Ezekiel 29

Chinese TTVR (現代台語譯本羅馬字版)

← Chapter 28 Jump to: Chapter 30 →

1Tē-cha̍p nî cha̍p-ge̍h cha̍p-jī, Siōng Chú tùi góa kóng,

2“Jîn-chú ah, lí tio̍h tùi Ai-ki̍p -ông kap Ai-ki̍p choân-kok kóng ū-giân, chí-chek in,

3kóng, ‘Chì-koân ê Siōng Chú án-ni kóng: Ai-ki̍p -ông, lí chhin-chhiūⁿ bih tī hô--ni̍h ê tōa hái-koài, góa beh kap lí choh-tùi! Lí bat kóng Nî-lô-hô sī lí ê, sī lí chō--ê.

4Góa beh ēng kau-á kau lí ê gê-chô, hō͘ hô--ni̍h ê hî kha̍h tī lí ê lân; góa beh kā lí kap kha̍h tī lí ê lân ê hî lóng tùi hô--ni̍h giú--khí-lâi.

5Góa mā beh kā lí kap hô--ni̍h ê hî hiat tī khòng-iá. Lí ōe sí tī iá-tōe, bô lâng kā lí siu sin-si, bô lâng kā lí bâi-chòng. Góa beh hō͘ lí chòe tōe-chiūⁿ ê iá-siù kap khong-tiong pe-chiáu ê chia̍h-mi̍h.

6Án-ni, só͘-ū Ai-ki̍p ê chū-bîn chiū chai góa sī Siōng Chú. “‘Siōng Chú koh kóng: Ai-ki̍p -lâng, lí tùi Í-sek-lia̍t -lâng kóng--khí-lâi, put-kò sī chi̍t ki lô͘-tek-á-koáiⁿ.

7In ēng chhiú gia̍h lí tú thô͘-kha, lí chiū pit--khui, siong-tio̍h in ê keng-thâu; in ê seng-khu khò lí, lí chiū tn̄g--khì, hō͘ in ê io siám--tio̍h.

8Só͘-í, góa — Chì-koân ê Siōng Chú án-ni kóng: Góa beh hō͘ lín tú-tio̍h chiàn-loān; lâng kap cheng-siⁿ lóng beh hō͘ to thâi-sí.

9Ai-ki̍p ê tōe beh pha-hng hong-hòe, án-ni, lâng chiū chai góa sī Siōng Chú. “‘In-ūi Ai-ki̍p -ông khoa-kháu kóng: Nî-lô-hô sī góa ê, sī góa chō--ê.

10Góa beh kap lí í-ki̍p lí ê hô-liû choh-tùi. Góa beh hō͘ Ai-ki̍p ê thó͘-tōe, tùi pak-pō͘ ê Bi̍t-toa̍t, kàu lâm-pō͘ ê Sek-hut-nî, it-ti̍t kàu Kó͘-si̍t pian-kài, choân-pō͘ pha-hng hong-hòe,

11bô koh ū lâng á-sī iá-siù keng-kè; sì-cha̍p nî kú, Ai-ki̍p bô lâng khiā-khí.

12Góa beh hō͘ Ai-ki̍p pìⁿ-chòe sè-kan siōng pha-hng ê só͘-chāi, hō͘ Ai-ki̍p ê siâⁿ-tìn pìⁿ-chòe siōng hong-hòe ê siâⁿ-tìn. Góa beh kā Ai-ki̍p -lâng kóaⁿ-sòaⁿ khì lia̍t-kok, sì-sòaⁿ tī lia̍t-pang sì-cha̍p nî kú.

13“‘Chì-koân ê Siōng Chú án-ni kóng: Sì-cha̍p nî liáu-āu, góa beh chū-chi̍p siū hòng-tio̍k ê Ai-ki̍p -lâng,

14chhōa in tùi siū-lia̍h ê só͘-chāi tńg-lâi in ê pún-ku-tōe Pa-te̍k-lô. Tī hia, in beh chiâⁿ-chòe jio̍k-siáu ê kok-ka,

15sī lia̍t-kok tiong siōng bî-sòe--ê, bōe-tàng koh thóng-tī pa̍t-ê kok-ka. Góa beh hō͘ in soe-lám, bōe-tàng koh koán-hat pa̍t-ê kok-ka.

16Ai-ki̍p bōe-tàng koh chòe Í-sek-lia̍t ê khò-soaⁿ, chí-ū hō͘ Í-sek-lia̍t -lâng siūⁿ-khí in óa-khò Ai-ki̍p ê chōe-kò. Án-ni, in chiū chai góa sī Chì-koân ê Siōng Chú.’”

17Tē-jī-cha̍p-chhit nî chiaⁿ-ge̍h chhoe-it, Siōng Chú tùi góa kóng,

18“Jîn-chú ah, Pa-pí-lûn -ông Nî-pò͘-kah-nî-sat chhōa i ê tāi-kun kong-táⁿ Thài-ní. Pa-pí-lûn -ông kap i ê kun-tūi chhut-la̍t khó͘-chiàn, ta̍k-ê lâng lóng lak thâu-mn̂g, keng-thâu liù-phê, m̄-kú in lóng bô tùi Thài-ní tit-tio̍h sím-mi̍h.

19Só͘-í, góa — Chì-koân ê Siōng Chú án-ni kóng, ‘Góa beh chiong Ai-ki̍p ê thó͘-tōe kau hō͘ Pa-pí-lûn -ông Nî-pò͘-kah-nî-sat. I beh chhiúⁿ Ai-ki̍p ê châi-bu̍t, chiong in ê chu-goân chhiúⁿ-liáu-liáu; chiah-ê chiàn-lī-phín beh chòe i ê kun-tūi ê pò-siúⁿ.

20Góa beh kā Ai-ki̍p kau hō͘ i, tòng-chòe i ê kang-chîⁿ, in-ūi i ê kun-tūi sī ūi góa chòe kang. Góa — Chì-koân ê Siōng Chú án-ni soan-pò͘.’

21“Hit-sî, góa beh hō͘ Í-sek-lia̍t kiông-sēng, mā beh hō͘ lí Í-se-kiat koh-chài khui-chhùi tī in tiong-kan kóng-ōe. Án-ni, in chiū chai góa sī Siōng Chú.”

← Chapter 28 Jump to: Chapter 30 →