Ezekiel 3

Chinese TTVR (現代台語譯本羅馬字版)

← Chapter 2 Jump to: Chapter 4 →

1Siōng-tè tùi góa kóng, “Jîn-chú, chiong góa hō͘ lí chit-kńg chheh-kǹg chia̍h--lo̍h-khì, jiân-āu khì tùi Í-sek-lia̍t -lâng soan-káng.”

2Só͘-í góa chhùi peh-khui, I chiū chiong hit-kńg chheh hō͘ góa chia̍h.

3I koh kóng, “Jîn-chú, tio̍h chia̍h góa hō͘ lí ê chheh-kǹg, hō͘ lí ê pak-tó͘ pá-tīⁿ.” Góa chiū chia̍h; chheh tī góa ê chhùi-lāi kam-tiⁿ ná bi̍t.

4Siōng-tè kā góa kóng, “Jîn-chú, khì Í-sek-lia̍t -lâng hia, chiong góa ê ōe kā in kóng.

5Góa m̄-sī phài lí khì gú-giân oh-tit lí-kái ê bîn-cho̍k hia, sī phài lí khì Í-sek-lia̍t -lâng tiong-kan.

6Góa m̄-sī phài lí khì gú-giân bōe thong, kóng sím-mi̍h lí lóng thiaⁿ bô ê bîn-cho̍k hia; góa nā phài lí khì in tiong-kan, in ōe thiaⁿ lí ê ōe.

7M̄-kú Í-sek-lia̍t jîn-bîn m̄-khéng thiaⁿ lí ê ōe, in-ūi in liân góa ê ōe to m̄ thiaⁿ. Í-sek-lia̍t jîn-bîn kò͘-chip, sim-koaⁿ ngī.

8Góa beh hō͘ lí ì-chì kian-tēng ōe-tàng kap in tùi-khòng.

9Góa beh hō͘ lí ê ì-chì chhin-chhiūⁿ soān-chio̍h, pí hé-chio̍h koh-khah kian-tēng. Sui-jiân in sī pōe-ge̍k ê chú-bîn, lí m̄-bián kiaⁿ in, mā m̄-bián in-ūi in ê bīn-sek tio̍h-kiaⁿ.”

10Siōng-tè koh tùi góa kóng, “Jîn-chú, góa kóng ê ōe, lí tio̍h chù-ì thiaⁿ, mā tio̍h khǹg tī sim-lāi.

11Lí tio̍h khì liû-bông ê tông-pau hia, put-koán in beh thiaⁿ á-sī m̄ thiaⁿ, tio̍h thoân-ta̍t góa — Chì-koân ê Siōng Chú beh kā in kóng ê ōe.”

12Hit-sî, Siōng-tè ê sîn kā góa giâ--khí-lâi, góa chiū thiaⁿ-tio̍h góa ê āu-bīn ū hōng-hōng-kiò ê siaⁿ, kóng, “Tio̍h chheng-chàn Siōng Chú tùi I hia só͘ hián-chhut ê êng-iāu!”

13Góa koh thiaⁿ-kìⁿ chiah-ê oa̍h-mi̍h tī khong-tiong teh pe, si̍t-á sio-kha̍p ê siaⁿ, mā thiaⁿ-kìⁿ in ê lián-á tńg-se̍h só͘ hoat-chhut chhin-chhiūⁿ tōa tōe-tāng ê siaⁿ.

14Siōng-tè ê sîn kā góa giâ--khí-lâi, chhōa góa kiâⁿ, góa ê sim kan-khó͘ koh siū-khì, Siōng Chú ê tōa khùi-la̍t kā góa chhi̍h--teh.

15Án-ni, góa lâi kàu Ka-pa-ló͘ hô-piⁿ ê Thê-le̍k A-pit, chiū-sī liû-bông ê tông-pau tòa ê só͘-chāi. Góa ut-chut gāng-gāng tī in tiong-kan tòa chhit ji̍t.

16Chhit ji̍t āu, Siōng Chú kā góa kóng,

17“Jîn-chú, taⁿ góa chí-phài lí chòe Í-sek-lia̍t jîn-bîn ê siú-bōng-chiá. Lí tio̍h chiong góa kā lí kóng kéng-kò ê ōe kā in kóng.

18Nā-sī góa soan-pò͘ bó͘ chi̍t ê siâ-ok ê lâng it-tēng tio̍h sí, lí bô khì kā kéng-kò, khǹg i kái-siâ-kui-chèng, hō͘ i thang kiù ka-kī, chit-ê lâng sui-jiân ōe in-ūi ka-kī ê chōe sí, m̄-kú góa beh tùi lí tui-kiù i sí ê chek-jīm.

19Lí nā ū kéng-kò hit-ê lâng m̄-thang kè-sio̍k choh-pháiⁿ, m̄-kú i bô beh kái-siâ-kui-chèng, i ōe in-ūi ka-kī ê chōe sí; i ê sí, lí m̄-bián hū chek-jīm.

20“Nā-sī gī-lâng lī-khui chiàⁿ-lō͘ khì choh-pháiⁿ, góa beh hō͘ i poa̍h-tó, hō͘ i sí. Lí nā bô kéng-kò i, i it-tēng ōe sí. I beh in-ūi ka-kī ê chōe sí, góa bô beh kì-liām i só͘ chòe ê hó-sū, mā beh tùi lí tui-kiù chek-jīm.

21M̄-kú lí nā ū kéng-kò i m̄-thang hoān-chōe, i mā bô koh hoān-chōe, i beh in-ūi chiap-siū kéng-kò lâi oa̍h, lí mā beh kiù ka-kī ê sìⁿ-miā.”

22Siōng Chú ê khùi-la̍t chhiong-móa góa; I kā góa kóng, “Khí--lâi, khì soaⁿ-kok hia, góa beh tī hia tùi lí kóng-ōe.”

23Góa chiū khí--lâi, khì soaⁿ-kok, tī hia khòaⁿ-kìⁿ Siōng Chú ê êng-kng, kap góa tī Ka-pa-ló͘ hô-piⁿ só͘ khòaⁿ--kìⁿ-ê siâng-khoán. Góa chiū phak lo̍h-khì thô͘-kha;

24Siōng-tè ê sîn chìn-ji̍p góa lāi-bīn, hō͘ góa khiā--khí-lâi. Siōng Chú tùi góa kóng, “Tńg--khì, kā ka-kī koaiⁿ tī chhù-lāi.

25Jîn-chú ah, lâng beh ēng soh-á kā lí pa̍k--khí-lâi, hō͘ lí bōe-tàng chhut-khì gōa-bīn kìⁿ lâng.

26Góa beh hō͘ lí é-káu bōe kóng-ōe, hō͘ lí bô hoat-tō͘ kéng-kò hiah-ê pōe-ge̍k ê jîn-bîn.

27M̄-kú, góa ōe koh tùi lí kóng-ōe, hit-sî, góa ōe khui lí ê chhùi, lí tio̍h thoân-ta̍t góa — Chì-koân ê Siōng Chú beh kā in kóng ê ōe. Lâng nā beh thiaⁿ, hō͘ in thiaⁿ; lâng nā m̄ thiaⁿ, kù-chāi in, in-ūi in sī pōe-ge̍k ê jîn-bîn.”

← Chapter 2 Jump to: Chapter 4 →