Ezekiel 43

Chinese TTVR (現代台語譯本羅馬字版)

← Chapter 42 Jump to: Chapter 44 →

1Liáu-āu, hit-ê lâng chhōa góa khì ǹg tang ê mn̂g.

2Khòaⁿ leh! Í-sek-lia̍t Siōng-tè ê êng-kng tùi tang-pêng lâi. I ê siaⁿ chhin-chhiūⁿ tōa-chúi giâ-éng hōa-hōa-háu; tōe in-ūi I ê êng-kng hoat-chhut kong-chhái.

3Chit-ê īⁿ-siōng kap í-chêng góa só͘ khòaⁿ--kìⁿ Siōng-tè húi-bia̍t Iâ-lō͘-sat-léng ê īⁿ-siōng, í-ki̍p góa tī Ka-pa-ló͘ hô-piⁿ khòaⁿ--kìⁿ ê īⁿ-siōng siâng-khoán, góa chiū phak-lo̍h thô͘-kha.

4Siōng Chú ê êng-kng tùi tang-mn̂g chìn-ji̍p sèng-tiān.

5Siōng-tè ê sîn kā góa giâ--khí-lâi, tòa góa ji̍p-khì lāi-tiâⁿ. Tī hia, góa khòaⁿ-kìⁿ Siōng Chú ê êng-kng chhiong-móa sèng-tiān.

6Hit-ê lâng khiā tī góa sin-piⁿ; góa thiaⁿ-kìⁿ ū chi̍t ê siaⁿ tùi sèng-tiān kā góa kóng,

7“Jîn-chú ah, chia sī góa ê pó-chō, sī góa ê kha-tiam; góa beh éng-oán tòa tī Í-sek-lia̍t -lâng ê tiong-kan. Í-sek-lia̍t -lâng kap in ê kun-ông bōe-ēng-tit koh in-ūi pài ngó͘-siōng kiâⁿ îm-loān, á-sī in-ūi kun-ông ê si-thé siat-to̍k góa ê sèng-miâ.

8In chiong ông-kiong ê hō͘-tēng khí óa góa sèng-tiān ê hō͘-tēng, koh chiong ông-kiong ê mn̂g-thiāu khí óa góa sèng-tiān ê mn̂g-thiāu; in kap góa ê tiong-kan kan-ta keh chi̍t tó͘ chhiûⁿ. In ēng chiah-ê thang iàm-ò͘ⁿ ê sū siat-to̍k góa ê sèng-miâ, só͘-í góa hoat tōa siū-khì kā in siau-bia̍t.

9Taⁿ, in bōe-ēng-tit koh pài ngó͘-siōng, koh tio̍h chiong kun-ông ê si-thé sóa lī-khui góa sèng ê só͘-chāi, góa chiū beh éng-oán tòa tī in tiong-kan.

10“Jîn-chú ah, lí tio̍h chiong chit-ê sèng-tiān ê siat-kè chí-sī Í-sek-lia̍t -lâng, hō͘ in niû sèng-tiān ê tōa-sòe, tùi án-ni ōe-hiáu ūi-tio̍h ka-kī ê chōe-ok kám-kak kiàn-siàu.

11In nā ūi-tio̍h ka-kī ê hêng-ûi kám-kak kiàn-siàu, lí tio̍h chiong chit-ê sèng-tiān ê siat-kè, khoán-sit, chhut-ji̍p-kháu, só͘-ū ê siat-kè kap kui-lē, só͘-ū ê khoán-sit kap tiâu-lē lóng kā in kóng. Lí tio̍h tī in ê bīn-chêng chiong chiah-ê siá chheng-chhó, hō͘ in thang chiàu chit-ê sèng-tiān ê siat-kè kap kui-lē khì chòe.

12Sèng-tiān ê tiâu-lē sī án-ni: Sèng-tiān tio̍h khí tī soaⁿ-téng, sèng-tiān ê sì-chiu-ûi sī chì-sèng. Tio̍h ōe-kì--tit, che chiū-sī sèng-tiān ê tiâu-lē.”

13Chè-tôaⁿ ê chhùn-chhioh sī: Chè-tôaⁿ ê ki-chō koân gō͘-cha̍p kong-hun, khoah gō͘-cha̍p kong-hun; sì-chiu-ûi ū tûn, khoah jī-cha̍p-gō͘ kong-hun.

14Tē-jī chàn ki-chō koân chi̍t kong-chhioh, khoah gō͘-cha̍p kong-hun. Tē-saⁿ chàn ki-chō koân nn̄g kong-chhioh, khoah gō͘-cha̍p kong-hun.

15Lô͘-tâi, chiū-sī siōng téng-bīn chàn, koân nn̄g kong-chhioh, téng-bīn ū khiàu--khí-lâi ê sì ki kak, koân gō͘-cha̍p kong-hun.

16Lô͘-tâi tn̂g kap khoah lóng sī la̍k kong-chhioh, sī sù-hong--ê.

17Ki-chō ê tn̂g kap khoah lóng sī chhit kong-chhioh, sī sù-hong--ê. Sì-chiu-ûi ū tûn, khoah jī-cha̍p-gō͘ kong-hun. Ki-chō sì-chiu-ûi khoah gō͘-cha̍p kong-hun. Chiūⁿ chè-tôaⁿ ê kiā-á ǹg tang-pêng.

18Chì-koân ê Siōng Chú tùi góa kóng, “Jîn-chú ah, ē-bīn sī iú-koan chè-tôaⁿ ê tiâu-lē: Chè-tôaⁿ chō hó í-āu, tio̍h tī chè-tôaⁿ téng-bīn hiàn sio-hòa-chè, hiù hiàn-chè ê huih.

19Lí tio̍h khan chi̍t chiah gû-káng-á, kau hō͘ sū-hōng góa ê chè-si, chiū-sī Lī-bī chi-cho̍k, Sat-tok ê hō͘-tāi, hiàn chòe sio̍k-chōe-chè. Góa — Chì-koân ê Siōng Chú án-ni soan-pò͘.

20Lí tio̍h the̍h gû-káng ê huih boah chè-tôaⁿ khiàu--khí-lâi ê sì ki kak, kap lô͘-tâi ê sì-kak-thâu, í-ki̍p sì-chiu-ûi thóng--chhut-lâi ê tûn. Lí tio̍h án-ni chòe lâi kiat-chēng chè-tôaⁿ hō͘ i chheng-khì.

21Lí tio̍h chiong sio̍k-chōe-chè ê gû-káng-á tòa-khì sèng-tiān gōa-bīn, tī chí-tēng ê só͘-chāi sio-tiāu.

22Tē-jī ji̍t, lí tio̍h hiàn chi̍t chiah bô hâ-chhû ê soaⁿ-iûⁿ-káng chòe sio̍k-chōe-chè kiat-chēng chè-tôaⁿ, chhin-chhiūⁿ ēng gû-káng-á kiat-chēng chè-tôaⁿ kâng-khoán.

23Chè-tôaⁿ kiat-chēng liáu-āu, lí tio̍h khan chi̍t chiah bô hâ-chhû ê gû-káng-á kap chi̍t chiah bô hâ-chhû ê mî-iûⁿ-káng,

24lâi kàu Siōng Chú bīn-chêng. Chè-si tio̍h iā iâm tī in ê seng-khu téng, chiong in chòe sio-hòa-chè hiàn hō͘ Siōng Chú.

25Liân-sòa chhit ji̍t, lí tio̍h ta̍k-ji̍t hiàn chi̍t chiah gû-káng-á, soaⁿ-iûⁿ-káng, kap mî-iûⁿ-káng chòe sio̍k-chōe-chè. Chiah-ê cheng-siⁿ lóng tio̍h bô hâ-chhû--ê.

26Chit chhit ji̍t lāi, chè-si tio̍h ta̍k-ji̍t ūi chè-tôaⁿ kiâⁿ kiat-chēng-lé, hō͘ i chheng-khì; kā i hun-pia̍t-choh-sèng.

27Tē-poeh ji̍t, chè-si tio̍h tī chè-tôaⁿ téng ūi jîn-bîn hiàn sio-hòa-chè kap pêng-an-chè. Án-ni, góa chiū beh chiap-la̍p lín.” Chì-koân ê Siōng Chú án-ni soan-pò͘.

← Chapter 42 Jump to: Chapter 44 →