Ezekiel 33

Chinese TTVR (現代台語譯本羅馬字版)

← Chapter 32 Jump to: Chapter 34 →

1Siōng Chú tùi góa kóng,

2“Jîn-chú ah, tio̍h kā lí ê tông-pau kóng, góa hō͘ chi̍t ê kok-ka tú-tio̍h chiàn-loān, hit-ê kok-ka ê jîn-bîn tio̍h tùi in tiong-kan soán chi̍t ê lâng chòe siú-bōng-chiá.

3Siú-bōng-chiá khòaⁿ-tio̍h tùi-te̍k pek-kūn, chiū pûn sàu-kak kéng-kò jîn-bîn.

4Nā ū lâng thiaⁿ-tio̍h sàu-kak ê siaⁿ m̄-kú bô kéng-kak, soah hō͘ tùi-te̍k thâi-sí, i tio̍h ūi ka-kī ê sí hū chek-jīm.

5I thiaⁿ-tio̍h sàu-kak ê siaⁿ m̄-kú bô kéng-kak, i tio̍h ūi ka-kī ê sí hū chek-jīm. I nā chiap-siū kéng-kài, chiū ōe-tàng kiù ka-kī ê sìⁿ-miā.

6Siú-bōng-chiá khòaⁿ-tio̍h tùi-te̍k pek-kūn, nā bô pûn sàu-kak, tì-kàu jîn-bîn m̄-chai thang kéng-kài, soah ū lâng hō͘ tùi-te̍k thâi-sí, chiū-sī-kóng hit-ê lâng ū chōe kai-sí, góa mā ài siú-bōng-chiá ūi-tio̍h hit-ê lâng ê sí hū chek-jīm.

7“Jîn-chú ah, taⁿ góa chí-phài lí chòe Í-sek-lia̍t jîn-bîn ê siú-bōng-chiá. Lí tio̍h chiong góa kā lí kóng kéng-kò ê ōe kā in kóng.

8Nā-sī góa soan-pò͘ bó͘ chi̍t ê siâ-ok ê lâng it-tēng tio̍h sí, lí khiok bô khì kā i kéng-kò, khǹg i kái-siâ-kui-chèng, chit-ê lâng sui-jiân mā ōe in-ūi ka-kī ê chōe lâi sí, m̄-kú góa beh tùi lí tui-kiù i sí ê chek-jīm.

9Lí nā ū kéng-kò hit-ê lâng m̄-thang kè-sio̍k choh-pháiⁿ, m̄-kú i bô beh kái-siâ-kui-chèng, i ōe in-ūi ka-kī ê chōe sí; i ê sí, lí m̄-bián hū chek-jīm.”

10Siōng Chú tùi góa kóng, “Jîn-chú ah, Í-sek-lia̍t -lâng bat kóng: Goán ê chōe kap kè-sit chhin-chhiūⁿ tāng-tàⁿ kā goán teh--leh, goán in-ūi án-ni sit-chì soe-lám, m̄-chai beh án-chóaⁿ oa̍h--lo̍h-khì.

11Lí tio̍h kā in kóng, góa — Chì-koân ê Siōng Chú kí ka-kī ê oa̍h-miā li̍p-sè, góa m̄-ài pháiⁿ-lâng sí-bông, ài in lī-khui pháiⁿ-lō͘ lâi tit-tio̍h oa̍h-miā. Í-sek-lia̍t -lâng ah, lín tio̍h hóe-kái, oa̍t tò-tńg, lī-khui siâ-ok ê hêng-ûi! Lín ná beh chhē sí leh?

12“Só͘-í, jîn-chú ah, tio̍h kā lí ê tông-pau kóng, ‘Gī-lâng hoān-chōe, i chá-chêng chòe ê hó-sū bōe kiù i. Pháiⁿ-lâng hóe-kái, i chá-chêng chòe ê pháiⁿ bōe hō͘ i bia̍t-bông; gī-lâng hoān-chōe, i chá-chêng ê hó hêng-ûi bōe hō͘ i tit-tio̍h oa̍h-miā.’

13Góa tùi gī-lâng kóng ‘Lí it-tēng ōe oa̍h’, m̄-kú i nā khò ka-kī ê hó hêng-ûi soah khai-sí hoān-chōe, i só͘-ū ê hó hêng-ûi góa bōe kā i kì--teh. I ōe in-ūi só͘ chòe ê pháiⁿ lâi sí.

14Góa bat tùi pháiⁿ-lâng kóng ‘Lí it-tēng ōe sí’, m̄-kú i nā hóe-kái lī-khui pháiⁿ, chòe kong-pêng chèng-gī ê sū;

15phì-jū kóng, chiong i thau--lâi á-sī pa̍t-lâng tí-ah ê mi̍h-kiāⁿ hêng hō͘ goân-chú, chun-siú sù sìⁿ-miā ê lu̍t-hoat, bô koh chòe pháiⁿ, i it-tēng ōe tit-tio̍h sìⁿ-miā, bōe sí.

16Góa bōe kā i jīm-hô ê chōe kì--teh; i beh in-ūi só͘ chòe kong-pêng chèng-gī ê sū, sìⁿ-miā tit-tio̍h pó-chûn.

17“Lí ê tông-pau kóng ‘Chú án-ni chhú-lí bô kong-tō’. Kî-si̍t, in chiah sī bô kong-tō.

18Gī-lâng bô koh chòe hó-sū, tian-tò khì chòe pháiⁿ, in it-tēng ōe in-ūi án-ni lâi sí.

19Pháiⁿ-lâng nā hóe-kái bô koh choh-pháiⁿ, chòe kong-pêng chèng-gī ê sū, i beh in-ūi án-ni pó-chûn sìⁿ-miā.

20Lín iáu-teh kóng ‘Chú án-ni chhú-lí bô kong-tō’. Í-sek-lia̍t -lâng ah, góa beh chiàu lín ta̍k-ê lâng ê hêng-ûi kā lín sím-phòaⁿ.”

21Tē-cha̍p-jī nî cha̍p-ge̍h chhoe-gō͘, ū chi̍t ê tùi Iâ-lō͘-sat-léng tô-cháu--chhut-lâi ê lâng lâi góa chia. I kā góa kóng, Iâ-lō͘-sat-léng -siâⁿ í-keng lûn-hām.

22Chit-ê lâng lâi ê chêng chi̍t àm, Siōng Chú ê khùi-la̍t chhiong-móa góa, hō͘ góa ōe koh kóng-ōe. Tē-jī ji̍t chá-khí, chit-ê lâng lâi góa chia í-chêng, góa ê chhùi í-keng khui, khai-sí ōe kóng-ōe.

23Siōng Chú tùi góa kóng,

24“Jîn-chú ah, tòa tī Í-sek-lia̍t hong-hòe ê siâⁿ ê jîn-bîn kóng, ‘ A-pek-la-hán chi̍t ê lâng chiū tit-tio̍h chit-tè thó͘-tōe, lán jîn-sò͘ chiah chōe, chit-tè thó͘-tōe koh-khah ōe-ēng-tit hō͘ lán chòe sán-gia̍p.’

25“Lí tio̍h kā in kóng, góa — Chì-koân ê Siōng Chú án-ni kóng, ‘Lín chia̍h kâⁿ-huih ê bah, pài ngó͘-siōng, koh thâi-sí lâng, iáu siūⁿ-beh tit-tio̍h chit-tè thó͘-tōe chòe sán-gia̍p o͘h?

26Lín khò to-kiàm kè ji̍t-chí, chòe thang iàm-ò͘ⁿ ê sū, lâng-lâng hoān kan-îm, iáu káⁿ siūⁿ-beh tit-tio̍h chit-tè thó͘-tōe chòe sán-gia̍p?’

27“Lí tio̍h koh kā in kóng, ‘Góa — Chì-koân ê Siōng Chú kí ka-kī ê oa̍h-miā li̍p-sè: Lín tòa tī hong-hòe ê siâⁿ ê jîn-bîn beh hō͘ lâng thâi-sí, tòa tī iá-gōa ê lâng beh hō͘ iá-siù thun-chia̍h, bih tī pó-lúi á-sī tōng-lāi ê lâng beh tì-tio̍h un-e̍k sí--khì.

28Góa beh hō͘ chit-tè tōe thiat-tóe pha-hng; in só͘ khoa-iāu--ê lóng beh siau-sit. Í-sek-lia̍t ê soaⁿ beh hong-hòe, bô lâng keng-kè.’

29Góa in-ūi in só͘ chòe it-chhè thang iàm-ò͘ⁿ ê sū kā in hêng-hoa̍t, hō͘ thó͘-tōe pha-hng ê sî, in chiū chai góa sī Siōng Chú.”

30Siōng Chú kóng, “Jîn-chú ah, lí ê tông-pau tī siâⁿ-chhiûⁿ piⁿ, tī chhù mn̂g-kháu tâm-lūn lí. In hō͘-siōng kóng-lâi-kóng-khì, ‘Lâi, lán lâi thiaⁿ-khòaⁿ Siōng Chú ōe kóng sím-mi̍h!’

31In kui-tīn chòe-hé lâi, chhin-chhiūⁿ beh lâi chū-hōe, chē tī lí ê bīn-chêng, ká-ná sī góa ê chú-bîn. In thiaⁿ sī thiaⁿ, m̄-kú bô khì kiâⁿ. In ê chhùi lóng teh kiông-tiau thiàⁿ, m̄-kú in ê sim teh siūⁿ put-gī-chi-châi.

32Tī in ê sim-ba̍k tiong, lí put-kò sī siaⁿ-im súi, gâu chhiùⁿ chêng-koa, koh ōe-hiáu tôaⁿ-khîm ê koa-chhiú. Lí ê ōe, in chit-hī thiaⁿ, hit-hī chhut, lóng bô khì chòe.

33M̄-kú lí kóng ê ōe chin kín chiū ōe si̍t-hiān; lí ê ōe si̍t-hiān ê sî, in chiū chai, bat ū sian-ti tī in tiong-kan.”

← Chapter 32 Jump to: Chapter 34 →