Ezekiel 17

Chinese TTVR (現代台語譯本羅馬字版)

← Chapter 16 Jump to: Chapter 18 →

1Siōng Chú tùi góa kóng,

2“Jîn-chú, lí tio̍h kā Í-sek-lia̍t -lâng kóng chi̍t ê phì-jū, hō͘ in siūⁿ lāi-bīn ê ì-sù.

3Lí tio̍h kā in kóng, Chì-koân ê Siōng Chú án-ni kóng, ‘Ū chi̍t chiah tōa eng-chiáu, si̍t-kó͘ tōa, mn̂g tn̂g koh cha̍t, sek-chhái chōe koh súi. I pe-khì Lê-pa-lūn soaⁿ-téng, khì kàu pek-hiuⁿ-chhiū ê bé-liu,

4tok-tn̄g pek-hiuⁿ-chhiū chhiū-bé iù-nńg ê ki, kā-khì chòe seng-lí ê tōe-khu, pàng tī chòe bō͘-e̍k ê siâⁿ-chhī.

5I koh tùi Í-sek-lia̍t the̍h chéng-chí chai tī pûi ê tōe, chhin-chhiūⁿ liú-chhiū chèng tī chúi-goân chhiong-chiok ê khoe-piⁿ.

6Chéng-chí puh-gê seng-tióng, chiâⁿ-chòe sòe-châng sì-kòe soan-tîn ê phû-tô-chhiū. I ê ki chhun ǹg eng-chiáu, tèng-kun tī eng-chiáu ê ē-bīn, chiâⁿ-chòe hoat-ki soan-tîn ê phû-tô-chhiū.

7“‘Lēng-gōa ū chi̍t chiah tōa eng-chiáu, si̍t-kó͘ tōa, mn̂g chin cha̍t. Chit-châng phû-tô-chhiū chiong kun kap ki oan ǹg chit-chiah tōa eng-chiáu, siūⁿ-beh tit-tio̍h pí i goân-lâi siū chai-chèng ê thó͘-tōe koh-khah chōe koàn-ak ê chúi.

8Kî-si̍t, chit-châng phû-tô-chhiū chá chiū chai tī thô͘ pûi chúi chōe ê hn̂g--ni̍h, ōe-tàng hoat-ki, kiat ké-chí, chiâⁿ-chòe chi̍t châng gâu kiat ké-chí ê phû-tô-chhiū.’

9“Chì-koân ê Siōng Chú koh kóng, ‘Chit-châng phû-tô-chhiū kiám ōe-tàng koh tióng-tōa bō͘-sēng? Kiám kóng tē-it chiah tōa eng-chiáu bōe kā i liân kun pu̍ih--khí-lâi, kā i ê ké-chí bán-liáu-liáu, hō͘ kui-châng chhiū, liân sin hoat ê ki-hio̍h mā ko͘-tâ? Án-ni, m̄-bián chhut tōa-la̍t á-sī chōe lâng, chiū ōe-tàng kā i liân kun pu̍ih--khí-lâi.

10Lí khòaⁿ, phû-tô-chhiū sui-jiân siū chai-chèng, m̄-kú kiám ōe-tàng tióng-tōa bō͘-sēng? I kiám ōe-kham-tit hō͘ tang-hong siàn? I it-tēng ōe tī i seng-tióng ê hn̂g--ni̍h ko͘-tâ.’”

11Siōng Chú tùi góa kóng,

12“Lí kā hiah-ê pōe-ge̍k ê lâng mn̄g, khòaⁿ in chai chiah-ê phì-jū ê ì-sù bô? Lí kā in kóng, Pa-pí-lûn -ông bat lâi Iâ-lō͘-sat-léng, chiong Iû-tāi -ông kap i ê jîn-sîn lia̍h-khì Pa-pí-lûn,

13koh tùi Iû-tāi ông-cho̍k tiong soán chi̍t ê lâng, kap i li̍p-iok, kiò i chiù-chōa. Pa-pí-lûn -ông mā chiong Iû-tāi kok-tiong chi̍t-kóa léng-tō-chiá lia̍h--khì,

14hō͘ Iû-tāi -kok soe-bî bô hoat-tō͘ hoán-khòng, kan-ta ōe-tàng khò siú-iok lâi seng-chûn.

15M̄-kú Iû-tāi -ông hoán-poān. I phài sù-chiá khì Ai-ki̍p iau-kiû chiàn-bé kap tāi-kun lâi chi-oān. I kiám ōe sêng-kong? Chòe chit-chióng tāi-chì ê lâng, kiám ōe-tàng tô-thoat? I ûi-pōe iok-tēng, kiám ū hoat-tō͘ siám-khui hêng-hoa̍t?

16“Chì-koân ê Siōng Chú kóng, ‘Góa kí góa ê sìⁿ-miā li̍p-sè: Chit-ê ông it-tēng ōe sí tī i siū siat-li̍p choh-ông ê só͘-chāi, in-ūi Pa-pí-lûn -ông siat-li̍p i choh-ông, m̄-kú i ûi-pōe ka-kī chiù-chōa ê ōe, hòe-tû i kap Pa-pí-lûn -ông li̍p ê iok.

17Tng tùi-te̍k Pa-pí-lûn -ông lâi kong-siâⁿ, thūn thô͘-tui, khí-chō kong-táⁿ siâⁿ-chhiûⁿ ê koân-tâi, chìn-hêng tōa tô͘-sat ê sî, Ai-ki̍p -ông kiông koh chōe ê kun-tūi mā bōe-tàng pang-chān i.

18I ûi-pōe ka-kī chiù-chōa ê ōe, hòe-tû i kap Pa-pí-lûn -ông só͘ li̍p ê iok. I í-keng tâu-hâng, kèng-jiân chòe chiah-ê sū, taⁿ, i bô lō͘ thang tô-cháu lah.’

19“Só͘-í, Chì-koân ê Siōng Chú án-ni kóng, ‘Góa kí góa ê sìⁿ-miā li̍p-sè: Góa beh hêng-hoa̍t i, in-ūi i ûi-pōe ka-kī chiù-chōa ê ōe, hòe-tû i kap góa li̍p ê iok.

20Góa beh siat lô-bāng, kā i lia̍h--khí-lâi, tòa-khì Pa-pí-lûn, kā i sím-phòaⁿ, in-ūi i tùi góa put-tiong.

21Só͘-ū tô-cháu ê chiàn-sū ōe chiàn-sí, chhun--lo̍h-lâi ê kun-peng ōe tô-cháu sì-sòaⁿ. Án-ni lín chiū chai, kóng chiah-ê ōe--ê sī góa Siōng Chú.’”

22Chì-koân ê Siōng Chú án-ni kóng, “Góa beh at-tn̄g pek-hiuⁿ-chhiū ê chhiū-bé, chiong i iù-nńg ê ki at--lo̍h-lâi, kā i chèng tī koân-soaⁿ téng.

23Góa beh kā i chai tī Í-sek-lia̍t ê koân-soaⁿ téng; i beh hoat-ki, kiat ké-chí, chiâⁿ-chòe chi̍t châng koân koh súi ê pek-hiuⁿ-chhiū. Ta̍k-chióng chiáu-á pe-lâi chia choh-siū, hioh tī i chhiū-ki ê ìm-ńg-ē.

24Chhân-iá só͘-ū ê chhiū-ba̍k lóng beh chai: Góa Siōng Chú hō͘ tōa-châng chhiū pìⁿ sòe-châng, hō͘ sòe-châng chhiū tōa-châng; góa hō͘ chhiⁿ-chhùi ê chhiū ko͘-tâ, hō͘ ko͘-tâ ê chhiū bō͘-sēng. Góa Siōng Chú án-ni kóng, it-tēng án-ni chòe.”

← Chapter 16 Jump to: Chapter 18 →