Ezekiel 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Tē-la̍k nî la̍k-ge̍h chhoe-gō͘, góa chē tī chhù-lāi, Iû-tāi ê chèng tiúⁿ-ló chē tī góa ê bīn-chêng. Chì-koân Siōng Chú ê khùi-la̍t chhiong-móa góa.

2Góa koan-khòaⁿ ê sî, khòaⁿ-kìⁿ chi̍t ê chhin-chhiūⁿ lâng ê hêng-siōng; i ê io í-hā chhin-chhiūⁿ hé, io téng-koân chhin-chhiūⁿ ōe sih ê kim-sio̍k hiah-ni̍h kng.

3I chhun-chhut chi̍t ki chhin-chhiūⁿ lâng ê chhiú khiú góa ê thâu-mn̂g. I ê sîn kā góa giâ-koân kàu khong-tiong; tī īⁿ-siōng tiong, I ê sîn tòa góa khì Iâ-lō͘-sat-léng sèng-tiān lāi-tiâⁿ ê pak-mn̂g mn̂g-kháu. Tī hia ū chi̍t ê chō-ūi, téng-bīn chē jiá Siōng-tè siū-khì ê ngó͘-siōng.

4Tī hia, góa khòaⁿ-kìⁿ Í-sek-lia̍t Siōng-tè ê êng-kng, kap góa tī Ka-pa-ló͘ hô-piⁿ khòaⁿ--kìⁿ-ê siâng-khoán.

5Siōng-tè tùi góa kóng, “Jîn-chú ah, lí khòaⁿ pak-pêng!” Góa chiū gia̍h-thâu ǹg pak khòaⁿ, khòaⁿ-kìⁿ chè-tôaⁿ-mn̂g ê pak-pêng, tī ji̍p-kháu ū chi̍t sian jiá Siōng-tè siū-khì ê ngó͘-siōng.

6Siōng-tè koh tùi góa kóng, “Jîn-chú ah, lí ū khòaⁿ-kìⁿ Í-sek-lia̍t -lâng tī chia teh chòe sím-mi̍h? In tī chia chòe ke̍k thang iàm-ò͘ⁿ ê tāi-chì, pek góa lī-khui góa ê sèng-só͘ hn̄g-hn̄g. M̄-kú, lí ōe koh khòaⁿ-kìⁿ pí che koh-khah thang iàm-ò͘ⁿ ê sū.”

7I chhōa góa khì gōa-tiâⁿ ê ji̍p-kháu; góa chi̍t-ē khòaⁿ, chhiûⁿ-piah ū chi̍t khang.

8I tùi góa kóng, “Jîn-chú ah, kā chhiûⁿ-piah ó͘ thàng--kè.” Góa chi̍t-ē ó͘ thàng--kè, chiū khòaⁿ-kìⁿ ū chi̍t ê mn̂g.

9I kā góa kóng, “Ji̍p--khì, khòaⁿ in tī lāi-bīn só͘ chòe thang iàm-ò͘ⁿ ê pháiⁿ-sū.”

10Góa chiū ji̍p-khì khòaⁿ. Góa khòaⁿ-kìⁿ sì-bīn ê chhiûⁿ-piah khek ta̍k-khoán tī thô͘-kha teh sô ê oa̍h-mi̍h kap thang iàm-ò͘ⁿ ê cháu-siù, mā ū Í-sek-lia̍t -lâng pài ê ngó͘-siōng.

11Ū chhit-cha̍p ê Í-sek-lia̍t ê tiúⁿ-ló khiā tī hiah-ê siōng ê thâu-chêng, Sa-hoan ê kiáⁿ Ngá-sat-nî-a mā tī hia. In ta̍k-ê lâng chhiú phâng hiuⁿ-lô͘, hiuⁿ ê ian chhèng-koân.

12Siōng-tè tùi góa kóng, “Jîn-chú ah, lí ū khòaⁿ-tio̍h Í-sek-lia̍t ê tiúⁿ-ló, in ta̍k-ê lâng àm-tiong tī chhiong-móa ngó͘-siōng ê pâng-keng teh chòe sím-mi̍h? In kóng, ‘Siōng Chú khòaⁿ bōe tio̍h goán; I í-keng khì-sak chit-tè thó͘-tōe.’”

13Siōng Chú koh kā góa kóng, “Lí ōe koh khòaⁿ-kìⁿ in chòe chin khó-ò͘ⁿ ê pháiⁿ-sū.”

14Jiân-āu, I chhōa góa khì Siōng Chú sèng-tiān ê pak-mn̂g, tī hia ū chi̍t kûn hū-lú chē--teh, ūi Tah-bô͘-su sîn-bêng thî-khàu.

15Siōng Chú kóng, “Jîn-chú ah, lí ū khòaⁿ--kìⁿ-bô? Lí beh khòaⁿ-kìⁿ pí che koh-khah thang iàm-ò͘ⁿ ê pháiⁿ-sū.”

16I koh chhōa góa khì Siōng Chú sèng-tiān ê lāi-tiâⁿ. Tī sèng-tiān ê mn̂g-kháu, tī chè-tôaⁿ kap cháu-lông ê tiong-kan, tāi-iok ū jī-cha̍p-gō͘ ê lâng, ka-chiah ǹg sèng-tiān, bīn ǹg tang-pêng pài ji̍t-thâu.

17Siōng Chú kā góa kóng, “Jîn-chú ah, lí ū khòaⁿ--kìⁿ-bô? Lí khòaⁿ, Iû-tāi -lâng tī chia só͘ chòe thang iàm-ò͘ⁿ ê pháiⁿ-sū kiám sī sió-khóa? In tī choân-kok ta̍k só͘-chāi chòe kiông-pō ê sū, it-chài kek góa siū-khì. In koh gia̍h chhiū-ki tú ǹg phīⁿ-á, ēng án-ni bú-jio̍k góa.

18Só͘-í, góa beh tùi in hoat tōa siū-khì; bô beh khó-lîn in, mā bô beh thiàⁿ-sioh in. Chiū-sī-kóng in tī góa ê hī-khang piⁿ tōa-siaⁿ ho͘-kiû, góa mā m̄ thiaⁿ.”

← Chapter 7 Jump to: Chapter 9 →