Ezekiel 16 — Chinese TTVR (現代台語譯本羅馬字版)

2“Jîn-chú, lí tio̍h hō͘ Iâ-lō͘-sat-léng chai i só͘ chòe thang iàm-ò͘ⁿ ê sū.

3Tio̍h kā Iâ-lō͘-sat-léng kóng, Chì-koân ê Siōng Chú án-ni kóng, ‘Lí ê pún-ku-tōe, lí chhut-sì ê só͘-chāi, sī Ka-lâm -lâng ê tōe. Lí ê lāu-pē sī A-mô͘-lī -lâng, lāu-bú sī Hek -lâng.

4Lí chhut-sì ê sî, bô lâng kā lí tńg-châi, ēng chúi kā lí sóe chheng-khì, mā bô lâng ēng iâm kā lí chhit seng-khu, ēng pò͘ kā lí pau--teh.

5Bô lâng khó-lîn lí, lâi kā lí chòe chiah-ê tāi-chì. Lí chhut-sì ê sî, hō͘ lâng hiat tī chhân-iá, in-ūi lí hō͘ lâng thó-ià.

6“‘Góa kiâⁿ-lō͘ tùi lí hia keng-kè, khòaⁿ-tio̍h lí tī huih-tiong ngia̍uh-ngia̍uh-tāng; góa tùi lí kóng: Sui-jiân lí kui seng-khu lóng sī huih, m̄-kú lí tio̍h oa̍h--lo̍h-khì, tio̍h oa̍h--lo̍h-khì!

7Góa chai-pôe lí, chhin-chhiūⁿ teh chiàu-kò͘ hn̂g--ni̍h ê lông-chok-bu̍t. Lí chiām-chiām tōa-hàn, hoat-io̍k chiâⁿ-chòe siàu-lú, nn̄g lia̍p lin kiat-si̍t, thâu-mn̂g tn̂g, m̄-kú iû-goân chhiah-sin-lō͘-thé.

8“‘Góa tùi lí hia keng-kè, khòaⁿ lí í-keng sêng-se̍k, ōe tâm-chêng-soat-ài. Góa ēng gōa-saⁿ jia-khàm lí bô chhēng-saⁿ ê seng-khu, kap lí li̍p-sè kiat bêng-iok; góa — Chì-koân ê Siōng Chú kap lí kiat-iok, lí chiū kui-sio̍k góa.

9“‘Góa ēng chúi kā lí seng-khu ê huih sóe chheng-khì, koh ēng iû kā lí boah.

10Góa hō͘ lí chhēng siù-hoe ê súi-saⁿ, ko-kip ê phê-ôe, iù-môa-pò͘ ê thâu-kun, koh kā lí chhēng si-tiû ê gōa-thò.

11Góa kā lí soe-chng-táⁿ-pān, kā lí kòa chhiú-khoân, phoa̍h-liān,

12phīⁿ-khoân, hī-kau, ēng hoa-koan kā lí tì.

13Án-ni, lí ū kim-gûn ê chng-thāⁿ, chhēng iù-môa, si-tiû, kap siù-hoe ê súi-saⁿ. Lí ēng siōng-hó ê mī-hún, phang-bi̍t, kap kaⁿ-ná-iû chòe chia̍h-mi̍h. Lí siⁿ-chòe chin súi, súi kah ōe-tàng chòe lú-ông.

14In-ūi góa — Chì-koân ê Siōng Chú kā lí chng-thāⁿ, hō͘ lí ke̍k súi. Lí ê bí-māu chiū thoân-piàn lia̍t-kok.

15“‘M̄-kú lí khò-sè ka-kī ê bí-māu kap miâ-siaⁿ khì chòe chhiong-ki, hòng-chhiòng chêng-io̍k, kap ta̍k-ê kè-lō͘ ê lâng kiâⁿ-îm.

16Lí ēng lí ê saⁿ chng-thāⁿ soaⁿ-thâu-tôaⁿ, tī hia kiâⁿ-îm. Ài, chit-khoán tāi-chì bô eng-kai ū, chiong-lâi mā bô eng-kai hoat-seng.

17Lí the̍h góa hō͘ lí kùi-tiōng ê kim-gûn chu-pó, chù-chō ta-po͘-lâng ê siōng, chhin-chhiūⁿ ki-lú kap in kiâⁿ-îm.

18Lí ēng góa hō͘ lí siù-hoe ê súi-saⁿ kā in moa--teh, koh kā góa hō͘ lí ê iû kap phang-liāu hiàn hō͘ in.

19Lí koh chiong góa hō͘ lí ê niû-si̍t, chiū-sī siōng-hó ê mī-hún, kaⁿ-ná-iû, phang-bi̍t, the̍h-khì chòe phang-phang ê chè-mi̍h hiàn hō͘ in. Tāi-chì chiū-sī án-ni. Chì-koân ê Siōng Chú án-ni kóng.

20“‘Lí sīm-chì chiong lí kap góa siⁿ ê hāu-siⁿ, cha-bó͘-kiáⁿ tòng-chòe chè-mi̍h hiàn hō͘ ngó͘-siōng. Lí ka-kī ê îm-loān iáu bô-kàu sī--bô?

21Lí koh thâi góa ê jî-lú tòng-chòe chè-mi̍h ēng hé sio, hiàn hō͘ in.

22Lí chòe ki-lú kap chòe thang iàm-ò͘ⁿ ê sū, kā lí sòe-hàn ê sî chhiah-sin-lō͘-thé, tī huih-tiong ngia̍uh-ngia̍uh-tāng ê chêng-hóng lóng pàng bōe-kì--tit.’”

23“Chì-koân ê Siōng Chú kè-sio̍k kóng, ‘Lí chhám ah! Lí ū chai-hō lah! Lí chòe chiah-ê pháiⁿ-tāi í-gōa,

24koh tī siâⁿ-lāi khí-chō hoe-lâu, tī khoan-khoah ê só͘-chāi khí pài ngó͘-siōng ê koân-tâi.

25Lí tī koe-thâu-hāng-bé khí-chō koân-tâi, hō͘ lí ê bí-māu pìⁿ-chòe thang iàm-ò͘ⁿ--ê; lí koh hòng-chhiòng chêng-io̍k, kap só͘-ū kè-lō͘ ê lâng kiâⁿ-îm.

26Lí kap hò͘ⁿ-sek ê chhù-piⁿ Ai-ki̍p kiâⁿ-îm; lí hòng-chhiòng chêng-io̍k lâi jiá góa siū-khì.

27“‘Só͘-í, góa beh chhun-chhiú hêng-hoa̍t lí, siu-hôe góa hō͘ lí ê hok-hūn. Góa beh chiong lí kau hō͘ oàn-hūn lí ê Hui-lī-sū -lâng, sûi-chāi in tùi-thāi lí; liân in mā in-ūi lí ê îm-loān kám-kak kiàn-siàu.

28“‘M̄-kú, lí iáu bô boán-chiok, koh kap A-su̍t kiâⁿ-îm; án-ni mā iáu bô boán-chiok lí îm-loān ê io̍k-bōng.

29Lí koh kap gâu chòe seng-lí ê Pa-pí-lûn kiâⁿ-îm; chiū-sī án-ni, lí iû-goân bô boán-chiok.’

30“Chì-koân ê Siōng Chú koh kóng, ‘Lí si̍t-chāi hō͘ góa hui-siông siū-khì! Lí chòe chiah-ê tāi-chì chhin-chhiūⁿ m̄-chai kiàn-siàu ê ki-lú chòe--ê.

31Lí tī lō͘-thâu chō hoe-lâu, tī kóng-tiûⁿ khí koân-tâi, tī hia kiâⁿ-îm. Lí pí ki-lú khah m̄-ta̍t, in-ūi lí bô beh the̍h lâng ê chîⁿ;

32lí sī îm-hū, lêng-khó kap gōa-lâng su-thong, bô ài ka-kī ê tiōng-hu.

33Ki-lú sī kā lâng the̍h lé-mi̍h, lí tian-tò sàng lé-mi̍h hō͘ ài-jîn; lí ín-iú in tùi ta̍k só͘-chāi lâi boán-chiok lí ê chêng-io̍k.

34Lí kap it-poaⁿ ê ki-lú bô siâng-khoán, m̄-sī lâng lâi chhē lí kiâⁿ-îm, sī lí khì chhē lâng; lí bô siu lâng ê chîⁿ, tian-tò tò-thiap. Lí kap kî-tha ê ki-lú tian-tò-péng.’”

35Taⁿ, lí chit-ê îm-hū Iâ-lō͘-sat-léng, tio̍h thiaⁿ Siōng Chú ê ōe.

36Chì-koân ê Siōng Chú kóng, “Lí hòng-chhiòng chêng-io̍k, ūi ài-jîn lō͘-hiān lí ê hā-thé kap in kiâⁿ-îm, koh thâi ka-kī ê jî-lú chòe chè-mi̍h, hiàn hō͘ thang iàm-ò͘ⁿ ê ngó͘-siōng.

37Só͘-í, góa beh kā lí só͘-ū ê ài-jîn, bô-lūn sī lí kah-ì--ê á-sī thó-ià--ê, tùi ta̍k só͘-chāi tiàu-chi̍p lâi kong-kek lí; góa beh tī in ê bīn-chêng kā lí thǹg-kng-kng, hō͘ in kā lí kui seng-khu khòaⁿ-liáu-liáu.

38Góa beh sím-phòaⁿ lí, chhin-chhiūⁿ sím-phòaⁿ kiâⁿ-îm kap thâi-lâng ê cha-bó͘-lâng. Góa beh tī tōa siū-khì kap oàn-tò͘ tiong kā lí hêng-hoa̍t, kā lí chhú-sí.

39Góa beh chiong lí kau tī in ê chhiú; in beh thiah-húi lí ê hoe-lâu, húi-hoāi lí ê koân-tâi, pak lí ê saⁿ, chhiúⁿ lí ê chu-pó, hō͘ lí chhiah-sin-lō͘-thé.

40“In beh chhōa kûn-chiòng lâi kong-kek lí, ēng chio̍h-thâu kā lí tìm-sí, ēng to-kiàm kā lí tok-chhùi.

41In beh pàng-hé sio lí ê chhù, tī chin chōe hū-lú ê bīn-chêng kā lí hêng-hoa̍t. Góa bô beh hō͘ lí koh chòe ki-lú, liáu-chîⁿ tò-thiap ài-jîn.

42Án-ni, góa ê tōa siū-khì chiah ōe siau, góa ê oàn-tò͘ chiah ōe soah; góa chiah ōe pêng-chēng, bô koh siū-khì.

43Lí bōe-kì-tit sòe-hàn ê sî góa án-chóaⁿ tùi-thāi lí, tian-tò chòe chiah-ê sū jiá góa siū-khì, só͘-í góa beh chiàu lí ê só͘-chòe pò-èng lí. Lí í-keng chòe hiah chōe khó-ò͘ⁿ ê sū, sī-án-chóaⁿ beh koh kiâⁿ-îm?” Chì-koân ê Siōng Chú án-ni soan-kò.

44Siōng Chú kóng, “Nā ū lâng beh ēng sio̍k-gú kā lí phì-siùⁿ, it-tēng ōe kóng, ‘Iú kî bú pit iú kî lú.’

45Lí chin-chiàⁿ kap lí ê lāu-bú siâng-khoán, khì-sak ka-kī ê tiōng-hu kap kiáⁿ-jî. Lí mā kap lí ê chí-bē siâng-khoán, khì-sak ka-kī ê tiōng-hu kap kiáⁿ-jî. Lí ê lāu-bú sī Hek -lâng, lāu-pē sī A-mô͘-lī -lâng.

46“Lí ê tōa-chí sī Sat-má-lī-a; i kap i ê cha-bó͘-kiáⁿ tòa tī lí ê pak-pêng. Lí ê sió-bē sī Só͘-to-má; i kap i ê cha-bó͘-kiáⁿ tòa tī lí ê lâm-pêng.

47Lí o̍h in ê só͘-chòe, chòe thang iàm-ò͘ⁿ ê sū, m̄-nā án-ni, bô-jōa-kú, lí tī ta̍k hong-bīn lóng pí in koh-khah pháiⁿ.”

48Chì-koân ê Siōng Chú koh kóng, “Góa kí góa ê sìⁿ-miā li̍p-sè: Lí ê sió-bē Só͘-to-má kap i ê cha-bó͘-kiáⁿ bô chòe lí kap lí ê cha-bó͘-kiáⁿ só͘ chòe ê pháiⁿ-sū.

49Khòaⁿ leh, lí ê sió-bē Só͘-to-má ê chōe sī án-ni: I kap i ê cha-bó͘-kiáⁿ ê chōe sī kiau-ngō͘, chiū-sī in chia̍h-mi̍h chhiong-chiok, an-ún kè hó ji̍t-chí, m̄-kú bô chiàu-kò͘ khùn-khó͘ kap sàn-chhiah ê lâng.

50In kiau-ngō͘, chòe góa khòaⁿ-chòe iàm-ò͘ⁿ ê sū, só͘-í góa kā in siau-bia̍t. Chit-hāng sū lí í-keng chai.

51“ Sat-má-lī-a hoān ê chōe khah bô lí ê chi̍t-pòaⁿ. Lí só͘ chòe khó-ò͘ⁿ ê sū pí in koh-khah chōe. Lí só͘ chòe khó-ò͘ⁿ ê sū soah hō͘ lí ê chí-bē pí lí khah chèng-ti̍t.

52Lí kì-jiân ūi-tio̍h lí ê chí-bē piān-hō͘, taⁿ lí tio̍h sêng-tam ka-kī ê kiàn-siàu, in-ūi lí hoān ê chōe pí in koh-khah khó-ò͘ⁿ, soah hō͘ in pí lí khah chèng-ti̍t. Taⁿ lí tio̍h chai thang kiàn-siàu, in-ūi lí hō͘ lí ê chí-bē khòaⁿ--khí-lâi pí lí hó chin chōe.”

53Siōng Chú tùi Iâ-lō͘-sat-léng kóng, “Góa beh hō͘ Só͘-to-má kap Sat-má-lī-a í-ki̍p in ê cha-bó͘-kiáⁿ, tùi siū-lia̍h ê tōe tò-tńg--lâi, mā beh hō͘ lí kap in chòe-hé tò-tńg--lâi;

54án-ni, lí chiah ōe-hiáu in-ūi só͘ siū ê bú-jio̍k lâi kám-kak kiàn-siàu, hō͘ lí ê chí-bē tit-tio̍h an-ùi.

55Só͘-to-má kap Sat-má-lī-a í-ki̍p in ê cha-bó͘-kiáⁿ beh hôe-ho̍k chá-chêng ê sēng-hóng. Lí kap lí ê cha-bó͘-kiáⁿ mā it-tēng ōe án-ni.

56Tī lí chhia-iāⁿ, chōe-ok iáu-bē hián-lō͘ ê sî, lí kiám m̄-sī bat thí-chhiò Só͘-to-má? Taⁿ, lí beh hō͘ Í-tong -lâng, Hui-lī-sū -lâng, kap chiu-ûi oàn-hūn lí ê lâng kā lí thí-chhiò.

58Lí beh ūi-tio̍h ka-kī ê îm-loān kap só͘ chòe khó-ò͘ⁿ ê sū siū pò-èng.” Siōng Chú án-ni soan-pò͘.

59Chì-koân ê Siōng Chú kóng, “Góa beh chiàu lí ê hêng-ûi pò-èng lí, in-ūi lí ûi-pōe tùi góa chiù-chōa ê ōe, hòe-tû kap góa li̍p ê iok.

60Sui-jiân sī án-ni, góa beh kì-tiâu góa tī lí siàu-liân ê sî kap lí li̍p ê iok, koh kian-li̍p i chiâⁿ-chòe éng-oán ê iok.

61Lí chiap-la̍p lí ê tōa-chí sió-bē ê sî, beh siūⁿ-khí lí í-chêng só͘ chòe ê it-chhè lâi kám-kak kiàn-siàu. Sui-jiân góa bô án-ni kap lín iok-tēng, góa beh kā in kau hō͘ lí, chòe lí ê cha-bó͘-kiáⁿ.

62Góa beh kian-li̍p góa kap lí li̍p ê iok, lí chiū chai góa sī Siōng Chú.

63Góa beh sià-bián lí só͘ hoān it-chhè ê chōe-kò, hō͘ lí ōe-kì-tit chiah-ê sū lâi kám-kak kiàn-siàu, m̄-káⁿ koh khui-chhùi.” Chì-koân ê Siōng Chú án-ni soan-pò͘.