Ezekiel 19

Chinese TTVR (現代台語譯本羅馬字版)

← Chapter 18 Jump to: Chapter 20 →

1Lí tio̍h ūi Í-sek-lia̍t ê léng-siù chhiùⁿ ai-ko:

2Lí ê lāu-bú sī sai-bú, phak tī sai-kûn ê tiong-kan; i tī ióng-béng ê sai tiong-kan ióng-io̍k sòe-chiah sai.

3I kā chi̍t chiah sòe-chiah sai-á chhī tōa-chiah, hō͘ i chiâⁿ-chòe siàu-chòng ê sai, o̍h ōe-hiáu lia̍h la̍h-bu̍t, thun-chia̍h lâng.

4Lia̍t-kok thiaⁿ--kìⁿ, chiū ēng hām-khiⁿ kā i lia̍h--khí-lâi, ēng kau-á kā i thoa-khì Ai-ki̍p.

5Sai-bú khòaⁿ-kìⁿ i ê kî-thāi lo̍k-khong, sim choa̍t-bāng; chiū koh chhī chi̍t chiah sòe-chiah sai-á, hō͘ i chiâⁿ-chòe siàu-chòng ê sai.

6Siàu-chòng ê sai tī sai-kûn tiong kiâⁿ-lâi-kiâⁿ-khì; i o̍h ōe-hiáu lia̍h la̍h-bu̍t, thun-chia̍h lâng.

7I phò-hoāi siâⁿ-pó, húi-hoāi siâⁿ-tìn; i hm̄-hm̄-háu, chèng-lâng kiaⁿ-hiâⁿ, choân-tōe pha-hng.

8Chiu-ûi ê lia̍t-kok tùi sì-bīn ûi-kong i; in siat lô-bāng, ó͘ hām-khiⁿ, kā i lia̍h--khí-lâi.

9In ēng kau-á kā i kau--teh, koaiⁿ-ji̍p lông-á lāi, tòa-khì Pa-pí-lûn -ông hia; in kā i koaiⁿ tī kian-kò͘ ê kaⁿ-lô, Í-sek-lia̍t ê chèng-soaⁿ bô koh thiaⁿ-kìⁿ i hm̄-hm̄-háu ê siaⁿ.

10Lí ê lāu-bú chhin-chhiūⁿ phû-tô-chhiū, chai tī khoe-chúi piⁿ, in-ūi chúi-goân chhiong-chiok, ki-hio̍h bō͘-sēng, gâu kiat ké-chí.

11I ê chhiū-ki ióng koh tēng, thang chòe thóng-tī-chiá ê koáiⁿ. Chit-châng chhiū tōa-châng, pí bō͘-sēng ê chhiū-oe khah koân; i ê chhiū-ki thiu-koân, hn̄g-hn̄g chiū khòaⁿ ōe tio̍h.

12M̄-kú, chit-châng phû-tô-chhiū, in-ūi Siōng-tè ê siū-khì, liân kun pu̍ih--khí-lâi, hiat tī thô͘-kha, ké-chí hō͘ tang-hong chhe ta, tēng ê chhiū-ki siū at-tn̄g ko͘-tâ, hō͘ hé sio-sio--khì.

13Taⁿ i siū sóa-chai tī khòng-iá, chèng tī ta-sò bô-chúi ê só͘-chāi.

14Chhiū-châng to̍h-hé, sio-húi chhiū-oe kap ké-chí; i bô koh ū tēng ê chhiū-ki thang chòe thóng-tī-chiá ê koáiⁿ. Che sī chi̍t siú ai-ko; chit-siú ai-ko it-ti̍t liû-thoân.

← Chapter 18 Jump to: Chapter 20 →