Ezekiel 40 — Chinese TTVR (現代台語譯本羅馬字版)

1Goán siū hòng-tio̍k ê tē-jī-cha̍p-gō͘ nî, chiū-sī Iâ-lō͘-sat-léng lûn-hām ê tē-cha̍p-sì nî, chiaⁿ-ge̍h chhoe-cha̍p, Siōng Chú ê khùi-la̍t chhiong-móa góa, kā góa chhōa-khì Í-sek-lia̍t -tōe.

2Tī īⁿ-siōng tiong, Siōng Chú kā góa hē tī Í-sek-lia̍t -tōe chi̍t chō ke̍k-koân ê soaⁿ. Soaⁿ ê lâm-pêng ná-chhin-chhiūⁿ ū chi̍t chō siâⁿ.

3I chhōa góa khì hia; góa khòaⁿ-kìⁿ chi̍t ê lâng, i ê hêng-chōng chhin-chhiūⁿ tâng hoat kng, chhiú the̍h môa-soh kap lô͘-tek ê niû-chhioh, khiā tī mn̂g-kháu.

4I tùi góa kóng, “Jîn-chú ah, góa kā lí hoan-hù--ê, lí tio̍h siông-sè khòaⁿ, chù-ì thiaⁿ, koh kì tī sim-lāi, in-ūi che sī góa chhōa lí lâi chia ê bo̍k-te̍k. Lí tio̍h chiong só͘ khòaⁿ--kìⁿ ê it-chhè, lóng kā Í-sek-lia̍t -lâng kóng.”

5Góa khòaⁿ-kìⁿ sèng-tiān, sì-chiu-ûi ū ûi-chhiûⁿ. Hit-ê lâng chhiú the̍h chi̍t ki saⁿ kong-chhioh tn̂g ê lô͘-tek-chhioh. I niû chhiûⁿ; chhiûⁿ koân saⁿ kong-chhioh, kāu saⁿ kong-chhioh.

6I kàu tang-mn̂g, peh-chiūⁿ kiā-á, niû mn̂g ê hō͘-tēng, khoah saⁿ kong-chhioh.

7Hia mā ū siú-ōe-sek; ta̍k-keng tn̂g saⁿ kong-chhioh, khoah saⁿ kong-chhioh. Pâng-keng kap pâng-keng tiong-kan làng nn̄g kong-chhioh-pòaⁿ. Cháu-lông ū chi̍t ê mn̂g ǹg sèng-tiān; hit-ê mn̂g ê hō͘-tēng, khoah saⁿ kong-chhioh.

8I niû beh khì sèng-tiān ê mn̂g ê cháu-lông, khoah saⁿ kong-chhioh.

9I koh niû thàng khì sèng-tiān hit-ê cháu-lông, khoah sì kong-chhioh; piah-thiāu kāu chi̍t kong-chhioh.

10Tang-mn̂g ê siú-ōe-sek chit-pêng saⁿ keng, hit-pêng saⁿ keng, ta̍k-keng tōa-sòe lóng siâng-khoán; nn̄g pêng ê piah-thiāu kāu-tō͘ mā siâng-khoán.

11I niû tang-mn̂g ê ji̍p-kháu khoah gō͘ kong-chhioh, mn̂g pún-sin la̍k kong-chhioh-pòaⁿ.

12Ta̍k-keng siú-ōe-sek ê thâu-chêng lóng ū chhiûⁿ-á, koân gō͘-cha̍p kong-hun, kāu gō͘-cha̍p kong-hun; pâng-keng ê tn̂g kap khoah lóng saⁿ kong-chhioh.

13Nn̄g pêng siú-ōe-sek ê mn̂g sio-tùi, chit-pêng siú-ōe-sek ê gōa-piah niû kàu hit-pêng siú-ōe-sek ê gōa-piah, ū cha̍p-jī kong-chhioh-pòaⁿ.

14I sūn chhiûⁿ niû, kàu thàng khì gōa-tiâⁿ ê chhiûⁿ, tn̂g saⁿ-cha̍p kong-chhioh.

15I koh tùi tōa-mn̂g-kháu chit-pêng niû kàu cháu-lông āu-bīn ê chhiûⁿ, tn̂g jī-cha̍p-gō͘ kong-chhioh.

16Ta̍k-keng siú-ōe-sek, piah-thiāu kap piah-thiāu ê tiong-kan, í-ki̍p cháu-lông nn̄g pêng lóng ū thang-á. Piah-thiāu téng-bīn ū khek chang-chhiū.

17Hit-ê lâng chhōa góa khì gōa-tiâⁿ. Gōa-tiâⁿ chiu-ûi ū saⁿ-cha̍p keng pâng-keng, thô͘-kha pho͘ chio̍h.

18Pho͘ chio̍h ê lō͘ tùi lāi-tiâⁿ se̍h kàu gōa-tiâⁿ, khoah-tō͘ kap mn̂g kâng-khoán; gōa-tiâⁿ pho͘ ê lō͘ pí lāi-tiâⁿ khah kē.

19I koh niû tùi lāi-tiâⁿ ê mn̂g kàu gōa-tiâⁿ gōa-piah ê mn̂g, tn̂g gō͘-cha̍p kong-chhioh. Pak-pêng kap tang-pêng siâng-khoán.

20Hit-ê lâng koh niû gōa-tiâⁿ pak-mn̂g ê tn̂g kap khoah.

21Cháu-lông nn̄g pêng kok ū saⁿ keng siú-ōe-sek. Nn̄g pêng ê piah-thiāu í-ki̍p cháu-lông ê chhùn-chhioh kap tang-mn̂g siâng-khoán, tn̂g jī-cha̍p-gō͘ kong-chhioh, khoah cha̍p-jī kong-chhioh-pòaⁿ.

22Cháu-lông, thang-á, kap tiau-khek ê chang-chhiū, lóng kap tang-mn̂g ê chhùn-chhioh kâng-khoán. Cháu-lông ê ji̍p-kháu peh chhit chàn kiā-á chiūⁿ kàu pak-mn̂g; cháu-lông lēng-gōa chi̍t pêng thàng gōa-tiâⁿ.

23Lāi-tiâⁿ ū chi̍t ê mn̂g kap pak-mn̂g sio-tùi; pak-pêng kap tang-pêng lóng siâng-khoán. I niû chit nn̄g ê mn̂g ê kū-lī, tn̂g gō͘-cha̍p kong-chhioh.

24Hit-ê lâng chhōa góa kiâⁿ tùi lâm-pêng, khì kàu lâm-mn̂g. I niû chit-ê mn̂g; nn̄g pêng ê piah-thiāu í-ki̍p cháu-lông ê chhùn-chhioh lóng kap thâu-chêng nn̄g ê mn̂g kâng-khoán.

25Chit-ê mn̂g nn̄g pêng kap cháu-lông sì-chiu-ûi lóng ū thang-á, kap thâu-chêng niû ê thang-á kâng-khoán. Mn̂g ê cháu-lông tn̂g jī-cha̍p-gō͘ kong-chhioh, khoah cha̍p-jī kong-chhioh-pòaⁿ.

26Cháu-lông ê ji̍p-kháu peh chhit chàn kiā-á chiūⁿ kàu lâm-mn̂g, cháu-lông lēng-gōa chi̍t pêng thàng gōa-tiâⁿ. Cháu-lông ê piah-thiāu ū khek chang-chhiū, chit-pêng chi̍t châng, hit-pêng chi̍t châng.

27Lāi-tiâⁿ lâm-pêng mā ū mn̂g. Hit-ê lâng niû chit nn̄g ê mn̂g tiong-kan ê kū-lī, tn̂g gō͘-cha̍p kong-chhioh.

28Hit-ê lâng chhōa góa tùi lâm-mn̂g ji̍p-khì lāi-tiâⁿ. I niû lāi-tiâⁿ ê lâm-mn̂g, chhùn-chhioh kap gōa-tiâⁿ ê mn̂g siâng-khoán.

29Chiah-ê siú-ōe-sek, cháu-lông, kap piah-thiāu, tōa-sòe lóng kap kî-tha ê mn̂g kâng-khoán. Chit-ê mn̂g kap cháu-lông sì-chiu-ûi lóng ū thang-á. Mn̂g ê cháu-lông tn̂g jī-cha̍p-gō͘ kong-chhioh, khoah cha̍p-jī kong-chhioh-pòaⁿ.

30Sì-bīn ū cháu-lông, tn̂g jī-cha̍p-gō͘ kong-chhioh, khoah cha̍p-jī kong-chhioh-pòaⁿ.

31Cháu-lông bīn ǹg gōa-tiâⁿ, piah-thiāu ū khek chang-chhiū; peh poeh chàn kiā-á chiū thàng kàu chit-ê mn̂g.

32Hit-ê lâng chhōa góa tùi tang-mn̂g ji̍p-khì lāi-tiâⁿ. I niû lāi-tiâⁿ ê tang-mn̂g, chhùn-chhioh kap gōa-tiâⁿ ê mn̂g siâng-khoán.

33Chiah-ê siú-ōe-sek, cháu-lông, kap piah-thiāu, tōa-sòe lóng kap kî-tha ê mn̂g kâng-khoán. Chit-ê mn̂g kap cháu-lông sì-chiu-ûi lóng ū thang-á. Mn̂g ê cháu-lông tn̂g jī-cha̍p-gō͘ kong-chhioh, khoah cha̍p-jī kong-chhioh-pòaⁿ.

34Cháu-lông bīn ǹg gōa-tiâⁿ, mn̂g nn̄g pêng ê piah-thiāu lóng ū khek chang-chhiū; peh poeh chàn kiā-á chiū thàng kàu chit-ê mn̂g.

35Hit-ê lâng chhōa góa tùi pak-mn̂g ji̍p-khì lāi-tiâⁿ. I niû lāi-tiâⁿ ê pak-mn̂g, chhùn-chhioh kap gōa-tiâⁿ ê mn̂g siâng-khoán.

36I mā niû chiah-ê siú-ōe-sek, cháu-lông, kap piah-thiāu. Mn̂g ê sì-chiu-ûi lóng ū thang-á. Mn̂g ê cháu-lông tn̂g jī-cha̍p-gō͘ kong-chhioh, khoah cha̍p-jī kong-chhioh-pòaⁿ.

37Cháu-lông bīn ǹg gōa-tiâⁿ, cháu-lông nn̄g pêng ê piah-thiāu lóng ū khek chang-chhiū; peh poeh chàn kiā-á chiū thàng kàu chit-ê mn̂g.

38Tī ta̍k-ê mn̂g ê cháu-lông piⁿ--á lóng ū chi̍t keng ū mn̂g ê pâng-keng; chè-si tī hia sóe sio-hòa-chè ê cheng-siⁿ.

39Cháu-lông ū hē toh-á, chit-pêng nn̄g tè, hit-pêng nn̄g tè; in tī chiah-ê toh-á téng thâi sio-hòa-chè, sio̍k-chōe-chè, kap pê-chōe-chè ê cheng-siⁿ.

40Cháu-lông beh khì pak-mn̂g ê mn̂g-kháu, ǹg gōa-bīn hit-pêng ū nn̄g tè toh-á, ǹg lāi-bīn chit-pêng mā ū nn̄g tè.

41Só͘-í, tōa-mn̂g nn̄g pêng kok ū sì tè toh-á, chóng-kiōng ū poeh tè, thang tī hit téng-bīn thâi hiàn-chè ê cheng-siⁿ.

42Sio-hòa-chè beh ēng ê toh-á ū sì tè; chiah-ê toh-á sī ēng chio̍h-thâu phah--ê, koân gō͘-cha̍p kong-hun, toh-bīn tn̂g khoah lóng sī chhit-cha̍p-gō͘ kong-hun; thâi sio-hòa-chè kap kî-tha chè-sū ê cheng-siⁿ beh ēng ê khì-khū hē tī toh-téng.

43Cháu-lông sì-chiu-ûi ê piah ū kau-á, tn̂g chhit kong-hun-pòaⁿ. Hiàn-chè ê bah lóng hē tī toh-téng.

44Hit-ê lâng chhōa góa ji̍p-khì lāi-tiâⁿ. Lāi-tiâⁿ ū nn̄g keng ūi-tio̍h chhiùⁿ-koa ê lâng siat ê pâng-keng, chi̍t keng tī pak-mn̂g ê piⁿ--á, ǹg lâm; chi̍t keng tī lâm-mn̂g ê piⁿ--á, ǹg pak.

45I kā góa kóng, “Ǹg lâm ê pâng-keng sī beh hō͘ tī sèng-tiān sū-hōng ê chè-si ēng--ê.

46Ǹg pak ê pâng-keng sī beh hō͘ tī chè-tôaⁿ sū-hōng ê chè-si ēng--ê. Chiah-ê chè-si lóng sī Lī-bī chi-cho̍k tiong Sat-tok ê hō͘-tāi; chí-ū in thang lâi Siōng Chú bīn-chêng sū-hōng.”

47Hit-ê lâng koh niû lāi-tiâⁿ, tn̂g, khoah lóng sī gō͘-cha̍p kong-chhioh. Chè-tôaⁿ tī sèng-tiān thâu-chêng.

48I koh chhōa góa khì kàu sèng-tiān thâu-chêng ê cháu-lông. I niû cháu-lông ê piah-thiāu, kāu nn̄g kong-chhioh-pòaⁿ; mn̂g ê khoah chhit kong-chhioh, nn̄g pêng ê piah kāu lóng sī chi̍t kong-chhioh-pòaⁿ.

49Cháu-lông ê tn̂g cha̍p kong-chhioh, khoah gō͘ kong-chhioh-pòaⁿ; lâng tio̍h peh kiā-á chiah ōe-tàng khì kàu cháu-lông. Óa-kūn piah-thiāu ū thiāu-á, chit-pêng chi̍t ki, hit-pêng chi̍t ki.