Ezekiel 12

Chinese TTVR (現代台語譯本羅馬字版)

← Chapter 11 Jump to: Chapter 13 →

1Siōng Chú tùi góa kóng,

2“Jîn-chú, lí tòa tī pōe-ge̍k ê lâng tiong-kan. In ū ba̍k-chiu, m̄-kú bô beh khòaⁿ; ū hī-khang, m̄-kú bô beh thiaⁿ, in-ūi in lóng sī pōe-ge̍k ê lâng.

3“Só͘-í, jîn-chú, lí tio̍h chún-pī siū hòng-tio̍k ê sî só͘ su-iàu ê pau-ho̍k-á, tng-thâu-pe̍h-ji̍t, tī in ê ba̍k-chiu chêng lī-khui lí tòa ê só͘-chāi khì pa̍t-ūi; in sui-jiân pōe-ge̍k, khó-lêng ōe in-ūi lí ê hêng-tōng kak-chhíⁿ.

4Lí tio̍h tī ji̍t--sî, tī in ê ba̍k-chiu chêng, the̍h lí khoán-hó tī siū hòng-tio̍k ê sî beh ēng ê pau-ho̍k-á chhut--khì. Kàu hông-hun, lí tio̍h tī in ê bīn-chêng chhin-chhiūⁿ siū hòng-tio̍k ê lâng lī-khui.

5Lí koh tio̍h tī in iáu-teh khòaⁿ ê sî, kā lí chhù ê piah ó͘-khang, tùi hit-khang kōaⁿ pau-ho̍k-á chhut--khì.

6Kàu thiⁿ àm ê sî, lí tio̍h tī in bīn-chêng kā pau-ho̍k-á phāiⁿ tī keng-thâu kiâⁿ--chhut-khì. Lí koh tio̍h kā lí ê bīn khàm--khí-lâi, khòaⁿ bōe tio̍h chit-tè tōe; góa beh hō͘ lí chiâⁿ-chòe góa hêng-hoa̍t Í-sek-lia̍t -lâng ê tiāu-thâu.”

7Góa chiū chiàu Siōng Chú ê bēng-lēng chòe. Hit-ji̍t, góa tī ji̍t--sî chiong khoán-hó tī siū hòng-tio̍k ê sî beh ēng ê pau-ho̍k-á the̍h--chhut-lâi. Kàu hông-hun, góa ēng chhiú kā piah ó͘-khang; thiⁿ àm ê sî, tī chèng-lâng ê bīn-chêng phāiⁿ pau-ho̍k-á lī-khui.

8Keh-chá-khí, Siōng Chú tùi góa kóng,

9“Jîn-chú, hiah-ê pōe-ge̍k ê Í-sek-lia̍t -lâng nā mn̄g lí, ‘Lí teh chhòng siáⁿ?’

10Lí tio̍h kā in kóng, ‘Chì-koân ê Siōng Chú án-ni kóng: Che sī iú-koan tī Iâ-lō͘-sat-léng ê ông kap só͘-ū Í-sek-lia̍t -lâng ê sìn-sit.’

11Lí tio̍h kā in kóng, ‘Góa chiū-sī lín ê tiāu-thâu. Góa só͘ chòe--ê beh hoat-seng tī lín sin-chiūⁿ. Lín beh siū-lia̍h, siū hòng-tio̍k.

12Lín ê ông beh tī thiⁿ àm ê sî, phāiⁿ pau-ho̍k-á tùi ūi-tio̍h i ó͘ ê piah-khang chhut--khì. I ê bīn beh khàm--teh, khòaⁿ bōe tio̍h chit-tè tōe.’

13Góa beh pha-bāng kā i lia̍h--khí-lâi, lia̍h-khì Pa-pí-lûn. I khòaⁿ bōe tio̍h hit-ê só͘-chāi, lō͘-bé ōe sí tī hia.

14Góa beh kā i ê kun-tūi kap sì-chiu-ûi só͘-ū pang-chān i ê lâng, kóaⁿ-sòaⁿ khì tang sai lâm pak ta̍k só͘-chāi, mā beh pu̍ih to tui-sat in.

15“Góa kā in kóaⁿ-sòaⁿ khì lia̍t-kok, kā in hòng-tio̍k khì ta̍k só͘-chāi ê sî, in chiū chai góa sī Siōng Chú.

16M̄-kú góa beh kā in lâu chi̍t-kóa lâng, bô sí tī to-kiàm, ki-hng, un-e̍k. Án-ni, hiah-ê lâu--lo̍h-lâi ê lâng beh tī siū hòng-tio̍k ê ta̍k-kok, kóng-khí ka-kī chá-chêng só͘ chòe ê pháiⁿ-tāi. Án-ni, in chiū chai góa sī Siōng Chú.”

17Siōng Chú tùi góa kóng,

18“Jîn-chú, lí chia̍h-pn̄g ê sî tio̍h phi̍h-phi̍h-chhoah, lim-chúi ê sî tio̍h kiaⁿ-hiâⁿ put-an.

19Lí tio̍h tùi chit só͘-chāi ê jîn-bîn kóng, ‘Che sī Chì-koân ê Siōng Chú iú-koan lâu tī Í-sek-lia̍t pún-kok ê Iâ-lō͘-sat-léng jîn-bîn kóng ê ōe: In chia̍h-pn̄g ê sî ōe phi̍h-phi̍h-chhoah, lim-chúi ê sî ōe kiaⁿ-hiâⁿ put-an; in-ūi hia ê chū-bîn bû-hoat-bû-thian, in ê thó͘-tōe ōe pha-hng, bô chhun pòaⁿ-hāng.

20Ū lâng tòa ê siâⁿ-tìn ōe hong-hòe, thó͘-tōe ōe pha-hng. Án-ni, lín chiū chai góa sī Siōng Chú.’”

21Siōng Chú tùi góa kóng,

22“Jîn-chú, Í-sek-lia̍t -lâng sī-án-chóaⁿ ū sio̍k-gú kóng ‘Ji̍t-chí chi̍t-ji̍t chi̍t-ji̍t teh kè, bô chi̍t ê īⁿ-siōng si̍t-hiān’?

23Lí tio̍h kā in kóng, ‘Chì-koân ê Siōng Chú án-ni kóng: Góa beh hō͘ chit-kù sio̍k-gú bô koh liû-hêng; Í-sek-lia̍t -lâng bōe koh kóng chit-kù sio̍k-gú.’ Lí tio̍h kā in kóng, ‘Sî-ji̍t pek-kūn lah, só͘-ū ê īⁿ-siōng lóng beh si̍t-hiān lah.’

24“ Í-sek-lia̍t -lâng tiong-kan bô beh koh ū ké ê īⁿ-siōng á-sī lâng kah-ì thiaⁿ ê ū-giân.

25Góa Siōng Chú chhin-chhùi tùi in kóng ê ōe, it-tēng ōe si̍t-hiān, bōe iân-tî. Pōe-ge̍k ê lâng ah, góa kā lín kóng ê ōe beh tī lín oa̍h--teh ê sî si̍t-hiān. Góa — Chì-koân ê Siōng Chú án-ni soan-pò͘.”

26Siōng Chú koh tùi góa kóng,

27“Jîn-chú, Í-sek-lia̍t -lâng beh kóng, ‘I khòaⁿ--kìⁿ ê īⁿ-siōng sī teh kóng chin kú í-āu ê tāi-chì, só͘ kóng ê ū-giân lóng sī chí iâu-oán ê chiong-lâi.’

28Só͘-í, lí tio̍h kā in kóng, ‘Chì-koân ê Siōng Chú án-ni kóng: Góa ê ōe bô chi̍t kù ōe iân-tî; góa kóng ê ōe it-tēng si̍t-hiān.’ Góa — Chì-koân ê Siōng Chú án-ni soan-pò͘.”

← Chapter 11 Jump to: Chapter 13 →