Numbers 22

Chinese TTVR (現代台語譯本羅馬字版)

← Chapter 21 Jump to: Chapter 23 →

1Í-sek-lia̍t -lâng koh chhut-hoat, tī Iok-tàn-hô tang-pêng, Iâ-lī-ko tùi-bīn ê Mô͘-ap pêng-goân chat-iâⁿ.

2Se-phoat ê kiáⁿ Pa-le̍k thiaⁿ-kìⁿ Í-sek-lia̍t -lâng tùi A-mô͘-lī -lâng só͘ chòe it-chhè ê sū.

3Mô͘-ap -lâng chai Í-sek-lia̍t -lâng chin chōe, chiū chin kiaⁿ, hui-siông tio̍h-kip.

4Mô͘-ap -lâng kā Bí-tiân ê tiúⁿ-ló kóng, “Taⁿ chit-tīn lâng beh chiong lán sì-chiu-ûi só͘-ū--ê chia̍h-liáu-liáu, chhin-chhiūⁿ gû chia̍h iá-tōe ê chháu kâng-khoán.” Hit-sî Se-phoat ê kiáⁿ Pa-le̍k chòe Mô͘-ap ê ông.

5I phài sù-chiá khì Iù-hoat-la-tí-hô ê Pí-toa̍t, Pí-ní ê kiáⁿ Pa-lân ê kò͘-hiong, iau-chhiáⁿ i lâi, kóng, “Ū chi̍t cho̍k ê lâng tùi Ai-ki̍p chhut--lâi; in lâng chōe kah khàm-móa tōe-bīn, hiān-chāi tòa tī góa ê tùi-bīn.

6In pí goán khah kiông, só͘-í chhiáⁿ lí lâi, thòe góa chiù-chó͘ hiah-ê lâng, góa chiah ū khó-lêng thâi-iâⁿ, kā in kóaⁿ-chhut chit-ê tōe. Góa chai, lí chiok-hok--ê, ōe tit-tio̍h chiok-hok; lí chiù-chó͘--ê, ōe siū chiù-chó͘.”

7Mô͘-ap ê tiúⁿ-ló kap Bí-tiân ê tiúⁿ-ló chiū tòa pok-kòa ê lé-kim chhut-hoat, khì Pa-lân hia, chiong Pa-le̍k ê ōe kā i kóng.

8Pa-lân tùi in kóng, “Ē-hng-àm lín tòa chia; góa ōe chiong Siōng Chú hoan-hù góa--ê kā lín hôe-ho̍k.” Mô͘-ap ê koaⁿ-oân chiū tòa tī Pa-lân hia.

9Siōng-tè lâi Pa-lân hia, mn̄g i kóng, “Lâi tòa lí chia--ê sī siáⁿ-lâng?”

10Pa-lân ìn Siōng-tè kóng, “Sī Se-phoat ê kiáⁿ Mô͘-ap -ông Pa-le̍k phài lâng lâi góa chia, kóng,

11‘Ū jîn-bîn tùi Ai-ki̍p chhut--lâi, lâng chōe kah khàm-móa tōe-bīn. Chhiáⁿ lí lâi, thòe góa kā in chiù-chó͘, góa chiah ū khó-lêng thâi-iâⁿ, kā in kóaⁿ--chhut-khì.’”

12Siōng-tè tùi Pa-lân kóng, “Lí m̄-thang kap in khì, mā m̄-thang kā chit-ê jîn-bîn chiù-chó͘, in-ūi in sī góa só͘ chiok-hok--ê.”

13Keh-chá-khí Pa-lân khí--lâi, tùi Pa-le̍k ê koaⁿ-oân kóng, “Lín tò--khì, in-ūi Siōng Chú m̄-chún góa kap lín chòe-hé khì.”

14Mô͘-ap ê koaⁿ-oân chiū chhut-hoat, tò-khì kā Pa-le̍k pò-kò, kóng, “ Pa-lân m̄-khéng kap goán lâi.”

15Pa-le̍k koh phài khah-chōe, khah-tōa ê koaⁿ-oân.

16In kàu Pa-lân hia, tùi i kóng, “ Se-phoat ê kiáⁿ Pa-le̍k án-ni kóng, ‘Chhiáⁿ lí it-tēng tio̍h lâi góa chia.

17Góa beh hō͘ lí kàu-gia̍h ê pò-siúⁿ; bô-lūn lí iau-kiû sím-mi̍h, góa lóng ōe hō͘ lí; só͘-í chhiáⁿ lí lâi, thòe góa kā chit-ê jîn-bîn chiù-chó͘.’”

18Pa-lân tùi Pa-le̍k ê koaⁿ-oân kóng, “ Pa-le̍k chiū-sī kui chhù-keng ê kim-gûn hō͘ góa, góa chi̍t-sut-á to m̄-káⁿ ûi-pōe Siōng Chú — góa ê Siōng-tè ê bēng-lēng.

19Chhiáⁿ lín ē-hng-àm koh hioh tiàm chia, thèng-hāu góa chai Siōng Chú beh koh kā góa kóng sím-mi̍h.”

20Hit-mî Siōng-tè lâi Pa-lân hia, kā i kóng, “Kì-jiân chiah-ê lâng koh lâi iau-chhiáⁿ lí, lí chiū kap in khì; m̄-kú góa kā lí kóng--ê, lí tio̍h chiàu án-ni chòe.”

21Pa-lân thàu-chá khí--lâi, chún-pī lû, kap Mô͘-ap ê koaⁿ-oân chòe-hé khì.

22Siōng-tè in-ūi Pa-lân kap Pa-le̍k ê koaⁿ-oân chòe-hé khì chiū siū-khì. Pa-lân khiâ-lû, ū nn̄g ê po̍k-jîn tè i; Siōng Chú ê sù-chiá lâi khiā tī lō͘--ni̍h, kā i chó͘-tòng.

23Lû khòaⁿ-kìⁿ Siōng Chú ê sù-chiá khiā tī lō͘--ni̍h, chhiú gia̍h pu̍ih--chhut-lâi ê to, chiū tùi lō͘--ni̍h siám ji̍p hn̂g; Pa-lân phah lû, beh hō͘ i tńg-lâi goân-lō͘.

24Siōng Chú ê sù-chiá lâi khiā tī phû-tô-hn̂g ê oe̍h-lō͘, siang-pêng lóng ū chhiûⁿ.

25Lû khòaⁿ-kìⁿ Siōng Chú ê sù-chiá, chiū siám óa chi̍t pêng chhiûⁿ, kā Pa-lân ê kha khoeh--tio̍h, Pa-lân chiū koh phah i.

26Siōng Chú ê sù-chiá kiâⁿ chìn-chêng, khiā tī khah-oe̍h ê só͘-chāi, siang-pêng bô lō͘ thang oat.

27Lû khòaⁿ-kìⁿ Siōng Chú ê sù-chiá, chiū phak tī Pa-lân ê ē-tóe; Pa-lân hoat siū-khì, ēng koáiⁿ-á phah lû.

28Siōng Chú khui lû ê chhùi, lû chiū tùi Pa-lân kóng, “Lí ná bô-tāi-bô-chì kā góa phah saⁿ piàn?”

29Pa-lân tùi lû kóng, “In-ūi lí chhòng-tī góa; góa hūn-bōe-tit ū to kā lí thâi--sí.”

30Lû tùi Pa-lân kóng, “Lí chêng siàu-liân chiū khiâ góa, góa kiám bat tùi lí án-ni chòe?” Pa-lân kóng, “M̄-bat.”

31Hit-sî Siōng Chú khui Pa-lân ê ba̍k-chiu, i chiū khòaⁿ-kìⁿ Siōng Chú ê sù-chiá khiā tī lō͘--ni̍h, chhiú gia̍h pu̍ih--chhut-lâi ê to; Pa-lân chiū àⁿ-thâu phak tī thô͘-kha.

32Siōng Chú ê sù-chiá tùi i kóng, “Lí sī-án-chóaⁿ saⁿ piàn phah lí ê lû? Góa lâi chó͘-tòng lí, in-ūi lí ê só͘-chòe ûi-pōe góa.

33Lû khòaⁿ-kìⁿ góa, chiū siám góa saⁿ piàn; i nā bô siám, góa chá chiū kā lí thâi--sí, hō͘ lû oa̍h--teh.”

34Pa-lân tùi Siōng Chú ê sù-chiá kóng, “Góa ū chōe lah. Góa m̄ chai lí khiā tī lō͘--ni̍h chó͘-tòng góa; lí nā bô ài góa khì, góa chiū tńg--khì.”

35Siōng Chú ê sù-chiá tùi Pa-lân kóng, “Lí kap in khì; m̄-kú lí kan-ta ōe-ēng-tit kóng góa ài lí kóng ê ōe.” Pa-lân chiū kap Pa-le̍k ê koaⁿ-oân chòe-hé khì.

36Pa-le̍k thiaⁿ-tio̍h Pa-lân lâi, chiū khì Mô͘-ap -siâⁿ gêng-chiap i; chit-ê siâⁿ sī tī pian-kài ê A-lūn hô-piⁿ.

37Pa-le̍k tùi Pa-lân kóng, “Góa chêng-piàn chiū jia̍t-chhiat iau-chhiáⁿ lí, lí sī-án-chóaⁿ bô lâi? Lí siūⁿ-kóng góa bōe hō͘ lí kàu-gia̍h ê pò-siúⁿ sī--bô?”

38Pa-lân ìn Pa-le̍k kóng, “Góa to í-keng lâi ah. M̄-kú góa bōe-tàng beh kóng sím-mi̍h chiū kóng sím-mi̍h. Góa kan-ta ōe-tàng kóng Siōng-tè kau-tài góa ê ōe.”

39Pa-le̍k chhōa Pa-lân khì Ô͘-só -siâⁿ.

40Pa-le̍k thâi gû iûⁿ hiàn-chè, chiong chè-bah sàng hō͘ Pa-lân í-ki̍p khì chiap i lâi ê koaⁿ-oân.

41Keh-chá-khí, Pa-le̍k chhōa Pa-lân khì Pa-boa̍t Pa-le̍k; Pa-lân tùi hia ōe-tàng khòaⁿ-tio̍h Í-sek-lia̍t jîn-bîn hun-sòaⁿ kàu tó-ūi.

← Chapter 21 Jump to: Chapter 23 →