Ezekiel 34

Chinese TTVR (現代台語譯本羅馬字版)

← Chapter 33 Jump to: Chapter 35 →

1Siōng Chú tùi góa kóng,

2“Jîn-chú ah, lí tio̍h khiàn-chek Í-sek-lia̍t ê léng-tō-chiá, tùi in thoân-ta̍t góa ê sìn-sit. Lí tio̍h kā in kóng, góa — Chì-koân ê Siōng Chú án-ni kóng, ‘ Í-sek-lia̍t ê bo̍k-chiá, lín chhám ah! Lín kan-ta kò͘ ka-kī. Bo̍k-chiá kiám m̄-sī tio̍h chiàu-kò͘ iûⁿ-kûn?

3Lín chia̍h iûⁿ-lin, chhēng iûⁿ-mn̂g ê saⁿ, thâi siōng-pûi ê iûⁿ lâi chia̍h, m̄-kú bô beh chiàu-kò͘ iûⁿ-kûn.

4Soe-lám--ê, lín bô kā in kò͘ hō͘ ióng; phòa-pīⁿ--ê, lín bô kā in i-tī; siū-siong--ê, lín bô kā in pau-chat; sit-bê--ê, lín bô kā in chhōa--tò-lâi; sit-lo̍h--ê, lín bô khì chhē. Lín tian-tò ēng kiông-pō chân-khok koán-hat in.

5In-ūi bô bo̍k-chiá, iûⁿ-kûn chiū sì-sòaⁿ; iûⁿ sì-sòaⁿ, chiū hō͘ iá-siù thun-chia̍h.

6Góa ê iûⁿ-kûn tī tōa-soaⁿ sió-soaⁿ bê-lō͘ liû-lōng, sì-sòaⁿ tī choân-tōe, bô lâng chiàu-kò͘, bô lâng khì chhē.

7“‘Só͘-í, bo̍k-chiá ah, lín tio̍h thiaⁿ góa Siōng Chú tùi lín kóng ê ōe:

8Góa — Chì-koân ê Siōng Chú kí ka-kī ê oa̍h-miā li̍p-sè, góa ê iûⁿ-kûn in-ūi bô bo̍k-chiá, soah chiâⁿ-chòe la̍h-bu̍t, hō͘ iá-siù thun-chia̍h. Góa ê bo̍k-chiá bô khì chhē góa ê iûⁿ; in kan-ta kò͘ ka-kī, bô chiàu-kò͘ góa ê iûⁿ-kûn.

9Só͘-í, lín chiah-ê bo̍k-chiá tio̍h thiaⁿ góa Siōng Chú ê ōe.

10Góa — Chì-koân ê Siōng Chú beh kap lín chiah-ê bo̍k-chiá choh-tùi. Góa beh tùi lín siu-hôe góa ê iûⁿ-kûn, put-chún lín koh chòe in ê bo̍k-chiá, mā bô beh hō͘ lín kā ka-kī chhī kah pûi-pûi-pûi. Góa beh kiù góa ê iûⁿ thoat-lī lín ê chhùi, put-chún lín chia̍h in ê bah.’”

11“Só͘-í, góa — Chì-koân ê Siōng Chú án-ni kóng, ‘Góa beh chhin-sin khì chhē góa ê iûⁿ, kā in chhē--tò-lâi.

12Bo̍k-chiá tī iûⁿ-kûn sì-sòaⁿ ê sî, án-chóaⁿ khì chhē i ê iûⁿ, góa mā beh án-ni chhē góa ê iûⁿ. In tī o͘-thiⁿ-àm-tōe ê ji̍t-chí sì-sòaⁿ khì ta̍k só͘-chāi, góa beh tùi hia kā in kiù--tò-lâi.

13Góa beh tùi bān-cho̍k tiong kā in chhōa--chhut-lâi, tùi lia̍t-kok tiàu-chi̍p in, chhōa in tńg-lâi hiong-thó͘. Góa beh tī Í-sek-lia̍t chèng-soaⁿ ê khoe-chúi piⁿ, hó khiā-khí ê só͘-chāi bo̍k-ióng in.

14Góa beh tī hó ê chháu-po͘ bo̍k-ióng in; Í-sek-lia̍t ê koân-soaⁿ beh chòe in ê bo̍k-tiûⁿ. In beh tó tī chhiⁿ-chhùi ê bo̍k-tiûⁿ, tī Í-sek-lia̍t soaⁿ--ni̍h pûi-súi ê chháu-po͘ chia̍h-chháu.

15Góa beh chhin-sin chòe góa iûⁿ-kûn ê bo̍k-chiá, hō͘ in ū an-hioh ê só͘-chāi. Góa — Chì-koân ê Siōng Chú án-ni soan-pò͘.

16“‘Sit-lo̍h--ê, góa beh khì chhē; sit-bê--ê, góa beh kā in chhōa--tò-lâi; siū-siong--ê, góa beh kā in pau-chat; phòa-pīⁿ--ê, góa beh kā in i-tī. M̄-kú hiah-ê pûi koh ióng--ê, góa beh kā in tû-bia̍t; góa beh chiàu kong-tō bo̍k-ióng in.’

17“Kóng-tio̍h góa ê iûⁿ-kûn, góa — Chì-koân ê Siōng Chú án-ni kóng, ‘Góa beh sím-phòaⁿ ta̍k-chiah iûⁿ, tī mî-iûⁿ-káng kap soaⁿ-iûⁿ-káng ê tiong-kan chú-chhî kong-tō.

18Lín chiah-ê tī chhiⁿ-chhùi ê chháu-po͘ chia̍h kah pûi-pûi--ê, siūⁿ-kóng che sī lí-só͘-tong-jiân sī--bô? Lín kèng-jiân ēng kha thún-ta̍h chia̍h chhun ê chháu! Lín lim chheng ê chúi, kèng-jiân ēng kha kā lim chhun ê chúi lā hō͘ lô.

19Kiám kóng góa kî-tha ê iûⁿ kan-ta ōe-tàng chia̍h lín thún-ta̍h--kè ê chháu, lim lín lā-lô ê chúi?

20“‘Só͘-í, góa — Chì-koân ê Siōng Chú án-ni kóng: Góa beh chhin-sin tī lín chiah-ê pûi kap sán ê iûⁿ tiong-kan chú-chhî kong-tō.

21In-ūi lín ēng pak-tó͘-piⁿ kap keng-kah-thâu khoeh soe-lám--ê, ēng kak kā in tak, kā in kóaⁿ-sòaⁿ khì pa̍t-ūi.

22Só͘-í, góa beh kái-kiù góa ê iûⁿ-kûn, hō͘ in bô koh chiâⁿ-chòe la̍h-bu̍t; góa beh tī iûⁿ kap iûⁿ ê tiong-kan chú-chhî kong-tō.

23Góa beh siat-li̍p chi̍t ê bo̍k-chiá, chiū-sī góa ê po̍k-jîn Tāi-pi̍t, lâi kā in tī-lí, kā in bo̍k-ióng.

24Góa Siōng Chú beh chòe in ê Siōng-tè, góa ê po̍k-jîn Tāi-pi̍t beh chòe in ê kun-ông. Góa Siōng Chú án-ni soan-pò͘.

25Góa beh kap in li̍p pêng-an ê iok, siau-bia̍t in kok-lāi hiong-ok ê iá-siù, in chiū thang tī khòng-iá an-jiân khiā-khí, tī chhiū-nâ lāi hioh-khùn.

26“‘Góa beh sù-hok hō͘ in, mā sù-hok hō͘ góa ê soaⁿ sì-chiu-ûi ê tōe-khu. Góa beh chiàu-sî lo̍h-hō͘; hok-khì beh chhin-chhiūⁿ hō͘-chúi kàng-lîm.

27Chhân-iá ê chhiū-ba̍k beh kiat ké-chí, thó͘-tōe beh chhut thó͘-sán; góa ê chú-bîn beh tī ka-kī ê thó͘-tōe an-ku-lo̍k-gia̍p. Góa kòng-tn̄g in pē ê taⁿ, tùi ap-pek in ê chhiú kā in tháu-pàng ê sî, in chiū chai góa sī Siōng Chú.

28In bô koh chòe lia̍t-kok ê la̍h-bu̍t, hō͘ iá-siù thun-chia̍h. In beh an-jiân khiā-khí, bô koh ū kiaⁿ-hiâⁿ.

29Góa beh kā in kiàn-li̍p chi̍t ê lông-tiûⁿ, hō͘ in bu̍t-sán hong-hù; in bōe koh in-ūi ki-hng siū-hāi, lia̍t-kok bōe koh kā in thí-chhiò.

30In lóng beh chai góa Siōng Chú — Í-sek-lia̍t ê Siōng-tè kap in tông-chāi; in sī góa ê chú-bîn.’ Góa — Chì-koân ê Siōng Chú án-ni soan-pò͘.

31“Lín sī góa ê iûⁿ, góa chháu-tiûⁿ ê iûⁿ; lín sī góa ê chú-bîn, góa sī lín ê Siōng-tè.” Chì-koân ê Siōng Chú án-ni soan-pò͘.

← Chapter 33 Jump to: Chapter 35 →