Ezekiel 6

Chinese TTVR (現代台語譯本羅馬字版)

← Chapter 5 Jump to: Chapter 7 →

1Siōng Chú kā góa kóng,

2“Jîn-chú ah, tio̍h bīn ǹg Í-sek-lia̍t ê chèng-soaⁿ, thoân-ta̍t góa ê sìn-sit, kóng,

3‘ Í-sek-lia̍t ê chèng-soaⁿ ah, tio̍h thiaⁿ Chì-koân Siōng Chú ê ōe. Chì-koân ê Siōng Chú tùi tōa-soaⁿ, sió-soaⁿ, soaⁿ-kau, soaⁿ-kok án-ni kóng: Góa beh ēng to-kiàm húi-bia̍t lín ê soaⁿ-thâu-tôaⁿ.

4Chè-tôaⁿ beh siū thiah-húi, hiuⁿ-tôaⁿ siū phah-chhùi, siū thâi-sí ê lâng beh tó tī lín ê ngó͘-siōng ê thâu-chêng.

5Góa beh kā Í-sek-lia̍t -lâng ê sin-si hiat tī in ê ngó͘-siōng ê thâu-chêng, chiong lín ê kut-hâi iā-sòaⁿ tī lín ê chè-tôaⁿ sì-chiu-ûi.

6Bô-lūn lín tòa tī sím-mi̍h só͘-chāi, lín ê siâⁿ-tìn lóng beh pìⁿ-chòe hong-po͘, soaⁿ-thâu-tôaⁿ pha-hng tì-kàu chè-tôaⁿ hong-hòe, ngó͘-siōng siū phah-chhùi húi-bia̍t, hiuⁿ-tôaⁿ siū chám-tn̄g. Lín só͘ chō ê it-chhè lóng beh siū tû-bia̍t.

7Siū thâi ê lâng tó tī lín tiong-kan, lín chiū chai góa sī Siōng Chú.

8“‘Góa beh kā lín lâu chi̍t-kóa lâng, hō͘ in tô-thoat lia̍t-kok ê to-kiàm, hun-sòaⁿ khì ta̍k só͘-chāi.

9Hit-sî, hiah-ê thoat-lī to-kiàm ê lâng, tī siū hòng-tio̍k ê só͘-chāi beh siūⁿ-khí góa, liáu-kái góa in-ūi in ê put-tiong, pōe-ge̍k, í-ki̍p sim-ba̍k loân-bō͘ ngó͘-siōng lâi sim kan-khó͘. In ōe in-ūi ka-kī só͘ chòe siâ-ok ê pháiⁿ-sū iàm-ò͘ⁿ ka-kī.

10In beh bêng-pe̍k góa sī Siōng Chú, góa kóng beh kàng chai-hō hō͘ in, m̄-sī kóng ké--ê.’”

11Chì-koân ê Siōng Chú án-ni kóng, “Lí tio̍h chàm-kha tǹg-chhiú, kóng, ‘Chhám lah, Í-sek-lia̍t in-ūi chòe siâ-ok kap chòe hō͘ lâng iàm-ò͘ⁿ ê sū, beh sí tī chiàn-cheng, iau-gō, kap un-e̍k.’

12Tī hn̄g-hn̄g ê só͘-chāi ê lâng beh in-ūi un-e̍k lâi sí; tī hù-kūn ê lâng beh in-ūi chiàn-loān lâi sí; lâu--lo̍h-lâi ê lâng beh in-ūi ki-hng lâi sí. Góa beh tī in sin-chiūⁿ piàⁿ-chīn góa ê tōa siū-khì.

13“In siū thâi ê lâng ê sin-si beh sì-sòaⁿ tī in ê ngó͘-siōng tiong-kan, tī in ê chè-tôaⁿ sì-chiu-ûi, tī múi chi̍t chō tōa-soaⁿ, sió-soaⁿ ê téng-bīn, tī múi chi̍t châng chhiⁿ-chhùi ê chhiū kap bō͘-sēng ê siōng-chhiū kha, chiū-sī in bat ǹg ngó͘-siōng hiàn phang-phang ê chè ê só͘-chāi. Án-ni, in chiū chai góa sī Siōng Chú.

14Góa it-tēng beh chhut-chhiú kong-kek in. Góa beh hō͘ in ê tōe hong-hòe, tùi lâm-hng ê khòng-iá it-ti̍t kàu pak-hng ê Tē-pek-la -siâⁿ; Í-sek-lia̍t -lâng tòa ê só͘-chāi lóng beh pha-hng. Án-ni, in chiū chai góa sī Siōng Chú.”

← Chapter 5 Jump to: Chapter 7 →