Ezekiel 45

Chinese TTVR (現代台語譯本羅馬字版)

← Chapter 44 Jump to: Chapter 46 →

1“Lín thiu-chhiam pun thó͘-tōe hō͘ ta̍k chi-cho̍k chòe sán-gia̍p ê sî, tio̍h lâu chi̍t hūn hiàn hō͘ Siōng Chú. Chit-tè thó͘-tōe tio̍h tn̂g cha̍p-jī kong-lí-pòaⁿ, khoah cha̍p kong-lí; chit-ê tōe-khu lóng sī sèng--ê.

2Tio̍h tùi hit tiong-kan ōe chi̍t tè tōe, tn̂g, khoah lóng sī nn̄g-pah gō͘-cha̍p kong-chhioh, chòe sèng-só͘ ê iōng-tōe; sì-chiu-ûi tio̍h koh ōe khoah jī-cha̍p-gō͘ kong-chhioh ê khàng-tōe.

3Niû chit-tè tōe ê chi̍t-pòaⁿ, tn̂g cha̍p-jī kong-lí-pòaⁿ, khoah gō͘ kong-lí, tio̍h ōe i chòe sèng-só͘ ê iōng-tōe, sī chì-sèng--ê.

4Che sī choân-kok tiong-kan sèng ê só͘-chāi, beh kui hō͘ koán-lí sèng-tiān, chhin-kūn koh sū-hōng Siōng Chú ê chè-si; in ê chhù kap sèng-tiān lóng tī chit-ê sèng ê tōe-khu lāi-bīn.

5Lēng-gōa chi̍t-pòaⁿ tn̂g cha̍p-jī kong-lí-pòaⁿ, khoah gō͘ kong-lí ê thó͘-tōe, beh kui hō͘ tī sèng-tiān sū-hōng ê Lī-bī -lâng, chòe in tòa ê só͘-chāi.

6“Koh tio̍h tī sèng ê thó͘-tōe piⁿ--á ōe chi̍t tè tōe, tn̂g cha̍p-jī kong-lí-pòaⁿ, khoah nn̄g kong-lí-pòaⁿ, chòe Í-sek-lia̍t -lâng khiā-khí ê siâⁿ-tìn.”

7“Beh ōe hō͘ kun-ông ê thó͘-tōe sī tī sèng ê thó͘-tōe kap Í-sek-lia̍t -lâng siâⁿ-tìn ê iōng-tōe ê siang-pêng, chi̍t pêng tī sèng ê thó͘-tōe keh-piah, chi̍t pêng tī siâⁿ-tìn iōng-tōe ê keh-piah. Sai-pêng ê tōe thàng kàu Tōe-tiong-hái, tang-pêng ê tōe thàng kàu tang-pêng ê pian-kài; thó͘-tōe ê tn̂g-tō͘ kap Í-sek-lia̍t ta̍k chi-cho̍k pun--tio̍h ê thó͘-tōe kâng-khoán.

8Chit-tè tōe sī kun-ông tī Í-sek-lia̍t tiong-kan pun--tio̍h ê sán-gia̍p. Án-ni, ông bōe koh khi-ap góa ê chú-bîn; i beh chiàu ta̍k chi-cho̍k eng-kai tit--tio̍h ê thó͘-tōe pun hō͘ Í-sek-lia̍t jîn-bîn.”

9Chì-koân ê Siōng Chú án-ni kóng, “ Í-sek-lia̍t ê kun-ông ah, góa bô beh koh jím-siū lín lah! Tio̍h thêng-chí kiông-pō kap khi-ap ê sū; tio̍h péng-kong-hêng-gī. Lín m̄-thang koh chhiúⁿ-toa̍t góa chú-bîn ê thó͘-tōe. Góa — Chì-koân ê Siōng Chú án-ni soan-pò͘.

10Lín tio̍h ēng kong-tō ê thian-phêng, i-hoat, pā-te̍k.

11Niû kò͘-thé ê i-hoat kap niû e̍k-thé ê pā-te̍k hūn-liōng tio̍h kâng-khoán, ēng ‘hō-mûi-ní’ chòe tan-ūi, chi̍t ‘hō-mûi-ní’ chiū-sī cha̍p i-hoat, mā-sī cha̍p pā-te̍k.

12“Kè-sǹg tāng-liōng ê tan-ūi sī ‘sià-khek-le̍k’; chi̍t ‘sià-khek-le̍k’ chiū-sī jī-cha̍p ‘kùi-la’; chi̍t ‘bí-ná’ chiū-sī la̍k-cha̍p ‘sià-khek-le̍k’.

13“Lín tio̍h chiàu án-ni hōng-hiàn lín ê chè-mi̍h: Sió-be̍h: Tio̍h hōng-hiàn siu-sêng ê la̍k-cha̍p-hūn-chi-it Tōa-be̍h: Tio̍h hōng-hiàn siu-sêng ê la̍k-cha̍p-hūn-chi-it

14Kaⁿ-ná-iû: Tio̍h hōng-hiàn siu-sêng ê pah-hūn-chi̍t

15Iûⁿ: Tio̍h tùi Í-sek-lia̍t chúi-goân chhiong-chiok ê chháu-tiûⁿ chhú iûⁿ, múi nn̄g-pah chiah hōng-hiàn chi̍t chiah “Chiah-ê thang chòe sò͘-chè, sio-hòa-chè, pêng-an-chè ê chè-mi̍h, ūi jîn-bîn sio̍k-chōe. Góa — Chì-koân ê Siōng Chú án-ni soan-pò͘.

16“Choân-kok ê jîn-bîn lóng tio̍h tòa chit-ê chè-mi̍h khì kàu Í-sek-lia̍t ê kun-ông hia.

17Tī chhoe-it, An-hioh-ji̍t, kap kî-tha Í-sek-lia̍t -lâng ê choeh-ji̍t, ông tio̍h hū-chek thê-kiong sio-hòa-chè, sò͘-chè, tiān-chiú-chè ê chè-mi̍h. I tio̍h chún-pī sio̍k-chōe-chè, sò͘-chè, sio-hòa-chè, kap pêng-an-chè ê chè-mi̍h, hō͘ chè-si ūi Í-sek-lia̍t jîn-bîn sio̍k-chōe.”

18Chì-koân ê Siōng Chú án-ni kóng, “Chiaⁿ-ge̍h chhoe-it, lí tio̍h hiàn chi̍t chiah bô hâ-chhû ê sòe-chiah gû-káng chòe chè-mi̍h, kiat-chēng sèng-tiān.

19Chè-si tio̍h the̍h sio̍k-chōe-chè cheng-siⁿ ê huih boah tī sèng-tiān ê mn̂g-khiā, chè-tôaⁿ ê sì ki kak, í-ki̍p lāi-tiâⁿ tōa-mn̂g ê mn̂g-kheng.

20Chiaⁿ-ge̍h chhoe-chhit, lí mā tio̍h ūi hiah-ê bô-ì-tiong, á-sī in-ūi bû-ti hoān-chōe ê lâng hiàn-chè; án-ni, sèng-tiān chiū tit-tio̍h kiat-chēng.

21“Tùi chiaⁿ-ge̍h cha̍p-sì khai-sí, lín tio̍h siú Pôaⁿ-kè-choeh. Tī chit chhit ji̍t ê choeh-kî tiong, lín lóng tio̍h chia̍h bô-kàⁿ-piáⁿ.

22Choeh-kî ê tē-it ji̍t, ông tio̍h ūi ka-kī kap choân-kok jîn-bîn chún-pī chi̍t chiah gû-káng chòe sio̍k-chōe-chè.

23Tī chit chhit ji̍t ê choeh-kî tiong, i tio̍h ta̍k-ji̍t pī-pān chhit chiah bô hâ-chhû ê gû-káng kap chhit chiah mî-iûⁿ-káng chòe sio-hòa-chè, hiàn hō͘ Siōng Chú. I mā tio̍h ta̍k-ji̍t chún-pī chi̍t chiah soaⁿ-iûⁿ-káng chòe sio̍k-chōe-chè.

24I koh tio̍h pī-pān sò͘-chè; múi chi̍t chiah gû-káng á-sī mî-iûⁿ-káng phòe cha̍p-chhit kong-seng-pòaⁿ ê iù mī-hún, koh kah saⁿ kong-seng ê iû.

25Chhit-ge̍h cha̍p-gō͘ siú Tah-liâu-choeh ê sî, ông tio̍h chiàu Pôaⁿ-kè-choeh ê tiâu-lē, tī chhit ji̍t ê choeh-kî tiong, ta̍k-ji̍t chún-pī sio̍k-chōe-chè, sio-hòa-chè, sò͘-chè, kap iû chiah-ê chè-mi̍h.”

← Chapter 44 Jump to: Chapter 46 →