Ezekiel 46

Chinese TTVR (現代台語譯本羅馬字版)

← Chapter 45 Jump to: Chapter 47 →

1Chì-koân ê Siōng Chú án-ni kóng, “Lāi-tiâⁿ ê tang-mn̂g, An-hioh-ji̍t kap chhoe-it tio̍h phah-khui, ōe-tàng chòe kang hit la̍k ji̍t tio̍h koaiⁿ--teh.

2Chè-si beh ūi ông hiàn sio-hòa-chè kap pêng-an-chè ê sî, ông tio̍h tùi gōa-tiâⁿ keng-kè chit-ê mn̂g ê cháu-lông ji̍p--lâi, khiā tī mn̂g-thiāu piⁿ, tī hō͘-tēng hia kèng-pài; kèng-pài liáu-āu chiū thè--chhut-khì. Chit-ê mn̂g tio̍h it-ti̍t khui--teh, ē-hng í-chêng m̄-thang koaiⁿ.

3Múi chi̍t ê An-hioh-ji̍t kap chhoe-it, choân-kok ê jîn-bîn tio̍h tī chit-ê mn̂g ê thâu-chêng kèng-pài Siōng Chú.

4An-hioh-ji̍t, ông tio̍h ēng la̍k chiah bô hâ-chhû ê iûⁿ-ko, kap chi̍t chiah bô hâ-chhû ê mî-iûⁿ-káng, chòe sio-hòa-chè hiàn hō͘ Siōng Chú.

5Siâng-sî tio̍h hiàn ê sò͘-chè, múi chi̍t chiah mî-iûⁿ-káng phòe cha̍p-chhit kong-seng-pòaⁿ ê iù mī-hún, múi chi̍t chiah iûⁿ-ko phòe jōa-chōe iù mī-hún, ông thang chiàu ka-kī ê lêng-le̍k koat-tēng. Múi cha̍p-chhit kong-seng-pòaⁿ ê iù mī-hún tio̍h kah saⁿ kong-seng ê iû.

6Múi ge̍h chhoe-it, i tio̍h hiàn bô hâ-chhû ê sòe-chiah gû-káng chi̍t chiah, iûⁿ-ko la̍k chiah, mî-iûⁿ-káng chi̍t chiah.

7Ông mā tio̍h chún-pī sò͘-chè, múi chi̍t chiah gû-káng kap múi chi̍t chiah mî-iûⁿ-káng, lóng tio̍h phòe cha̍p-chhit kong-seng-pòaⁿ ê iù mī-hún chòe-hé hiàn; múi chi̍t chiah iûⁿ-ko phòe jōa-chōe iù mī-hún, ông thang chiàu ka-kī ê lêng-le̍k koat-tēng. Múi cha̍p-chhit kong-seng-pòaⁿ ê iù mī-hún tio̍h kap saⁿ kong-seng ê iû chòe-hé hiàn.

8Ông tùi gōa-tiâⁿ chit-ê mn̂g ê cháu-lông ji̍p--lâi, mā tio̍h tùi goân-lō͘ chhut--khì.

9“Tī choeh-kî, jîn-bîn beh lâi kèng-pài Siōng Chú ê sî, tùi pak-mn̂g ji̍p--lâi-ê, tio̍h tùi lâm-mn̂g chhut--khì; tùi lâm-mn̂g ji̍p--lâi-ê, tio̍h tùi pak-mn̂g chhut--khì. Put-chún in tùi kâng chi̍t ê mn̂g chhut-ji̍p; in tio̍h tùi ji̍p--lâi ê mn̂g tùi-bīn hit-ê mn̂g chhut--khì.

10Ông tio̍h tī jîn-bîn ji̍p--lâi ê sî ji̍p--lâi, tī jîn-bîn chhut--khì ê sî chhut--khì.

11Tī choeh-kî kap chí-tēng ê ji̍t-chí, beh hiàn ê sò͘-chè, múi chi̍t chiah gû-káng, á-sī mî-iûⁿ-káng, tio̍h phòe cha̍p-chhit kong-seng-pòaⁿ ê iù mī-hún. Múi chi̍t chiah iûⁿ-ko tio̍h phòe jōa-chōe iù mī-hún, ông thang chiàu ka-kī ê lêng-le̍k koat-tēng. Múi cha̍p-chhit kong-seng-pòaⁿ ê iù mī-hún tio̍h kap saⁿ kong-seng ê iû chòe-hé hiàn.

12“Ông chiàu i ê sim-ì hōng-hiàn sio-hòa-chè á-sī pêng-an-chè hō͘ Siōng Chú ê sî, tio̍h ūi i khui tang-mn̂g. I tio̍h chiàu An-hioh-ji̍t ê tiâu-lē hiàn sio-hòa-chè kap pêng-an-chè. I lī-khui liáu-āu, mn̂g tio̍h koaiⁿ--khí-lâi.”

13“Ông ta̍k-ji̍t tio̍h chún-pī chi̍t chiah bô hâ-chhû chi̍t-hè ê iûⁿ-ko, chòe sio-hòa-chè ta̍k chá-khí hiàn hō͘ Siōng Chú.

14Ta̍k chá-khí ông mā tio̍h hiàn sò͘-chè, ēng chi̍t kong-seng iû chhiau nn̄g kong-seng iù mī-hún hiàn hō͘ Siōng Chú. Chit-ê sò͘-chè ê kui-lē tio̍h éng-oán chun-siú.

15Ta̍k chá-khí tio̍h án-ni, ēng iûⁿ-ko, sò͘-chè, kap iû chòe sio-hòa-chè hiàn hō͘ Siōng Chú.”

16Chì-koân ê Siōng Chú án-ni kóng, “Ông nā chiong ka-kī ê thó͘-tōe sù hō͘ i jīm-hô chi̍t ê kiáⁿ, hit-tè tōe chiū kui-sio̍k hit-ê kiáⁿ; hit-ê kiáⁿ thang kā thó͘-tōe lâu hō͘ i ê kiáⁿ-sun chòe sán-gia̍p.

17Ông nā chiong i ê thó͘-tōe sù hō͘ i ê jîn-sîn, hit-tè tōe chiū kui-sio̍k hit-ê jîn-sîn; m̄-kú kàu ‘Un-hūi ê Nî’, jîn-sîn tio̍h chiong hit-tè tōe hêng hō͘ ông, in-ūi chí-ū ông ê kiáⁿ-sun chiah ōe-tàng sêng-chiap hit-tè tōe.

18Ông bōe-ēng-tit chhim-chiàm jîn-bîn ê thó͘-tōe, kā in kóaⁿ lī-khui in ê thó͘-tōe. I tio̍h chiong ka-kī ê thó͘-tōe pun hō͘ i ê kiáⁿ-jî, chiah bián góa ê chú-bîn lī-khui in ê thó͘-tōe, sì-sòaⁿ khì ta̍k só͘-chāi.”

19Āu-lâi, hit-ê lâng chhōa góa tùi tōa-mn̂g piⁿ--á ê ji̍p-kháu, ji̍p-khì hiah-ê ǹg pak, ūi-tio̍h chè-si chún-pī ê sèng ê pâng-keng. Góa khòaⁿ-kìⁿ siōng sai-pêng ê só͘-chāi ū chi̍t tè khàng-tōe.

20I kā góa kóng, “Che sī hō͘ chè-si chú pê-chōe-chè kap sio̍k-chōe-chè ê bah, í-ki̍p hang sò͘-chè ê chè-mi̍h ê só͘-chāi, chiah bián chè-si kā sèng ê chè-mi̍h tòa-khì gōa-tiâⁿ, hō͘ jîn-bîn in-ūi chiap-chhiok-tio̍h sèng ê mi̍h tì-kàu siū chek-hoa̍t.”

21I koh chhōa góa khì gōa-tiâⁿ, keng-kè gōa-tiâⁿ sì ê kak-thâu; múi chi̍t ê kak-thâu lóng ū chi̍t ê sòe-sòe ê tiâⁿ.

22Chiah-ê sòe-sòe ê tiâⁿ lóng ū chhiûⁿ-á ûi--teh, tn̂g jī-cha̍p kong-chhioh, khoah cha̍p-gō͘ kong-chhioh; sì ê kak-thâu sòe-sòe ê tiâⁿ tōa-sòe lóng kâng-khoán.

23Múi chi̍t ê sòe ê tiâⁿ sì-piⁿ lóng ū chio̍h-chhiûⁿ, chio̍h-chhiûⁿ ē-bīn ū chàu.

24Hit-ê lâng kā góa kóng, “Chia sī chàu-kha, sèng-tiān ê kang-chok jîn-oân tī chia chú jîn-bîn hiàn ê chè-mi̍h.”

← Chapter 45 Jump to: Chapter 47 →