Ezekiel 18

Chinese TTVR (現代台語譯本羅馬字版)

← Chapter 17 Jump to: Chapter 19 →

1Siōng Chú tùi góa kóng,

2“Lín Í-sek-lia̍t -lâng ná ū chit-kù sio̍k-gú, kóng ‘Lāu-pē chia̍h sng phû-tô, kiáⁿ-jî ê chhùi-khí sng-nńg’?”

3Chì-koân ê Siōng Chú án-ni kóng, “Góa kí góa éng-oán ê oa̍h-miā li̍p-sè: Lín Í-sek-lia̍t -lâng bōe koh liû-thoân chit-kù sio̍k-gú.

4Múi chi̍t ê lâng ê sìⁿ-miā lóng sī góa ê; pē-bú ê sìⁿ-miā sio̍k tī góa, kiáⁿ-jî ê sìⁿ-miā mā sio̍k tī góa. Sím-mi̍h-lâng hoān-chōe, chiū hit-ê lâng sí.

5“Nā ū lâng chèng-ti̍t, hêng-ûi kong-pêng chèng-gī:

6I bô chia̍h soaⁿ-thâu-tôaⁿ sîn-biō ê chè-mi̍h, bô ǹg Í-sek-lia̍t -lâng ê ka-cho̍k sîn-bêng kiû pó-pì, bô chhim-hoān pa̍t-lâng ê bó͘, bô kap keng-kî tiong ê hū-jîn-lâng tâng-pâng,

7bô khi-ap lâng, chiong khiàm-chè ê lâng tí-ah ê mi̍h hêng i, bô chhiúⁿ-toa̍t pa̍t-lâng ê mi̍h-kiāⁿ, the̍h chia̍h-mi̍h hō͘ iau-gō ê lâng chia̍h, the̍h saⁿ hō͘ chhiah-sin-lō͘-thé ê lâng chhēng,

8chioh-chîⁿ hō͘ lâng bô the̍h lī-sek, bô pàng tāng-lī, bô chòe siâ-ok ê sū, chiàu kong-tō chhú-lí kiù-hun.

9Chit-chióng lâng ho̍k-chiông góa ê kui-lē, kín-sīn chun-siú góa ê bēng-lēng, chiàu-khí-kang chòe tāi-chì; i sī chèng-ti̍t ê lâng, it-tēng ōe-tàng pó-chûn sìⁿ-miā.” Chì-koân ê Siōng Chú án-ni soan-pò͘.

10“Chit-ê lâng nā ū kiáⁿ chòe kiông-tō, thâi-lâng, chòe in lāu-pē m̄-bat chòe--kè ê pháiⁿ tāi-chì, chia̍h soaⁿ-thâu-tôaⁿ sîn-biō ê chè-mi̍h, chhim-hoān pa̍t-lâng ê bó͘,

12khi-ap khùn-khó͘ kap sàn-chhiah ê lâng, chhiúⁿ-toa̍t pa̍t-lâng ê mi̍h-kiāⁿ, khàu-liû khiàm-chè ê lâng tí-ah ê mi̍h, ǹg ngó͘-siōng kiû pó-pì, chòe thang iàm-ò͘ⁿ ê sū,

13chioh-chîⁿ hō͘ lâng the̍h lī-sek koh the̍h tāng-lī. Chit-chióng lâng kiám ōe-tàng pó-chûn sìⁿ-miā? Bōe! I chòe chiah-ê khó-ò͘ⁿ ê sū, it-tēng tio̍h sí; i sī chū-chhú-bia̍t-bông.

14“Chit-ê pháiⁿ-lâng nā ū chi̍t ê kiáⁿ, chit-ê kiáⁿ khòaⁿ-kìⁿ i ê lāu-pē só͘ chòe it-chhè ê pháiⁿ tāi-chì, m̄-kú i ka-kī séng-chhat, lóng bô án-ni khì chòe.

15I bô chia̍h soaⁿ-thâu-tôaⁿ sîn-biō ê chè-mi̍h, bô ǹg Í-sek-lia̍t -lâng ê ka-cho̍k sîn-bêng kiû pó-pì, bô chhim-hoān pa̍t-lâng ê bó͘,

16bô khi-ap lâng, chiong khiàm-chè ê lâng tí-ah ê mi̍h hêng i, bô chhiúⁿ-toa̍t pa̍t-lâng ê mi̍h-kiāⁿ, hoán-tńg the̍h chia̍h-mi̍h hō͘ iau-gō ê lâng chia̍h, the̍h saⁿ hō͘ chhiah-sin-lō͘-thé ê lâng chhēng,

17bô siong-hāi sàn-chhiah-lâng, chioh-chîⁿ hō͘ lâng bô the̍h lī-sek, bô pàng tāng-lī; m̄-kú ū chun-siú góa ê bēng-lēng, ho̍k-chiông góa ê kui-lē. I bōe in-ūi i ê lāu-pē só͘ hoān ê chōe sí. I it-tēng ōe-tàng pó-chûn sìⁿ-miā.

18I ê lāu-pē in-ūi khi-ap lâng, chhiúⁿ-toa̍t pa̍t-lâng ê mi̍h-kiāⁿ, tī jîn-bîn tiong-kan chòe pháiⁿ tāi-chì; i ōe in-ūi ka-kī hoān ê chōe sí.

19“Lín teh mn̄g, ‘Sī-án-chóaⁿ hāu-siⁿ bô in-ūi lāu-pē só͘ hoān ê chōe siū hêng-hoa̍t?’ Góa ê hôe-tap sī, ‘Hāu-siⁿ chòe kong-pêng chèng-gī ê sū, kín-sīn chun-siú góa ê kui-lē, i it-tēng ōe-tàng pó-chûn sìⁿ-miā.’

20Chí-ū hoān-chōe ê lâng tio̍h sí. Hāu-siⁿ m̄-bián ūi-tio̍h lāu-pē ê chōe siū hêng-hoa̍t; lāu-pē mā m̄-bián ūi-tio̍h hāu-siⁿ ê chōe siū hêng-hoa̍t. Chèng-ti̍t ê lâng beh in-ūi choh-hó tit-tio̍h pò-siúⁿ; pháiⁿ-lâng beh in-ūi choh-pháiⁿ siū hêng-hoa̍t.

21“Pháiⁿ-lâng nā hóe-kái, lī-khui i só͘ hoān it-chhè ê chōe, kín-sīn chun-siú góa ê kui-lē, chòe kong-pêng chèng-gī ê sū, i chiū thang pó-chûn sìⁿ-miā, m̄-bián sí.

22I só͘ hoān it-chhè ê chōe lóng ōe siū sià-bián; i beh in-ūi i chòe ê hó-sū pó-chûn sìⁿ-miā.

23Pháiⁿ-lâng sí-bông, kiám sī góa — Chì-koân ê Siōng Chú só͘ ài? M̄-sī! Góa kiám m̄-sī ài in lī-khui pháiⁿ-lō͘ lâi pó-chûn sìⁿ-miā?

24“Chèng-ti̍t ê lâng nā lī-khui chiàⁿ-lō͘ khì choh-pháiⁿ, kap pháiⁿ-lâng kâng-khoán chòe thang iàm-ò͘ⁿ ê sū, i kiám ōe-tàng pó-chûn sìⁿ-miā? Bōe-tàng! I chá-chêng só͘ chòe ê hó-sū bô chún-sǹg. I ōe in-ūi pōe-ge̍k, hoān-chōe lâi sí.

25“M̄-kú lín kóng, ‘Chú án-ni chhú-lí bô kong-tō!’ Í-sek-lia̍t -lâng, chù-ì thiaⁿ, góa án-ni chhú-lí bô kong-tō o͘h? Lín chiah sī bô kong-tō!

26Chèng-ti̍t ê lâng nā lī-khui chiàⁿ-lō͘ khì choh-pháiⁿ, i sí, sī in-ūi i choh-pháiⁿ.

27Pháiⁿ-lâng hóe-kái, lī-khui i só͘ hoān it-chhè ê chōe, chòe kong-pêng chèng-gī ê sū, i beh kiù ka-kī ê sìⁿ-miā.

28I séng-chhat ka-kī, hóe-kái, lī-khui i só͘ hoān it-chhè ê chōe, chiū ōe-tàng pó-chûn sìⁿ-miā, m̄-bián sí.

29Í-sek-lia̍t -lâng ah, lín kóng, ‘Chú ê choh-hoat bô kong-tō!’ Lín siūⁿ-kóng góa ê choh-hoat bô kong-tō o͘h? Lín ê choh-hoat chiah sī bô kong-tō!

30“Só͘-í, Í-sek-lia̍t -lâng, góa — Chì-koân ê Siōng Chú án-ni kóng: Góa beh chiàu lín ta̍k-ê lâng ê hêng-ûi sím-phòaⁿ lín. Lín tio̍h hóe-kái, lī-khui lín só͘ hoān it-chhè ê chōe, chiah bián lín in-ūi ka-kī ê chōe siū húi-bia̍t.

31Tio̍h pàng-sak lín só͘ chòe it-chhè ê pháiⁿ-sū, ōaⁿ chi̍t lia̍p sin ê sim, sin ê sîn! Í-sek-lia̍t -lâng, lín sī-án-chóaⁿ ài-beh sí?

32Góa bô ài ū lâng sí. Lín hóe-kái chiū ōe-tàng pó-chûn sìⁿ-miā.” Chì-koân ê Siōng Chú án-ni soan-pò͘.

← Chapter 17 Jump to: Chapter 19 →