Ezekiel 20 — Chinese TTVR (現代台語譯本羅馬字版)

1Tē-chhit nî gō͘-ge̍h chhoe-cha̍p, ū kúi ê Í-sek-lia̍t ê tiúⁿ-ló lâi chē tī góa ê bīn-chêng, beh chai Siōng Chú ê chí-ì.

2Hit-sî, Siōng Chú tùi góa kóng,

3“Jîn-chú ah, lí tio̍h kā Í-sek-lia̍t ê tiúⁿ-ló kóng, Chì-koân ê Siōng Chú án-ni kóng, ‘Lín lâi beh kiû-mn̄g góa ê chí-ì sī--bô? Góa kí góa éng-oán ê oa̍h-miā li̍p-sè: Góa bô beh hō͘ lín mn̄g.’ Chì-koân ê Siōng Chú án-ni soan-pò͘.

4“Jîn-chú ah, lí beh sím-mn̄g in sī--bô? Nā sī, tio̍h hō͘ in chai in ê chó͘-sian só͘ chòe khó-ò͘ⁿ ê sū.

5Lí tio̍h kā in kóng, Chì-koân ê Siōng Chú án-ni kóng, ‘Góa kéng-soán Í-sek-lia̍t -lâng chòe góa chú-bîn ê sî, tī Ai-ki̍p -tōe hō͘ in bat góa; góa tùi Ngá-kok ê hō͘-tāi li̍p-sè kóng: Góa sī Siōng Chú — lín ê Siōng-tè.

6Hit-sî, góa èng-ún beh chhōa in chhut Ai-ki̍p, kàu góa ūi-tio̍h in soán-tēng hit-tè lâu lin kap bi̍t ê tōe, sī bān-kok tiong siōng pûi koh súi ê tōe.

7Góa kā in kóng: Lín ta̍k-ê lâng tio̍h pàng-sak lín ê ba̍k-chiu só͘ kah-ì hiah-ê thang iàm-ò͘ⁿ ê ngó͘-siōng; m̄-thang pài Ai-ki̍p ê ké-sîn lâi phah lâ-sâm ka-kī, in-ūi góa sī Siōng Chú — lín ê Siōng-tè.

8M̄-kú in pōe-ge̍k góa, m̄ thiaⁿ-thàn góa. In bô pàng-sak só͘ kah-ì hiah-ê thang iàm-ò͘ⁿ ê ngó͘-siōng, mā bô khì-sak Ai-ki̍p ê ké-sîn. Hit-sî, góa siūⁿ-beh tī Ai-ki̍p chiong góa choân-pō͘ ê siū-khì lóng piàⁿ tī in sin-chiūⁿ.

9Chóng-sī góa bô án-ni chòe. Góa bô beh hō͘ góa ê miâ tī in khiā-khí ê lia̍t-kok tiong siū siat-to̍k; in-ūi góa bat tī in khiā-khí ê lia̍t-kok jîn-bîn ê bīn-chêng tùi in kóng, góa beh chhōa in chhut Ai-ki̍p.’

10“Só͘-í, góa chhōa in chhut Ai-ki̍p, kā in chhōa kàu khòng-iá.

11Góa chiong góa ê kui-lē sù hō͘ in, chiong góa ê bēng-lēng kà-sī in, hō͘ chun-hêng ê lâng lóng thang pó-chûn sìⁿ-miā.

12Góa koh chiong góa ê An-hioh-ji̍t sù hō͘ in, chòe góa kap in li̍p-iok ê kì-hō, hō͘ in chai, góa sī kā in hun-pia̍t-choh-sèng ê Siōng Chú.

13M̄-kú, Í-sek-lia̍t -lâng soah tī khòng-iá pōe-ge̍k góa, bô chun-siú góa ê kui-lē, kū-choa̍t góa ê bēng-lēng; chun-hêng ê lâng chiah ōe-tàng pó-chûn sìⁿ-miā. In thiat-tóe ûi-hoān An-hioh-ji̍t. In-ūi án-ni, góa siūⁿ-beh tī khòng-iá chiong góa choân-pō͘ ê siū-khì lóng piàⁿ tī in sin-chiūⁿ, kā in siau-bia̍t.

14Chóng-sī góa bô án-ni chòe. Góa bô beh hō͘ góa ê miâ tī in khiā-khí ê lia̍t-kok tiong siū siat-to̍k; in-ūi góa bat tī in khiā-khí ê lia̍t-kok jîn-bîn ê bīn-chêng tùi in kóng, góa beh chhōa in chhut Ai-ki̍p.

15Só͘-í, góa tī khòng-iá ǹg in li̍p-sè, bô beh chhōa in ji̍p-khì góa beh sù hō͘ in hit-tè lâu lin kap bi̍t ê tōe, chiū-sī bān-kok tiong siōng pûi koh súi ê tōe.

16In-ūi in khì-sak góa ê bēng-lēng, bô chun-siú góa ê kui-lē, ûi-hoān góa ê An-hioh-ji̍t, khì pài in ka-kī ê ngó͘-siōng.

17“Sui-jiân án-ni, góa iû-goân khó-lîn in, bô tī khòng-iá kā in lóng-chóng siau-bia̍t.

18Góa tī khòng-iá kā in ê jî-lú kéng-kò, m̄-thang chun-thàn in ê chó͘-sian só͘ tēng ê kui-lē, m̄-thang siú in ê bēng-lēng, m̄-thang pài in ê ngó͘-siōng lâi phah lâ-sâm ka-kī.

19Góa sī Siōng Chú — lín ê Siōng-tè. Lín tio̍h sūn-thàn góa ê kui-lē, chun-hêng góa ê bēng-lēng;

20tio̍h siú An-hioh-ji̍t chòe sèng-ji̍t, chòe góa kap lín li̍p-iok ê kì-hō, hō͘ lín chai góa sī Siōng Chú — lín ê Siōng-tè.

21“M̄-kú, in ê jî-lú mā pōe-ge̍k góa. In bô sūn-thàn góa ê kui-lē, bô chun-siú góa ê bēng-lēng, ûi-hoān An-hioh-ji̍t; chun-hêng ê lâng chiah ōe-tàng pó-chûn sìⁿ-miā. Góa siūⁿ-beh tī khòng-iá chiong góa choân-pō͘ ê siū-khì lóng piàⁿ tī in sin-chiūⁿ.

22M̄-kú, góa kā góa ê chhiú kiu--tò-lâi. Góa án-ni chòe, sī bô beh hō͘ góa ê miâ siū bú-jio̍k, in-ūi lia̍t-kok ê jîn-bîn lóng ū khòaⁿ-tio̍h góa kā Í-sek-lia̍t -lâng tùi Ai-ki̍p chhōa--chhut-lâi.

23Góa koh tī khòng-iá ǹg in li̍p-sè: Góa beh kā in hòng-tio̍k khì gōa-pang, sì-sòaⁿ tī lia̍t-kok,

24in-ūi in bô chun-siú góa ê bēng-lēng, khì-sak góa ê kui-lē, ûi-hoān An-hioh-ji̍t, kèng-pài in chó͘-sian ê ngó͘-siōng.

25“Āu-lâi, góa kui-khì chiong bô hó ê kui-lē, bōe-tàng hō͘ lâng tit-tio̍h oa̍h-miā ê bēng-lēng hō͘ in;

26hō͘ in sio ka-kī ê tōa-kiáⁿ hiàn-chòe chè lâi phah lâ-sâm ka-kī. Góa beh hō͘ in kiaⁿ-hiâⁿ, in chiū chai góa sī Siōng Chú.

27“Só͘-í, jîn-chú ah, tio̍h kā Í-sek-lia̍t -lâng kóng, Chì-koân ê Siōng Chú án-ni kóng, ‘Lín ê chó͘-sian tùi góa put-tiong, siat-to̍k góa.

28Góa chhōa in kàu góa èng-ún beh hō͘ in ê thó͘-tōe. In chi̍t-ē khòaⁿ-tio̍h koân ê soaⁿ kap hoat kah chin ām ê chhiū, chiū tī hia hiàn-chè; in tī hia hiàn phang-phang ê chè-mi̍h kap tiān-chiú-chè, jiá góa siū-khì.

29Góa mn̄g in: Lín khì hit-ê koân ê só͘-chāi kiò-chòe sím-mi̍h? Chit-ê só͘-chāi kàu kin-á-ji̍t iáu kiò-chòe Pa-bâ.’

30Só͘-í, lí tio̍h kā Í-sek-lia̍t -lâng kóng, góa — Chì-koân ê Siōng Chú án-ni kóng, ‘Lín beh kè-sio̍k hoān lín chó͘-sian só͘ hoān ê chōe lâi phah lâ-sâm ka-kī sī--bô? Beh kè-sio̍k pài in só͘ pài khó-ò͘ⁿ ê ngó͘-siōng lâi hoān kan-îm sī--bô?

31Lín kàu kin-á-ji̍t iáu-teh sio ka-kī ê jî-lú hiàn chòe chè, pài ngó͘-siōng lâi phah lâ-sâm ka-kī; Í-sek-lia̍t -lâng, góa kiám ōe-tàng hō͘ lín kiû-mn̄g? Góa Chì-koân ê Siōng Chú kí góa éng-oán ê oa̍h-miā li̍p-sè: Góa bô beh hō͘ lín mn̄g.

32Lín sim-lāi siūⁿ: Goán beh chhin-chhiūⁿ lia̍t-kok, chhin-chhiūⁿ gōa-cho̍k-lâng, khì pài chhâ-thâu kap chio̍h-thâu. Lín ê sim-ì choa̍t-tùi bōe-tàng si̍t-hiān.’”

33Chì-koân ê Siōng Chú kóng, “Góa kí góa éng-oán ê oa̍h-miā li̍p-sè, góa beh choh-ông, chhun-chhut tōa koân-lêng ê chhiú tī-lí lín, beh chiong góa ê tōa siū-khì piàⁿ tī lín sin-chiūⁿ.

34Góa beh chhun-chhut tōa koân-lêng ê chhiú, ēng piàⁿ--chhut-lâi ê tōa siū-khì, chiong lín tùi bān-bîn tiong chhōa--chhut-lâi, tùi hun-sòaⁿ--khì ê lia̍t-kok chū-chi̍p lín.

35Góa beh kā lín chhōa-khì gōa-cho̍k-lâng ê khòng-iá, tng-bīn kā lín sím-mn̄g.

36Góa chá-chêng án-chóaⁿ tī Ai-ki̍p ê khòng-iá hêng-hoa̍t lín ê chó͘-sian, hiān-chāi beh chiàu án-ni kā lín hêng-hoa̍t. Chì-koân ê Siōng Chú án-ni soan-kò.

37“Góa beh giâm-giâm koán-kàu lín, chhin-chhiūⁿ kò͘-iûⁿ ê bo̍k-chiá koán-lí iûⁿ-kûn, hō͘ lín chun-siú góa ê iok.

38Góa beh tùi lín tiong-kan tû-khì pōe-ge̍k kap tek-chōe góa ê lâng; góa beh kā in tùi kià-ku ê só͘-chāi chhōa--chhut-lâi, m̄-kú in bōe-tàng tńg-khì kò͘-hiong Í-sek-lia̍t. Án-ni, lín chiū chai góa sī Siōng Chú.

39“Koan-hē lín, Í-sek-lia̍t -lâng ah, Chì-koân ê Siōng Chú án-ni kóng, ‘Sûi-chāi lín, lín nā bô beh ho̍k-chiông góa, chòe lín khì pài lín ê ngó͘-siōng! M̄-kú lín bōe-ēng-tit koh hiàn-chè hō͘ ngó͘-siōng lâi siat-to̍k góa ê sèng-miâ.’

40Chì-koân ê Siōng Chú kóng, ‘Lín só͘-ū ê Í-sek-lia̍t -lâng beh tī góa ê sèng-soaⁿ, chiū-sī Í-sek-lia̍t ê koân-soaⁿ kèng-pài góa. Góa beh chiap-la̍p lín, koh ài lín tòa chè-mi̍h, chho͘-se̍k ê lông-sán-bu̍t, kap it-chhè sîn-sèng ê lé-mi̍h lâi hiàn hō͘ góa.

41Góa beh tùi bān-cho̍k ê tiong-kan kā lín chhōa--chhut-lâi, kā lín tùi sì-sòaⁿ--khì ê lia̍t-kok chū-chi̍p óa--lâi; hit-sî, góa beh chiap-la̍p lín chhin-chhiūⁿ chiap-siū phang-phang ê chè-mi̍h; lia̍t-kok beh in-ūi lín chai, góa sī sîn-sèng--ê.

42Góa beh kā lín chhōa tńg-khì lín ê kò͘-hiong Í-sek-lia̍t, chiū-sī góa èng-ún beh hō͘ lín chó͘-sian ê thó͘-tōe, hit-sî, lín chiū chai góa sī Siōng Chú.

43Lín beh tī hia siūⁿ-khí í-chêng só͘ chòe it-chhè phah lâ-sâm ka-kī ê sū, in-ūi ka-kī só͘ chòe siâ-ok ê sū iàm-ò͘ⁿ ka-kī.

44Í-sek-lia̍t -lâng ah, góa ūi-tio̍h góa ê miâ bô chiàu lín ê siâ-ok kap lín só͘ chòe ê pháiⁿ-sū kā lín hêng-hoa̍t ê sî, lín chiū chai góa sī Siōng Chú.’ Chì-koân ê Siōng Chú án-ni soan-pò͘.”

45Siōng Chú kā góa kóng,

46“Jîn-chú ah, lí khòaⁿ lâm-pêng, kā lâm-hng kéng-kò, tùi Nî-kek-hu ê chhiū-nâ kóng ū-giân.

47Tio̍h kā Nî-kek-hu ê chhiū-nâ kóng, ‘Tio̍h thiaⁿ Siōng Chú só͘ kóng ê ōe. Chì-koân ê Siōng Chú án-ni kóng: Góa beh tī lín hia pàng-hé, kā chhiū-nâ lāi só͘-ū ê chhiū-ba̍k, bô-lūn sī chhiⁿ-chhùi--ê á-sī ko͘-tâ--ê, lóng sio-liáu-liáu. Béng-lia̍t ê hé-iām phah bōe hoa, tùi lâm kàu pak, kā tōe-bīn ê it-chhè sio kah chhùn-chháu-put-liû.

48Ta̍k-ê lâng lóng ōe chai, che sī góa Siōng Chú pàng ê hé, it-tēng phah bōe hoa.’”

49M̄-kú góa kóng, “Ài, Chì-koân ê Siōng Chú ah, mài kiò góa chòe chit-khoán tāi-chì. Lâng lóng án-ni kóng góa, chit-ê lâng put-sî teh kóng hàm-kó͘.”