Ezekiel 28

Chinese TTVR (現代台語譯本羅馬字版)

← Chapter 27 Jump to: Chapter 29 →

1Siōng Chú tùi góa kóng,

2“Jîn-chú ah, tio̍h kā Thài-ní -ông kóng, ‘Chì-koân ê Siōng Chú án-ni kóng: Lí sim-lāi kiau-ngō͘, siūⁿ-kóng ka-kī sī sîn-bêng, chē tī hái-tiong chiòng-sîn ê chō-ūi. Sui-jiân lí sim-lāi án-ni siūⁿ, kî-si̍t lí sī lâng, m̄-sī sîn-bêng.

3Lí siūⁿ lí ka-kī pí Tān-í-lí khah chhong-bêng, bêng-pe̍k só͘-ū ê ò-pì.

4Lí khò ka-kī ê chhong-bêng kap ki-khiáu tit-tio̍h châi-hù, lúi-chek chin chōe kim-gûn tī khò͘-pâng.

5Lí ūn-iōng chòe seng-lí ê chhong-bêng, cheng-ka lí ê châi-hù. Lí in-ūi ka-kī ê châi-hù jú lâi jú kiau-ngō͘!

6“‘Só͘-í, góa — Chì-koân ê Siōng Chú án-ni kóng: In-ūi lí siūⁿ ka-kī kap sîn-bêng kâng-khoán,

7só͘-í góa beh chhōa lia̍t-kok tiong siōng hiong-ok ê gōa-kok-lâng lâi kong-táⁿ lí. In beh pu̍ih to húi-hoāi lí ēng chhong-bêng kiàn-li̍p ê sêng-chiū, hō͘ lí sit-khì kong-chhái.

8In beh kā lí hiat-lo̍h Chhim-khiⁿ, hō͘ lí chhám-sí tī hái--ni̍h.

9Lí kiám ōe-tàng tùi kā lí thâi ê lâng kóng lí sī sîn-bêng? Tī thâi lí ê lâng chhiú-tiong, lí put-kò sī lâng, m̄-sī sîn-bêng.

10Lí beh sí tī gōa-kok-lâng ê chhiú-tiong, chhin-chhiūⁿ bô siū kat-lé ê lâng sí, sí kah chin kiàn-siàu. Góa — Chì-koân ê Siōng Chú án-ni soan-kò.’”

11Siōng Chú tùi góa kóng,

12“Jîn-chú ah, lí tio̍h ūi Thài-ní -ông chhiùⁿ ai-ko, kā i kóng, ‘Chì-koân ê Siōng Chú án-ni kóng: Lí kè-khì sī oân-bí ê tián-hoān, chhiong-móa tì-hūi, si̍p-choân-si̍p-bí.

13Lí bat tòa tī I-tiân, chiū-sī Siōng-tè ê hn̂g lāi-bīn, ēng âng-pó-chio̍h, n̂g-ge̍k, kim-kong-chio̍h, chhiⁿ-ge̍k, âng-bé-ló, phek-ge̍k, nâ-pó-chio̍h, le̍k-pó-chio̍h, chhiah-ge̍k chng-thāⁿ ka-kī; só͘-ū ê pó-chio̍h lóng siuⁿ kim-kheng. Tī lí siū-chō hit-ji̍t, góa chiū lóng ūi lí chún-pī hó-sè.

14Góa siat-li̍p lí chòe ki-lō͘-pek, pó-hō͘ Siōng-tè ê sèng-soaⁿ, tī chhin-chhiūⁿ hé teh to̍h kng-liāng ê pó-chio̍h tiong-kan sûn-sī.

15Tùi siū-chō ê ji̍t, lí ê hêng-ûi chèng-ti̍t, āu-lâi soah khai-sí chòe pháiⁿ.

16Lí seng-lí hó koh chòe chin tōa, soah hoān-chōe, chòe chin chōe kiông-pō ê sū. Só͘-í, góa kā lí kóaⁿ lī-khui góa ê sèng-soaⁿ, hō͘ lí tú-tio̍h kiàn-siàu. Ah, siú-hō͘-chiá ki-lō͘-pek, góa tùi chhin-chhiūⁿ hé teh to̍h kng-liāng ê pó-chio̍h tiong-kan kā lí kóaⁿ-cháu.

17Lí in-ūi eng-chùn, lāi-sim kiau-ngō͘; lí chhut-miâ, soah khòaⁿ-khin tì-hūi. Só͘-í góa kā lí siak tī thô͘-kha, hō͘ chu-ông chhin-ba̍k khòaⁿ--tio̍h.

18Lí in-ūi chōe-kò chin chōe, chòe seng-lí bô kong-tō, soah siat-to̍k lí ê sèng-só͘, só͘-í góa pàng-hé kā lí sio, hō͘ lí tī lâng ê ba̍k-chiu chêng pìⁿ-chòe hé-hu.

19Só͘-ū jīn-bat lí ê kok-ka lóng beh kiaⁿ-hiâⁿ; lí éng-oán siau-sit, chit-khoán ê kiat-kio̍k hō͘ lâng tio̍h-kiaⁿ.’”

20Siōng Chú tùi góa kóng,

21“Jîn-chú ah, lí tio̍h ǹg Se-tùn -lâng kóng ū-giân, chí-chek in.

22Tio̍h kā in kóng Chì-koân ê Siōng Chú án-ni kóng, ‘ Se-tùn, góa beh kap lí choh-tùi! Góa beh tī lín tiong-kan hián-chhut góa ê êng-kng. Góa hián-bêng góa ê sîn-sèng, si-hêng sím-phòaⁿ ê sî, lâng chiū chai góa sī Siōng Chú.

23Góa beh hō͘ un-e̍k tī Se-tùn liû-hêng, hō͘ Se-tùn ê koe-lō͘ lóng sī huih; tùi-te̍k gia̍h to tùi sì-bīn kong-kek i, siū thâi ê lâng tó tī koe-lō͘. Án-ni, lâng chiū chai Góa sī Siōng Chú.’”

24Siōng Chú kóng, “Kè-khì khòaⁿ-khin Í-sek-lia̍t -lâng chiu-ûi ê kok-ka, bōe koh chhin-chhiūⁿ chha̍k--lâng ê chhì-phè, siong-lâng ê chi̍t-lê chhì-siong Í-sek-lia̍t, án-ni lâng chiū chai góa sī Chì-koân ê Siōng Chú.”

25Chì-koân ê Siōng Chú án-ni kóng, “Góa beh chū-chi̍p siū hòng-tio̍k khì bān-cho̍k ê Í-sek-lia̍t -lâng, bān-cho̍k beh in-ūi án-ni chai góa sī sîn-sèng; Í-sek-lia̍t -lâng beh tòa tī in ka-kī ê thó͘-tōe, chiū-sī góa siúⁿ-sù hō͘ góa ê po̍k-jîn Ngá-kok ê thó͘-tōe.

26In beh tī hia an-ku-lo̍k-gia̍p; góa hêng-hoa̍t chiu-ûi hiah-ê khòaⁿ-khin Í-sek-lia̍t -lâng ê bîn-cho̍k liáu-āu, Í-sek-lia̍t -lâng beh khí-chhù, khai-khún phû-tô-hn̂g, an-jiân khiā-khí. Án-ni, in chiū chai góa sī Siōng Chú — in ê Siōng-tè.”

← Chapter 27 Jump to: Chapter 29 →