Judges 4

Shan

← Chapter 3 Jump to: Chapter 5 →

1လိုၼ်းသေ ဢေႇႁူႉတႃႉ တၢႆယဝ်ႉၼၼ်ႉ၊ ၵူၼ်းမဵဝ်း ဢီႉသရေႇလႃႉ တင်းလၢႆသမ်ႉ ႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ-

2ထႃႇဝရႃႉၽြႃးဢဝ်ၶဝ်ၶၢႆပၼ်တီႈ ယႃႇၽိၼ်း ၶုၼ်ႁေႃၶမ်း ၶႃႇၼၢၼ်ႇ ဢၼ်ႁဵတ်းၶုၼ်ၵႃႈတီႈဝဵင်း ႁႃႇၸေႃႇ ၼၼ်ႉဢေႃႈ။ ၶုၼ်ပူဝ်ႇၶျုၵ်ႈမၼ်းၸမ်ႉ၊ ပဵၼ် သီႉသရႃႉ ဢၼ်ယူႇၵႃႈတီႈဝဵင်း ႁႃႇရေႃးသိၵ်ႉ မိူင်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉဢေႃႈ။-

3မိူဝ်ႈၼၼ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ႁွင်ႉသႅၼ်ႇတီႈထႃႇဝရႃႉၽြႃးဢေႃႈ။ လွင်ႈမၼ်းၸမ်ႉ ၶုၼ်ၼၼ်ႉမီးလေႃႉရထႃးလဵၵ်းၵဝ်ႈပၢၵ်ႇလႄႈ ၼိၵ်ႈၸၢၵ်ႈငႅၼ်းသႄးၵူၼ်းမဵဝ်း ဢီႉသရေႇလႃႉ တင်းလၢႆၼႃႇလူင်လၢင် သၢဝ်းပီႊတဵမ်တဵမ်ဢေႃႈ။-

4မိူဝ်ႈၼၼ်ႉ ပရေႃးၽႅတ်ႈမႄႈယိင်း တေႇပေႃးရႃႇ ဢၼ်ပဵၼ်မေး လပီႉတုတ်ႉ ၼၼ်ႉ လႆႈၸီႇယၢင်ႇၵႃႈၼိူဝ်မဵဝ်း ဢီႉသရေႇလႃႉ ဢေႃႈ။-

5မၼ်းၼၼ်ႉ ယူႇၵႃႈတီႈတႂ်ႈတူၼ်ႈထၢၼ် တေႇပေႃးရႃႇ ဢၼ်မီးၵႄႈဝူင်ႈၵၢင် ဝဵင်း ရႃႇမႃႉ တင်းဝဵင်း ပေႇသလႃႉ ၵႃႈၼိူဝ်ႁၢၼ်ႉလွႆ ဢေႇၽရိမ်ႇ ၼၼ်ႉလႄႈ ၵူၼ်းမဵဝ်း ဢီႉသရေႇလႃႉ တင်းလၢႆလႆႈၶိုၼ်ႈၵႂႃႇၸူးမၼ်း ႁႂ်ႈလႆႈၶၢမ်ႇဢဝ်တၢင်းဢၼ်ၸီႇယၢင်ႇတီႈမၼ်းၼၼ်ႉဢေႃႈ။-

6မၼ်းၼၼ်ႉ သမ်ႉပွႆႇၸႂ်ႉလႄႈႁွင်ႉဢဝ် ပႃႇရၵ်ႉ လုၵ်ႈၸၢႆး ဢၽီႉၼွင်ႇ သေၵႃႈတီႈဝဵင်း ၵေႇတေႇသႃႉ ဢိူင်ႇ ၼပ်ႉထလီႉ ၼၼ်ႉမႃးသေယဝ်ႉ၊ သင်ႇလၢတ်ႈတီႈမၼ်းလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ မီးဢမိင်ႉလႄႈဝႃႈၸမ်ႉ၊ မႂ်းၵႂႃႇလႄႈ ဢွၼ်ဢဝ်ၸူးၵႃႈတီႈလွႆ တႃႇပေႃႇ လႄႈ ပႃးဢဝ်ၵူၼ်းမိုၼ်ႇၼိုင်ႈၵႃႈၼႂ်းၵူၼ်းမဵဝ်း ၼပ်ႉထလီႉ ၊ ၵူၼ်းမဵဝ်း ၸေႇပူႉလုၼ်ႇ ၸိူဝ်းၼၼ်ႉၵႂႃႇတႃႉ။-

7ၵဝ်ၵေႃႈတၵ်းဢွၼ်ဢဝ် သီႉသရႃႉ ပူဝ်ႇၶျုၵ်ႈၶုၼ် ယႃႇၽိၼ်း ဢိၵ်ႇတင်းလေႃႉရထႃးမၼ်းတင်းပူဝ်ႇပႃႇမၼ်းတင်းလၢႆ မႃးၸူးၵႃႈတီႈမႂ်းၵႃႈတီႈၼမ်ႉႁွင်ႈ ၵီႉသုၼ်ႇ ၼၼ်ႉလႄႈ ဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ၊ ဝႃႈၼင်ႇၼႆယဝ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။-

8ပႃႇရၵ်ႉ ၵေႃႈ လဝ်ႊလၢတ်ႈတီႈမၼ်းလႄႈဝႃႈ၊ ပေႃးၸဝ်ႈႁဝ်းၵႂႃႇလူၺ်ႈၵၼ်တင်းၵဝ်ၶႃႈၸိုင် ၵဝ်ၶႃႈတၵ်းၵႂႃႇၶႃႈဢေႃႈ။ ပေႃးၸဝ်ႈႁဝ်းဢမ်ႇၵႂႃႇၸမ်ႉ ၵဝ်ၶႃႈဢမ်ႇၵႂႃႇၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

9မၼ်းၼၼ်ႉလၢတ်ႈလႄႈဝႃႈ၊ ၵဝ်တၵ်းၵႂႃႇလူၺ်ႈၵၼ်တင်းမႂ်းဢမၢၼ်ႇၶၼ်ပဵၼ်ဢေႃႈ။ ၵူၺ်းၵႃႈ တၢင်းဢၼ်မႂ်းၵႂႃႇမႂ်းပႆၼၼ်ႉ တၵ်းဢမ်ႇပဵၼ်မုၼ်သရေႇတီႈမႂ်း။ ထႃႇဝရႃႉၽြႃးတၵ်းဢဝ် သီႉသရႃႉ ၶၢႆပၼ်တီႈမႄႈယိင်းဢေႃႈ၊ ဝႃႈၼင်ႇၼႆသေယဝ်ႉ၊ တေႇပေႃးရႃႇ ၸင်ႇလုၵ်ႉလႄႈၵႂႃႇလူၺ်ႈၵၼ်တင်း ပႃႇရၵ်ႉ ၸူးၵႃႈတီႈဝဵင်း ၵေႇတေႇသႃႉ ဢေႃႈ။-

10ပႃႇရၵ်ႉ ၼၼ်ႉႁွင်ႉဢဝ်ၵူၼ်းမဵဝ်း ၸေႇပူႉလုၼ်ႇ ၊ ၵူၼ်းမဵဝ်း ၼပ်ႉထလီႉ တင်းလၢႆမႃးၵႃႈတီႈဝဵင်း ၵေႇတေႇသႃႉ လႄႈ ပႃးဢဝ်တင်းၵူၼ်းဢၼ်ၸွမ်းမၼ်းမိုၼ်ႇၼိုင်ႈၼၼ်ႉ ၶီႇၶိုၼ်ႈၵႂႃႇဢေႃႈ။ တေႇပေႃးရႃႇ ၵေႃႈ ၸွမ်းလူၺ်ႈၵၼ်တင်းမၼ်းၶိုၼ်ႈၵႂႃႇဢေႃႈ။-

11ႁေႇပႃႇ ၵူၼ်းမဵဝ်း ၵေႇၼီႉ ဢၼ်ၶဝ်ႈပႃးၵႃႈၼႂ်းလုၵ်ႈလၢင်း ႁေႃးပပ်ႉ ပူႇၼၢႆး မူဝ်းသေႇ ၼၼ်ႉၽၢတ်ႇယၢၼ် ၵူၼ်း ၵေႇၼီႉ တင်းလၢႆသေလႄႈ ၵင်ႈမူဝ်းၵႃႇမၼ်းယူႇၵႃႈတီႈႁိမ်းတူၼ်ႈမႆႉၼိမ် ၵႃႈတီႈ ၸႃႇၼၼ်ႇၼိမ်ႇ ဢၼ်မီးၵႃႈႁိမ်းဝဵင်း ၵေႇတေႇသႃႉ ၼၼ်ႉဢေႃႈ။-

12ၶဝ်မွၵ်ႇလၢတ်ႈလွင်ႈဢၼ် ပႃႇရၵ်ႉ လုၵ်ႈၸၢႆး ဢၽီႉၼွင်ႇ ၶိုၼ်ႈၸူးၵႃႈၼိူဝ်လွႆ တႃႇပေႃႇ ၼၼ်ႉတီႈ သီႉသရႃႉ သေယဝ်ႉ၊-

13သီႉသရႃႉ ၼၼ်ႉ ႁႂ်ႈလေႃႉရထႃးမၼ်းၵႃႈမီး ဢၼ်ဝႃႈလေႃႉရထႃးလဵၵ်းၵဝ်ႈပၢၵ်ႇၼၼ်ႉ ဢိၵ်ႇတင်းၵူၼ်းမၼ်းတင်းသဵင်ႈတင်းလူင် လုၵ်ႉသေၵႃႈတီႈဝဵင်း ႁႃႇရေႃးသိၵ်ႉ မိူင်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉ မႃးၸူးၵႃႈတီႈၼမ်ႉႁွင်ႈ ၵီႉသုၼ်ႇ ဢေႃႈ။-

14တေႇပေႃးရႃႇ လၢတ်ႈတီႈ ပႃႇရၵ်ႉ လႄႈဝႃႈ၊ လုၵ်ႉတႃႉ။ ဝၼ်းမိူဝ်ႈၼႆႉၸမ်ႉ ပဵၼ်ဝၼ်းဢၼ်ထႃႇဝရႃႉၽြႃးဢဝ် သီႉသရႃႉ ဢၢပ်ႈပၼ်ၵႃႈၼႂ်းမိုဝ်းမႂ်းယဝ်ႉဢေႃႈ။ ထႃႇဝရႃႉၽြႃးၼၼ်ႉ ဢွၼ်ႁူဝ်မႂ်းၵႂႃႇယဝ်ႉဢမ်ႇၸႂ်ႈႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊ ပႃႇရၵ်ႉ လူင်းသေၵႃႈၼိူဝ်လွႆ တႃႇပေႃႇ လႄႈ ၵူၼ်းမိုၼ်ႇၼိုင်ႈၸွမ်းပႃႈလင်မၼ်းယူႇဢေႃႈ။-

15ထႃႇဝရႃႉၽြႃးႁႂ်ႈ သီႉသရႃႉ ဢိၵ်ႇတင်းလေႃႉရထႃးမၼ်းၵႃႈမီး တင်းပူဝ်ႇပႃႇၵူၼ်းသိုၵ်းမၼ်းၵႃႈမီးၸိူဝ်းၼၼ်ႉ တူၵ်းသုမ်းလူၺ်ႈၶူမ်းလၢပ်ႇၶူမ်းလႅဝ်း ၵႃႈတီႈၽၢႆႇၼႃႈ ပႃႇရၵ်ႉ လႄႈ သီႉသရႃႉ ၼၼ်ႉ လူင်းသေၵႃႈၼိူဝ်လေႃႉရထႃးမၼ်းသေလႄႈ ပႆတိၼ်ဢွၵ်ႇပၢႆႈၵႂႃႇဢေႃႈ။-

16ပႃႇရၵ်ႉ ၼၼ်ႉလိုပ်ႈၸွမ်းလမ်းၸွမ်းလေႃႉရထႃး ဢိၵ်ႇတင်းပူဝ်ႇပႃႇၵူၼ်းသိုၵ်းၸိူဝ်းၼၼ်ႉ တေႃႇထိုင်ႁွတ်ႈဝဵင်း ႁႃႇရေႃးသိၵ်ႉ မိူင်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉလႄႈ ပူဝ်ႇပႃႇၵူၼ်းသိုၵ်း သီႉသရႃႉ ၵႃႈမီးၼၼ်ႉ လူမ်ႉတၢႆလူၺ်ႈၶူမ်းလၢပ်ႇၶူမ်းလႅဝ်းဢေႃႈ။ ဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်း။-

17သီႉသရႃႉ ၼၼ်ႉ ပႆတိၼ်ဢွၵ်ႇပၢႆႈၵႂႃႇၸူးၵႃႈတီႈမူဝ်းၵႃႇ ယေႇလႃႉ မေး ႁေႇပႃႇ ၵူၼ်းမဵဝ်း ၵေႇၼီႉ ၼၼ်ႉဢေႃႈ။ လွင်ႈမၼ်းၸမ်ႉ မိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်မီးဝႆႉၵႃႈတီႈဝူင်ႈၵၢင် ယႃႇၽိၼ်း ၶုၼ်ႁေႃၶမ်း ႁႃႇၸေႃႇ ဢိၵ်ႇတင်းမဵဝ်းၸိူဝ်ႉၶိူဝ်း ႁေႇပႃႇ ၵူၼ်း ၵေႇၼီႉ ၼၼ်ႉယူႇဢေႃႈ။-

18ယေႇလႃႉ ၼၼ်ႉ ဢွၵ်ႇႁႂ်ႈလႆႈႁပ်ႉႁူဝ်တၢင်း သီႉသရႃႉ သေလႄႈႁွင်ႉဝႃႈ၊ ၸဝ်ႈႁဝ်း၊ ၶဝ်ႈမႃးသေၵမ်းၶႃႈ။ ၶဝ်ႈမႃးၵႃႈတီႈၵဝ်ၶႃႈၼႆႉသေၵမ်းၶႃႈ။ ယႃႇပေမႆႈၸႂ်ၶီၸႂ်ၶႃႈ၊ ဝႃႈၼင်ႇၼႆသေယဝ်ႉ မၼ်းဝႄႉၶဝ်ႈၵႃႈတီႈမၼ်းၼၼ်ႉၵႃႈၼႂ်းမူဝ်းၵႃႇလႄႈ မၼ်းၼၼ်ႉဢဝ်ၽႃႈဝႆႁူမ်ႇသုမ်ႇမၼ်းဝႆႉဢေႃႈ။-

19မၼ်းၵေႃႈယွၼ်းလႄႈဝႃႈ ပၼ်ၼမ်ႉဢိတ်းဢွၼ်ႇၼိုင်ႈတီႈၵဝ်သေၵမ်း။ ၵဝ်တွင်ႉမႆႈၼမ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင် မၼ်းၼၼ်ႉၽုၺ်ႇတဝ်ႈၼမ်ႉၼူမ်းလႄႈ ပၼ်ၵိၼ်သေယဝ်ႉ သမ်ႉႁူမ်ႇသုမ်ႇမၼ်းဝႆႉသေဢေႃႈ။-

20မၼ်းၵေႃႈသမ်ႉသင်ႇလၢတ်ႈတီႈမၼ်းၼၼ်ႉလႄႈဝႃႈ၊ ၸုၵ်းယူႇၵႃႈတီႈႁူးၽၵ်းတူမူဝ်းၵႃႇသေၵမ်း။ ပေႃးသေၵေႃႉသေၵူၼ်းမႃးတွင်ႈထၢမ်တီႈမႂ်းလႄႈဝႃႈ၊ ၵႃႈတီႈၼႆႈ မီးၵူၼ်းၸၢႆးႁိုဝ်။ ဝႃႈၼင်ႇၼႆၸိုင် မႂ်းလၢတ်ႈလႄႈဝႃႈ၊ ဢမ်ႇမီးၵူၺ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

21မိူဝ်ႈၼၼ်ႉ ယေႇလႃႉ မေး ႁေႇပႃႇ ၼၼ်ႉယိပ်းၵမ်ဢဝ်သႄႈမူဝ်းၵႃႇတင်းၶွၼ်ႉတွၵ်ႇသေလႄႈ တဵတ်ႇတဵတ်ႇၵႂႃႇၸူးၵႃႈတီႈမၼ်းလႄႈ ဢဝ်သႄႈၼၼ်ႉ တွၵ်ႇသႂ်ႇၵႃႈတီႈသီႈမႅပ်ႉမၼ်း တေႃႇထိုင်ႁွတ်ႈထၼ်ႈပေႃးၸပ်းလိၼ်ဝႆႉဢေႃႈ။ လွင်ႈမၼ်းၸမ်ႉ မၼ်းယင်းတိုၵ်ႉၼွၼ်းလပ်းယူႇလႄႈ ႁိူဝ်ႉဢမ်ႇပႆႇပေႇဢေႃႈ။ ၼင်ႇၼၼ်လႄႈ မၼ်းတၢႆဢေႃႈ။-

22မိူဝ်ႈဢၼ် ပႃႇရၵ်ႉ ၸွမ်းႁႃ သီႉသရႃႉ ၼၼ်ႉၸိုင် ယေႇလႃႉ ဢွၵ်ႇမႃးႁပ်ႉႁူဝ်တၢင်းမၼ်းလႄႈ လၢတ်ႈတီႈမၼ်းလႄႈဝႃႈ၊ ၶဝ်ႈမႃးသေၵမ်းၶႃႈ။ ၶႃႈၸဝ်ႈတၵ်းၼႄပၼ်ၵေႃႉဢၼ်ၸဝ်ႈႁဝ်းႁႃၼၼ်ႉ တီႈၸဝ်ႈႁဝ်းၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းမႃးၸူးတီႈမၼ်းၼၼ်ႉလႄႈ ထူပ်းႁၼ် သီႉသရႃႉ ၼၼ်ႉတၢႆယဵတ်ႇယူႇယဝ်ႉလႄႈ သႄႈသဵပ်ႇၵႃႈတီႈသီႈမႅပ်ႉမၼ်းယူႇဢေႃႈ။-

23ၼင်ႇၼၼ်လႄႈ ထႃႇဝရႃႉၽြႃးဢဝ် ယႃႇၽိၼ်း ၶုၼ်ႁေႃၶမ်း ႁႃႇၸေႃႇ ၶျႃးတူၵ်းတီႈတႅမ်ႇ ၵႃႈတီႈၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆ ၼႂ်းဝၼ်းၼၼ်ႉသေယဝ်ႉ၊-

24ႁႅင်းမိုဝ်းၵူၼ်းမဵဝ်း ဢီႉသရေႇလႃႉ တင်းလၢႆ ပႄႉၼႅင်ႇ ယႃႇၽိၼ်း ၶုၼ်ႁေႃၶမ်း ႁႃႇၸေႃႇ ယူႇတိၵ်းတိၵ်းယူႇ တေႃႇထိုင်ႁွတ်ႈထၼ်ႈပေႃး ယႃႉၽဵဝ်ႈ ယႃႇၽိၼ်း ၶုၼ်ႁေႃၶမ်း ႁႃႇၸေႃႇ ၼၼ်ႉပႅတ်ႈဢေႃႈ။

← Chapter 3 Jump to: Chapter 5 →