၊ ပုၼ်ႈထႃႇဝရႃႉၽြႃး ဢိၵ်ႇတင်းပုၼ်ႈ ၵီႉတီႉဢုၼ်ႇ ဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

19ၼင်ႇၼၼ်လႄႈ ၵီႉတီႉဢုၼ်ႇ ဢိၵ်ႇတင်းၵူၼ်းပၢၵ်ႇၼိုင်ႈ ဢၼ်ပႃးတီႈမၼ်းၸိူဝ်းၼၼ်ႉ ႁွတ်ႈထိုင်ၵႂႃႇတီႈႁိမ်းတီႈသုတ်းတပ်ႉ ၼႂ်းငဝ်ႈၶိင်ႇလႄႉၵမ်းၶိုင်ႈၵၢင်မိူဝ်ႈဢၼ်ၶဝ်ၸင်ႇၸႃႉလႄႉၵၼ်ပႂ်ႉၵၢင်ၼၼ်ႉသေယဝ်ႉ ဢွၼ်ၵၼ်ပဝ်ႇၼႄးၶရႃႇလႄႈ ပေႃႉမေႃႈဢၼ်မိုဝ်းၶဝ်ယိပ်းၵမ်ယူႇၸိူဝ်းၼၼ်ႉတႅၵ်ႇဢေႃႈ။-

20ၵူၼ်းသၢမ်မုၵ်ႉၸိူဝ်းၼၼ်ႉ ပဝ်ႇၼႄးၶရႃႇလႄႈ ပေႃႉမေႃႈတႅၵ်ႇသေယဝ်ႉ ၵႃႈတီႈမိုဝ်းၶွၼ်သၢႆႉယိပ်းၵမ်ၵၢၼ်ႈၽႆးယူႇ၊ ၵႃႈတီႈမိုဝ်းၶွၼ်ၶႂႃ ယိပ်းၵမ်ၼႄးၶရႃႇ ပုၼ်ႈဢၼ်တၵ်းပဝ်ႇၼၼ်ႉယူႇသေလႄႈ ဢွၼ်ၵၼ်ႁွင်ႉသႅၼ်ႇလႄႈဝႃႈ၊ လၢပ်ႇပုၼ်ႈထႃႇဝရႃႉၽြႃး ဢိၵ်ႇတင်းပုၼ်ႈ ၵီႉတီႉဢုၼ်ႇ ဢေႃႈ၊ ဝႃႈၼင်ႇၼႆဢေႃႈ။-

21ၶဝ်ၸုၵ်းယူႇၵႃႈၼႂ်းတီႈၽႂ်တီႈမၼ်း ၵူႈၵေႃႉၵူႈၵူၼ်း ၵႃႈတီႈလဵပ်ႈႁွပ်ႈတပ်ႉၼၼ်ႉလႄႈ ပူဝ်ႇပႃႇၵူၼ်းသိုၵ်းတင်းသဵင်ႈတင်းလူင်ၼၼ်ႉ ၶုၼ်ႇလႅၼ်ႈယူႇ၊ ႁွင်ႉသႅၼ်ႇယူႇသေလႄႈ ဢွၼ်ၵၼ်ဢွၵ်ႇပၢႆႈဢေႃႈ။-

22ၶဝ်ပဝ်ႇၼႄးၶရႃႇသၢမ်ပၢၵ်ႇၼၼ်ႉလႄႈ ထႃႇဝရႃႉၽြႃးႁႂ်ႈၵူၼ်းသိုၵ်းၵႃႈမီးၼၼ်ႉ ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ် ဢဝ်လၢပ်ႇၶႃႈၽၼ်းၵၼ်လႄႈ ပူဝ်ႇပႃႇၵူၼ်းသိုၵ်းၸိူဝ်းၼၼ်ႉ ဢွၼ်ၵၼ်ပၢႆႈၸူးၵႃႈတီႈဝဵင်း ပႅတ်ႉသိတ်ႉတႃႇ ၼႂ်းတီႈ ၸေးရရတ်ႉ ဢိၵ်ႇတင်း ၵႃႈတီႈလိၼ်ဝဵင်း ဢႃႇပေႇလႃႉမႁေႃႇလႃႉ ၵႃႈႁိမ်းဝဵင်း တပ်ႉပတ်ႉ ၼၼ်ႉဢေႃႈ။-

23ၵူၼ်းမဵဝ်း ဢီႉသရေႇလႃႉ တင်းလၢႆ ဢွၵ်ႇသေၵႃႈတီႈဢိူင်ႇ ၼပ်ႉထလီႉ ၊ ဢိူင်ႇ ဢႃႇသႃႇ တင်းဢိူင်ႇ မၼႃႇသေႇ မႃးၸူႉၵၼ်တုမ်ၵၼ်သေလႄႈ လိုပ်ႈၸွမ်းလမ်းၸွမ်းၵူၼ်း မီႉတျၼ်ႇ ၸိူဝ်းၼၼ်ႉဢေႃႈ။-

24ၵီႉတီႉဢုၼ်ႇ ၵေႃႈ ပွႆႇၸႂ်ႉတမၢၼ်ႇတင်းလၢႆ ၵႂႃႇၵႃႈတီႈၼိူဝ်ႁၢၼ်ႉလွႆ ဢေႇၽရိမ်ႇ ၵူႈတီႈၵူႈလႅၼ်လႄႈ သင်ႇလၢတ်ႈလႄႈဝႃႈ၊ ဢွၼ်ၵၼ်လူင်းမႃးႁႂ်ႈလႆႈႁႄႉတၢင်း ၵူၼ်း မီႉတျၼ်ႇ ၸိူဝ်းၼၼ်ႉလႄႈ ဢဝ်ၼမ်ႉႁွင်ႈတေႃႇထိုင်ႁွတ်ႈဝၢၼ်ႈ ပႅတ်ႉပႃႇရႃႇ ဢၼ်ဝႃႈ ၼမ်ႉႁွင်ႈ ယေႃးတၢၼ်ႇ ၼၼ်ႉ ဢွၼ်တၢင်းၶဝ်တႃႉ၊ ဝႃႈၼင်ႇၼႆလႄႈ၊ ၵူၼ်း ဢေႇၽရိမ်ႇ တင်းသဵင်ႈတင်းလူင် ၸူႉၵၼ်တုမ်ၵၼ်လႄႈ ဢဝ်ၼမ်ႉႁွင်ႈတေႃႇထိုင်ႁွတ်ႈ ဝၢၼ်ႈ ပႅတ်ႉပႃႇရႃႇ ဢၼ်ဝႃႈၼမ်ႉႁွင်ႈ ယေႃးတၢၼ်ႇ ၼၼ်ႉဢေႃႈ။-

25ၶဝ်တီႉၵမ်ဢဝ် ၶုၼ်ပူဝ်ႇၶျုၵ်ႈ မီႉတျၼ်ႇ သွင်ၵေႃႉဢၼ်ဝႃႈ ဢေႃးရၽႃႉ တင်း ၸေးၽႃႉ လႄႈ ဢဝ် ဢေႃးရၽႃႉ တၢႆ ၵႃႈၼိူဝ်မၢၵ်ႇႁိၼ် ဢေႃးရၽႃႉ ဢဝ် ၸေးၽႃႉ တၢႆ ၵႃႈတီႈၶူင်ႇၼူတ်ႈ မၢၵ်ႇၸပိတ်ႈ ၸေးၽႃႉ သေယဝ်ႉ၊ လိုပ်ႈၸွမ်းလမ်းၸွမ်းၵူၼ်း မီႉတျၼ်ႇ ၸိူဝ်းၼၼ်ႉလႄႈ ဢဝ်ၵွၵ်းႁူဝ် ဢေႃးရၽႃႉ တင်းၵွၵ်းႁူဝ် ၸေးၽႃႉ ၼၼ်ႉ မႃးၸူးၵႃႈတီႈ ၵီႉတီႉဢုၼ်ႇ ၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ ဢေႃႈ။

← Chapter 6 Jump to: Chapter 8 →