Ezekiel 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Siōng-tè tùi góa kóng, “Jîn-chú ah, khiā--khí-lâi! Góa ū ōe beh kā lí kóng.”

2I kóng-ōe ê sî, Siōng-tè ê sîn chìn-ji̍p góa ê lāi-bīn, hō͘ góa khiā--khí-lâi. Góa thiaⁿ-kìⁿ I kā góa kóng,

3“Jîn-chú, góa beh phài lí khì Í-sek-lia̍t -lâng, chiū-sī pōe-ge̍k góa ê kok-bîn hia. In kap in ê chó͘-sian pōe-ge̍k góa, hiān-chāi iáu-teh pōe-poān góa.

4Chiah-ê chú-bîn bīn-phê kāu, sim ngī, góa phài lí khì in hia, thoân-ta̍t góa — Chì-koân ê Siōng Chú beh kā in kóng ê ōe.

5Put-koán chiah-ê pōe-ge̍k ê lâng beh thiaⁿ á-sī m̄ thiaⁿ, in eng-kai chai ū chi̍t ê sian-ti tī in tiong-kan.

6“Jîn-chú, m̄-bián kiaⁿ in, mā m̄-bián in-ūi in kóng ê ōe kiaⁿ-hiâⁿ. Sui-jiân in ōe hoán-khòng, khòaⁿ bōe khí lí, hō͘ lí chhin-chhiūⁿ siū chháu-chhì kap chi̍t-lê pau-ûi, koh chhin-chhiūⁿ tiàm tī giat-á-thâng tiong-kan, lí m̄-bián kiaⁿ in kóng ê ōe, mā m̄-bián in-ūi in ê bīn-sek tio̍h-kiaⁿ.

7Put-koán in beh thiaⁿ á-sī m̄ thiaⁿ, lí tio̍h chiong góa ê ōe kā in kóng, in-ūi in sī pōe-ge̍k ê lâng.

8“Jîn-chú, tio̍h thiaⁿ góa kā lí kóng ê ōe; m̄-thang kap hiah-ê pōe-ge̍k ê lâng siâng-khoán pōe-poān góa. Khui lí ê chhùi, chiong góa beh hō͘ lí ê mi̍h chia̍h--lo̍h-khì.”

9Khòaⁿ leh, góa khòaⁿ-kìⁿ chi̍t ki chhiú chhun kè-lâi góa chia, chhiú-lāi ū chi̍t kńg chheh-kǹg.

10I tī góa ê bīn-chêng thí-khui hit-kńg chheh-kǹg; góa khòaⁿ-kìⁿ chheh ê siang-bīn lóng ū siá-jī, lāi-bīn siá--ê sī ai-ko, thó͘-khùi, kap chai-hō ê ōe.

← Chapter 1 Jump to: Chapter 3 →