Numbers 11

Chinese TTVR (現代台語譯本羅馬字版)

← Chapter 10 Jump to: Chapter 12 →

1Í-sek-lia̍t jîn-bîn hoat oàn-giân, in ê put-boán thoân kàu Siōng Chú hia; Siōng Chú thiaⁿ--tio̍h, chiū hoat tōa siū-khì. Siōng Chú kàng hé tī in tiong-kan, sio iâⁿ-tōe ê gōa-ûi.

2Jîn-bîn tùi Mô͘-se ai-kiû, Mô͘-se chiū kî-kiû Siōng Chú; hé chiū hoa.

3Hit-ê só͘-chāi chiū kiò-chòe Tha-pī-la, in-ūi Siōng Chú tī hia kàng hé sio in.

4In tiong-kan ê gōa-cho̍k-lâng siàu-siūⁿ beh chia̍h hó-mi̍h; Í-sek-lia̍t -lâng mā thî-khàu kóng, “Nā ū bah thang chia̍h m̄-chai jōa hó leh?

5Goán ōe-kì-tit tī Ai-ki̍p chia̍h hî bián chîⁿ, koh ū chhì-koe, si-koe, kú-chhài, chhang-thâu, soàn-thâu.

6Goán í-keng bô goân-khì lah, in-ūi má-ná í-gōa, goán lóng bô mi̍h-kiāⁿ thang chia̍h.”

7Má-ná chhin-chhiūⁿ iân-sui-chí, sek-tì chhin-chhiūⁿ chin-chu.

8Jîn-bîn sì-kòe khì khioh, ū-ê ēng chio̍h-thûi géng, ū-ê ēng cheng-khū cheng, ēng e-á chú, choh-chòe piáⁿ; chu-bī chhin-chhiūⁿ chhiau-iû ê piáⁿ.

9Mî--sî má-ná kap lō͘-chúi chòe-hé lo̍h tī iâⁿ-lāi.

10Mô͘-se thiaⁿ-tio̍h jîn-bîn ke-ke-hō͘-hō͘ tī pò͘-pîⁿ-kháu teh háu. Siōng Chú chin siū-khì, Mô͘-se mā bô hoaⁿ-hí.

11Mô͘-se tùi Siōng Chú kóng, “Lí sī-án-chóaⁿ pháiⁿ khoán-thāi lí ê po̍k-jîn? Góa sī-án-chóaⁿ bô tit-tio̍h lí ê un-tián, lí kèng-jiân chiong só͘-ū jîn-bîn ê tàⁿ hē tī góa ê keng-thâu téng?

12Chit-ê jîn-bîn kiám sī góa hoâi-īn--ê? Kiám sī góa siⁿ--ê? Lí kèng-jiân kiò góa tio̍h kā in phō tī heng-chêng, chhin-chhiūⁿ lāu-pē teh io-chhī chia̍h-lin ê eⁿ-á, kàu in chìn-ji̍p lí soan-sè beh siúⁿ-sù in chó͘-sian ê tōe?

13Góa beh khì tó-ūi the̍h bah lâi hō͘ só͘-ū ê jîn-bîn chia̍h? In-ūi in lóng khàu-lōa góa, kóng, ‘Hō͘ goán ū bah thang chia̍h!’

14Chit-ê jîn-bîn ê tàⁿ siuⁿ tāng, góa ka-kī tam-tng bōe khí.

15Lí nā án-ni tùi-thāi góa, góa nā tùi lí tit-tio̍h un-tián, kiû lí sûi-sî kā góa thâi-sí, hō͘ góa bián koh khòaⁿ-tio̍h ka-kī án-chóaⁿ siū-khó͘.”

16Siōng Chú tùi Mô͘-se kóng, “Lí tio̍h tiàu-chi̍p chhit-cha̍p ê tiúⁿ-ló, chiū-sī lí só͘ bat, chòe jîn-bîn ê tiúⁿ-ló kap koaⁿ-tiúⁿ--ê lâi, hō͘ in kap lí khiā tī hōe-bō͘ thâu-chêng.

17Góa beh kàng-lîm tī hia kap lí kóng-ōe, mā beh chiong kàng-lo̍h tī lí sin-chiūⁿ ê sîn pun hō͘ in; in chiū kap lí hun-tam koán-lí jîn-bîn ê tàⁿ, chiah bián lí ka-kī chi̍t ê tam-tng.

18Lí mā tio̍h kā jîn-bîn kóng, ‘Lín tio̍h ka-kī hun-pia̍t-choh-sèng, chún-pī bîn-á-chài chia̍h-bah, in-ūi Siōng Chú ū thiaⁿ-tio̍h lín thî-khàu, kóng: Hō͘ goán ū bah thang chia̍h! Goán tī Ai-ki̍p chin hó. Só͘-í Siōng Chú beh hō͘ lín ū bah thang chia̍h.

19Lín m̄-sī kan-ta chia̍h chi̍t ji̍t, nn̄g ji̍t, gō͘ ji̍t, cha̍p ji̍t, jī-cha̍p ji̍t;

20I beh hō͘ lín chia̍h kui kò-ge̍h, chia̍h kàu bah tùi lín ê phīⁿ-khang phùn--chhut-lâi, chia̍h kah ùi; in-ūi lín khì-sak tòa tī lín tiong-kan ê Siōng Chú, kā I khàu-lōa kóng: Goán ná tio̍h chhut Ai-ki̍p?’”

21Mô͘-se kóng, “Chiah-ê kap góa chòe-hé ê jîn-bîn, kan-ta kiâⁿ-lō͘ ê ta-po͘-lâng chiū ū la̍k-cha̍p-bān, lí kóng, ‘Góa beh hō͘ in kui kò-ge̍h lóng ū bah thang chia̍h.’

22Kiám ū kàu-gia̍h ê gû-kûn, iûⁿ-kûn thang thâi lâi hō͘ in chia̍h? Kā tōa-hái só͘-ū ê hî lóng lia̍h--lâi, kiám ū-kàu in chia̍h?”

23Siōng Chú tùi Mô͘-se kóng, “Lí sī khòaⁿ Siōng Chú ê khùi-la̍t bô-kàu sī--bô? Taⁿ lí beh khòaⁿ-tio̍h góa ê ōe si̍t-hiān.”

24Mô͘-se chhut--khì, chiong Siōng Chú ê ōe kā jîn-bîn kóng, koh tiàu-chi̍p jîn-bîn tiong-kan ê tiúⁿ-ló chhit-cha̍p lâng, hō͘ in khiā tī hōe-bō͘ ê sì-chiu-ûi.

25Siōng Chú tī hûn-tiong kàng-lîm, tùi Mô͘-se kóng-ōe, koh chiong kàng-lo̍h tī i sin-chiūⁿ ê sîn, pun hō͘ hit chhit-cha̍p ê tiúⁿ-ló. Siōng Chú ê sîn lîm-kàu in ê sî, in chiū chhin-chhiūⁿ sian-ti ji̍p-sîn kóng-ōe; í-āu chit-ê sū bô koh hoat-seng.

26Ū nn̄g ê tī miâ-toaⁿ lāi-bīn ê tiúⁿ-ló, I-lī-ta̍t kap Bí-ta̍t, iû-goân lâu tī iâⁿ-lāi. In bô khì hōe-bō͘ hia, m̄-kú Siōng Chú ê sîn mā lîm-kàu in, in chiū tī iâⁿ-lāi kóng sian-ti ê ōe.

27Ū chi̍t ê siàu-liân-lâng cháu-lâi kā Mô͘-se pò-kò, “ I-lī-ta̍t kap Bí-ta̍t tī iâⁿ-lāi ji̍p-sîn kóng-ōe.”

28Tùi siàu-liân chiū chòe Mô͘-se ê chō͘-chhiú, Lūn ê kiáⁿ Iok-su-a, kóng, “Chhiáⁿ góa ê chú Mô͘-se kā in kìm-chí.”

29Mô͘-se kā i kóng, “Lí ūi-tio̍h góa teh oàn-tò͘ in sī--bô? Khó͘-bōe-tit Siōng Chú chiong I ê sîn sù hō͘ I só͘-ū ê chú-bîn, hō͘ in lóng chòe sian-ti.”

30Āu-lâi, Mô͘-se kap Í-sek-lia̍t ê tiúⁿ-ló chiū tò-khì iâⁿ-lāi.

31Siōng Chú khí chi̍t chūn hong, tùi hái--ni̍h kā ian-chhun chhe-lâi tī iâⁿ-tōe chiu-ûi, sì-kho͘-lìn-tńg ū chi̍t ji̍t ê lō͘-thêng hiah khoah, lī tōe-bīn tāi-iok chi̍t kong-chhioh koân.

32Jîn-bîn kui-mî kui-ji̍t kap tē-jī ji̍t kui-ji̍t, lóng khí-lâi lia̍h ian-chhun; lia̍h siōng chió--ê mā ū cha̍p tui, lóng pâi tī iâⁿ-tōe sì-ûi.

33Bah iáu tī in ê chhùi-lāi teh pō͘, Siōng Chú chiū tùi in hoat siū-khì, kàng tōa un-e̍k phah in.

34Hit-ê só͘-chāi chiū kiò-chòe Ki-phok-lô Hap-tha-óa, in-ūi in tī hia bâi-chòng hiah-ê tham-io̍k ê lâng.

35Í-sek-lia̍t -lâng tùi Ki-phok-lô Hap-tha-óa khì kàu Hap-sé-lio̍k, chiū tòa tī hia.

← Chapter 10 Jump to: Chapter 12 →