Ezekiel 27

Chinese TTVR (現代台語譯本羅馬字版)

← Chapter 26 Jump to: Chapter 28 →

1Siōng Chú tùi góa kóng,

2“Jîn-chú ah, lí tio̍h ūi Thài-ní chhiùⁿ ai-ko.

3Lí tio̍h tùi tī hái-kháu, kap tī chin chōe iân-hái ê tó-sū chòe bō͘-e̍k ê Thài-ní kóng, ‘Chì-koân ê Siōng Chú án-ni kóng: Thài-ní ah, lí bat khoa-kháu ka-kī sī si̍p-choân-si̍p-bí ê siâⁿ-chhī.

4Lí khok-tián lí ê pian-kài kàu hái ê tiong-sim; lí siū khí-chō chhin-chhiūⁿ chi̍t chiah oân-bí ê tōa-chûn.

5In ēng Hek-bûn-soaⁿ ê siông-chhiū chòe chûn-pang, ēng Lê-pa-lūn ê pek-hiuⁿ-chhiū chòe chûn-ûi,

6ēng Pa-san ê siōng-chhiū chòe chiúⁿ, ēng Sài-phó͘-lō͘-su ê n̂g-iông-bo̍k, siuⁿ chhiūⁿ-gê chòe chhn̂g-pang.

7In ēng Ai-ki̍p siù-hoe ê iù-môa-pò͘ chòe phâng, lâng tùi hn̄g-hn̄g chiū khòaⁿ ōe tio̍h. In ēng Í-lī-sa iân-hōaⁿ ūn--lâi ê nâ-sek, chí-sek ê pò͘-liāu chòe pò͘-pîⁿ.

8Ūi lí kò-chûn--ê sī Se-tùn -lâng kap A-hoat -lâng; ūi lí hōaⁿ-tōa--ê sī Thài-ní pún-tōe ê ko-chhiú.

9Siu-lí chûn--ê sī Ka-pa-le̍k láu-liān ê sai-hū; tōa-hái lâi-óng ê chûn-chiah kap chûn-oân lóng lâi lí chia chòe seng-lí.

10“‘Lí chhiàⁿ Pho-su -lâng, Lū-tí-a -lâng, kap Hut -lâng lâi lí ê kun-tūi chòe chiàn-sū. In kā tún-pâi kap thâu-khoe kòa tī lí ê iâⁿ-pâng, ke-thiⁿ lí ê ui-hong.

11Tùi A-hoat chhiàⁿ--lâi ê chiàn-sū ūi lí siú-ōe siâⁿ-chhiûⁿ; lí ê siâⁿ-lâu mā ū Ka-má-tí -lâng teh kò͘-siú. In kā tún-pâi kòa tī lí ê piah-téng, hō͘ lí koh-khah chòng-koan.

12“‘ Tha-si -lâng in-ūi lí ê mi̍h-kiāⁿ chin chōe chiū lâi kau-koan, ēng gûn, thih, siah, kap iân, kau-ōaⁿ lí ê siong-phín.

13Hi-la̍h -lâng, Thó͘-pa -lâng, Bí-siat -lâng kap lí chòe seng-lí, ēng lô͘-lē kap tâng-khì kau-ōaⁿ lí ê hè-mi̍h.

14Tô-ka-má -lâng ēng bé, chiàn-bé, kap lô, kau-ōaⁿ lí ê hè-mi̍h.

15Tí-tān -lâng kap lí chòe seng-lí, chin chōe hái-tó ê chū-bîn mā-sī lí ê kò͘-kheh; in ēng chhiūⁿ-gê, o͘-tôaⁿ-bo̍k kap lí kau-ōaⁿ hè-mi̍h.

16A-lân -lâng in-ūi lí ê mi̍h-kiāⁿ chin chōe chiū lâi kau-koan, ēng le̍k-pó-chio̍h, chí-sek-pò͘, siù-hoe-pò͘, iù-môa-pò͘, san-ô͘, kap âng-pó-chio̍h, kau-ōaⁿ lí ê siong-phín.

17Iû-tāi -lâng, Í-sek-lia̍t -lâng lóng kap lí chòe seng-lí, ēng Bí-le̍k ê be̍h, piáⁿ, bi̍t, kaⁿ-ná-iû, jú-hiuⁿ kau-ōaⁿ lí ê hè-mi̍h.

18In-ūi lí ê mi̍h-kiāⁿ chin chōe, Tāi-má-sū-kek -lâng ēng Hek-pún ê chiú kap pe̍h iûⁿ-mn̂g kap lí kau-e̍k,

19ēng O͘-sat ê chiú, cheng-liān ê thih, kùi-phê, phang ê chhiong-pô͘, kap lí kau-ōaⁿ hè-mi̍h.

20Tí-tān -lâng ēng chū bé-oaⁿ ê thán-á kau-ōaⁿ lí ê hè-mi̍h.

21A-la-pek kap Ki-ta̍t só͘-ū ê léng-siù ēng iûⁿ-ko, mî-iûⁿ-káng, soaⁿ-iûⁿ-káng kau-ōaⁿ lí ê hè-mi̍h.

22Sī-pa kap La-má ê seng-lí-lâng ēng ko-kip hiuⁿ-liāu, chu-pó, n̂g-kim kau-ōaⁿ lí ê siong-phín.

23Hap-lân, Kan-nî, I-tiân, Sī-pa ê seng-lí-lâng, A-su̍t, Ki-boat lóng lâi kap lí chòe seng-lí.

24In chiong siōng-téng ê i-ho̍k, siù-hoe ê chí-sek-pò͘, chhái-sek ê tōe-thán, ēng soh-á pa̍k kah chin hó-sè, tòa-lâi chhī-tiûⁿ kap lí bóe-bōe.

25Tha-si ê chûn-tūi kā lí ūn-sàng hè-mi̍h. Lí chhin-chhiūⁿ hái--ni̍h ê tōa-chûn, tóe-móa hè-mi̍h, chia̍h-chúi chin chhim.

26Kò-chûn--ê kā lí kò kàu gōa-hái; tang-hong tī hái-tiong kā lí siàn-phòa.

27Chûn phòa tîm--lo̍h-khì ê sî, lí ê châi-pó, siong-phín, hè-mi̍h, chûn-oân kap hōaⁿ-tōa--ê, siu-lí chûn--ê, hū-chek bóe-bōe--ê, chûn-téng ê kun-jîn kap só͘-ū ê lâng, lóng tîm-lo̍h hái-tóe.

28Chûn tîm-lo̍h hái ê sî, chûn-oân hoah kiù-miā ê siaⁿ, hù-kūn iân-hái ê lâng lóng tio̍h-kiaⁿ.

29“‘Kò-chûn--ê, chûn-oân, kap hōaⁿ-tōa--ê, lóng beh lo̍h-chûn chiūⁿ-hōaⁿ.

30In beh ūi-tio̍h lí chhut-siaⁿ tōa khàu, thâu-khak sám thô͘-hún, tī hé-hu tiong kō-lâi-kō-khì.

31In ūi-tio̍h lí thì kng-thâu, chhēng môa-saⁿ, siong-sim ai-khàu, thòng-khó͘ kàu-ke̍k.

32In ūi-tio̍h lí thî-khàu ai-siong ê sî, ūi lí chhiùⁿ ai-ko: Ū tó chi̍t chō siâⁿ chhin-chhiūⁿ Thài-ní, tîm-lo̍h hái-tóe bô-siaⁿ-bô-seh?

33Lí tī hái--ni̍h sàng-hè, hō͘ lia̍t-kok chhiong-chiok. Lí ê châi-hù kap siong-phín chin chōe, hō͘ sè-kan ê kun-ông hó-gia̍h.

34Lí tī tōa-hái hō͘ éng lòng-phòa, só͘-ū ê hè-mi̍h kap chûn-oân lóng tîm lo̍h-khì hái chhim ê só͘-chāi.

35“‘Hái-tó ê chū-bîn lóng in-ūi lí ê kiat-kio̍k tio̍h-kiaⁿ; in ê kun-ông mā lóng kiaⁿ-hiâⁿ khióng-hông, bīn-tài-iu-iông.

36Lia̍t-kok ê seng-lí-lâng kā lí hàiⁿ-thâu thí-chhiò; lí éng-oán siau-sit, chit-khoán ê kiat-kio̍k hō͘ lâng tio̍h-kiaⁿ.’”

← Chapter 26 Jump to: Chapter 28 →