Numbers 16 — Chinese TTVR (現代台語譯本羅馬字版)

1Lī-bī ê cheng-sun, Ko-hat ê sun, Í-su-hap ê kiáⁿ Khó-la, kap Lū-piān ê hō͘-tāi Í-lī-ap ê kiáⁿ Tāi-tan, A-pí-lân, kap Pí-le̍k ê kiáⁿ An,

2in khí-lâi hoán-khòng Mô͘-se, chhōa Í-sek-lia̍t -lâng tiong-kan nn̄g-pah gō͘-cha̍p ê ū bêng-bōng, siū hōe-chiòng soán-chhut ê léng-siù, chòe-hé khì chhē Mô͘-se.

3In liân-ha̍p kong-kek Mô͘-se kap A-lûn, kóng, “Lín siuⁿ kè-hūn lah! Choân-thé hōe-chiòng ta̍k-ê lâng lóng sī sèng, Siōng Chú mā tī in tiong-kan; lín sī-án-chóaⁿ chū-ko, khòaⁿ ka-kī pí Siōng Chú ê hōe-chiòng khah koân?”

4Mô͘-se thiaⁿ-tio̍h chit-ê ōe chiū phak tī thô͘-kha,

5tùi Khó-la kap in hit-tīn lâng kóng, “Bîn-á-chá-khí, Siōng Chú beh chí-sī sím-mi̍h-lâng sī sio̍k I ê, sím-mi̍h-lâng sī sèng, chiū ōe kiò hit-ê lâng chiū-kūn I; Siōng Chú beh hō͘ I kéng-soán ê lâng chhin-kūn I.

6Lín tio̍h án-ni chòe: Khó-la kap lín chit-tīn lâng, tio̍h the̍h hiuⁿ-lô͘ lâi;

7bîn-á-chài lín tio̍h tī Siōng Chú bīn-chêng, tī hiuⁿ-lô͘ lāi-bīn tóe hé, téng-bīn hē hiuⁿ. Siōng Chú kéng--tio̍h ê lâng, i chiah sī sèng. Lín chiah-ê Lī-bī ê kiáⁿ-sun chiah sī siuⁿ kè-hūn lah!”

8Mô͘-se koh tùi Khó-la kóng, “ Lī-bī ê kiáⁿ-sun, chù-ì thiaⁿ!

9Í-sek-lia̍t ê Siōng-tè kā lín tùi Í-sek-lia̍t ê hōe-chiòng hun-pia̍t--chhut-lâi, hō͘ lín chhin-kūn I, pān-lí Siōng Chú hōe-bō͘ ê sū, koh khiā tī hōe-chiòng bīn-chêng ho̍k-sāi, che kiám sī sió-khóa tāi-chì?

10Siōng-tè koh hō͘ lí, kap lí ê chhin-cho̍k Lī-bī ê kiáⁿ-sun chòe-hé chhin-kūn I, lín iáu beh iau-kiû chè-si ê chit-hūn sī--bô?

11Lí kap lín chit-tīn lâng liân-ha̍p, sī teh kong-kek Siōng Chú. A-lûn sī siáⁿ-lâng, lín kèng-jiân tùi i hoat oàn-giân?”

12Mô͘-se chhe lâng khì kiò Í-lī-ap ê kiáⁿ Tāi-tan kap A-pí-lân; in kóng, “Goán m̄ khì!

13Lí kā goán tùi lâu lin kap bi̍t ê Ai-ki̍p -tōe chhōa--chhut-lâi, hāi goán sí tī khòng-iá, koh beh ka-kī choh-ông koán-hat goán sī--bô?

14Lí m̄-nā bô chhōa goán khì kàu lí só͘ kóng lâu lin kap bi̍t ê tōe, bô hō͘ goán ū chhân-hn̂g kap phû-tô-hn̂g chòe ke-gia̍p, koh beh ó͘ chiah-ê lâng ê ba̍k-chiu sī--bô? Goán bô beh khì lí hia.”

15Mô͘-se chiū hui-siông siū-khì, tùi Siōng Chú kóng, “Kiû lí m̄-thang chiap-la̍p in ê chè-mi̍h. Góa m̄-bat khan-kè in chi̍t chiah lû, mā m̄-bat hāi-kè in chi̍t ê lâng.”

16Mô͘-se tùi Khó-la kóng, “Lí kap lín chit-tīn lâng, kap A-lûn, bîn-á-chài lóng tio̍h lâi khiā tī Siōng Chú ê bīn-chêng.

17Lín nn̄g-pah gō͘-cha̍p lâng ta̍k-ê tio̍h tòa hiuⁿ-lô͘, lāi-bīn tóe hiuⁿ, lâi kàu Siōng Chú ê bīn-chêng; lí kap A-lûn tio̍h ka-kī tòa hiuⁿ-lô͘ lâi.”

18In ta̍k-ê lâng chiū the̍h hiuⁿ-lô͘, lāi-bīn tóe hé, téng-bīn hē hiuⁿ; in kap Mô͘-se, A-lûn khiā tī hōe-bō͘ mn̂g-kháu.

19Khó-la chio-chi̍p choân-thé hōe-chiòng lâi hōe-bō͘ mn̂g-kháu, kong-kek Mô͘-se, A-lûn. Hit-sî, Siōng Chú ê êng-kng ǹg hōe-chiòng hián-hiān.

20Siōng Chú hoan-hù Mô͘-se kap A-lûn kóng,

21“Lín tio̍h lī chiah-ê hōe-chiòng khah hn̄g leh, góa beh tī chi̍t-ba̍k-nih-kú ê tiong-kan kā in siau-bia̍t.”

22Mô͘-se kap A-lûn chiū phak tī thô͘-kha, kóng, “Siōng-tè ah, siúⁿ-sù sìⁿ-miā hō͘ sè-kan-lâng ê Siōng-tè, chi̍t ê lâng hoān-chōe, lí chiū tùi choân hōe-chiòng hoat tōa siū-khì sī--bô?”

23Siōng Chú hoan-hù Mô͘-se khì kā hōe-chiòng kóng, “Lín tio̍h lī-khui Khó-la, Tāi-tan, A-pí-lân pò͘-pîⁿ ê sì-chiu-ûi.”

25Mô͘-se khì Tāi-tan, A-pí-lân hia, Í-sek-lia̍t ê tiúⁿ-ló mā tè i khì.

26I hoan-hù hōe-chiòng kóng, “Lín tio̍h lī-khui chiah-ê pháiⁿ-lâng ê pò͘-pîⁿ. In ê mi̍h-kiāⁿ lóng m̄-thang bong, chiah bián lín kap in chòe-hé siau-bia̍t.”

27Hōe-chiòng chiū lī-khui Khó-la, Tāi-tan, A-pí-lân pò͘-pîⁿ ê sì-chiu-ûi. Tāi-tan, A-pí-lân kap in ê bó͘, kiáⁿ-jî, in ê sòe-kiáⁿ, lóng chhut-lâi khiā tī in ka-kī ê pò͘-pîⁿ mn̂g-kháu.

28Mô͘-se kóng, “Sī Siōng Chú chhe góa chòe chiah-ê tāi-chì, só͘-í lín tio̍h chai, m̄-sī góa chiàu ka-kī ê ì-sù teh chòe.

29Chiah-ê lâng nā kap it-poaⁿ-lâng kâng-khoán chū-jiân sí, tú-tio̍h kap it-poaⁿ-lâng kâng-khoán ê cho-gū, chiū-sī Siōng Chú bô chhe góa.

30Siōng Chú nā chòe chi̍t hāng sin ê sū, hō͘ tōe khui-chhùi, chiong in kap hit-tīn lâng lóng thun--lo̍h-khì, hō͘ in oa̍h-oa̍h siak-lo̍h Im-kan, lín chiū chai chiah-ê lâng biáu-sī Siōng Chú.”

31Mô͘-se ōe tú-á kóng soah, Tāi-tan kap A-pí-lân ē-bīn ê tōe chiū li̍h--khui.

32Tōe li̍h--khui, chiong in kap in ê ka-koàn, í-ki̍p só͘-ū sio̍k Khó-la ê lâng, châi-bu̍t lóng thun--lo̍h-khì.

33Hiah-ê lâng kap só͘-ū sio̍k in--ê lóng oa̍h-oa̍h lo̍h Im-kan; tōe tī in ê téng-bīn koh ha̍p-óa, in chiū tùi hōe-chiòng tiong-kan siau-bia̍t.

34Tī in sì-chiu-ûi ê Í-sek-lia̍t -lâng thiaⁿ-tio̍h in âu-kiò, chiū lóng tô-cháu, kóng, “Lán mā ōe hō͘ tōe thun--lo̍h-khì!”

35Koh ū hé tùi Siōng Chú hia hoat-chhut, thun-bia̍t hit nn̄g-pah gō͘-cha̍p ê hiàn-hiuⁿ ê lâng.

36Siōng Chú bēng-lēng Mô͘-se

37hoan-hù chè-si A-lûn ê kiáⁿ Í-lī-a-sat, kā hiah-ê hiuⁿ-lô͘ tùi hé-tiong khioh--khí-lâi, koh kā hiah-ê teh to̍h ê hé-thòaⁿ the̍h-khì khah-hn̄g ê só͘-chāi iā hō͘ sòaⁿ; hiah-ê hiuⁿ-lô͘ í-keng sī sèng.

38Hiah-ê hiuⁿ-lô͘ í-keng hiàn hō͘ Siōng Chú, só͘-í sī sèng--ê. Lí tio̍h chiong hiah-ê hoān-chōe hāi ka-kī sìⁿ-miā ê lâng ê hiuⁿ-lô͘, tûi-chòe kui-phìⁿ, tah tī chè-tôaⁿ, thang chòe Í-sek-lia̍t -lâng ê kàm-kài.

39Chè-si Í-lī-a-sat chiū kā hiah-ê lâng só͘ hiàn tâng ê hiuⁿ-lô͘ the̍h--lâi, tûi-chòe kui-phìⁿ, kā chè-tôaⁿ pau--teh,

40hō͘ Í-sek-lia̍t -lâng chòe kàm-kài; chiah bián m̄-sī sio̍k A-lûn hō͘-tāi ê gōa-lâng tī Siōng Chú ê bīn-chêng sio-hiuⁿ, chhin-chhiūⁿ Khó-la kap in hit-tīn lâng siū siau-bia̍t; che sī chiàu Siōng Chú thong-kè Mô͘-se tùi Í-lī-a-sat ê bēng-lēng.

41Keh-ji̍t, Í-sek-lia̍t -lâng choân-thé hōe-chiòng lóng bâi-oàn Mô͘-se kap A-lûn, kóng, “Lín hāi-sí Siōng Chú ê chú-bîn.”

42Hōe-chiòng chū-chi̍p kong-kek Mô͘-se kap A-lûn ê sî, hut-jiân khòaⁿ-kìⁿ hōe-bō͘ ū hûn khàm--teh, Siōng Chú ê êng-kng hián-hiān.

43Mô͘-se kap A-lûn chiū lâi hōe-bō͘ thâu-chêng,

44Siōng Chú hoan-hù Mô͘-se, kóng,

45“Lín tio̍h lī-khui chit-ê hōe-chiòng, hō͘ góa thang tī chi̍t-ba̍k-nih-kú ê tiong-kan kā in siau-bia̍t.” In nn̄g ê lâng chiū phak tī thô͘-kha.

46Mô͘-se tùi A-lûn kóng, “Khì the̍h lí ê hiuⁿ-lô͘, chiong chè-tôaⁿ téng ê hé hē tī hit lāi-bīn, téng-bīn hē hiuⁿ, khah kín tòa-khì hōe-chiòng hia, kā in sio̍k-chōe; in-ūi Siōng Chú í-keng hoat tōa siū-khì, un-e̍k thòaⁿ-khui lah.”

47A-lûn chiàu Mô͘-se ê hoan-hù, the̍h hiuⁿ-lô͘ cháu ji̍p-khì hōe-chiòng tiong-kan. Ài ah! Un-e̍k í-keng tī jîn-bîn ê tiong-kan teh thòaⁿ lah. A-lûn chiū chiong hiuⁿ hē tī hé ê téng-bīn, kā jîn-bîn sio̍k-chōe.

48I khiā tī oa̍h-lâng kap sí-lâng ê tiong-kan, un-e̍k chiū thêng-chí.

49Tû-liáu in-ūi Khó-la ê sū-kiāⁿ sí--ê í-gōa, tú-tio̍h un-e̍k sí--ê kiōng chi̍t-bān sì-chheng chhit-pah lâng.

50Un-e̍k thêng-chí liáu-āu, A-lûn chiū tò-lâi hōe-bō͘ mn̂g-kháu Mô͘-se hia.