Ezekiel 42

Chinese TTVR (現代台語譯本羅馬字版)

← Chapter 41 Jump to: Chapter 43 →

1Hit-ê lâng chhōa góa ǹg pak kiâⁿ, lâi kàu gōa-tiâⁿ. I koh chhōa góa ji̍p-khì chi̍t pâi chhù; chiah-ê chhù chi̍t bīn ǹg sèng-tiān ê khàng-tōe, chi̍t bīn ǹg pak-pêng ê pâng-keng.

2Chit-pâi chhù tn̂g gō͘-cha̍p kong-chhioh, khoah jī-cha̍p-gō͘ kong-chhioh, ǹg pak chit-pêng ū mn̂g.

3Chit-pâi chhù chi̍t bīn ǹg cha̍p kong-chhioh khoah ê lāi-tiâⁿ, chi̍t bīn ǹg ū pho͘ chio̍h-pán ê gōa-tiâⁿ. Chit-pâi chhù ū saⁿ chàn, ta̍k-chàn ê cháu-lông saⁿ-liân.

4Chit-pâi chhù ê mn̂g lóng ǹg pak, thâu-chêng ū thong-lō͘, khoah gō͘ kong-chhioh, tn̂g gō͘-cha̍p kong-chhioh.

5In-ūi cháu-lông chiàm chi̍t-kóa khong-kan, só͘-í saⁿ-lâu ê pâng-keng pí jī-lâu kap it-lâu ê pâng-keng khah oe̍h.

6Chit-pâi chhù ū saⁿ chàn, in-ūi bô chhin-chhiūⁿ gōa-tiâⁿ ê chhù ēng thiāu-á thuh--teh, só͘-í, saⁿ-lâu ê pâng-keng pí jī-lâu kap it-lâu ê pâng-keng khah oe̍h.

7Tī gōa-tiâⁿ, chit-pâi chhù ê thâu-chêng, ū chi̍t tó͘ chhiûⁿ kap chhù pêng-hêng, tn̂g jī-cha̍p-gō͘ kong-chhioh.

8Ǹg gōa-tiâⁿ ê pâng-keng, tn̂g jī-cha̍p-gō͘ kong-chhioh, ǹg sèng-tiān ê pâng-keng tn̂g gō͘-cha̍p kong-chhioh.

9Chit-pâi chhù ē-bīn ê tang-pêng, ū chi̍t ê mn̂g thong kàu gōa-tiâⁿ;

10hit-ê thong-lō͘ ê khoah-tō͘ kap gōa-tiâⁿ ê chhiûⁿ siâng-khoán. Sèng-tiān ê lâm-pêng mā ū chi̍t pâi chhù; chiah-ê chhù chi̍t bīn ǹg sèng-tiān ê khàng-tōe, chi̍t bīn ǹg lâm-pêng ê chhù.

11Chit-pâi chhù ê thâu-chêng ū chi̍t tiâu thong-lō͘, kap pak-pêng hit-pâi chhù kâng-khoán; pâng-keng ê tn̂g, khoah, khoán-sit, kap chhut-ji̍p-kháu lóng kap pak-pêng ê chhù siâng-khoán.

12Lâm-pêng hiah-ê pâng-keng ê ē-bīn, kap pak-pêng ê chhù kâng-khoán, tī thong-lō͘ ê khai-sí ū mn̂g thang chhut-ji̍p.

13Hit-ê lâng kā góa kóng, “Lâm-pêng kap pak-pêng biān-tùi khàng-tōe ê pâng-keng, lóng hun-pia̍t-choh-sèng; tī Siōng Chú bīn-chêng ho̍k-sāi ê chè-si tī hia chia̍h chì-sèng ê mi̍h; chè-si tī chia khǹg chì-sèng ê chè-mi̍h, chiū-sī sò͘-chè, sio̍k-chōe-chè, kap pê-chōe-chè ê chè-mi̍h.

14Chè-si ji̍p-khì sèng-só͘ liáu-āu, bōe-ēng-tit ti̍t-chiap chhut-lâi gōa-tiâⁿ, tio̍h chiong sū-hōng Siōng Chú ê sî chhēng ê lé-ho̍k lâu tī hia ê pâng-keng, in-ūi chiah-ê lé-ho̍k sī sèng--ê; in tio̍h chhēng pa̍t-chióng saⁿ, chiah thang chhin-kūn hōe-chiòng.”

15Hit-ê lâng niû sèng-tiān lāi-pō͘ ê chhùn-chhioh liáu-āu, chiū chhōa góa tùi tang-mn̂g chhut--khì, khì niû sèng-tiān ê sì-chiu-ûi.

16I ēng lô͘-tek ê niû-chhioh niû, tang-pêng tn̂g nn̄g-pah gō͘-cha̍p kong-chhioh.

17I koh se̍h-khì pak-pêng, lâm-pêng, sai-pêng, ēng lô͘-tek ê niû-chhioh niû, múi chi̍t pêng tn̂g lóng sī nn̄g-pah gō͘-cha̍p kong-chhioh.

20Án-ni, i niû sèng-tiān ê sì-chiu-ûi, tn̂g, khoah kok nn̄g-pah gō͘-cha̍p kong-chhioh; sì-chiu-ûi lóng ū ûi-chhiûⁿ, keh-khui sèng kap sio̍k ê só͘-chāi.

← Chapter 41 Jump to: Chapter 43 →