Numbers 24

Chinese TTVR (現代台語譯本羅馬字版)

← Chapter 23 Jump to: Chapter 25 →

1Pa-lân chai Siōng Chú hoaⁿ-hí sù-hok hō͘ Í-sek-lia̍t, chiū bô chhin-chhiūⁿ téng nn̄g piàn khì khòaⁿ tiāu-thâu. Pa-lân bīn ǹg khòng-iá,

2khòaⁿ-tio̍h Í-sek-lia̍t -lâng chiàu chi-cho̍k chat-iâⁿ, Siōng-tè ê sîn lîm-kàu i.

3I chiū liām-si, kóng: Pí-ní ê kiáⁿ Pa-lân ê ū-giân, ba̍k-chiu khòaⁿ chheng-chhó ê lâng ê ū-giân;

4ū thiaⁿ-kìⁿ Siōng-tè ê ōe, khòaⁿ-kìⁿ Choân-lêng-chiá ê īⁿ-siōng, phak--teh, ba̍k-chiu kim-kim ê lâng ê ū-giân:

5Ngá-kok ah, lí ê pò͘-pîⁿ ná ōe hiah súi! Í-sek-lia̍t ah, lí ê tiùⁿ-bō͘ ná hiah hó-khòaⁿ!

6In chhin-chhiūⁿ sio-liân-sòa ê chang-chhiū, chhin-chhiūⁿ khoe-piⁿ ê hoe-hn̂g, chhin-chhiūⁿ Siōng Chú chai-chèng ê tîm-hiuⁿ-chhiū, chhin-chhiūⁿ chúi-piⁿ ê pek-hiuⁿ-chhiū.

7Chúi beh tùi in ê chúi-tháng móa-chhut; in ê chéng-chí beh iā tī chúi-goân chhiong-chiok ê thó͘-tōe. In ê ông beh pí Ko-kek khah úi-tāi; i ê kok beh heng-khí.

8Siōng-tè chhōa i chhut Ai-ki̍p; ūi-tio̍h i, I hoat-chhut chhin-chhiūⁿ iá-gû ê khùi-la̍t. I beh siau-bia̍t tùi-te̍k ê kok, kòng-tn̄g in ê kut-thâu, ēng chìⁿ siā-thàng in.

9I chhin-chhiūⁿ phak--teh ê sai-kang, chhin-chhiūⁿ tó--teh ê sai-bú, siáⁿ-lâng káⁿ jiá i? Chiok-hok lín--ê, goān in siū chiok-hok; chiù-chó͘ lín--ê, goān in siū chiù-chó͘.

10Pa-le̍k khì-phut-phut, kûn-thâu-bú tīⁿ-ân-ân tùi Pa-lân kóng, “Góa kiò lí lâi kā góa ê tùi-te̍k chiù-chó͘, lí kèng-jiân liân-sòa saⁿ piàn lóng kā in chiok-hok.

11Lí sûi-sî kā góa tńg--khì! Góa pún-lâi siūⁿ-beh hō͘ lí kàu-gia̍h ê pò-siúⁿ, m̄-kú Siōng Chú chó͘-tòng, hō͘ lí tit bōe tio̍h.”

12Pa-lân tùi Pa-le̍k kóng, “Góa kiám bô tùi lí phài-khì góa hia ê sù-chiá kóng,

13‘ Pa-le̍k chiū-sī kui chhù-keng ê kim-gûn hō͘ góa, góa mā m̄-káⁿ ûi-pōe Siōng Chú ê bēng-lēng, chiàu ka-kī ê ì-sù chòe tāi-chì. Siōng Chú ài góa kóng sím-mi̍h, góa chiū án-ni kóng.’”

14Pa-lân koh tùi Pa-le̍k kóng, “Taⁿ góa beh tńg-khì góa ê kò͘-hiong. Lâi, góa kā lí kóng, chiong-lâi Í-sek-lia̍t -lâng ōe án-chóaⁿ tùi-thāi lí ê jîn-bîn.”

15I chiū liām-si, kóng: Pí-ní ê kiáⁿ Pa-lân ê ū-giân, ba̍k-chiu khòaⁿ chheng-chhó ê lâng ê ū-giân;

16ū thiaⁿ-kìⁿ Siōng-tè ê ōe, tit-tio̍h Chì-koân-chiá ê tì-sek, khòaⁿ-kìⁿ Choân-lêng-chiá ê īⁿ-siōng, phak--teh, ba̍k-chiu kim-kim ê lâng ê ū-giân:

17Góa khòaⁿ--kìⁿ-ê, m̄-sī hiān-kim ê sū; góa koan-chhat--ê, sī chiong-lâi ê tāi-chì. Ū chi̍t lia̍p chhiⁿ tùi Ngá-kok chhut--lâi; ū chi̍t ê thóng-tī-chiá tùi Í-sek-lia̍t heng-khí. I ōe chhim-ji̍p Mô͘-ap ê pian-kài, ōe chiàm-léng Sài-te̍k ê léng-thó͘.

18I beh cheng-ho̍k tùi-te̍k Í-tong, hō͘ in chiâⁿ-chòe i ê sán-gia̍p. Í-sek-lia̍t ōe jú lâi jú kiông.

19Ū chi̍t ê thóng-tī-chiá ōe tùi Ngá-kok chhut--lâi; i beh châu-bia̍t siâⁿ-lāi só͘ chhun--ê.

20Pa-lân koh khòaⁿ-kìⁿ A-má-le̍k -lâng, chiū liām-si, kóng: A-má-le̍k sī lia̍t-kok ê thâu, m̄-kú i chòe-āu ōe bia̍t-bông.

21Pa-lân koh khòaⁿ-kìⁿ Ki-nî -lâng, chiū liām-si, kóng: Lín khiā-khí ê só͘-chāi kian-kò͘, lín choh-siū tī soaⁿ-giâm.

22M̄-kú Ki-nî ōe soe-bî, chòe-āu hō͘ A-su̍t lia̍h--khì.

23Pa-lân koh liām-si, kóng: Ài ah, Siōng-tè chòe chiah-ê tāi-chì, siáⁿ-lâng ōe-tàng oa̍h--lo̍h-khì?

24Ū chiàn-chûn tùi Ki-thê lâi, chhim-hoān A-su̍t, kong-kek Hi-pek; in mā ōe éng-oán bia̍t-bông.

25Pa-lân chiū khí-sin, tò-khì i ê kò͘-hiong; Pa-le̍k mā tńg--khì.

← Chapter 23 Jump to: Chapter 25 →