1 Samuel 22

Tswana (BAEBELE e e Boitshepo) 1992

← Chapter 21 Jump to: Chapter 23 →

1Ka ntlha ya moo Dafite a tloga gone a falolela kwa logageng lwa Adulame; mme e rile bomogolowe le botlhe ba ntlo ya ga rraagwe ba utlwa mo, ba fologela kwa go ene gone.

2Mongwe le mongwe yo o mo pitlaganong, le mongwe le mongwe yo go batlwang molato mo go ene, le mongwe le mongwe yo o ngongoregang, ba phuthegela kwa go ene; a nna molaodi wa bone; ga nna nae batho e ka ne e le makgolo a le mane.

3Dafite a tswa gone a ya Misepa wa Moabe; mme a raya kgosi ya Moabe a re: “Ke a go rapela, o mme rre le mme ba huduge, ba tle go nna le lona go tle go tsamaye ke itse se Modimo o tlaa se ntirelang.”

4A ba lere fa pele ga kgosi ya Moabe; ba aga nae ka lobaka lotlhe lo Dafite o ne a nna mo kagong ya phemelo ka lone.

5Gate moperofeti a a raya Dafite a re: “O se ka wa nna mo kagong ya phemelo; tloga o ye lefatsheng la Juta.” Foo Dafite a tloga a tla mo sekgweng sa Herethe.

6Saule a utlwa fa Dafite a bonywe, le banna ba o nang nabo; Saule a bo a dutse mo Gibea, fa tlase ga setlhare sa motamariseka mo Rama, a tshotse lerumo la gagwe, le batlhanka botlhe ba gagwe ba bo ba emeeme tikologong ya gagwe.

7Saule a raya batlhanka ba gagwe ba ba emeemeng tikologong ya gagwe a re: “Utlwang jaana lona Babenjamine; a morwa Jese o tlaa naya mongwe le mongwe wa lona matlhagare le masimo a mafine, a o tlaa lo dira lotlhe balaodi ba makgolo a masome, le balaodi ba makgolo?

8Ka e le fa lotlhe lo nkgolaganetse, go se na ope yo o ntshebetsang fa morwaake a dira kgolagano le morwa Jese, go bile go se na ope wa lona yo o ntlhomogelang pelo, le fa e le go ntshebetsa fa morwaake a ntlhotlheleditse motlhanka wa me, gore a tle a ntalele jaaka gompieno?”

9Foo ga fetola Doege wa Moetome, yo o emeng fa batlhankeng ba ga Saule a re: “Ke bonye morwa Jese a tla kwa Nobe mo go Ahimeleke morwa Ahitube.

10Mme a mmoletsa mo go Jehofa, a mo naya dijo, a ba a mo naya tšhaka ya ga Goliathe wa Mofilisitia.”

11Foo kgosi ya roma ya ya go bitsa Ahimeleke moperesiti, morwa Ahitube, le botlhe ba ntlo ya ga rraagwe, baperesiti ba ba mo Nobe; mme ba tla botlhe kwa kgosing.

12Saule a re: “Utlwa jaana, wena morwa Ahitube.” A fetola, a re: “Ke fano morena wa me.”

13Saule a mo raya a re: “Ana lo nkgolaganetse ka ntlha yang, wena le morwa Jese, ka o mo neile senkgwe, le tšhaka, wa ba wa mmoletsa mo Modimong, gore a tle a tlhabane le nna, a ntalele, jaaka gompieno?”

14Foo Ahimeleke a fetola kgosi a re: “E mang mo batlhankeng ba gago botlhe yo o boikanngo jaaka Dafite, yo e leng mogwe wa kgosi, a na le go gakololana nao, a bile a le tlotlego mo ntlong ya gago?

15A ke gore ke simolotse gompieno fela go mmoletsa mo Modimong? A go nne kgakala le nna; a kgosi e se kae motlhanka wa gagwe molato ope, le fa e le botlhe ba ntlo ya ga rre; gonne motlhanka wa gago ga a itse sepe sa dilo tsotlhe tse, bonnye, le fa e le bogolo.”

16Kgosi ya re: “Ruri o tlaa swa, wena Ahimeleke le botlhe ba ntlo ya ga rraago.”

17Kgosi ya raya basimane ba yone ba ba emeng tikologong ya yone ya re: “Menogang lo bolaye baperesiti ba ga Jehofa; gonne seatla sa bone le sone se na le Dafite, le ka gonne ba ne ba itse fa a ne a tshaba, mme ba se ka ba ntshebetsa.” Mme batlhanka ba kgosi ba gana go ntsha letsogo la bone go wela baperesiti ba ga Jehofa.

18Kgosi ya raya Doege ya re: “A go menoge wena, o wele baperesiti.” Mme Doege wa Moetome a menoga, a wela baperesiti, mme a bolaya ka tsatsi leo ba le 85, ba ba apereng sekutlana sa leloba.

19Nobe motse wa baperesiti, a o kgemetha ka bogale jwa tšhaka, banna le basadi, bana le ba ba anyang, le dikgomo le diesela le dinku, ka bogale jwa tšhaka.

20Mongwe wa bomorwa Ahimeleke morwa Ahitube, yo leina la gagwe e ne e le Abiathare, a falola, a tshaba a latela Dafite.

21Abiathare a bolelela Dafite fa Saule a bolaile baperesiti ba ga Jehofa.

22Dafite a raya Abiathare a re: “Ke itsile ka tsatsi leo, ka Doege wa Moetome a le gone, fa ruri a tlaa bolelela Saule; ke nna ke bolaileng batho botlhe ba ntlo ya ga rraago.

23Nnela ruri le nna, o se ka wa boifa, gonne yo o senkang go mpolaya o senka go bolaya wena; gonne o tlaa nna mo polokegong fa o ntse le nna.”

← Chapter 21 Jump to: Chapter 23 →