Ezekiel 10

Chinese TTVR (現代台語譯本羅馬字版)

← Chapter 9 Jump to: Chapter 11 →

1Góa koan-khòaⁿ, khòaⁿ-kìⁿ tī thiⁿ-sài ki-lō͘-pek thâu-khak téng ê kiong-chhong téng-bīn, ū chi̍t ê hêng-chōng chhin-chhiūⁿ ēng nâ-pó-chio̍h chō ê pó-chō.

2Siōng-tè tùi chhēng iù-môa-pò͘ ê saⁿ hit-ê lâng kóng, “Lí ji̍p--khì, tùi ki-lō͘-pek ē-bīn ê lián-á ê tiong-ng, the̍h teh to̍h ê hé-thòaⁿ chhut--lâi, phóng tī siang-chhiú, iā tī choân Iâ-lō͘-sat-léng -siâⁿ.” Góa khòaⁿ i ji̍p--khì.

3I ji̍p--khì ê sî, ki-lō͘-pek khiā tī sèng-tiān ê lâm-pêng, ū hûn-chhái chhiong-móa lāi-tiâⁿ.

4Siōng Chú ê êng-kng seng-koân lī-khui ki-lō͘-pek, thêng tī sèng-tiān ê ji̍p-kháu; ū hûn-chhái chhiong-móa sèng-tiān, Siōng Chú ê êng-kng hoat-chhut ê kong-hui chhiong-móa kui-ê tiâⁿ.

5Ki-lō͘-pek ê si̍t hoat-chhut ê siaⁿ, chhin-chhiūⁿ Choân-lêng Siōng-tè teh kóng-ōe ê siaⁿ, tī gōa-tiâⁿ mā thiaⁿ ōe tio̍h.

6Siōng Chú hoan-hù chhēng iù-môa-pò͘ ê saⁿ hit-ê lâng tùi ki-lō͘-pek ē-bīn lián-á ê tiong-ng the̍h hé; i chiū ji̍p--khì, khiā tī chi̍t ê lián-á ê piⁿ--á.

7Kî-tiong chi̍t ê ki-lō͘-pek chhun-chhiú tùi ki-lō͘-pek tiong-ng the̍h chi̍t-kóa hé, hē tī chhēng iù-môa-pò͘ ê saⁿ hit-ê lâng ê chhiú-tiong. Hit-ê lâng the̍h--tio̍h chiū chhut--khì.

8Hiah-ê ki-lō͘-pek ê si̍t-kó͘ ē-bīn ū chhiú, khòaⁿ--khí-lâi chhin-chhiūⁿ lâng ê chhiú.

9Góa khòaⁿ-kìⁿ chiah-ê ki-lō͘-pek ê piⁿ--á ū sì ê lián-á, múi chi̍t ê ki-lō͘-pek piⁿ--á lóng ū chi̍t ê lián-á; lián-á chhin-chhiūⁿ pó-chio̍h hoat-kng.

10Sì ê lián-á ê gōa-hêng lóng kâng-khoán; múi chi̍t ê lián-á chhin-chhiūⁿ lāi-bīn koh ū chi̍t ê lián-á.

11Chit sì ê lián-á tín-tāng ê sî, lóng ōe-tàng tùi ta̍k-pêng ti̍t-kiâⁿ, m̄-bián tńg-oat. In ǹg tó chi̍t ê hong-hiòng kiâⁿ, lóng m̄-bián tńg-oat.

12Ki-lō͘-pek kui seng-khu, liân ka-chiah, chhiú, si̍t, sīm-chì múi chi̍t ê lián-á, sì-chiu-ûi lóng sī ba̍k-chiu.

13Chiah-ê lián-á, chiàu góa thiaⁿ--kìⁿ-ê kiò-chòe “teh tńg ê lián-á”.

14Múi chi̍t ê ki-lō͘-pek lóng ū sì khoán bīn: Tē-it ê sī gû ê bīn, tē-jī ê sī lâng ê bīn, tē-saⁿ ê sī sai ê bīn, tē-sì ê sī eng ê bīn.

15Ki-lō͘-pek pe-chiūⁿ koân; chiah-ê sī góa tī Ka-pa-ló͘ hô-piⁿ khòaⁿ--kìⁿ ê oa̍h-mi̍h.

16Ki-lō͘-pek kiâⁿ ê sî, lián-á mā tī piⁿ--á kiâⁿ. In thí-khui si̍t pe koân lī-khui tōe-bīn, lián-á mā bô tńg-se̍h lī-khui in sin-piⁿ.

17Ki-lō͘-pek thêng--teh, lián-á mā thêng--teh; ki-lō͘-pek tùi tōe-bīn seng-koân, lián-á mā chòe-hé seng-koân, in-ūi oa̍h-mi̍h ê sim-ì khòng-chè lián-á.

18Siōng Chú ê êng-kng lī-khui sèng-tiān ê ji̍p-kháu, thêng tī ki-lō͘-pek ê téng-bīn.

19Góa khòaⁿ-kìⁿ ki-lō͘-pek thí-si̍t pe-koân lī-khui tōe-bīn, lián-á mā tī in sin-piⁿ. In thêng tī sèng-tiān tang-mn̂g ê ji̍p-kháu, Í-sek-lia̍t Siōng-tè ê êng-kng tī in téng-bīn.

20Chiah-ê sī góa tī Ka-pa-ló͘ hô-piⁿ só͘ khòaⁿ--kìⁿ, tī Í-sek-lia̍t Siōng-tè ē-bīn ê oa̍h-mi̍h; góa chai in sī ki-lō͘-pek.

21Múi chi̍t ê ki-lō͘-pek ū sì khoán bīn, sì ki si̍t; si̍t ē-bīn ū chhiú, khòaⁿ--khí-lâi chhin-chhiūⁿ lâng ê chhiú.

22In ê bīn ê bô͘-iūⁿ, chiū-sī in ê hêng-chōng kap khoán-sit, kap góa tī Ka-pa-ló͘ hô-piⁿ khòaⁿ--kìⁿ ê bīn kâng-khoán. Múi chi̍t ê ki-lō͘-pek, lóng ōe-tàng tùi ta̍k-pêng ti̍t-kiâⁿ.

← Chapter 9 Jump to: Chapter 11 →